རྒྱ་གཞུང་ཉེན་རྟོག་པས་བོད་མི་གྲྭ་པ་ཞིག་གིས་རང་ལུས་མེར་བསྲེག་བྱ་འདུན་གྱི་བསམ་ཚུལ་བཅངས་པ་དང་། བོད་ཀྱི་རྒྱལ་དར་མདུན་དུ་པར་བརྒྱབ་པའི་དོགས་གཞིའི་འོག་འཇུ་བཟུང་བཙན་འཁྲིད་བྱས་ཡོད་འདུག
འདི་ག་ལྟེ་གནས་ཁང་ལ་གནས་ཚུལ་འབྱོར་དོན། ཕྱི་ལོ་ ༢༠༡༦ ཟླ་ ༥ ཚེས་ ༡༦ ཉིན་གྱི་བོད་ནང་གི་ཕྱི་དྲོ་ཆུ་ཚོད་ ༨ དང་ཕྱེད་ཀ་ཡས་མས་སུ། བོད་མདོ་ཁམས་རྟའུ་ཉི་མཚོ་དགོན་པའི་ནང་བསྟན་གཙུག་ལག་སློབ་གྲྭའི་གྲྭ་བྱམས་པ་དགེ་ལེགས་ལགས་རྟའུ་རྣམ་རྒྱལ་མཆོད་རྟེན་གྱི་གླིང་འགྲམ་ན་འགྲོ་བཞིན་པའི་སྐབས་སུ། གློ་བུར་དུ་རྒྱ་ནག་གཞུང་ཉེན་རྟོག་པས་རྒྱུ་མཚན་སོགས་ཅི་ཡང་གསལ་བཤད་མ་བྱས་པར་འཛིན་བཟུང་བཙན་ཁྲིད་བྱས་ཡོད་འདུག
དེ་བཞིན། བོད་ནང་གི་མཚན་མོ་ཆུ་ཚོད་ ༡༠ ཙམ་ལ་ཉེན་རྟོག་པ་ཕོན་ཆེན་པོ་གྲྭ་བྱམས་པ་དགེ་ལེགས་ཀྱི་གྲྭ་ཤག་ནང་དུ་འཛུལ་ནས་བསྔོག་བཤེར་བྱས་ཡོད་པ་མ་ཟད། མཚན་མོ་དེར་ཉེན་རྟོག་པས་གྲྭ་བྱམས་པ་དགེ་ལེགས་དར་རྩེ་མདོའི་བཙོན་ཁང་དུ་འཁྲིད་ནས་བཀག་བྱས་ཡོད་འདུག