Tag: མཚོ་སྔོན།

རྒྱ་གཞུང་གིས་འཇུ་བཟུང་བཙོན་འཇུག་འོག་སྡུག་སྦྱོང་མནར་གཅོད་ཚད་མེད་བཏང་སྟེ་གཟུགས་པོ་ནད་གཅོང་བཟོས་ཡོད་པའི་ཆབ་སྲིད་བཙོན་ཟུར་རྒྱ་ཡེ་ཕུན་ཚོགས་ལགས་དུས་ཡུན་རིང་པོར་ནད་མནར་གྱིས་ཉེ་ཆར་འདས་གྲོངས་སུ་ཕྱིན་འདུག

འདི་ག་ལྟེ་གནས་ཁང་ལ་གནས་ཚུལ་འབྱོར་དོན། རང་ལོ་ ༨༤ སོན་པའི་ཆབ་སྲིད་བཙོན་ཟུར་རྒྱ་ཡེ་ཕུན་ཚོགས་ལགས་ཕྱི་ལོ་ ༢༠༡༦ ལོའི་ཟླ་ ༣ ཚེས་ ༢༡ གི་ཞོགས་པར་རྐྱེན་འདས་སུ་གྱུར་ཡོད། ཁོང་རྒྱ་གཞུང་གིས་འཇུ་བཟུང་བཙོན་འཇུག་སྐབས་རང་ལོ་ ༦༨ ཡིན་འདུག ལོ་གཉིས་རིང་འཇུ་བཟུང་བཀག་ཉར་སྐབས་སྡུག་སྦྱོང་མནར་གཅོད་ཚད་མེད་བཏང་ནས་གཟུགས་པོ་གཅོང་ནད་བཟོས་ཏེ་ཕྱིར་རང་ཕྱིན་དུ་སློག་རྗེས་ལོ་བཅུའི་རིང་བཟང་བཙོན་ལྟ་རྟོགས་འོག་འཚོ་བ་བསྐྱལ་དགོས་བྱུང་མཐར། ཉེ་ཆར་གཟུགས་པོའི་གནས་སྟངས་ཇེ་ཞན་ཇེ་སྡུག་ཏུ་གྱུར་ཏེ་འདས་གྲོངས་ཕྱིན་ཡོད་པ་རེད།

རྒྱ་གཞུང་གིས་བོད་ས་བཅད་བགོས་ཀྱིས་མི་སེར་སྤེལ་བཞིན་པའི་ལྟའི་དབང་བསྒྱུར་སྲིད་འཛིན་ས་ཁོངས་ལྟར་བྱས་ན། མཚོ་སྔོན་ཞིང་ཆེན་ཡུལ་ཤུལ་ཁུལ་ནང་ཆེན་རྫོང་ཀ་གཞུང་ཡུལ་ཚོས་བཙན་དྲག་གྱི་སྒོ་ནས། ས་གནས་བོད་རིགས་མང་ཚོགས་ལ་རྒྱ་དམར་གྱི་དམག་བཙུགས་དུས་ཆེན་སྲུང་བརྩི་བཅུག་ཡོད་པར་མ་ཟད། མང་ཚོགས་ཀྱི་དུས་སྟོན་དེ་སྲུང་བརྩི་བྱས་པའི་རྣམ་འགྱུར་ཡག་པོ་མེད་པར་ཁ་གཡར་ནས། མཚན་མོ་མང་ཚོགས་ཐོག་དམག་མི་མང་པོ་བཏང་སྟེ་གཅར་རྡུང་དྲག་གནོན་བྱས་པ་དང་། འབྲི་རུ་རྫོང་དུ་བཙོན་གྱིས་བོད་མི་ཚོར་བཙན་གྱིས་གཅན་གཟན་གྱི་པགས་རིགས་གྱོན་དགོས་པ་དང་དམར་གཞུང་ལ་བསྟོད་གླུ་ལེན་བཅུག་ཡོད་འདུག

ནམ་རྒྱུན་རྒྱ་གཞུང་གིས་བོད་རིགས་མང་ཚོགས་རྣམས་དམར་དམག་ལ་དགའ་མོས་ཡོད་སྐོར་གྱི་གནས་ཚུལ་རྫུན་སྒྲོག་དང་། རྒྱ་དམར་གྱི་དབང་བསྒྱུར་འོག་བོད་རིགས་མང་ཚོགས་ཀྱིས་བདེ་སྐྱིད་ཀྱི་འཚོ་བ་རོལ་བཞིན་པའི་རྣམ་འགྱུར་རྫུན་མ་དྲིལ་སྒྲོག་བྱ་ཐབས་སུ། ལོ་ལྟར་རྒྱ་དམར་གཞུང་འབྲེལ་དུས་སྟོན་ཁག་ལ་བོད་རིགས་མང་ཚོགས་རྣམས་ལ་བཙན་གྱིས་དུས་སྟོན་སྲུང་བརྩི་བྱེད་འཇུག་གི་ཡོད་པ་ལྟར། ཉེ་ཆར་ཡང་རྒྱ་གཞུང་གིས་བརྒྱད་གཅིག་དམག་བཙུགས་དུས་ཆེན་ཟེར་བ་སྲུང་བརྩི་དགོས་པའི་བཀའ་རྒྱ་བཏང་སྟེ། བོད་ཀྱི་ས་ཁུལ་སོ་སོའི་ནང་རྒྱ་དམར་བཅིངས་འགྲོལ་དམག་(དམར་དམག)བཙུགས་ནས་ལོ་ ༨༨ འཁོར་བའི་དུས་ཆེན་བརྩི་སྲུང་གོ་སྒྲིག་གིས་རིག་རྩེད་སྤྲོ་ཚོགས་བསྡུས་ཐོག ས་གནས་བོད་མི་རྣམས་བཙན་གྱིས་མཉམ་ཞུགས་བྱེད་འཇུག་གིན་ཡོད་འདུག

ཁ་སང་གཟའ་ཕུར་བའི་དགོང་དྲོར་བོད་མདོ་ཁམས་སྒ་སྐྱེ་རྒུ་མདོ་གྲོང་ཁྱེར་དུ་གྲྭ་བསོད་ནསམ་སྟོབས་རྒྱལ་ལགས་ཀྱིས་རང་ལུས་མེར་བསྲེགས་ཀྱིས་ཞི་བའི་ངོ་རྒོལ་གནང་ཡོད་འདུག ད་ལྟའི་ཆར་ཁོང་འདས་གྲོངས་ཕྱིན་ཡོད་མེད་གྱི་གནས་ཚུལ་ཤེས་རྟོགས་ཐུབ་མི་འདུག

འདི་ག་ལྟེ་གནས་ཁང་ལ་གནས་ཚུལ་འབྱོར་དོན། ཕྱི་ལོ་ ༢༠༡༥ ཟླ་ ༧ ཚེས་ ༩ གཟའ་ཕུར་བུའི་ཉིན་རྒྱབ་ཆུ་ཚོད་ ༦ པ་ཡས་མས་ཤིག་ལ། བོད་མདོ་ཁམས་སྒ་སྐྱེ་རྒུ་མདོ་གྲོང་ཁྱེར་གྱི་གེ་སེར་ཐང་ཆེན་དུ་བོད་རིགས་གྲྭ་པ་ཞིག་གིས། རྒྱ་གཞུང་གིས་བོད་ཐོག་འཛིན་པའི་དྲག་གནོན་དབང་སྒྱུར་གྱི་མི་སེར་སྤེལ་བའི་སྲིད་ཇུས་ལ་ཞི་བའི་ངོ་རྒོལ་གྱིས་རང་ལུས་མེར་བསྲེགས་བཏང་ཡོད་འདུག

རང་ལུས་མེར་བསྲེགས་གཏོང་མཁན་གྲྭ་པ་དེའི་མཚན་ལ་བསོད་ནམས་སྟོབས་རྒྱལ་ཟེར་བ་དང་། ད་ལྟ་ཁོང་རང་ལོ་ ༢༦ ཡིན་འདུག ཁོང་གི་ཕ་ཡུལ་ཁམས་ནང་ཆེན་རྫོང་ཁོངས་ནས་ཡིན་པ་དང་། ཕའི་མིང་ལ་ནང་ཆེན་བཀྲ་ཤིས་ཟེར་གྱི་འདུག ཁོང་གིས་དེ་སྔོན་ཁམས་སྡེ་དགེ་རྫོང་གསར་དགོན་དུ་ལོ་བདུན་རིང་སློབ་གཉེར་གནང་མྱོང་ཡོད་འདུག ད་ལྟའི་ཆར་ས་གནས་སུ་དམ་དྲག་ཤུགས་ཆེན་པོ་བྱེད་ཀྱིན་ཡོད་སྟབས། ཁོང་འདས་གྲོང་ཕྱིན་ཡོད་མེད་སོགས་ཀྱི་གནས་ཚུལ་གང་ཡང་ཤེས་རྟོགས་ཐུབ་ཀྱི་མེད་པ་རེད། ཁོང་གིས་རང་ལུས་མེར་བསྲེགས་གཏོང་ཡུལ་ས་གནས་ནི། རྒྱ་གཞུང་གིས་བོད་ས་བཅད་བགོས་ཀྱི་ད་ལྟའི་མི་སེར་སྤེལ་བའི་དབང་སྒྱུར་ས་ཁོངས་ལྟར་བྱས་ན། མཚོ་སྔོན་ཞིང་ཆེན་ཡུལ་ཤུལ་བོད་རིགས་རང་སྐྱོང་ཁུལ་ཡུལ་ཤུལ་རྫོང་གྲོང་ཁྱེར་ཁུལ་དུ་ཡོད་པའི་གེ་སེར་ཐང་ཆེན་ཟེར་བའི་འདུ་ཐང་དེའི་གཡས་ཟུར་ཡིན་འདུག

འདི་ག་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གིས། རྒྱ་གཞུང་གིས་བོད་ནང་དམར་ཤོག་མང་ཚོགས་ལམ་ཕྱོགས་སློབ་གསོ་ཟེར་བའི་ཆབ་སྲིད་ལས་འགུལ་སྤེལ་ཏེ། བོད་ཀྱི་ས་ཁུལ་ཁག་ནང་བོད་མིའི་སྤྱི་དམངས་ཁེ་དབང་དང་འགྲོ་བ་མིའི་ཐོབ་ཐང་རྩ་གཏོར་གཏོང་བཞིན་པའི་ཐད། <<ལམ་ཕྱོགས་དམར་པོ>> ཞེས་པའི་ཉམས་ཞིབ་སྙན་ཐོ་ཞིག་ཉེ་ཆར་བོད་ཡིག་ཐོག་འདོན་སྤེལ་བྱས་ཡོད།

ཞི་ཅིན་ཕིན་རྒྱ་ནག་དམར་ཤོག་སྲིད་འཛིན་ཆགས་རྗེས། རྒྱ་ནག་ཁྱོན་ཡོངས་ལ་དམར་ཤོག་ ‘མང་ཚོགས་ལམ་ཕྱོགས’ ཟེར་བའི་མའོ་ཡི་འཐབ་རྩོད་ལས་འགུལ་གྱི་མེ་རོ་བསྐྱར་དུ་གསོས་ཤིང་། ‘སྟག་དང་སྦྲང་མ་མཉམ་རྡུང’ གི་རུལ་སུངས་ངོ་རྒོལ་གྱི་འབོད་ཚིག་འོག་དམར་ཤོག་མཐོ་རིམ་དཔོན་རིགས་ ༡༠༠ ལྷག་ལ་ཞིབ་བཤེར་ཁྲིམས་གཅོད་དང་། ‘སྤྱོད་ངན་བཞི།’ ‘དབུས་དམར་ཤོག་གི་གཏན་འབེབས་བརྒྱད’ སོགས་ཀྱི་དྲིལ་བསྒྲགས་འོག གཞི་རིམ་དམར་ཤོག་ལས་བྱེད་པར་ཞིབ་བཤེར་གྱིས་དམར་གཙང་སྲིད་གཙང་ཟེར་བའི་ལས་འགུལ་སྤེལ་ཏེ། དམར་ཤོག་དང་མང་ཚོགས་བར་ཤ་དང་རུས་པ་ལྟ་བུའི་འབྲེལ་བ་ཟབ་མོ་འཛུགས་རྒྱུ་ཡིན་པ་དང་། ཁྲིམས་སྐྱོང་སྤྱི་ཚོགས་འཛུགས་རྒྱུ་ཡིན་སྐོར་དྲིལ་སྒྲོག་ཤུགས་ཆེན་བྱས་ཡོད། ཡིན་ནའང་། འདས་པའི་ལོ་ ༣ ལྷག་གི་ཞིས་ཅིན་ཕིན་གྱིས་སྲིད་བསྐྱངས་དུས་ཡུན་རིང་། དམར་ཤོག་ ‘མང་ཚོགས་ལམ་ཕྱོགས’ དང་འབྲེལ་ཏེ་བོད་ནང་དམ་དྲག་སྲིད་ཇུས་མང་པོ་ལག་བསྟར་བྱས་ཏེ། བོད་མིའི་འགྲོ་བ་མིའི་ཐོབ་ཐང་གནས་སྟངས་སྔར་བའི་ཇེ་ཞན་ཇེ་སྡུག་ཏུ་ཕྱིན་ཡོད།

བོད་མདོ་སྨད་བིས་མདོ་དགོན་ཆེན་གྱི་གྲྭ་བརྩོན་འགྲུས་དང་ཚུལ་ཁྲིམས་གཉིས་རྒྱ་གཞུང་གིས་འཇུ་བཟུང་བཀག་ཉར་འོག་འདས་པའི་ཟླ་ ༥ རིང་གར་སོང་ཆ་མེད་དུ་གྱུར་མཐར། འདི་ལོའི་ཕྱི་ཟླ་ ༤ ཚེས་ ༡༨ ཉིན་མཚོ་སྔོན་ཞིང་ཆེན་མཚོ་ཤར་ས་ཁུལ་ཡ་རྫི་རྫོང་མི་དམངས་ཁྲིམས་ཁང་གིས་ཁོང་གཉིས་ལ་ལོ་ ༣ རེའི་བཙོན་འཇུག་ཁྲིམས་ཐག་བཅད་དེ། ནང་མི་ཉེ་འབྲེལ་ཚོར་ཐུག་འཕྲད་ཐེངས་གཅིག་བྱེད་བཅུག་རྗེས་སླར་ཡང་གར་ཡོད་གནས་སྟངས་ཆ་མེད་དུ་གྱུར་ཡོད་འདུག

ཉེ་ཆར་མཚོ་སྔོན་ཞིང་ཆེན་རྨ་ལྷོ་བོད་རིགས་རང་སྐྱོང་ཁུལ་འབྲིང་རིམ་མི་དམངས་ཁྲིམས་ཁང་ཟེར་བས། ཐུན་རིན་རྫོང་དང་རྩེ་ཁོག་རྫོང་གཉིས་སུ་ཁྲིམས་ར་བསྡུས་ཏེ། བོད་མི་གཅོད་པ་རྒྱལ་དང་ལྕགས་ཐར། ནམ་མཁའ་བྱམས། མགོན་བྷེ་བཅས་བཞི་ལ་ “རྒྱལ་ཁབ་ཁ་བྲལ་སྐུལ་སློང་” གི་བསྙད་བཙུགས་ཏེ།  ལོ་ ༦  ནས་ ༣ བར་གྱི་དུས་བཀག་བཙོན་འཇུག་གི་ཁྲིམས་ཐག་བཅད་ཡོད་འདུག