འདི་ག་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་དུ་ཁུངས་ལྡན་གྱི་གནས་ཚུལ་འབྱོར་བ་ལྟར་ན་བོད་ཁམས་ཕྱོགས་རྫ་ཆུ་ཁ་དབོན་པོ་སྡེ་པ་རུ་ཁ་སྔོན་ཕྱི་ཚེས་༢༢ ཀྱི་སྔ་དགོང་གཉིས་ཀར་རྒྱ་ནག་གི་དམག་མི་ཕོན་ཆེན་སླེབས་ནས་ཚེས་ ༢༣ དང་ ༢༤ བར་འདྲི་རྩད་བྱ་རྒྱུ་ཡིན་ཚུལ་བཤད་དེ་སྐྱ་སེར་མི་གྲངས་དྲུག་ཅུ་ཙམ་སྤྱི་ལེ་ ༧༠ ཡས་མས་ཀྱི་ས་ན་ཡོད་པའི་སེར་ཤུལ་རྫོང་ཐོག་ཏུ་འཇུ་བཟུང་བཀག་ཉར་བྱས་ཡོད་པ་རེད། ད་ལྟའི་ཆར་དབོན་པོ་ཡུལ་ཚོར་དམ་དྲག་ནན་མོ་བྱས་ཏེ་དམག་མིས་མི་ཚང་རེ་རེ་བཞིན་བསྔོག་བཤེར་བྱེད་བཞིན་ཡོད་པ་དང་ཁ་སང་ཚེས་༢༥ཉིན་རྒྱལ་ཁབ་ཀྱི་ཁྲིམས་ངོ་སྤྲོད་བྱེད་ཀྱི་ཡིན་ཟེར་ནས་དམངས་ཚོགས་འདུ་སྐོང་བྱས་ཏེ་༧གོང་ས་མཆོག་གི་སྐུ་པར་སྒྲིག་གཤོམ་མི་ཆོག་པ་དང་ཕྱི་ཕྱོགས་སུ་འབྲེལ་བ་བྱེད་མི་ཆོག་སོགས་ནན་བརྗོད་བྱས་ཡོད་པ་རེད།

Continue Reading

ཉེ་ལམ་རྒྱ་ནག་གི་རྒྱལ་ས་པེ་ཅིང་དུ་ཀྲུང་གོ་གུང་ཁྲན་ཏང་གི་ཀྲུང་དབྱང་ཨུ་ཡོན་ལྷན་ཁང་དྲིལ་བསྒྲགས་པུའུ་ཡིས་གཙོ་བྱས་ནས་མི་དམངས་ཁྲིམས་ཁང་ཆེན་མོ་དང་གཞུང་གི་དོ་དམ་འོག་ཡོད་པའི་རྒྱལ་ཡོངས་གསར་འགོད་ལྷན་ཚོགས། ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་ཆེས་མཐོའི་མི་དམངས་ཞིབ་དཔྱོད་ཁང་།  ཀྲུང་གོའི་དྲྭ་རྒྱའི་དོ་དམ་ལྷན་ཁང་། བཟོ་ལས་དང་བརྡ་འཕྲིན་དོ་དམ་ལྷན་ཁང་། སྤྱི་ཚོགས་བདེ་འཇགས་ལྷན་ཁང་། ཁྲོམ་རའི་དོ་དམ་ལྷན་ཁང་། ཁྲལ་བསྡུ་ལས་ཁུངས། རྒྱལ་ཡོངས་རླུང་འཔྲིན་དང་། གློག་བརྙན་དོ་དམ་ལྷན་ཁང་བཅས་མཐོ་རིམ་ལྷན་ཁང་ཁག་བཅུ་མཉམ་བསྡུས་ཀྱིས་ཚོགས་ཆེན་ཚོགས་ཏེ་“གསར་འགྱུར་རྫུན་མ་དང་ཁྲིམས་འགལ་གྱི་དྲྭ་ལམ་བྱ་སྤྱོད་རིགས”ལ་རྡུང་རྡེག་ཚ་གནོན་གྱི་ལས་འགུལ་འགོ་འཛུགས་ཞུ་རྒྱུ་ཡིན་པ་གསལ་བསྒྲགས་བྱས།

Continue Reading

འདི་ག་བོད་ཀྱི་འགྲོ་བ་མིའི་ཐོབ་ཐང་དང་མང་གཙོའི་འཕེལ་རྒྱས་ལྟེ་གནས་ཁང་དུ་ཁུངས་ལྡན་གྱི་གནས་ཚུལ་འབྱོར་བ་ལྟར་ན། སྤྱི་ཟླ་ ༠༧ ཚེས་ ༢༠ ཡས་མས་ཤིག་ལ། དགུང་ལོ་ ༤༥ ལ་སོན་པའི་རྔ་བ་སྤྲོ་ཚིགས་དགོན་པའི་དགེ་སྐོས་དཀོན་མེ་ལགས་རྒྱ་གཞུང་ཉེན་རྟོག་པས་འཇུ་བཟུང་བཀག་ཉར་བྱས་ནས་བདུན་ཕྲག་གཉིས་ཙམ་ཕྱིན་ཀྱང་ད་དུང་ཁོང་ཉིད་གང་དུ་བཀག་ཉར་བྱས་མིན་དང་ཅིའི་ཕྱིར་དུ་འཇུ་བཟུང་བྱས་མིན་སོགས་གནས་ཚུལ་གང་ཡང་ཤེས་རྟོགས་བྱུང་མི་འདུག  གྲྭ་དཀོན་མེ་ལགས་ནི་སྤྲོ་ཚིགས་སྡེ་པ་ནས་ཡིན་ཞིང་སྐུ་ན་ཆུང་དུས་ནས་དགོན་པར་ཚོགས་ཞུགས་གནང་ཡོད་པ་རེད། 

Continue Reading

ད་ལོ་དགུང་གྲངས་ ༣༢ ལ་སོན་པའི་རྔ་བ་ཀིརྟི་དགོན་པའི་གྲྭ་བློ་བཟང་བསྟན་འཛིན་ལགས་དང་ཕྱག་རོགས་གྲྭ་བཙུན་གཞན་གཉིས་ཀྱིས་ཕྱི་ལོ་༢༠༡༡ ལོའི་ཟླ་ ༠༣ ཚེས་ ༡༦ ཉིན་རང་ལུས་མེར་སྲེག་གནང་མཁན་རྒྱལ་གཅེས་དཔའ་བོ་བློ་བཟང་ཕུན་ཚོགས་ལགས་སྲུང་སྐྱོབ་བྱས་པར་བརྟེན་རྒྱ་གཞུང་གིས་“བསམ་བཞིན་དུ་མི་བསད་པའི་”ཉེས་མིང་བཏགས་ཏེ་ལོ་དེའི་ཟླ་བ་ ༠༣ ཚེས་ ༢༣ ཉིན་འཛིན་བཟུང་བྱས་ཤིང་ཟླ་ ༠༨ ཚེས་༢༨ ཉིན་རྔ་བ་ཁུལ་འབར་ཁམས་འབྲིང་རིམ་མི་དམངས་ཁྲིམས་ཁང་གིས་བློ་བཟང་བསྟན་འཛིན་ལགས་ལ་ལོ་བཅུ་གསུམ་གྱི་བཙོན་འཇུག་ཁྲིམས་ཆད་བཏང་།  འོན་ཀྱང་ཁོང་ཉིད་བཙོན་འཇུག་དུས་ཡུན་ལོ་བཅུ་ཟིན་མཚམས་སུ་ཉེ་ཆར་དངོས་སུ་གློད་གྲོལ་བཏང་ནས་ཕྱིར་ཕ་ཡུལ་གཅའ་གྲོང་རྡལ་ཕྱུགས་ལས་འགབ་མར་འབྱོར་ཟིན་ཡོད་པ་རེད།   ཁོང་གིས་དེ་སྔ་རྒྱ་ནག་གཞུང་གི་ཉེས་འཛུགས་ལ་ངོས་ལེན་གནང་མེད་ཀྱང་ཁོང་ཉིད་ལ་ཁྲིམས་རྩོད་པ་གླ་རྒྱུ་དང་དྲང་བདེན་གྱི་ཁྲིམས་བཤེར་བྱ་རྒྱུའི་གོ་སྐབས་སྤྲད་མེད་པ་རེད།  

Continue Reading

རྒྱ་མཚོ་དྭ་ཕྲུག་སློབ་གྲྭ་དབུ་འཛུགས་གནང་མཁན་སྤྱི་ཕན་ཞབས་ཞུ་བ་སྤྲུལ་སྐུ་བང་རི་རིན་པོ་ཆེ་མཆོག་ལྷ་སའི་ཉེ་འགྲམ་ཆུ་ཤུར་བཙོན་ཁང་དུ་རྒྱ་གཞུང་གིས་ལོ་བཅོ་བརྒྱད་ཀྱི་དུས་བཀག་(ཁྱོན་ལོ་ཉི་ཤུ་རྩ་གཉིས)བཙོན་འཇུག་བྱས་མཐར་འདི་ལོའི་ཕྱི་ཟླ་ ༧ ཚེས་ ༣༡ ཉིན་བཙོན་འཇུག་གི་ལོ་ཁ་གང་ནས་གློད་གྲོལ་གཏོང་རྒྱུའི་དུས་ལ་བབས་ཡོད།

Continue Reading

བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་ངོས་ནས་ཟི་ཁྲོན་ཞིང་ཆེན་ཁྱབ་ཁོངས་ཁྲིན་ཏུའུ་གྲོང་ཁྱེར་གྱི་གསང་བའི་གནས་ཤིག་ཏུ་རྣམ་དཔྱོད་ལྡན་པའི་བོད་ཀྱི་རྩོམ་པ་པོ་གྲགས་ཅན་སྐུ་ཞབས་ལྷ་ལྡན་ལགས་རྒྱ་གཞུང་གིས་ལོ་གཉིས་རིང་ནས་གང་བྱུང་བཀག་ཉར་བྱས་དང་བྱེད་བཞིན་པར་ཁོང་གང་མྱུར་ཆ་རྐྱེན་ཅི་ཡང་མེད་པའི་ཐོག་ནས་གློད་གྲོལ་གཏོང་དགོས་པའི་རེ་འདུན་འདོན་གྱི་ཡོད།

Continue Reading

བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གི་ངོས་ནས། ཨ་རིའི་གྲོས་ཚོགས་གོང་འོག་གཉིས་ནས་རྒྱ་གཞུང་གིས་ “མི་རིགས་རྩ་མེད་བཟོ་ཐབས་དང་ཨོ་རྩལ་འགྲན་ཚོགས་” འཚོགས་འཆར་ཐོག་ཉན་ཞིབ་གནང་སྐབས། གྲོས་ཚོགས་འོག་མའི་ཚོགས་གཙོ་ལྕམ་ནན་སེ་པོལ་སི་༼འགྲོ་བ་མིའི་ཐོབ་ཐང་དོན་གཉེར་གནང་མཁན་༽མཆོག་གིས། རྒྱ་ནག་ནང་ལོགས་ཀྱི་འགྲོ་བ་མིའི་ཐོབ་ཐང་གི་གནད་དོན་གཞིར་བྱས་རྒྱ་སྤྱིའི་འགོ་ཁྲིད་རྣམ་པས་རྒྱ་ནང་དུ་ཕྱི་ལོ་༢༠༢༢ ལོའི་པེ་ཅིན་ “ཨོ་རྩལ་འགྲན་ཚོགས་” འཚོགས་འཆར་ལ་འགོག་རྒོལ་གྱི་འབོད་སྐུལ་གནང་བ་དེ་ལ་ཡི་རངས་ཞུ་ཡི་ཡོད།འདི་ལྟེ་གནས་ཁང་གིས། ཕྱི་ཟླ་༥ བའི་ཚེས་༡༨ ཉིན་རིའི་གྲོས་ཚོགས་ཀྱི་ཊོམ་ལེན་ཊོ་སི་འགྲོ་བ་མིའི་ཐོབ་ཐང་རྟོགས་ཞིབ་ཚན་པ་(TLHRC)དང་ཨ་རིའི་རྒྱལ་ཡོངས་གྲོས་ཚོགས་ཀྱི་རྒྱ་ནག་ཞིབ་འཇུག་ཚན་པ་(CECC)གཉིས་ཀྱི་གོ་སྒྲིག་འོག སྤྱི་མཐུན་ཚོགས་པའི་འཐུས་མི་སྐུ་ཞབས་སི་མེ་ཐི་(Chris Smith)མཆོག་དང་སྐུ་ཞབས་ཇིམ་མག་གྷོ་ཝན་(Jim McGovern)མཆོག གྲོས་ཚོགས་གོང་མའི་འཐུས་མི་སྐུ་ཞབས་མར་ཁི་ལེ་(Jeffrey A. Merkley)བཅས་ཀྱིས་ཚན་པ་གཉིས་ཀྱི་སྐུ་ཚབ་གནང་ནས་དུས་ཐོག་ཉན་ཞིབ་སྐབས་སུ་གལ་ཆེའི་འབོད་སྐུལ་གནང་བ་དེ་ལའང་བསྔགས་བརྗོད་ཞུ་ཡི་ཡོད།ཕྱི་ལོ་༢༠༠༨ ལོར་པེ་ཅིན་ཨོ་རྩལ་འགྲན་ཚོགས་ཚོགས་སྐབས་ནས་བཟུང་རྒྱ་ནག་གཞུང་གིས་བོད་མིའི་ཞི་རྒོལ་ལ་དྲག་གནོན་བྱས་པ་དང་། བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་ཇེ་ཞན་ཇེ་སྡུག་ཏུ་ཕྱིན་པར་བརྟེན་ནས། བོད་མི་༡༥༦ གིས་བསྟུད་མར་རང་སྲེག་ཞི་རྒོལ་གནང་བ་རེད།ཕྱི་ལོ་༢༠༠༨ ཟླ་༣ པའི་ཟླ་འགོ་ནས་བཟུང་བོད་མིའི་ཞི་རྒོལ་ལས་འགུལ་བྱུང་བ་དང་། དེ་ཡང་ཐོག་མར་ལྷ་ས་དང་དེའི་རྗེས་བོད་ས་ཡོངས་སུ་བྱུང་བ་བརྒྱུད་ནས། རྒྱལ་སྤྱིའི་སྟེང་བོད་ནང་གི་འཇིགས་རུང་ཉམ་ང་བའི་གནས་སྟངས་ཤེས་རྟོགས་བྱུང་བ་རེད། སྐབས་དེའི་ཞི་རྒོལ་ལ་གདུག་རྩུབ་ཀྱི་དྲག་གནོན་བྱས་ཏེ། ཕྱི་ལོ་༢༠༠༨ ཟླ་༩ བར་་ཉུང་མཐར་ཡང་ཤེས་གསལ་བོད་མི་༡༠༠ དམར་གསོད་དང་བོད་མི་༦༠༠༠ གང་བྱུང་བཀག་ཉར་བྱས་པ་འདི་ག་ལྟེ་གནས་ཁང་གི་སྙན་ཐོའི་ནང་གསལ་ཡོད།བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་ཐད་ཀྱི་འདི་ག་ལྟེ་གནས་ཁང་གི་ལོ་འཁོར་སྙན་ཐོ་རིམ་པ་ཁག་གི་ནང་དུ། རྒྱ་ནག་གཞུང་གིས་བོད་མིའི་འགྲོ་བ་མིའི་ཐོབ་ཐང་རྡོག་རོལ་དང་ཆབ་སྲིད་ཀྱི་དྲག་གནོན་བྱས་པ་དེ་ནི་…

Continue Reading

ཕྱི་ལོ་༢༠༢༡ ཟླ་༥ བའི་ཚེས་༡༧ ནི་རྒྱ་ནག་གི་རྒྱལ་ཁབ་བདེ་འཇགས་ཚན་པས་ཀུན་གཟིགས་༸པཎ་ཆེན་སྐུ་ཕྲེང་བཅུ་གཅིག་པ་དགེ་འདུན་ཆོས་ཀྱི་ཉི་མ་མཆོག་བཙན་དབང་གིས་གར་སོང་ཆ་མེད་བཟོས་ནས་མི་ལོ་༢༦ འདས་པའི་རྗེས་དྲན་ཉིན་མོ་ཡིན། ཕྱི་ལོ་༡༩༩༥ ལོར་རྒྱ་གཞུང་གིས་སྐབས་དེར་དགུང་ལོ་༦ ལ་ཕེབས་པའི་༸པཎ་ཆེན་རིན་པོ་ཆེ་བཙན་འཁྲིད་བྱས་པ་རེད། དེ་ནི་རྒྱ་ནག་གཞུང་གིས་བྱིས་པའི་ཐོབ་ཐང་ཐད་ཀྱི་རྒྱལ་སྤྱིའི་སྤྱི་ཆིང་ལ་ལག་བསྟར་ཆོག་མཆན་གྱི་མིང་རྟགས་བཀོད་ནས་ལོ་གསུམ་གྱི་རྗེས་སུ་འཁེལ་ཡོད་པ་དང་། ཆིངས་གནས་རྒྱལ་ཁབ་ཅིག་གི་ངོས་ནས་རྒྱ་གཞུང་གིས་སྤྱི་ཆིངས་ནང་གསལ་གྱི་འགན་འཁྲི་ཁག་རྩིས་མེད་རྡོག་རོལ་ཚབས་ཆེན་བཏང་ཡོད།

Continue Reading

ཕྱི་ལོ་ ༢༠༢༠ ལོའི་ཟླ་ ༡༡ པའི་ཚེས་ ༡༢ ཉིན་མདོ་སྨད་ཁྲི་ཀ་རྫོང་ནས་ཡིན་པའི་ཚེ་རིང་མཚོ་ལགས་ཀྱིས་དྲྭ་ལམ་དུ་རྒྱལ་ཁབ་བདེ་འཇགས་དང་འབྲེལ་བའི་གནས་ཚུལ་སྤེལ་བར་བསྙད་དེ་རྒྱ་གཞུང་ཉེན་རྟོག་པས་ཁོ་མོ་ཟི་ལིང་གྲོང་ཁྱེར་ནས་འཇུ་བཟུང་བྱས་རྗེས་ཁྲི་ཀ་རྫོང་བཀག་ཉར་ཁང་དུ་ཉིན་གྲངས་ ༡༠ རིང་བཅུག  བཀག་ཉར་ཁང་དུ་བཅུག་པའི་རིང་ཉིན་ལྟར་ཟས་སུ་ཆུ་རྐྱང་དང་རླངས་བཙོས་བག་ལེབ་ཙམ་ལས་མ་སྤྲད་པར་ལྟོགས་སྐོམ་གྱི་མནར་གཅོད་བཏང་ཡོད་པ་མ་ཟད། ཉེན་རྟོག་པས་རྟག་ཏུ་ཁོང་མོ་དང་ལོ་ན་ ༨༠ སོན་པའི་ཁོང་མོའི་ཕ་རྒན་སོགས་ཁྱིམ་མི་ཡོངས་ལ་འཇིགས་སྐུལ་ཡང་ཡང་བྱས་པའི་གནས་ཚུལ་བྱུང་ཡོད། 

རྒྱ་གཞུང་ཉེན་རྟོག་པས་ཁྲིམས་འགལ་ཐོག་ཚེ་རིང་མཚོ་ལགས་འཇུ་བཟུང་བཀག་ཉར་བྱས་པར་དེར་ཁོ་རང་གི་འདི་ལྟར་གསུངས་འདུག “ཐེངས་འདིར་རྒྱུ་མཚན་གསལ་ཁ་གང་ཡང་མེད་པའི་ཐོག་ནས་ང་འཛིན་བཟུང་བྱས་པ་རེད། ཁོང་ཚོས་རྒྱུན་དུ་ང་འཛིན་བཟུང་བྱེད་འདོད་ཡོད་ནའང་ཁག་འགེལ་ས་ཞིག་རྙེད་གི་མེད་པ་རེད། ད་ཐེངས་ང་ཐའེ་ལན་ཌི་ནས་ཕྱིར་འབྱོར་བ་ནས་བཟུང་ཁོང་ཚོས་འཛིན་བཟུང་བྱེད་རྩིས་ཡོད་པའི་ཚོར་སྣང་ཞིག་བྱུང་། ང་གཱང་ཌའོ་(Guangzhou) ལ་ནད་ཡམས་དང་འབྲེལ་ནས་ཟུར་བཀག་བྱེད་སྐབས་ནས་ཁོང་ཚོས་ང་འཛིན་བཟུང་བྱེད་ཐབས་བྱས་ཡོད་སྲིད་པ་ཞིག་རེད། མཐའ་མར་ཕྱི་ཟླ་ ༡༠ ཚེས་ ༢ ཉིན་ངས་སྐད་འཕྲིན་ནང་གནས་ཚུལ་གཉིས་བཀོད་པ་ལ་བརྟེན་ནས། རྒྱལ་ཁབ་བདེ་འཇགས་ལ་ཁ་གཡར་ཏེ་ཉིན་གྲངས་ ༡༠ རིང་བཀག་ཉར་བྱས་པ་རེད། དོན་དངོས་སུ་དོན་ཚན་གང་ཞིག་རྒྱལ་ཁབ་བདེ་འཇགས་དང་འགལ་ཡོད་པ་ཤེས་ཀྱི་མི་འདུག་”ཅེས་འགྲེལ་བརྗོད་བྱས་ཡོད་པ་རེད།

Continue Reading

to top