གསར་འགྱུར།

སྤྲུལ་སྐུ་བསྟན་འཛིན་བདེ་ལེགས་ཀྱི་སྲིང་མོའི་གཙོས་ས་གནས་མི་མང་གི་འཐུས་ཚབ་མི་སྣ་ལྔ་རྒྱ་ནག་རྒྱལ་ས་པེ་ཅིན་དུ་བསྐྱོད་དེ།  རྒྱ་གཞུང་གི་ཉེས་དོན་གཏུགས་བཤེར་བཅའ་ཁྲིམས་ནང་བཀོད་པའི་ཁྲིམས་མཐུན་གྱི་ཁེ་དབང་གཞིར་བཟུང་།  མ་ཉེས་ཁག་གཡོག་ཀྱིས་དྲང་བདེན་མ་ཡིན་པའི་ཁྲིམས་ཆད་ཕོག་པའི་སྤྲུལ་སྐུ་བསྟན་འཛིན་བདེ་ལེགས་ཀྱི་གྱོད་གཞི་ཞུ་གཏུགས་སུ་བསྐྱོད་དེ་ཕྱིར་བསླེབས་སྐབས།  ས་གནས་ཉག་ཆུ་རྫོང་ཉེན་རྟོག་པས་བོད་མི་བཞི་བཀག་ཉར་དང་དངུལ་གྱི་ཆད་པ་འཁྱེར་ཡོང་དགོས་པའི་ཁྲིམས་མེད་ལུགས་མེད་ཀྱི་བྱ་སྤྱོད་སྤེལ་ཡོད་པ་དེར།  འདི་ག་ལྟེ་གནས་ཁང་གི་ངོས་ནས་བསྐྱོད་བརྗོད་དང་། རྒྱ་ནག་དབུས་འབྲེལ་ཡོད་སྡེ་ཁག་གིས་རིན་པོ་ཆེ་ཁོང་གི་གྱོད་གཞིར་དྲང་བདེན་གྱི་ཁྲིམས་བཤེར་བྱེད་དགོས་པའི་འབོད་སྐུལ་ཞུ་བཞིན་ཡོད།

༢༠༠༢ ལོར་རྒྱ་ནག་གཞུང་གིས་སྤྲུལ་སྐུ་བསྟན་འཛིན་བདེ་ལེགས་མཆོག་ལ། རྒྱ་ནག་ཁྲིན་ཏུའུ་གྲོང་ཁྱེར་གྱི་འགད་གཏོར་དོན་རྐྱེན་དང་འབྲེལ་བ་ཡོད་པའི་ཉེས་མིང་འོག ལོ་གཉིས་ཀྱི་དུས་འགྱངས་སྲོག་ཁྲིམས་བཅད་དེ་བཙོན་འཇུག་བྱས་ཏེ་ལོ་ ༡༡ འགྲོ་བཞིན་ཡོད་ལ།  འདས་པའི་ལོ་དེ་དག་ནང་ཁོང་གི་ནང་མི་ཉེ་འབྲེལ་གཙོས་ས་གནས་བོད་རིགས་ཡུལ་མི་ཚོས་ས་གནས་རྫོང་དང་ཁུལ་རིམ་པར་དྲང་བདེན་མ་ཡིན་པའི་ཁྲིམས་བཅད་དེར་བསྐྱར་ཞིབ་བྱ་དགོས་པའི་རེ་འདུན་ཐེངས་མང་བཏོན་ཡོད་ཀྱང་ད་ལྟའི་བར་གྲུབ་འབྲས་གང་ཡང་བྱུང་མེད་སྟབས།  ཕྱི་ལོ་ ༢༠༡༣ ཟླ་ ༧ ཚེས་ ༩ ཉིན་ལོ་ ༤༧ ཡིན་པའི་རིན་པོ་ཆེའི་སྲིང་མོ་སྒྲོན་དཀར་ལྷ་མོ་དང་།  ལོ་ ༦༦ ཡིན་པའི་ཁམས་ཉག་ཆུའི་མི་སྐྱ་སོག་རན་བློ་རིས།  ལོ་ ༥༠ ཡིན་པའི་ལུག་རྫི་ཨ་སྤེལ། རང་ལོ་ ༦༤ ཡིན་པའི་ལྷག་མ་ཆོས་གྲུབ།  ལོ་ ༤༦ ཡིན་པའི་འདུས་འཕྲིན་ལས་བཅས་བོད་མི་ལྔ་རྒྱ་ནག་རྒྱལ་ས་པེ་ཅིན་དུ་བསྐྱོད་དེ།  རྒྱ་གཞུང་གི་དབུས་འབྲེལ་ཡོད་སྡེ་ཁག་དག་ལ་སྤྲུལ་སྐུ་བསྟན་འཛིན་བདེ་ལེགས་མཆོག་ལ་ནག་ཉེས་བཀལ་ཏེ་དྲང་བདེན་མ་ཡིན་པའི་ཁྲིམས་བཅད་བྱས་པའི་གནས་ཚུལ་སྐོར་གྱི་ཡིག་ཆ་རྣམས་སྤྲད་དེ་ཞུ་གཏུགས་འབོད་སྐུལ་ཞུས་ཡོད་འདུག

ཐེངས་འདིའི་ཞུ་འབོད་ཀྱི་ནང་དོན་གཙོ་བོ་ནི། ས་གནས་རྒྱ་གཞུང་གིས་རིན་པོ་ཆེ་མཆོག་ལ་འཇིཊ་སྐུལ་རིང་ལུཊ་པའི་ནག་ཉེས་བཀལ་པ་དེར།  ས་གནས་མི་མང་ ༣༠༠༠༠ ལྷག་གིས་རིན་པོ་ཆེ་མཆོག་ལ་ནག་ཉེས་དེ་འདྲ་གཏན་ནས་མེད་པའི་ཁག་ཐེག་འགན་ལེན་བྱས་ཏེ། ལོ་མང་པོར་ཞང་དང་རྫོང་། ཁུལ་རིམ་པར་གནས་ཚུལ་རིམ་པ་ཞུས་ཡོད་ཀྱང་། ཡ་ལན་མ་བྱས་ཁར་མ་ཉེས་ཁག་གཡོག་གིས་བཙོན་འཇུག་བྱས་ཏེ་ལོ་ ༡༡ ལྷག་འགྲོ་བཞིན་ཡོད་པ་དང་། ལྷག་པར་དུ་དེ་སྔོན་ཁོང་གི་གཉེན་ཉེ་ཚོར་ཐེངས་འགར་ཐུག་འཕྲད་བྱེད་བཅུག་སྐབས།  རིན་པོ་ཆེར་སྙིང་རླུང་གི་ན་ཚ་ཕོག་སྟེ་གཟུགས་པོའི་གནས་སྟངས་ཧ་ཅང་སྐྱོ་བོ་ཆགས་ཡོད་ཤེས་རྟོགས་བྱུང་ཡོད་པའི་གནས་སྟངས་སྐོར་དང་།

ཟླ་འདིའི་ཕྱི་ཚེས་ ༡ ཉིན་ཉག་ཆུ་རྫོང་ས་གནས་རྒྱ་གཞུང་གི་མི་དམངས་ཁྲིམས་ཁང་གིས། རྩོམ་པ་པོ་གངས་སྐྱེས་སྒྲུབ་པ་སྐྱབས་དང་། བསམ་འགྲུབ། གཡུ་སྦྲང་། དྲན་གསལ། ཤེལ་རྒྱལ་བཅས་ལ་རྒྱ་གཞུང་གིས་བོད་དོན་ལས་འགུལ་སྤེལ་བའི་ཉེས་མིང་འོག་དུས་བཀག་བཙོན་འཇུག་གི་ཁྲིམས་ཐག་བཅད་ཡོད་འདུག
ཟླ་འདིའི་ཚེས་ ༦ ཉིན་འདི་ག་ལྟེ་གནས་ཁང་ལ་གནས་ཚུལ་འབྱོར་དོན། ཕྱི་ལོ་ ༢༠༡༣ ཟླ་ ༨ ཚེས་ ༡ ཉིན། ད་ལྟ་རྒྱ་གཞུང་གིས་བོད་ས་བཅད་བགོས་ཀྱི་ས་ཁོངས་ལྟར་བྱས་ན། ཟི་ཁྲོན་ཞིང་ཆེན་དཀར་མཛེས་བོད་རིགས་རང་སྐྱོང་ཁུལ་ཉག་ཆུ་རྫོང་ཁོངས་ནས་ཡིན་པའི་རྩོམ་པ་པོ་གངས་སྐྱེས་སྒྲུབ་པ་སྐྱབས་དང་། བསམ་འགྲུབ། གཡུ་སྦྲང་། དྲན་གསལ། ཤེལ་རྒྱལ་བཅས་ལ་བོད་དོན་ལས་འགུལ་སྤེལ་བའི་ཉེས་མིང་དང་། “དམར་ཆུང་ངོ་རྒོལ་ཚོགས་པ”ཞེས་པའི་ཚོགས་མི་ཡིན་པའི་ཉེས་འཛུགས་བྱས་ཏེ། ཉག་ཆུ་རྫོང་མི་དམངས་ཁྲིམས་ཁང་གིས་ཁྲིམས་ཐག་བཅད་ཡོད་འདུག
རྩོམ་པ་པོ་གངས་སྐྱེས་སྒྲུབ་པ་སྐྱབས་ལགས་ནི་ ༢༠༡༢ ལོའི་ཕྱི་ཟླ་ ༢ ཚེས་ ༡༥ ཉིན་རྒྱ་གཞུང་གི་འབྲེལ་ཡོད་ཉེན་རྟོག་པས་འཛིན་བཟུང་བྱས་ཏེ། ད་ལྟའི་བར་བཀག་ཉར་འོག་གར་སོང་ཆ་མེད་དུ་གྱུར་ཡོད་ལ། ༢༠༡༣ ལོའི་ཕྱི་ཟླ་ ༨ ཚེས་ ༡ ཉིན་ཁོང་ལ་ལོ་ ༥ དང་ཟླ་ ༦ གི་དུས་བཀག་ཁྲིམས་ཐག་བཅད་ཡོད་པ་རེད།
རྩོམ་པ་པོ་ཁོང་ནི་ཁམས་དཀར་མཛེས་ཁུལ་གསེར་རྟ་རྫོང་རགས་བཀྲམ་ཡུལ་ཚོའི་གེ་འཕེན་སྡེ་པ་ནས་ཡིན་པ་དང་། རགས་བཀྲམ་ཡུལ་ཚོའི་སློབ་ཆུང་དང་གསེར་རྟ་རྫོང་སློབ་འབྲིང་བཅས་རིམ་པར་བརྒྱུད་མཐར། དཀར་མཛེས་རྫོང་དུ་ཡོད་པའི་དགེ་འོས་སློབ་གྲྭ་རུ་སློབ་ཐོན་བྱུང་རྗེས། བརྡར་ཚང་དང་ཧོར་ཤུལ་ཡུལ་ཚོ་གཉིས་ཀྱི་སློབ་གྲྭ་རུ་སྔ་རྗེས་དགེ་རྒན་གྱི་ཕྱག་ལས་གནང་ཡོད་ལ། ཁོང་འཛིན་བཟུང་སྐབས་མཁན་པོ་ཚུལ་ཁྲིམས་བློ་གྲོས་ཀྱིས་བྲག་མགོ་རྫོང་ཁོངས་སུ་གསར་འཛུགས་གནང་བའི་སློབ་གྲྭ་ཞིག་ཏུ་དགེ་རྒན་གྱི་ཕྱག་ལས་གནང་བཞིན་ཡོད་འདུག

བོད་ཀྱི་བདེན་དོན་འཐབ་རྩོད་པ་རོང་རྒྱས་ཨ་གྲགས་ལགས་ལ་རྒྱ་གཞུང་གིས་ལོ་བརྒྱད་ཀྱི་དུས་བཀག་བཙོན་འཇུག་གི་ཁྲིམས་ཐག་བཅད་དེ་བཙོན་འོག་ཏུ་ལོ་ ༦ འཁོར་བའི་སྐབས་དང་བསྟུན་ནས།  བོད་མི་མང་སྤྱི་འཐུས་ཨ་ཀྲུག་ཚེ་བརྟན་ལགས་ཀྱི་རྒྱལ་སྤྱིའི་ཚོགས་སྒེར་ཚང་མར་ཞུ་སྐུལ་གྱི་བསྒྲགས་གཏམ་ཞིག་སྤེལ་འདུག

རྒྱ་གཞུང་གིས་བོད་ས་ཡོངས་སུ་བཙན་འཛུལ་དབང་སྒྱུར་བྱས་པ་ནས་ད་ལྟའི་བར་དུ།  བོད་ཐོག་བཙན་འཛུལ་དབང་བསྒྱུར་བྱས་པའི་དུས་ཚེས་ཀྱིས་མཚོན་པའི་རྒྱ་དམར་གཞུང་འབྲེལ་དུས་དྲན་ཁག་གི་སྐབས།  དམག་མི་མང་པོ་འགྲེམས་འཇོག་གིས་དམ་དྲག་བྱས་ཐོག་བོད་མི་ཚོར་བཙན་དྲག་འོག་དུས་ཚེས་སྲུང་བརྩི་བྱེད་འཇུག་གི་ཡོད་པར་བརྟེན།  ༢༠༠༧ ལོའི་ཕྱི་ཟླ་ ༨ ཚེས་ ༡ ཉིན་སྟེ་རྒྱ་དམར་དམག་བཙུགས་དུས་ཆེན་གྱི་ལི་ཐང་རྟ་རྒྱུགས་མཛད་སྒོའི་ཐོག  ལི་ཐང་རོང་རྒྱས་ཨ་གྲགས་ལགས་ཀྱིས་རྒྱ་ནག་གི་མགོ་ཁྲིད་དང་མི་མང་སྟོང་ཕྲག་མང་པོ་འདུ་འཛོམས་སར། ༸གོང་ས་མཆོག་བོད་མི་ས་ཡ་དྲུག་གི་མགོན་སྐྱབས་ཡིན་པ་དང་། ༸གོང་ས་མཆོག་མགྱོགས་མྱུར་བོད་ལ་གདན་འདྲེན་ཞུ་དགོས་པ། ༸པཎ་ཆེན་སྐུ་ཕྲེང་བཅུ་བའི་ཡང་སྲིད་དགེ་འདུན་ཆོས་ཀྱི་ཉི་མ་མཆོག་དང་། སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་རྣམ་གཉིས་ཀློད་གྲོལ་གཏོང་དགོས་པ་སོགས།  བོད་རང་རྒྱ་གཞུང་གི་དྲག་གནོན་འོག་རང་དབང་གང་ཡང་མེད་པའི་དངོས་ཡོད་གནས་སྟངས་སྐོར་གྱི་གཏམ་བཤད་སྤེལ་བའི་རྗེས།  རྒྱ་གཞུང་ཉེན་རྟོག་པས་ཁོང་འཇུ་བཟུང་བཙན་ཁྲིད་བྱས་ཡོད་ལ། ལོ་དེའི་ཕྱི་ཟླ་ ༡༡ པའི་ནང་དཀར་མཛེས་བོད་རིགས་རང་སྐྱོང་ཁུལ་འབྲིང་རིམ་ཁྲིམས་ཁང་གིས།  རྒྱལ་ཁབ་ཁ་བྲལ་དང་སྤྱི་ཚོགས་བརྟན་བརླིང་ལ་གནོད་སྐྱོན་བཟོས་པའི་ཉེས་མིང་བཀལ་ཏེ།  ཁོང་ལ་ལོ་བརྒྱད་ཀྱི་དུས་བཀག་བཙོན་འཇུག་གི་ཁྲིམས་ཐག་བཅད་དེ་སི་ཁྲོན་མཱེན་ཡཱང་བཙོན་ཁང་དུ་བསྐྱལ་ཡོད་པ་རེད།  རོང་རྒྱས་ཨ་གྲགས་ལགས་ལ་འཇུ་བཟུང་བཀག་ཉར་དང་བཙོན་འཇུག་དུས་ཡུན་རིང་རྒྱ་གཞུང་ཉེན་རྟོག་དམག་གིས་སྡུག་སྦྱོང་མནར་གཅོད་རབ་དང་རིམ་པ་བཏང་བར་བརྟེན།  ད་ལྟའི་ཆར་ཁོང་གི་མིག་ཡ་གཅིག་གིས་མཐོང་གི་མེད་པ་དང་། རྣ་བ་ཡ་གཅིག་གིས་མི་ཐོས་པའི་གནས་སུ་གྱར་ཡོད་པ་མ་ཟད།  ད་དུང་རྐང་པ་དང་རྐེད་པ་ནད་པ་ཆགས་ཏེ་གཟུགས་པོ་འགྲོ་བསྐྱོད་ཐད་དཀའ་ངལ་ཡོད་པའི་གནས་སྟངས་ཆགས་ཡོད་འདུག

ཕྱི་ལོ་ ༢༠༠༨ ལོར་འབྲས་སྤུངས་དགོན་པའི་སྒོ་མང་གྲྭ་ཚང་གི་དགེ་རྒན་ཐེ་བོ་དཀོན་མཆོག་ཉི་མ་ལགས་རྒྱ་གཞུང་གིས་འཇུ་བཟུང་བཙན་ཁྲིད་རྗེས་གར་ས་མེད་དུ་གྱུར་ཡོད་པ་ལྟར།  ཉེ་ཆར་རྒྱ་གར་དུ་བཙན་བྱོལ་དུ་འབྱོར་ཡོད་པའི་ཁོང་གི་དགེ་ཕྲུག་བསྟན་འཛིན་ཟླ་བ་ལགས་ཀྱིས་བརྗོད་ན།  ཁོང་གི་ནང་མི་གཙོས་དགེ་ཕྲུག་ཚང་མས་ཧ་ཅང་སེམས་ཁྲལ་ཆེན་པོའི་སྒོ་ནས་རྩད་གཅོད་གནང་བཞིན་ཡོད་འདུག

ཉེ་ཆར་རྒྱ་གར་དུ་བཙན་བྱོལ་ལ་འབྱོར་བའི་གྲྭ་བསྟན་འཛིན་ཟླ་བ་(མིང་ཚབ)ལགས་ནི་བོད་མདོ་སྨད་མཛོད་དགེ་ཤོག་ཁ་ལྔའི་ཁོངས་གཏོགས་ཏེ།  ད་ལྟ་རྒྱ་གཞུང་གིས་བོད་ས་བཅད་བགོས་ཀྱི་ས་ཁོངས་ལྟར་ན།  ཟི་ཁྲོན་ཞིང་ཆེན་རྔ་པ་བོད་རིགས་རང་སྐྱོང་ཁུལ་མཛོད་དགེ་རྫོང་ཚོང་རུ་ཞང་ནས་ཡིན་པ་དང་།  ད་ལྟ་ཁོ་རང་ལོ་ ༣༦ ལ་སོན་ཡོད།  ཁོང་རང་ལོ་ ༡༤ ཐོག་ཚོང་རུ་བར་མའི་དགོན་བཀྲ་ཤིས་འཕེལ་རྒྱས་གླིང་གི་ཆོས་སྒོར་ཞུགས་ཡོད་པ་དང་།  དེ་སྔོན་ཆོས་སློབ་གཉེར་ཆེད་རྒྱ་གར་དུ་བྲོས་བྱོལ་བྱས་ཀྱང་མ་ཐར་སྟབས།  རྗེས་སུ་གདན་ས་ཆེན་པོ་འབྲས་སྤུངས་དགོན་པར་ཟུར་ཞུགས་ཀྱིས་ནང་ཆོས་ལ་སློབ་གཉེར་གནང་ཡོད་ལ།  སྐབས་དེར་ཁོ་རང་ནི་དགེ་རྒན་དཀོན་མཆོག་ཉི་མ་ལགས་ཀྱི་དགེ་ཕྲུག་ཏུ་གྱུར་ཡོད་པ་རེད། སྔོན་ཆད་དགེ་རྒན་དཀོན་མཆོག་ཉི་མ་ལགས་ཀྱང་ཁོ་རང་ནང་བཞིན་བོད་མདོ་སྨད་ཐེ་བོ་གཟའ་རུ་དགོན་པ་ནས་འབྲས་སྤུངས་དགོན་དུ་ཆོས་སློབ་ཆེད་འོངས་པའི་གྲྭ་པ་དཀྱིས་མ་ཞིག་ཡིན།   རྗེས་སུ་སློབ་གཉེར་ཕུལ་དུ་ཕྱིན་ཏེ་འབྲས་སྤུངས་སྒོ་མང་གྲྭ་ཚང་གི་དཔེ་ཁྲིད་དགེ་རྒན་ཆགས་ཡོད་པ་རེད།

བོད་སྡེ་ཨ་རིག་བྲག་དཀར་དང་རྒྱ་སྡེ་ཚའོ་མེན་ཀྲོང་གཉིས་ནི་བོད་རྒྱའི་མཐའ་འབྲེལ་ས་ཁུལ་ཡིན་སྟབས། འདས་པའི་ལོ་མང་རིང་སྡེ་བ་གཉིས་བར་ས་ཆའི་རྩོད་རྙོག་རིམ་པར་བྱུང་ཡོད་ཀྱང་། མཚོ་སྔོན་ཞིང་ཆེན་དང་ཀན་སུའུ་ཞིང་ཆེན་གྱི་ས་གནས་རྒྱ་གཞུང་རིམ་པས་དཀའ་རྙོག་འདུམ་སྒྲིག་མ་བྱས་པར་སྣང་མེད་དུ་བཞག་ཡོད་སྟབས། ཟླ་འདིའི་ཕྱི་ཚེས་ ༡༧ རྒྱ་སྡེ་ཚའོ་མེན་ཀྲོང་གིས་དངུལ་སྤྲད་དེ་ཡུལ་དམག་བསྡུས་རྗེས། ཨ་རིག་བྲག་དཀར་སྡེ་བའི་ས་སྲུང་བའི་ཐོག་དམག་དྲངས་ཏེ་རུབ་རྡུང་བྱས་པའི་ཛ་དྲག་གནས་ཚུལ་བྱུང་ཡོད་འདུག

འདི་ག་ལྟེ་གནས་ཁང་དུ་གནས་ཚུལ་འབྱོར་དོན། ཕྱི་ལོ་ ༢༠༡༣ ཟླ་ ༧ ཚེས་ ༡༧ ཉིན། ཀན་སུའུ་ཞིང་ཆེན་ཀྲང་ཡའེ་གྲོང་ཁྱེར་མེན་ལིག་རྫོང་ནན་ཧྥུན་ཞང་ཚའོ་མེན་གྲོང་ཚོའི་རྒྱ་མི་ཀྲང་ཝུ་དང་ཀྲང་ཝན་གཉིས་ཀྱིས་མགོ་བསྡུ་བྱས་ཐོག ཀྲང་ཡའེ་གྲོང་ཁྱེར་ནང་གི་ནག་ཚོགས་པ་མི་རེ་ལ་རྒྱ་སྒོར་ ༡༠༠༠ རེ་སྤྲད་ནས་རྒྱ་མི་ ༡༠༠ ལྷག་གླས་རྗེས། གྲི་དང་དབྱུག་པ་མཛེར་མགོ་ཅན་སོགས་ལག་ཆ་སྣ་ཚོགས་བཟུང་སྟེ། ཀན་སུའུ་ཞིང་ཆེན་དང་འདབས་འབྲེལ་དུ་གནས་པའི་མཚོ་སྔོན་ཞིང་ཆེན་མཚོ་བྱང་ཁུལ་མདོ་ལ་རྫོང་མཁར་དམར་ཞང་ཨ་རིག་བྲག་དཀར་སྡེ་བའི་བོད་མི་ས་སྲུང་བའི་སྡོད་གུར་ཡོད་སར་དམག་དྲངས་ཏེ། བོད་མི་ས་སྲུང་བ་རྣམས་ལ་རུབ་རྡུང་བྱས་ནས་རྨས་སྐྱོན་ཚབས་ཆེན་བཟོས་ཡོད་འདུག

རྒྱ་གཞུང་གིས་བོད་ནང་ཆོས་དང་རིག་གཞུང་། ཆབ་སྲིད་གང་ཐད་ནས་དྲག་གནོན་དབང་སྒྱུར་གྱི་མི་སེར་སྤེལ་བའི་སྲིད་ཇུས་ཁོ་ན་ལག་བསྟར་བྱས་པར་བརྟེན། འདས་པའི་ལོ་ལྔ་བཅུ་ལྷག་གི་རིང་བོད་ནང་ཞི་བའི་ངོ་རྒོལ་ཡར་ལངས་རིམ་པར་བྱུང་ཡོད་པ་མ་ཟད།  ཕྱི་ལོ་ ༢༠༠༩ ནས་བཟུང་རང་ལུས་མེར་བསྲེགས་ཀྱི་ཞི་རྒོལ་ལས་འགུལ་བྱུང་སྟེ།  ད་ལྟའི་བར་བོད་མི་ ༡༢༠ རང་ལུས་མེར་བསྲེགས་ཀྱིས་རྒྱ་གཞུང་གི་ནོར་འཁྲུལ་ཅན་གྱི་དབང་སྒྱུར་སྲིད་བྱུས་ལ་ངོ་རྒོལ་བྱས་ཡོད་ཀྱང་། རྒྱ་གཞུང་གིས་བཟང་ཕྱོགས་ཀྱི་འགྱུར་བ་གང་ཡང་བཏང་མེད་པ་མ་ཟད། ཉེ་སྔོན་རྒྱ་གཞུང་ཆབ་སྲིད་གྲོས་ཚོགས་ཀྱི་ཚོགས་གཙོ་ཡུས་ཀྲིན་ཧྲིན་གྱིས་༧གོང་ས་མཆོག་ལ་ཁ་གཏད་ངོ་རྒོལ་བྱ་དགོས་པ་བསྒྲགས་ཏེ།  དགོན་སྡེ་ཁག་ནང་དམ་དྲག་བྱེད་ཤུགས་ཆེ་རུ་བཏང་ཡོད་པ་ལྟར།  ཟླ་འདིའི་ཕྱི་ཚེས་ ༢༠ ཉིན་བོད་མདོ་སྨད་མཛོད་དགེ་རྫོང་སོག་ཚང་དགོན་བཀྲ་ཤིས་ཐེག་མཆོག་གླིང་དུ་གྲྭ་བ་ཞིག་གིས་རང་ལུས་བསྲེགས་བཏང་སྟེ་འདས་གྲོངས་ཕྱིན་འདུག

ལོ་སྔོན་མར་རྒྱ་གཞུང་གིས་ཆབ་སྲིད་ཀྱི་གནད་དོན་ཡོད་རབས་དང་ཕྱི་ལོག་ལ་འབྲེལ་བ་ཡོད་སྐོར་གྱི་ཉེས་མིང་བཏགས་ཏེ་བཙན་ཁྲིད་བྱས་པའི་ཉ་མཚོ་ཟིལ་དཀར་དགོན་པའི་གྲྭ་ཚུལ་ཁྲིམས་སྐལ་བཟང་ལགས་བཀག་ཉར་འདྲི་གཅོད་སྐབས་གཅར་རྡུང་དྲག་པོ་བཏང་སྟེ་ནད་པ་ཆགས་པར་བརྟེན།  ཕྱིར་གློད་ཙམ་བྱས་རྗེས་བསྐྱར་དུ་འཇུ་བཟུང་བཙན་ཁྲིད་བྱས་ཡོད་པ་ལྟར།   ཕྱི་ལོ་ ༢༠༡༣ ཕྱི་ཟླ་ ༧ ཚེས་ ༡༢ ཉིན་ཁོང་ལ་མི་བསད་ཀྱི་ཉེས་མིང་བཏགས་ཏེ་ལོ་ ༡༠ བཙོན་འཇུག་ཁྲིམས་ཐག་བཅད་འདུག

ཕྱི་ལོ་ ༢༠༡༢ ཕྱི་ཟླ་ ༩ ཚེས་ ༡ ཉིན་ཉ་མཚོ་ཟིལ་དཀར་དགོན་དུ་རྒྱ་དམག་འབྱོར་ཏེ་ཆབ་སྲིད་ཀྱི་གནད་དོན་ཡོད་རབས་དང་ཕྱི་ལོག་ལ་འབྲེལ་བ་ཡོད་པའི་ཉེས་མིང་བཏགས་ཏེ།   གྲྭ་བློ་བཟང་སྦྱིན་པ་དང་བསོད་ནམས་ཤེས་རབ། བསོད་ནམས་དབྱིག་གཉེན། ཚུལ་ཁྲིམས་སྐལ་བཟང་བཞི་བཙན་ཁྲིད་བྱས་རྗེས། ཟླ་གཅིག་ལྷག་གི་རྗེས་གྲྭ་བསོད་ནམས་ཤེས་རབ་དང་བསོད་ནམས་དབྱིག་གཉེན་གཉིས་ལ་བཙོན་འཇུག་ཁྲིམས་ཐག་ལོ་གཉིས་རེ་བཅད་དེ།  སྟོང་སྐོར་རྫོང་དུ་ཡོད་པའི་ཟི་ལིང་ཏའོ་པཱ་ངལ་རྩོལ་སྒྱུར་བཀོད་ཁང་དུ་བཅུགས་ཡོད་འདུག  དེ་བཞིན། གྲྭ་བློ་བཟང་སྦྱིན་པ་ཞིབ་དཔྱོད་ཁང་དུ་མ་བརྒྱུད་མཐར་ཕྱིར་དགོན་ནང་དུ་མངགས་ཙམ་བྱས་ཀྱང་།  རྗེས་སུ་༼ བོད་དར་ཆ་སྒྲོངས་ཤིག་གངས་བུ་ཚོ༽ ཞེས་པའི་གླུ་བ་བློ་བློས་བླངས་པའི་འོད་སྡེར་དང་འབྲེལ་བ་ཡོད་སྐོར་བརྗོད་དེ། བསྐྱར་དུ་འཇུ་བཟུང་གིས་ལོ་ལྔའི་བཙོན་འཇུག་ཁྲིམས་ཐག་བཅད་ཡོད་པ་མ་ཟད།  ཁོང་དང་མཉམ་དུ་གླུ་བ་བློ་བློ་ལ་ཡང་ལོ་དྲུག་གི་བཙོན་འཇུག་ཁྲིགས་ཐག་ཡོད་པ་རེད།

ཉེ་སྔོན་༸གོང་ས་མཆོག་གི་སྐུའི་འཁྲུངས་སྐར་ཉིན་ཁམས་རྟའུ་རྫོང་དུ།  རྒྱ་གཞུང་གི་དྲག་ཆས་ཉེན་རྟོག་དམག་དཔུང་གིས་བོད་མི་སེར་སྐྱ་དད་ལྡན་མང་ཚོགས་ལ་བསང་གསོལ་བཀག་སྡོམ་གྱིས། མང་ཚོགས་ཐོག་གང་བྱུང་མེ་མདའ་བརྒྱབ་སྟེ་ཡ་ང་བའི་ཛ་དྲག་གནས་ཚུལ་བྱུང་རྗེས།  རྒྱ་གཞུང་གིས་རྟའུ་རྫོང་ཁུལ་དུ་དྲ་རྒྱ་དང་ཁ་པར་སོགས་བརྒྱུད་ལམ་ལ་སྔར་ལྷག་དམ་དྲག་བྱས་ཡོད་པར་བརྟེན། གནས་ཚུལ་གྱི་བརྒྱུད་རིམ་ཁ་གསལ་ཤེས་རྟོགས་ཐུབ་རྒྱུར་དཀའ་ངལ་བྱུང་ཡོད།

འདི་ག་ལྟེ་གནས་ཁང་ལ་གསར་དུ་ཞིབ་ཕྲའི་གནས་ཚུལ་འབྱོར་དོན། ཁམས་རྟའུ་རྫོང་དུ་བོད་མི་སེར་སྐྱ་དད་ལྡན་མང་ཚོགས་ལ་དྲག་གནོན་བྱས་པའི་དོན་རྐྱེན་དེའི་ཁྲོད།  ཁྱོན་བསྡོམས་བོད་མི་ ༡༤ ལ་མེ་མདས་བརྒྱབ་སྟེ་རྨས་སྐྱོན་བཟོས་ཡོད་པ་དང་།  བོད་མི་ ༡༨ ཉིན་མཚན་གཅིག་ཙམ་ལ་འཇུ་བཟུང་བཀག་ཉར་འོག་གཅར་རྡུང་མནར་གཅོད་དྲག་པོ་བཏང་སྟེ་རྨས་སྐྱོན་ཕོག་ཡོད་འདུག ཉེ་སྔོན་འདི་ག་ལྟེ་གནས་ཁང་གིས་གནས་ཚུལ་སྤེལ་བའི་ནང་ཚུད་མེད་པའི་རྨས་སྐྱོན་ཕོག་མཁན་ཁག་ཅིག་གསར་ཏུ་ཤེས་རྟོགས་བྱུང་བར། སློབ་ཕྲུག་བུ་མོ་དཔལ་ལྡན་དབང་མོ་ཟེར་བ་ཞིག་ལ་ཉེས་རྡུང་བཏང་སྟེ་རྨས་སྐྱོན་བཟོས་ཡོད་པ་མ་ཟད།  ཁོ་མོའི་གསེར་གྱི་རྣ་ལོང་དང་ལག་མགོའི་ཆུ་ཚོད་རྒྱ་དམག་གིས་བརྐུ་འཕྲོག་བྱས་ཡོད་པ་དང་།  ལོ་ ༧༢ ལ་སོན་པའི་རྒན་པོ་ཡ་མ་ཚེ་རིང་ལགས་ཀྱི་རྩིབ་མ་བཞི་བཅག་སྟེ་སྨན་ཁང་དུ་བསྐྱལ་དགོས་བྱུང་འདུག  བདེ་སྐྱིད་མགོན་པོ་ལགས་གཅར་རྡུང་གིས་རྣ་ཡ་གཅིག་གིས་ཅི་ཡང་མི་ཐོས་པར་འོན་པ་ཆགས་ཡོད་པ་རེད། རྒྱ་ནག་གིས་མེ་མདའ་བརྒྱབ་སྟེ་བོད་མིར་དྲག་གནོན་གྱི་གནས་ཚུལ་ཏེ་བྱུང་རྗེས། རྟའུ་རྫོང་གི་ས་ཁུལ་ཁག་ཁ་ཤས་ནང་མི་མང་འདུ་འཛོམས་ཀྱིས་སྐད་འབོད་ངོ་རྒོལ་གྱི་གནས་ཚུལ་བྱུང་འདུག

བོད་མདོ་སྨད་རྔ་བ་ཁུལ་ཟུང་ཆུ་རྫོང་དམུ་དགེ་ས་ཁུལ་དུ་རྒྱ་གཞུང་གིས་ས་གནས་བོད་རིགས་ཞང་འབྲོག་མང་ཚོགས་ཀྱི་ས་ཆ་བཙན་འཕྲོག་བྱས་པར་བརྟེན། ས་གནས་བོད་རིགས་མང་ཚོགས་ཀྱི་འཚོ་བར་དཀའ་ངལ་སྣ་ཚོགས་འཕྲལ་བཞིན་པ་མ་ཟད། དམུ་དགེ་དགོན་པ་གཙོས་ས་གནས་ཞང་གྲོང་ཁག་ནང་ཉེན་རྟོག་ཁང་མང་པོ་གསར་རྒྱག་བྱས་ཏེ་ལྟ་རྟོགས་བཀག་སྡོམ་ཤུགས་ཆེ་རུ་གཏོང་བཞིན་ཡོད་འདུག

འདི་ག་ལྟེ་གནས་ཁང་དུ་གནས་ཚུལ་འབྱོར་གསལ། རྒྱ་གཞུང་གིས་ད་ལྟའི་ཆར་ཟི་ཁྲོན་ཞིང་ཆེན་ཁོངས་སུ་བཅད་བགོས་བྱས་ཡོད་པའི་རྔ་པ་ཁུལ་ཟུང་ཆུ་རྫོང་གི་དམུ་དགེ་ནོར་བ་ཞེས་པའི་འབྲོག་སྡེ་ཡི་སྟོན་ཁ་རུ་བ་འབབ་སའི་ས་ཆ་དེ་ལོ་སྔོན་མར་རྒྱ་གཞུང་གིས་བཙན་འཕྲོག་བྱས་ཡོད་པ་དང་། ས་ཆ་དེ་བཙན་འཕྲོག་གི་ཐད་ནས་རྒྱ་གཞུང་གིས་ས་གནས་མང་ཚོགས་ལ་གྲོས་བསྡུར་དང་ཀུན་གསབ་གང་ཡང་སྤྲད་མེད་པ་མ་ཟད། ཐ་ན་ལས་གཞི་ག་རེ་ཆེད་དུ་ས་ཆ་འཕྲོག་གི་ཡོད་མེད་ཀྱི་གསལ་བཤད་ཙམ་ཡང་བྱས་མེད་པ་རེད། དེ་བཞིན། ཆུ་མཛོད་གློག་ཁང་རྒྱག་དགོས་པར་ཁ་གཡར་ཏེ་དམུ་དགེ་ས་ཁུལ་གྱི་རོང་སྡེ་ཨ་ཆུ་སྡེ་བའི་ཞིང་ས་ཆ་ཚང་དང་། ཨ་རྔང་སྡེ་བ་དང་ཨ་མགོན་སྡེ་བ་གཉིས་ཀྱི་ཞིང་ས་མང་པོ་ཞིག་བཅས་བཙན་འཕྲོག་བྱས་ཡོད་སྟབས། དམུ་དགེ་ས་ཁུལ་གྱི་རོང་འབྲོག་སྡེ་ཁག་གི་མང་ཚོགས་ཀྱི་འཚོ་བའི་ཐད་དཀའ་ངལ་སྣ་ཚོགས་འཕྲད་བཞིན་ཡོད་འདུག