གསར་འགྱུར།

ད་ལྟ་རང་ལོ་ ༢༤  ལ་ཕེབས་པའི་༸པཎ་ཆེན་རིན་པོ་ཆེ་དགེ་འདུན་ཆོས་ཀྱི་ཉི་མ་མཆོག་བཙན་ཁྲིད་ཀྱིས་མུ་མཐུད་གར་སོང་ཆ་མེད་གྱུར་ཡོད་པའི་གནས་སྟངས་དེ་རྒྱ་གཞུང་གིས་མཚམས་འཇོག་བྱས་ཏེ།  བོད་མིའི་ཆོས་ཀྱི་དབུ་ཁྲིད་ཁོང་འཕྲལ་དུ་ཀློད་གྲོལ་གཏོང་དགོས།

དེ་རིང་ནི་༸པཎ་ཆེན་རིན་པོ་ཆེ་སྐུ་ཕྲེང་བཅུ་པ་མཆོག་གི་ཡང་སྲིད་༸པཎ་ཆེན་དགེ་འདུན་ཆོས་ཀྱི་ཉི་མ་མཆོག་རང་ལོ་ ༢༤ ཕེབས་པའི་སྐུའི་འཁྲུངས་སྐར་ཉིན་མོ་ཡིན་ལ།  ༸པཎ་ཆེན་རིན་པོ་ཆེ་སྐུ་ཕྲེང་བཅུ་གཅིག་པ་དགེ་འདུན་ཆོས་ཀྱི་ཉི་མ་མཆོག་དང་།  ཁོང་གི་ཡབ་ཡུམ་ནང་མི་དང་བཅས་པ་གར་སོང་ཆ་མེད་དུ་གྱུར་ནས་མི་ལོ་ ༡༨ འགྲོ་བཞིན་ཡོད།

ལོ་སྔོན་མའི་ཕྱི་ཟླ་ ༡༡ ཚེས་ ༢༦ ཉིན་བོད་མདོ་སྨད་མཚོ་ལྷོ་ཁུལ་གྱི་སྲིད་འཛིན་ལྟེ་གནས་ས་ཁུལ་ཆབ་ཆ་གྲོང་རྡལ་དུ།  ཁུལ་ལས་རིགས་ལག་རྩལ་སློབ་གྲྭའི་སློབ་ཕྲུག་སྟོང་ཕྲག་བརྒལ་བས་འཕྲེད་དར་འཕྱར་ཏེ་སྐད་འབོད་ཁྲོམ་སྐོར་བྱས་ཏེ་རྒྱ་གཞུང་གི་སྲིད་བྱུས་ལ་ངོ་རྒོལ་གནང་བའི་རྗེས།  རྒྱ་གཞུང་ཉེན་རྟོག་པས་སྔ་ཕྱིར་སློབ་ཕྲུག་མང་པོ་བཙན་ཁྲིད་ཀྱིས་གཅར་རྡུང་འདྲི་གཅོད་དང་འཇུ་བཟུང་བཀག་བསྐྱིལ་བྱས་ཡོད་པ་ལྟར།  ཟླ་འདིའི་ཕྱི་ཚེས་ ༡༠ ཉིན་སློབ་ཕྲུག་བརྒྱད་ལ་དུས་བཀག་བཙོན་འཇུག་གི་ཁྲིམས་ཆད་བཅད་ཡོད་འདུག

ཕྱི་ཟླ་ ༤ ཚེས་ ༡༧ ཉིན་ཀྲུང་གོའི་བོད་ཀྱི་དྲ་བ་ཟེར་བས་གནས་ཚུལ་སྤེལ་ཏེ།   ཕྱི་ཟླ་ ༤ ཚེས་ ༡༠ ཉིན་གྱི་སྔ་དྲོའི་ཆུ་ཚོད་ ༡༠ སྟེང་། མཚོ་སྔོན་ཞིང་ཆེན་མཚོ་ལྷོ་བོད་རིགས་རང་སྐྱོང་ཁུལ་གུང་ཧོ་རྫོང་མི་དམངས་ཁྲིམས་ཁང་གིས། “༡༡་༢༦”མཚོ་ལྷོ་ཁུལ་ལས་རིགས་ལག་རྩལ་སློབ་གྲྭའི་སློབ་ཕྲུག་གི་ངོ་རྒོལ་ཁྲོམ་སྐོར་གྱི་གྱོད་དོན་ལ་འདྲི་གཅོད་བྱས་ཏེ།  མཚོ་ལྷོ་ཁུལ་ལས་རིགས་ལག་རྩལ་སློབ་གྲྭའི་སློབ་ཕྲུག་སངས་རྒྱས་འབུལ་ལ་ལོ་ ༤ དུས་བཀག་བཙོན་འཇུག་དང་། ཀུན་བཟང་འབུམ་དང་ལྷ་བརྟན། བྱམས་པ་ཚེ་རིང་གསུམ་ལ་ལོ་ ༢ དང་ཟླ་ ༦ རེའི་དུས་བཀག་བཙོན་འཇུག  དབང་རྒྱལ་ཚེ་རིང་དང་ཆོས་སྐྱོང་སྐྱབས་གཉིས་ལ་ལོ་ ༣ དང་ཟླ་ ༣ རེའི་དུས་བཀག་བཙོན་འཇུག་བཅས་ཀྱི་ཁྲིམས་ཆད་བཅད་ཡོད་པ་བསྒྲགས་འདུག

༢༠༡༣ ལོའི་ཕྱི་ཟླ་ ༤ ཚེས་ ༡༦ ཉིན་མདོ་སྨད་འཛམ་ཐང་ཇོ་ནང་དགོན་པའི་ཉེ་འཁྲིས་ནས། རང་ལོ་ ༢༠ ཡིན་པའི་བོད་རིགས་བུད་མེད་ཕྱུག་མཚོ་ཞུ་བ་ཞིག་གིས་རང་ལུས་མེར་བསྲེགས་བཏང་སྟེ།  རྒྱ་གཞུང་གིས་བོད་ཐོག་འཛིན་པའི་དྲག་གནོན་དབང་སྒྱུར་གྱི་མི་སེར་སྤེལ་བའི་སྲིད་ཇུས་ལ་ངོ་རྒོལ་གྱིས་འདས་གྲོངས་སུ་ཕྱིན་ཡོད་པ་དང་། རྒྱ་གཞུང་གིས་འཕྲལ་དུ་སྐུ་ཕུང་མེར་བསྲེག་གཏོང་དགོས་པའི་འཇིགས་སྐུལ་བཙན་དྲག་བྱས་པར་བརྟེན།  ཉིན་དེའི་མཚན་མོ་དེ་རང་ལ་སྐུ་ཕུང་ཞུགས་འབུལ་བྱེད་དགོས་བྱུང་ཡོད་འདུག

ཕྱི་ལོ་ ༢༠༠༨ ཟླ་ ༣ ཚེས་ ༡༠ ཉིན་སེར་ར་དགོན་པའི་དགེ་འདུན་པ་བཅོ་ལྔས་ལྷ་སར་ཞི་བའི་ངོ་རྒོལ་བྱས་རྗེས་འཇུ་བཟུང་འོག་ཚུད་པའི་ཁྲོད་ནས། དགེ་འདུན་པ་གཉིས་ཉེ་ཆར་གློད་ཀྲོལ་ཐོབ་ཡོད་ཀྱང་གཅིག་རིག་འཚོ་མ་ཟིན་པ་ཆགས་ཡོད་པ་རེད།

དེ་ཡང་།  ཕྱི་ལོ་ ༢༠༠༨ ཟླ་ ༣ ཚེས་ ༡༠ ཉིན་གྱི་ཞོགས་པ་ཆུ་ཚོད་ ༨ ཙམ་ལ་སྐུ་ཞབས་བློ་གྲོས་ལགས་ལྷ་སའི་གཙུག་ལག་ཁང་གི་མདུན་ཐང་དུ་ཡོང་སྟེ། བོད་ཀྱི་རྒྱལ་དར་ནམ་མཁར་འཕྱར་ཏེ་སྐད་འབོད་བྱ་རྩིས་བྱེད་སྐབས། ས་གནས་ཉེན་རྟོག་པས་འཇུ་བཟུང་བྱས་ཡོད་པ་དང་། དེ་ཉིན་ཕྱི་དྲོ་ཆུ་ཚོད་གསུམ་དང་ཕྱེད་ཀ་ཙམ་ལ་འབྲས་སྤུངས་དགོན་པའི་དགེ་འདུན་པས་དགོན་པ་ནས་ལྷ་སར་བར་ཞི་རྒོལ་ཡོང་བའི་ལམ་བར་ཉེན་རྟོག་པས་བཀག་འགོག་གིས་འཇུ་བཟུང་བྱས་ཡོད། དེ་རྗེས་ཕྱི་དྲོ་ཕྱག་ཚོད་ལྔ་པ་ཙམ་ལ་སེར་ར་དགོན་པར་སློབ་གཉེར་གནང་བཞིན་པའི་ཁམས་དང་ཨ་མདོ་ཁུལ་ནས་ཡིན་པའི་དགེ་འདུན་པ་བཅོ་ལྔས་ལྷ་སའི་བར་སྐོར་ནང་བོད་ཀྱི་རྒྱལ་དར་བསྒྲེངས་ནས།  བོད་རང་བཙན་ཡིན་ཞེས་བརྗོད་ནས་ཞི་བའི་རྔམ་སྟོན་ཁྲོམ་སྐོར་བྱས་རྗེས། ས་གནས་སྤྱི་བདེ་ཉེན་རྟོག་པས་ཁོང་རྣམས་འཇུ་བཟུང་གིས་ཉེས་རྡུང་ཚད་མེད་བཏང་བ་དང་། སྐབས་དེར་ཉེན་རྟོག་པས་ས་གནས་ཀྱི་ཚོང་ཁང་དང་ཟ་ཁང་སོགས་བཙན་ཤེད་ཀྱི་སྒོ་བརྒྱབ་བཅུག་རྗེས་དྲག་ཆས་ཉེན་རྟོག་དམག་སོགས་ཕོན་ཆེ་འབྱོར་ཡོད། སྐབས་དེའི་གནས་ཚུལ་འདི་ག་ལྟེ་གནས་ཁང་གི་གསར་འགོད་བསྒྲགས་ཤིག་ཀྱང་སྤེལ་ཡོད།

ཉེ་ཆར་མཚོ་སྔོན་ཞིང་ཆེན་རྨ་ལྷོ་བོད་རིགས་རང་སྐྱོང་ཁུལ་འབྲིང་རིམ་མི་དམངས་ཁྲིམས་ཁང་ཟེར་བས། ཐུན་རིན་རྫོང་དང་རྩེ་ཁོག་རྫོང་གཉིས་སུ་ཁྲིམས་ར་བསྡུས་ཏེ། བོད་མི་གཅོད་པ་རྒྱལ་དང་ལྕགས་ཐར། ནམ་མཁའ་བྱམས། མགོན་བྷེ་བཅས་བཞི་ལ་ “རྒྱལ་ཁབ་ཁ་བྲལ་སྐུལ་སློང་” གི་བསྙད་བཙུགས་ཏེ།  ལོ་ ༦  ནས་ ༣ བར་གྱི་དུས་བཀག་བཙོན་འཇུག་གི་ཁྲིམས་ཐག་བཅད་ཡོད་འདུག

འདི་ག་ལྟེ་གནས་ཁང་དུ་གནས་ཚུལ་འབྱོར་གསལ་ལ་གཞིགས་ན། ད་ལྟ་རང་ལོ་ ༤༧ ཙམ་ཕེབས་པའི་ཟླ་བ་རྒྱལ་མཚན་ལགས་བཙོན་ཁང་ནང་བསྒྱུར་བཀོད་རྣམ་འགྱུར་ཡག་པོ་ཡོད་པའི་དབང་གིས་ལོ་གཉིས་དུས་བཀག་ཆག་ཡང་བཏང་སྟེ་ལོ་སྔོན་མའི་ཕྱི་ཟླ་ ༣ ནང་གློད་ཀྲོལ་བཏང་ཡོད་པའི་གནས་ཚུལ་ཐོན་འདུག

ཟླ་བ་རྒྱལ་མཚན་ལགས་གློད་ཀྲོལ་བཏང་བའི་གནས་ཚུལ་རྒྱ་གཞུང་གི་འབྲེལ་ཡོད་ལས་ཁུངས་ནས་གསལ་བསྒྲགས་བྱས་མེད་ཀྱང་། འདི་ག་ལྟེ་གནས་ཁང་ནས་ཤེས་རྟོགས་བྱུང་བར། ཟླ་བ་རྒྱལ་མཚན་ལགས་མི་ལོ་ ༡༧ ལྷག་ཙམ་བཙོན་ཁང་རིམ་པའི་ནང་ཉེས་རྡུང་མནར་གཅོད་ཕོག་པའི་དབང་གིས་ད་ཆ་གློད་ཀྲོལ་ཐོབ་ཀྱང་གཟུགས་གཞིའི་གནས་སྟངས་ཧ་ཅང་སྐྱོ་པོ་ཆགས་ཡོད་འདུག

རང་ལོ་ ༥༢ ལ་ཕེབས་པའི་ཆབ་སྲིད་བཙོན་པ་འཇིགས་མེད་རྒྱ་མཚོ་ལགས་མི་ལོ་ཧྲིལ་པོ་ ༡༧ གྱི་བཙོན་དུས་རྫོགས་ཏེ་གློད་གྲོལ་བཏང་ཡོད་འདུག འཇིགས་མེད་རྒྱ་མཚོ་ལགས་གློད་གྲོལ་ཐོབ་ཡོད་ཀྱང་ཁོང་གི་གཟུགས་གཞིའི་གནས་སྟངས་ཧ་ཅང་སྐྱོ་བོ་ཡོད་པ་དང་། ཁོང་བཙོན་ཁང་ནང་དུས་ཡུན་རིང་པོར་ཉེས་རྡུང་མནར་གཅོད་ཕོག་པ་སོགས་ཀྱི་རྐྱེན་པས།  ད་ཆ་ཁོང་གི་མིག་གིས་གསལ་པོ་མི་མཐོང་བ་དང་མཁལ་མར་ནད་གཞི་ལྗིད་པོ་ཕོག་པ། དེ་བཞིན་སྙིང་ཁམས་མི་བདེ་བ། གོམ་པ་རྒྱག་དཀའ་བ་སོགས་ཀྱི་དཀའ་ངལ་ཆེན་པོ་འཕྲད་བཞིན་ཡོད་འདུག

རྒྱ་གཞུང་གིས་བོད་ཐོག་འཛིན་པའི་མི་སེར་སྤེལ་བའི་དྲག་གནོན་དབང་སྒྱུར་གྱི་སྲིད་ཇུས་ཀྱི་རྐྱེན་པས། བོད་ས་སྟོད་སྨད་བར་གསུམ་དུ་རང་ལུས་མེར་བསྲེགས་ཀྱི་ཞི་བའི་ངོ་རྒོལ་རིམ་པར་བྱུང་ཡོད་ལ། ཟླ་འདིའི་ཕྱི་ཚེས་ ༢༦ ཉིན་བོད་མདོ་སྨད་ཀླུ་ཆུ་རྫོང་རྨོག་རི་དགོན་པའི་གྲྭ་དཀོན་མཆོག་བསྟན་འཛིན་ལགས་ཀྱིས་རང་ལུས་མེར་བསྲེགས་གནང་སྟེ་སྐུ་གྲོངས་ཡོད་པ་དང་།  ཉེ་བའི་ཟླ་འདིའི་ནང་སྔ་ཕྱིར་རང་ལུས་མེར་བསྲེགས་གཏོང་མཁན་ ༥ པ་དང་།  ད་ལྟའི་བར་བོད་ནང་རང་བསྲེགས་གཏོང་མཁན་ ༡༡༤ པ་དེ་ཆགས་ཡོད་པ་རེད།  ཡིན་ནའང་། རྒྱ་གཞུང་གིས་སོ་སོའི་ནོར་འཁྲུལ་ཅན་གྱི་སྲིད་ཇུས་དེ་ཡོ་བསྲང་གིས་བོད་མི་མང་གི་མངོན་འདོད་ལ་ཉན་འཇོག་བྱེད་རྒྱུ་ལས་ལྡོག་སྟེ།  ཟླ་འདིའི་ཕྱི་ཚེས་ ༢༨ ཉིན་ནི་ “བོད་མི་ཞིང་བྲན་ཁྲི་ཚོ་བརྒྱ་ལ་བཅིངས་འགྲོལ་ཐོབ་པའི་དྲན་གསོའི་ཉིན་མོ ” རུ་བསྒྲགས་ཏེ།  བཙན་དྲག་འོག་བོད་མི་ཚོར་དུས་དྲན་སྲུང་བརྩི་བྱེད་འཇུག་གི་ཡོད་འདུག

བོད་མདོ་སྨད་ཀན་ལྷོ་བསང་ཆུ་རྫོང་དུ་སླར་ཡང་བོད་མི་ཞིག་གིས་རང་ལུས་མེར་བསྲེགས་གནང་སྟེ།  རྒྱ་གཞུང་གིས་བོད་འཛིན་པའི་དྲག་གནོན་དབང་སྒྱུར་སྲིད་ཇུས་ལ་ངོ་རྒོལ་གྱིས་སྐུ་གྲོངས་འདུག  ད་ལྟའི་ཆར་ཀན་ལྷོ་བསང་ཆུ་རྫོང་གཅིག་པུའི་ཁོངས་སུ་སྔ་ཕྱིར་བོད་མི་རང་ལུས་མེར་བསྲེགས་གནང་མཁན་ ༡༣ བྱུང་ཡོད།

ལོ་སྔོན་མའི་ལོ་མཇུག་ཙམ་ནས་བཟུང་རྒྱ་གཞུང་གིས་བོད་ཀྱི་ས་ཁུལ་སོ་སོའི་ནང་།  རང་སྲེག་ལ་ངོ་རྒོལ་གྱི་ལས་འགུལ་ཅིག་གཞི་རྒྱ་ཆེ་བ་ཞིག་སྤེལ་མགོ་བརྩམས་ཏེ།   བོད་ཁུལ་གྱི་དགོན་སྡེ་ཁག་གཙོས་གཞི་རིམ་གྲོང་སྡེ་ཁག་ནང་དམག་མི་འགྲེམས་འཇོག་དང་། ལས་བྱེད་ཆེད་གཏོང་བྱས་ཏེ་རྒྱལ་གཅེས་ཆོས་གཅེས་ཀྱི་དྲིལ་སྒྲོག་སློབ་གསོ་སྤེལ་གྱི་ཡོད་ལ། དྲག་གནོན་གྱི་བྱ་སྤྱོད་ཁོ་ན་ལ་བརྟེན་ནས་བོད་ནང་བྱུང་བཞིན་པའི་རང་ལུས་མེར་བསྲེགས་ཀྱི་གནས་སྟངས་འགོག་ཐབས་བྱས་པ་ལ་བརྟེན་ནས། བོད་ནང་རང་ལུས་མེར་བསྲེགས་ངོ་རྒོལ་མུ་མཐུད་འབྱུང་བཞིན་ཡོད་ལ།  ཉེ་ཆར་མདོ་སྨད་འཛམ་ཐང་དུ་སླར་ཡང་བོད་རིགས་བུད་མེད་ཅིག་གིས་རང་ལུས་མེར་བསྲེགས་གནང་སྟེ།  རྒྱ་གཞུང་གིས་བོད་ཐོག་འཛིན་པའི་དྲག་གནོན་དབང་སྒྱུར་སྲིད་ཇུས་ལ་ངོ་རྒོལ་གྱིས་འདས་གྲོངས་ཕྱིན་འདུག  ཁོང་མོ་ནི་ས་ཁུལ་དེར་བོད་མི་རང་ལུས་མེར་བསྲེགས་གནང་མཁན་ ༥ པ་དེ་ཆགས་ཡོད།

ཕྱི་ལོ་ ༢༠༠༨ ལོར་བོད་ས་ཡོངས་སུ་ས་བྱི་ཞི་རྒོལ་ཆེན་མོ་བྱུང་རྗེས། རྒྱ་གཞུང་གིས་བོད་ཀྱི་རྒྱལ་ས་ལྷ་སའི་གདན་ས་སེ་འབྲས་དགའ་གསུམ་གཙོས་དགོན་སྡེ་ཁག་ནང་། བོད་རང་སྐྱོང་ལྗོངས་ཕྱི་ལོགས་ཀྱི་གྲྭ་བ་གཅིག་ཀྱང་ཉར་མི་ཆོག་པའི་བཀའ་རྒྱ་བཏང་སྟེ། མདོ་སྟོད་སྨད་ཁུལ་གྱི་གྲྭ་བ་རྣམས་ཕྱིར་ཕུད་བཏང་ཡོད་པ་ལྟར།  སྔར་ལོ་ནས་བཟུང་རྒྱ་གཞུང་གིས་ཀན་སུའུ་ཞིང་ཆེན་ཁོངས་སུ་ཡོད་པའི་མདོ་སྨད་ཡུལ་གྱི་དགོན་སྡེ་ཆེ་ཤོས་བླ་བྲང་བཀྲ་ཤིས་འཁྱིལ་དུའང་། ཞིང་ཆེན་ཕྱི་ལོགས་ཀྱི་བོད་ས་སྟོད་སྨད་བར་གསུམ་ནས་ཆོས་སློབ་གཉེར་ཆེད་བསླེབས་མཁན་གྲྭ་བ་རྣམས་ཕྱིར་འཕུད་དགོས་པའི་བཀའ་རྒྱ་བཏང་ཡོད་པ་དང་། དེ་བཞིན། རེབ་གོང་རོང་བོ་དགོན་དུའང་སྲིད་ཇུས་དེ་ལག་བསྟར་བྱེད་མགོ་བརྩམས་ཡོད་སྟབས།  བོད་ནང་དུ་གྲྭ་བ་རྣམས་ཀྱི་བསླབ་པ་སློབ་གཉེར་ཐད་བར་ཆད་ཆེན་པོ་འཕྲད་བཞིན་ཡོད་འདུག