Tag: བོད།

ལོ་བཞི་བཙོན་འཇུག་ཁྲིམས་ཐག་བཅད་ཡོད་པའི་གྲྭ་བསོད་ནམས་མགོན་པོ་ལགས་བཙོན་འཇུག་དུས་ཡུན་གཙང་སྟེ་གློད་ཡོད་ནའང་། ཁོང་དང་ལྷན་དུ་ཁྲིམས་ཐག་དུས་ཡུན་གཅིག་པ་བཅད་ཡོད་པའི་གྲྭ་བསོད་ནམས་ཆོས་དར་ལགས་ད་དུང་གློད་མི་འདུག

འདི་ག་ལྟེ་གནས་ཁང་ལ་གནས་ཚུལ་འབྱོར་དོན། རྒྱ་གཞུང་གིས་ལོ་བཞིའི་བཙོན་འཇུག་ཁྲིམས་ཐག་བཅད་ཡོད་པའི་རྫ་དབོན་པོ་དགོན་པའི་གྲྭ་བསོད་ནམས་དགོན་པོ་ལགས་བཙོན་འཇུག་དུས་ཡུན་གཙང་སྟེ་གློད་གྲོལ་བཏང་སྟེ་ཕྱི་ཟླ་ ༣ ཚེས་ ༡༢ མཚན་མོར་ཕྱིར་རང་ཁྱིམ་དུ་བསླེབས་འདུག ཡིན་ནའང་། ཁོང་དང་ལྷན་དུ་ལོ་བཞིའི་བཙོན་འཇུག་ཁྲིམས་ཐག་བཅད་པའི་གྲྭ་བསོད་ནམས་ཆོད་དར་བཙོན་འཇུག་དུས་ཡུན་གཙང་ཟིན་ནའང་ད་དུང་གློད་གྲོལ་བཏང་མེད་པ་རེད། ད་ལྟའི་ཆར་ཁོང་གཉིས་ཀྱི་གཟུགས་པོའི་གནས་སྟངས་ག་འདྲ་ཡོད་མེད་སོགས་ཞིབ་ཕྲའི་གནས་ཚུལ་ཤེས་རྟོགས་ཐུབ་ཀྱི་མི་འདུག

བོད་མི་བཀྲ་ཤིས་དབང་ཕྱུག་ལགས་ཀྱིས་རྒྱ་ནག་གི་ཁྲིམས་ལུགས་གཞིར་བཟུང་བོད་ཀྱི་སྐད་ཡིག་སྲུང་ཡོང་ཐབས་ཞུ་གཏུགས་བྱས་པར། རྒྱ་གཞུང་གིས་ཁྲིམས་འགལ་གྱི་སྒོ་ནས་གསང་བས་འཇུ་བཟུང་བཙན་འཁྲིད་ཀྱིས་གར་སོང་ཆ་མེད་དུ་གྱུར་འདུག

འདི་ག་ལྟེ་གནས་ཁང་གིས་ཤེས་རྟོགས་བྱུང་དོན། བོད་ཀྱི་སྐད་ཡིག་སྲུང་སྐྱོབ་ཆེད་ཕྱག་ལས་དང་ཞུ་འབོད། རྩོམ་ཡིག་བཅས་སྤེལ་མཁན་བོད་མི་བཀྲ་ཤིས་དབང་ཕྱུག་ལགས་རྒྱ་གཞུང་གིས་གསང་བའི་ཐོག་འཇུ་བཟུང་བཙན་འཁྲིད་ཀྱིས་གར་སོང་ཆ་མེད་དུ་གྱུར་ཏེ་ཉིན་ ༥༠ ཕྱིན་ཡོད།

བཀྲ་ཤིས་དབང་ཕྱུག་ལགས་ཀྱི་རང་ལོ་ ༣༠ སོན་པའི་བོད་རིགས་གཞོན་སྐྱེས་ཚོང་པ་ཞིག་ཡིན་ལ། ཁོང་གི་ཕ་ཡུལ་ནི་བོད་མདོ་ཁམས་སྡེ་རྒུ་མདོ་ཡིན་པ་དང་། རྒྱ་གཞུང་གིས་བོད་ས་བཅད་བགོས་ཀྱིས་མི་སེར་སྤེལ་བའི་དྲག་གནོན་དབང་བསྒྱུར་གྱི་ད་ལྟའི་ས་ཁོངས་དབྱེ་བགོས་ལྟར་བྱས་ན། མཚོ་སྔོན་ཞིང་ཆེན་ཡུལ་ཤུལ་བོད་རིགས་རང་སྐྱོང་ཁུལ་གྱི་ས་ཁོངས་ཡིན་པ་རེད།

ཕྱི་ལོ་ ༢༠༡༦ ཟླ་ ༣ ཚེས་ ༡༠ ཉིན་ཨ་རིའི་ནེའུ་ཡོག་དུས་བབ་ཀྱིས་སྤེལ་བའི་གནས་ཚུལ་ལྟར་ན། བཀྲ་ཤིས་དབང་ཕྱུག་ལགས་འདི་ལོའི་ཕྱི་ཟླ་ ༡ ཚེས་ ༢༧ ཉིན་རྒྱ་གཞུང་གིས་འཇུ་བཟུང་བཙན་འཁྲིད་བྱས་ཡོད། ཁོང་གི་ནང་མིའི་ངོས་ནས་བཀྲ་ཤིས་དབང་ཕྱུག་ལགས་ད་ལྟའི་ཆར་ས་གནས་ཀྱི་ཉེན་རྟོག་ལྟ་སྲུང་ཁང་དུ་བཀག་ཉར་བྱས་ཡོད་པར་ཚོད་བགམ་ངོས་འཛིན་བྱེད་ཀྱི་འདུག དེར་མ་ཟད་ནང་མིས་ངོས་ནས་ས་གནས་ཉེན་རྟོག་སྡེ་ཁག་ལ་འབྲེལ་བ་བྱས་ཏེ་ཁོང་ལ་ཐུག་འཕྲད་ཀྱི་རེ་འབོད་ཞུས་ཡོད་ཀྱང་། ས་གནས་ཉེན་རྟོག་སྡེ་ཁག་གིས་ནང་མིའི་རེ་སྐུལ་དང་བྱས་མེད་པ་རེད།

  དེ་རིང་འདི་ག་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གི་ངོས་ནས། བོད་ནང་གི་ཆབ་སྲིད་བཙོན་པའི་གནས་ཚུལ་སྐོར་ལ་དབྱིན་ཡིག་གི་དྲ་རྒྱ་ལེགས་གྲུབ་ཀྱིས་དབུ་འབྱེད་ཐུབ་པ་བྱུང་བར་དགའ་སྤྲོ་སྐྱེ་བཞིན་ཡོད། ཕྱི་ལོ་ ༢༠༡༦ ཟླ་ ༣ ཚེས་ ༡༤ ནི་ཉིན་མོ་གལ་ཆེན་པོ་ཞིག་ཆགས་ཡོད་དེ། ༢༠༠༨ ལོར་བོད་ས་ཡོངས་སུ་ས་བྱི་ཞི་རྒོལ་ཆེན་མོ་བྱུང་ནས་ལོ་བརྒྱད་འཁོར་བའི་ཉིན་མོ་ཆགས་ཀྱི་ཡོད། ༢༠༠༨ ལོ་ནས་བཟུང་བོད་ནང་སྔར་ལས་ལྷག་པར་རྒྱ་གཞུང་གིས་བོད་མི་མང་པོ་འཇུ་བཟུང་བཙན་འཁྲིད་དང་གར་སོང་ཆ་མེད། སྡུག་སྦྱོང་ནར་གཅོད། ཁྲིམས་གཅོད་བཙོན་འཇུག དེ་བཞིན། བཙོན་འོག་ཏུ་འདས་གྲོངས་འགྲོ་བཞིན་པ་བཅས་ཀྱི་གནས་སྟངས་མཚམས་མ་ཆད་པར་མུ་མཐུད་བྱུང་དང་འབྱུང་བཞིན་ཡོད། ༢༠༠༨ ལོར་བོད་ས་ཡོངས་སུ་ས་བྱི་ཞི་བའི་ངོ་རྒོལ་ཆེན་མོ་བྱུང་དགོས་དོན་ནི། རྒྱ་གཞུང་གིས་བོད་ཐོག་འཛིན་པའི་དྲག་གནོན་དབང་བསྒྱུར་གྱི་མི་སེར་སྤེལ་བའི་སྲིད་ཇུས་ལག་བསྟར་གྱིས། བོད་མིའི་ཆོས་དང་རིག་གཞུང་། སྐད་ཡིག ཁོར་ཡུག འཚོ་གནས་བཅས་བརྡལ་བཤིག་བཏང་སྟེ་བོད་མིའི་ངོ་བོ་རྩ་བརླག་དང་། བོད་མིའི་གཞི་རྩའི་འགྲོ་བ་མིའི་ཐོབ་ཐང་དང་རང་དབང་མཐའ་དག་བཙན་འཕྲོག་བྱེད་བཞིན་པ་བཅས་ལ་ཐུག་ཡོད། ཆབ་སྲིད་བཙོན་པའི་གནས་ཚུལ་སྐོར་གྱི་དྲ་རྒྱ་འདི་བརྒྱུད་ནས། རྒྱལ་སྤྱིའི་སྒང་འགྲོ་བ་མིའི་ཐོབ་ཐང་ཐད་ཕྱག་ལས་གནང་མཁན་གྱི་གཞུང་དང་གཞུང་འབྲེལ་མ་ཡིན་པའི་ཚོགས་སྡེ། ཉམས་ཞིབ་པ་བཅས་ལ་དུས་ཐོག་བོད་ནང་གི་ཆབ་སྲིད་བཙོན་པའི་སྐོར་གྱི་གནས་ཚུལ་ཁ་གསལ་དང་ཁུངས་ལྡན་སྒོ་ནས་མཁོ་འདོན་བྱེད་ཐུབ་པར་ངོས་འཛིན་བྱེད་ཀྱི་ཡོད། དྲ་རྒྱ་འདིའི་ནང་འདི་ག་ལྟེ་གནས་ཁང་གི་ཆབ་སྲིད་བཙོན་པའི་མིང་ཐོ་གཞིར་བཟུང་། བོད་ནང་ཆབ་སྲིད་བཙོན་པ་རྣམས་ཀྱི་ལོ་རྒྱུས་གནས་ཚུལ་མཁོ་འདོན་དང་། རྒྱ་གཞུང་གིས་གསར་དུ་འཇུ་བཟུང་བྱས་པའི་ཆབ་སྲིད་བཙོན་པའི་མིང་ཐོ་དང་གནས་ཚུལ་དུས་ཐོག་དྲ་རྒྱའི་སྒང་གསར་འཇུག་བྱེད་ཀྱིན་ཡོད། དེ་བཞིན།…

ཟླ་འདིའི་ཕྱི་ཚེས་ ༡ ཉིན་བོད་མདོ་སྨད་རྔ་པ་རྨེའུ་རུ་མའི་བུ་མོ་མང་དགའ་ལགས་ཀྱིས། ༧གོང་ས་མཆོག་གི་སྐུ་པར་འཕྱར་ཏེ་རྒྱ་གཞུང་གི་སྲིད་ཇུས་ལ་ཞི་བའི་ངོ་རྒོལ་བྱས་སྐབས། ས་གནས་ཉེན་རྟོག་པས་འཇུ་བཟུང་བཙན་འཁྲིད་ཀྱིས་གར་སོང་ཆ་མེད་དུ་གྱུར་འདུག

འདི་ག་ལྟེ་གནས་ཁང་ལ་གནས་ཚུལ་འབྱོར་དོན། ཕྱི་ལོ་ ༢༠༡༦ ཟླ་ ༣ ཚེས་ ༡ ཉིན་གྱི་བོད་ནང་གི་ཆུ་ཚོད་ ༡༢ ཙམ་ལ། བོད་མདོ་སྨད་རྔ་པ་རྫོང་རྨེའུ་རུ་མ་ཡུལ་ཚོའི་རུ་ཆེན་དང་པོའི་བཀྲ་ཤིས་གཡས་འཁྱིལ་ཚང་གི་བུ་མོ་མང་དགའ་ལགས་ཀྱིས། རྨེའུ་རུ་མའི་ཡུལ་ཚོའི་ཁྲོམ་ལམ་དུ་༸གོང་ས་སྐྱབས་མགོན་ཆེན་པོ་མཆོག་གི་སྐུ་པར་ཞིག་ལག་གཉིས་ཀྱིས་གནམ་ལ་འཕྱར་ཏེ་གོམ་བགྲོད་ཀྱིས། རྒྱ་ནག་གཞུང་གིས་བོད་ཐོག་འཛིན་པའི་དྲག་གནོན་དབང་བསྒྱུར་གྱི་མི་སེར་སྤེལ་བའི་སྲིད་ཇུས་ལ་ངོ་རྒོལ་སྐད་འབོད་གནང་ཡོད་ཅིང་། དེ་མ་ཐག་ས་གནས་ཉེན་རྟོག་པ་ཚོས་ཁོང་མོ་འཛིན་བཟུང་བཙན་ཁྲིད་བྱས་ཡོད་འདུག ད་ལྟའི་ཆར་གནས་སྟངས་གང་ཡང་ཤེས་རྟོགས་མི་ཐུབ་པར་གར་སོང་ཆ་མེད་དུ་གྱུར་ཡོད།

བོད་ཀྱི་ན་གཞོན་རྩོམ་པ་པོ་ཞོགས་ལྗང་ལགས་ལ། རེབ་གོང་ཐུན་རིན་ཁྲིམས་ཁང་ནས་ལོ་ ༣ ཀྱི་ཁྲིམས་ཐག་བཅད་ཡོད་པའི་གནས་ཚུལ་ཐོན་འདུག ཡིན་ནའང་། གནས་ཚུལ་ཡོང་ཁུངས་གཞན་ཞིག་གིས་བརྗོད་པ་ལྟར་ན། ད་ལྟའི་ཆར་ཁོང་ལ་ལོ་གསུམ་གྱི་ཁྲིམས་ཐག་གཅོད་རྒྱུའི་བཀའ་རྒྱ་བསྒྲགས་པ་ཙམ་ལས། ད་དུང་དངོས་སུ་ཁྲིམས་ཐག་བཅད་མེད་པར་བཤད།

བརྒྱུད་ལམ་ཁག་ཏུ་གནས་ཚུལ་ཐོན་པ་ལྟར་ན། ཕྱི་ལོ་ ༢༠༡༦ ཟླ་ ༢ ཚེས་ ༡༧ ཉིན། སྨྱུག་མིང་ལ་ཞོགས་ལྗང་དུ་འབོད་པའི་བོད་ཀྱི་ན་གཞོན་རྩོམ་པ་པོ་འབྲུག་ལོ་ལགས་ལ། རེབ་གོང་ཐུན་རིན་ཁྲིམས་ཁང་ནས་ལོ་ ༣ ཀྱི་དུས་བཀག་བཙོན་འཇུག་གི་ཁྲིམས་ཐག་བཅད་ཡོད་པ་མ་ཟད། ཁྲིམས་རྩོད་སོགས་ཀྱི་གོ་རིམ་གང་ཡང་མེད་པར་ཁྲིམས་དཔོན་ཞིག་ནས། རྩོམ་པ་པོ་ཞོགས་ལྗང་ཁོང་གིས་ ༢༠༠༨ ལོར་མི་རིགས་ཁ་བྲལ་གྱི་ཟིང་ཆ་བསླངས་པ་དང་། ཕྱི་གྱར་ཁ་བྲལ་བར་ལྐོག་འབྲེ་བྱས་པ། ཆ་འཕྲིན་བརྒྱུད་ལམ་ཁག་ཏུ་ཐེངས་མང་པོར་སྤྱི་ཚོགས་བརྟན་བརླིང་ལ་གནོད་པའི་བརྗོད་བྱ་སྤེལ་བ་སོགས་ནག་ཉེས་ཁག་ ༤ བགྲང་ནས་ཁྲིམས་ཐག་བཅད་ཡོད་པ་དང་།  ཉིན་ ༡༠ ནང་ཚུད་དུ་ཁྲིམས་བཅད་དེར་ངོས་ལེན་ཡོད་མེད་མཚན་རྟགས་འགོད་དགོས་པའི་འགེང་ཤོག་ཅིག་སྤྲད་ཡོད་འདུག ཞོགས་ལྗང་གིས་སྐབས་དེ་རང་ལ་བསྐྱར་དུ་ཞུ་གཏུག་བྱ་རྒྱུ་ཡིན་སྐོར་བརྗོད་འདུག དེ་རྗེས་དུས་ཡུན་སྐར་མ་ ༤ ཙམ་གྱི་རིང་ལོ་ན་བཞི་ལ་སོན་མ་ཐག་པའི་ཁོ་རང་གི་བུ་ཆུང་ལ་ཐུག་འཕྲད་བྱེད་བཅུག་རྗེས་ཕྱིར་ཁྲིད་ཡོད་འདུག

ལྕོག་རི་དགོན་གྲོང་གཉིས་ནས་༧རྒྱལ་བའི་ཞབས་རིམ་གསོག་སྒྲུབ་དང་འབྲེལ་བའི་ཐོག་ནས། རྒྱ་གཞུང་ཉེན་རྟོག་པས་ཉིན་ཤས་གོང་ལྕོག་རི་དགོན་པའི་མཁན་པོ་དཔལ་དགའ་དང་དགེ་བཤེས་ཨོ་རྒྱན་རྣམ་གཉིས་འཇུ་བཟུང་བཙན་འཁྲིད་བྱས་འདུག

ཕྱི་ལོ་ ༢༠༡༦ ཟླ་ ༡ ཚེས་ ༢༥ ཉིན་ཁམས་དཀར་མཛེས་ཏྲེ་ཧོར་ལྕོག་རི་དགོན་དུ་ཏྲེ་ཧོར་སེར་སྐྱ་མི་མང་ཡོངས་ནས། ༸རྒྱལ་བའི་སྐུ་ཕྱྭའི་ཞབས་རིམ་རྒྱས་པ་ཞིག་ཚོགས་ཡོད་པའི་གནས་ཚུལ་རྣམས་བོད་ཕྱི་ནང་གཉིས་ཀྱི་སྤྱི་ཚོགས་དྲྭ་རྒྱའི་ཐོག་གང་སར་ཁྱབ་གདལ་དུ་ཕྱིན་ཡོད་པ་ལྟར། སྐབས་དེར་རྒྱ་ནག་གཞུང་གི་ཁ་ཐུག་དྲག་གནོན་བཀག་སྡོམ་རིགས་བྱས་མེད་པ་རེད། དེའི་རྗེས་ཕྱི་ལོ་ ༢༠༡༦ ཟླ་ ༡ ཚེས་ ༣༡ ཉིན་བྲག་མགོ་རྫོང་རིག་གནས་ཡུལ་སྐོར་ལས་ཁུངས་དང་བྲག་མགོ་རྫོང་སྤྱི་བདེ་ལས་ཁུངས། མི་རིགས་ཆོས་དོན་ལས་ཁུངས་བཅས་ཀྱིས་ཏཱ་ལའི་བླ་མའི་སྐུ་པར་སྒྲིག་གཤོམ་བྱས་པ་ནི་དྲིལ་བསྒྲགས་ལོག་པར་འགྲོ་བའི་དངོས་རྫས་ཡིན་པས་ཚོང་ཁང་དང་མི་མང་འདུ་འཛོམས་བྱ་སའི་སྤྱི་པའི་ཚོང་ར་བཅས་ཀྱི་ནང་སྒྲིག་གཤོམ་མི་ཆོག་པ་དང་། ཕྱི་ཟླ་ ༢ ཚེས་ ༢ སྔོན་དུ་རང་འགུལ་རང་རྫོང་རིག་གནས་ཁྲིམས་འཛིན་རུ་ཆེན་ཟེར་བར་སྤྲོད་དགོས་པ་མ་ཟད། དུས་ཚོད་ཕྱིར་འགྱངས་བྱེད་པ་དང་གཏན་ནས་མི་སྤྲོད་མཁན་ལ་ཐབས་ཤེས་དྲག་པོ་སྤྱད་ནས་རྩིས་ལེན་བྱེད་པ་དང་དོ་བདག་གི་མི་ལ་ཐག་གཅོད་ནན་མོ་བྱེད་རྒྱུ་ཡིན་སྐོར་ས་གནས་རྒྱ་གཞུང་འབྲེལ་ཡོད་ལས་ཁུངས་བཞིའི་ཐེལ་ཙེ་བརྒྱབ་སྟེ་བཙན་བཀའ་བཏང་ཡོད་པ་རེད།

ཉེ་ཆར་རྒྱ་གཞུང་གིས་ཞི་བའི་སྐད་འབོད་གོམ་བགྲོད་གནང་མཁན་རྔ་པ་ཀིརྟི་དགོན་པའི་གྲྭ་དགེ་འདུན་ཕུན་ཚོགས་དང་བློ་བཟང་སྐལ་བཟང་གཉིས་ལ་བཙོན་འཇུག་ཁྲིམས་བཅད་ཡོད་པ་མ་ཟད། གྲྭ་བློ་བཟང་དགེ་འཕེལ་དང་འབྲུག་སྒྲ་གཉིས་གློ་བུར་འཇུ་བཟུང་བཙན་འཁྲིད་བྱས་ཡོད་འདུག

འདི་ག་ལྟེ་གནས་ཁང་ལ་གནས་ཚུལ་འབྱོར་དོན། རྔ་པ་ཀིརྟི་དགོན་པའི་རང་ལོ་ ༡༨ ཡིན་པའི་གྲྭ་དགེ་འདུན་ཕུན་ཚོགས་ལགས་ལ། ཕྱི་ལོ་ ༢༠༡༥ ཟླ་ ༡༠ པའི་ཟླ་མཇུག་ཙམ་ལ་རྔ་པ་བོད་རིགས་རང་སྐྱོང་ཁུལ་གྱི་ཁོངས་གཏོགས་བཀྲ་ཤིས་གླིང་རྫོང་དུ་ལོ་ ༤ བཙོན་འཇུག་ཁྲིམས་ཐག་བཅད་ཡོད་པ་དང་མི་འགྱང་པར་ཟི་ཁྲོན་མེན་ཡཱང་བཙོན་ཁང་དུ་བསྐྱལ་རྒྱུ་ཡིན་འདུག ཡིན་ནའང་། ཁོང་ལ་ནག་ཉེས་ཅི་ཞིག་བཙུགས་པ་དང་ཁྲིམས་ཐག་ཇི་ལྟར་བཅད་ཡོད་མེད་ཀྱི་གནས་ཚུལ་ཁ་གསལ་ཤེས་རྟོགས་ཐུབ་ཀྱི་མེད་པ་རེད།

དེ་སྔོན་དགེ་འདུན་ཕུན་ཚོགས་ལགས་འཇུ་བཟུང་སྐོར་ལ་འདི་ག་ལྟེ་གནས་ཁང་གིས་གནས་ཚུལ་སྤེལ་ཡོད་པ་ལྟར། འདི་ལོའི་ཕྱི་ཟླ་ ༣ ཚེས་ ༨ ཉིན་ཁོང་གིས་༸གོང་ས་མཆོག་གི་སྐུ་པར་ཆེན་པོ་ཞིག་ཁ་བཏགས་སེར་པོ་ཞིག་གིས་ལྗིབས་ཏེ་མགོ་ཐོག་ཏུ་འཕྱར་ནས། “རྒྱལ་བ་རིན་པོ་ཆེ་བོད་ལ་ཕེབས་འཇུག་དགོས། བོད་ལ་རང་དབང་དང་འདྲ་མཉམ་དགོས།” ཞེས་སྐད་འབོད་བྱེད་བཞིན། རྔ་པ་རྫོང་མཁར་གྱི་གཞུང་ལམ་སྟེང་གོམ་བགྲོད་བྱས་སྐབས། རྒྱ་གཞུང་ཉེན་རྟོག་པས་འཇུ་བཟུང་བཙན་འཁྲིད་བྱས་ཡོད། དེ་རྗེས་ད་ལྟའི་བར་གར་ཡོད་ཅི་བྱུང་གི་གནས་ཚུལ་གཅིག་ཀྱང་ཤེས་རྟོགས་མ་བྱུང་བར་ལྷག་ཡོད་པ་རེད།

ཉེ་སྔོན་བཙོན་གྲོལ་བཏང་བའི་བོད་རིགས་རྩོམ་པ་པོ་སྐུ་ཞབས་སྒྲོལ་མ་སྐྱབས་ལགས་ཀྱིས་བཙོན་འོག་ཏུ་མཉམ་འབྲེལ་རྒྱལ་ཚོགས་ལ་ཕུལ་བའི་ཞུ་ཡིག་དེ་ཕྱི་ཕྱོགས་སུ་གསལ་འདོན་བྱེད་མཁན་སྐལ་བཟང་བསོད་ནམས་ལགས། གཟའ་མིག་དམར་ཉིན་བཙོན་གྲོལ་བཏང་སྟེ་ཕྱིར་རང་ཡུལ་དུ་འབྱོར་ཡོད་པ་དང་། གཟའ་ལྷག་པའི་ཉིན་ཆབ་སྲིད་བཙོན་ཟུར་རྩོམ་པ་པོ་སྐུ་ཞབས་སྒྲོལ་མ་སྐྱབས་ལགས་ཀྱང་ཆེད་དུ་ཁོང་ལ་འཚམས་འདྲི་བྱེད་དུ་སླེབས་ཡོད་འདུག

འདི་ག་ལྟེ་གནས་ཁང་ལ་གནས་ཚུལ་འབྱོར་དོན། ཕྱི་ལོ་ ༢༠༡༥ ཟླ་ ༡༠ ཚེས་ ༢༧ ཉིན། བོད་རིགས་ཆབ་སྲིད་བཙོན་པ་སྐལ་བཟང་བསོད་ནམས་ལགས་ཟི་ལིང་བཙོན་ཁང་ནས་གློད་གྲོལ་བཏང་སྟེ་ཕྱིར་རང་ཁྱིམ་དུ་འབྱོར་ཡོད་འདུག ཁོང་ནི་རྩོམ་པ་པོ་སྒྲོལ་མ་སྐྱབས་ལགས་ཀྱིས་བཙོན་འོག་ཏུ་མཉམ་འབྲེལ་རྒྱལ་ཚོགས་ལ་ཕུལ་བའི་ཞུ་ཡིག་དེ་ཕྱི་ཕྱོགས་སུ་གསལ་འདོན་བྱས་པར་བརྟེན་ནས། ཕྱི་ལོ་ ༢༠༠༦ ལོར་རྒྱ་གཞུང་གིས་འཇུ་བཟུང་ཐོག་རྒྱལ་ཁབ་ཀྱི་གསང་བ་ཕྱིར་བསྒྲགས་བྱས་པའི་ཉེས་མིང་བཀལ་ཏེ་ལོ་ ༡༠ ཕྱེད་ཀའི་བཙོན་འཇུག་ཁྲིམས་ཐག་བཅད་ནས། ཟི་ལིང་གྲོང་ཁྱེར་གྱི་བཙོན་ཁང་ནང་བཙོན་འཇུག་གིས་ད་ལྟའི་བར་མནར་གཅོད་མྱངས་དགོས་བྱུང་ཡོད། ཁྲིམས་བཅད་ལྟར་ན་ཁོང་གི་བཙོན་འཇུག་དུས་ཡུན་ད་དུང་རྫོགས་མེད་ཀྱང་། ལོ་གཅིག་གི་བཙོན་དུས་ཆགས་ཡང་བཏང་བའི་ཐོག་ནས་གློད་གྲོལ་ཐོབ་པ་ཞིག་ཡིན་འདུག

རྒྱ་གཞུང་གིས་བོད་རང་སྐྱོང་ལྗོངས་སུ་འབོད་པའི་ཁོངས་གཏོགས་སུ། འབྲི་རུ་རྫོང་ནི་དམིགས་བསལ་དམ་དྲག་བྱེད་བཞིན་པའི་ས་ཁུལ་ཞིག་ཆགས་ཡོད་སྟབས། དེ་གར་བྱུང་བཞིན་པའི་གནས་ཚུལ་མང་པོ་ཞིག་དུས་ཐོག་ཕྱི་ཕྱོགས་སུ་འབྱོར་ཐུབ་ཀྱི་མེད་པ་རེད། ཉེ་ཆར་ཤེས་རྟོགས་བྱུང་བ་ལྟར་ན་ས་གནས་དེ་གར་དགོན་པའི་ནང་བཙན་མ་ཕྱིར་འབུད་དང་། མང་ཚོགས་ཀྱི་ཁང་ཁྱིམ་དང་ས་ཞིང་བཙན་འཕྲོག་སོགས་ས་གནས་མང་ཚོགས་ལ་གཉའ་གནོན་གྱི་སྲིད་ཇུས་སྣ་ཚོགས་ཤིག་སྤེལ་བཞིན་ཡོད་འདུག

འདས་པའི་ལོ་འགའི་ནང་རྒྱ་གཞུང་གིས་འབྲི་རུ་རྫོང་ཁོངས་ཀྱི་དགོན་སྡེ་ཁག་མང་པོ་ཞིག་ནང་གྲྭ་བཙུན་རྣམས་ཕྱིར་འབུད་དང་། བོད་ཀྱི་ས་ཁུལ་གཞན་ནང་ཆོས་སློབ་གཉེར་ཆེད་བསྐྱོད་མཁན་གྲྭ་བཙུན་ཚོར་ཉེས་ཆད་དང་། བསམ་བཞིན་ཁོང་ཚོའི་ནང་མིའི་འཚོ་གནས་ལ་དཀའ་ངལ་བཟོ་བཞིན་ཡོད་པ་ལྟར། ཉེ་ཆར་འདི་ག་ལྟེ་གནས་ཁང་ལ་བསྐྱར་དུ་དེའི་སྐོར་གྱི་གནས་ཚུལ་འབྱོར་དོན། ཕྱི་ལོ་ ༢༠༡༥ ཟླ་ ༩ ཚེས་ ༢༧ ཉིན་ (བོད་ཟླ་ ༨ ཚེས་ ༡༤ ཉིན) ནས་མགོ་བཙུགས་ཏེ་ཉིན་གསུམ་རིང་། འབྲི་རུ་རྫོང་དཔོན་སངས་རྒྱས་བཀྲ་ཤིས་ཟེར་བ་དེ་རྒྱ་ཤོད་བན་དཀར་ཤང་གི་ཁོངས་སུ་ཡོད་པའི་བྱ་མདའ་དགའ་ལྡན་མཁའ་སྤྱོད་གླིང་བཙུན་དགོན་དུ་སླེབས་ནས། དགོན་པ་དེ་གར་བཙུན་མ་ ༢༠༠ ཙམ་ཡོད་པའི་གྲས་ནས། བཙུན་མ་ ༡༠༠ སླར་ཡང་ཕྱིར་ཕུད་བཏང་ཡོད་པ་དང་། དེར་མ་ཟད། ད་ལྟའི་ཆར་ཤུལ་དུ་བཙུན་མ་བརྒྱ་ཙམ་ཡོད་པའི་གྲས་ནས་ཀྱང་། རྒྱ་གཞུང་གི་ཆོག་མཆད་སྤྲད་དེ་སྒྲིག་མཐུན་སྒོ་ནས་དགོན་པར་ཚོགས་ཞུགས་ཆོག་པའི་བཙུན་མའི་ཞལ་གྲངས་ ༤༩ ལ་ཚད་བཀག་བཟོས་ནས། དེ་འཕྲོས་ཀྱི་བཙུན་མ་ ༥༡ རྣམས་ཚོགས་ཞུགས་ཀྱིས་ཆོས་སློབ་གཉེར་གྱི་ཐོབ་ཐང་མེད་པར་དགོན་པའི་འཛིན་སྐྱོང་ཁྱབ་ཁོངས་ཀྱི་ཚོང་ཁང་དང་མགྲོན་ཁང་སོགས་སུ་ངལ་རྩོལ་གྱི་ལས་ཀ་བྱེད་འཇུག་གིན་ཡོད་པ་རེད། ད་དུང་། རྒྱ་གཞུང་གི་ཆོག་མཆན་གཞིར་བཟུང་དགོན་པའི་ཚོགས་ཞུགས་ཁོང་སུ་ཡོད་པའི་བཙུན་མ་རྣམས་ཀྱང་། རང་ལོ་ལྔ་བཅུ་ལ་སོན་རྗེས་མུ་མཐུད་དགོན་པ་ནས་བཞུགས་མི་ཆོག་པར། ཐད་ཀར་རྒས་གསོ་ཁང་དུ་བསྐྱོད་དགོས་པའི་སྒྲིག་གཞི་བཟོ་ཡོད་འདུག