Tag: རྔ་པ།

རྒྱ་གཞུང་གི་དྲག་གནོན་དབང་བསྒྱུར་ལ་ཞི་བའི་ངོ་རྒོལ་གྱིས་རང་ལུས་མེར་བསྲེག་གནང་སྟེ་འདས་གྲོངས་ཕྱིན་པའི་རྒྱལ་གཅེས་དཔའ་བོ་གཉིས་ཀྱི་སྐུ་པར་ཉེ་ཆར་ལག་སོན་བ་ལྟར་འདོན་སྤེལ་བྱས་ཡོད།

ད་ལྟའི་བར་བོད་ནང་དུ་རང་ལུས་མེར་བསྲེག་གནང་སྟེ། རྒྱ་གཞུང་གིས་བོད་ཐོག་འཛིན་པའི་དྲག་གནོན་དབང་བསྒྱུར་གྱི་མི་སེར་སྤེལ་བའི་སྲིད་ཇུས་ལ་ཞི་བའི་ངོ་རྒོལ་བྱེད་མཁན་རྒྱལ་གཅེས་དཔའ་བོ་དཔའ་མོ་ ༡༤༥ དང་། བཙན་བྱོལ་སྤྱི་ནང་རང་ལུས་མེར་བསྲེག་གནང་མཁན་རྒྱལ་གཅེས་བོ་ ༨ བཅས། ཁྱོན་བོད་ཕྱི་ནང་གཉིས་སུ་རང་ལུས་མེར་བསྲེགས་གནང་མཁན་ ༡༥༣ བྱུང་ཡོད།

ཡིན་ནའང་། རྒྱ་གཞུང་གིས་བོད་ནང་དུ་དམག་མི་ཕོན་ཆེན་པོ་འགྲེམས་འཇོག་གིས་བོད་མིའི་འགྲོ་བསྐྱོད་ལ་བཀག་སྡོམ་ནན་མོ་བྱེད་ཀྱིན་པ་མ་ཟད། ཁ་པར་དང་དྲ་རྒྱ་སོགས་བརྒྱུད་ལམ་ཁག་ལའང་ཞིབ་བཤེར་ནན་མོ་བྱས་ཏེ་བཀག་སྡོམ་བྱེད་ཀྱིན་ཡོད་སྟབས། བོད་ནང་བྱུང་བའི་རང་ལུས་མེར་བསྲེག་གྱི་གནས་ཚུལ་རྣམས་དུས་ཐོག་ཤེས་རྟོག་ཐུབ་དཀའ་བ་དང་། ཁོང་ཚོའི་པར་རིས་དང་ལོ་རྒྱུས་ཞིབ་ཕྲ་ཤེས་རྒྱུ་ཧ་ཅང་ཁག་པོ་ཆགས་ཡོད། ལྷག་པར་དུ་རང་ལུས་མེར་བསྲེག་གནང་མཁན་ཁག་ཅིག་གིས་རང་ལུས་མེར་བཏང་བའི་རྗེས་སུ། ཁོང་ཚོ་འཆི་གསོན་གྱི་གནས་ཚུལ་ཡང་ཤེས་རྟོགས་མི་ཐུབ་པར་གྱུར་ཡོད།

རྔ་པ་ཀིརྟི་དགོན་པའི་གྲྭ་བློ་མིག་ལགས་ལོ་གཅིག་ལྷག་རིང་རྒྱ་གཞུང་ཉེན་རྟོག་པས་འཇུ་བཟུང་བཀག་ཉར་བྱས་མཐར། དེ་རིང་ལུང་དགུ་རྫོང་དུ་ཁོང་ལ་ལོ་བདུན་དང་ཕྱེད་ཀའི་བཙོན་འཇུག་ཁྲིམས་ཐག་བཅད་འདུག

འདི་ག་ལྟེ་གནས་ཁང་ལ་གནས་ཚུལ་འབྱོར་དོན། རྒྱ་གཞུང་གིས་རྩོམ་པ་པོ་གྲྭ་བློ་མིག་ལགས་རྒྱལ་ཁབ་ཀྱི་གསང་བ་ཕྱིར་བསྒྲགས་དང་རྒྱལ་ཁབ་ཁ་བྲལ་གྱི་བྱ་སྤྱོད་སྤེལ་བའི་ཉེས་འཛུགས་འོག ཡོངས་བསྒྲགས་མ་ཡིན་པར་གསང་བའི་ཐོག་ལོ་ ༧ ཕྱེད་ཀའི་དུས་བཀག་བཙོན་འཇུག་གི་ཁྲིམས་ཐག་བཅད་ཡོད་པ་དང་། ཁོང་ལ་ཁྲིམས་གཅོད་སྐབས་ནང་མིར་བརྡ་ལན་གང་བཏང་མེད་པ་མ་ཟད། ཁྲིམས་ཐག་ག་དུས་བཅད་མིན་སྐོར་ཡང་ནང་མིར་གསལ་བཤད་བྱས་མེད་པ་རེད།

དེའང་ཕྱི་ལོ་ ༢༠༡༦ ཟླ་ ༥ ཚེས་ ༩ ཉིན། རྔ་པ་བོད་རིགས་རང་སྐྱོང་ཁུལ་ལུང་དགུ་རྫོང་མི་དམངས་ཁྲང་ཟེར་བས་རྩོམ་པ་པོ་གྲྭ་བློ་བཟང་འཇམ་དབྱངས་ལགས་དང་ཁོང་གི་ནང་མི་ཆུ་ཚོད་ཕྱེད་ཀའི་ཐུག་འཕྲད་བྱེད་བཅུག་ཡོད་པ་དང་། སྐབས་དེར་རྩོམ་པ་པོ་ཁོང་གིས་ནང་མིར་བཤད་རྒྱུར་རྒྱ་གཞུང་གིས་ཁོང་ལ་ཕྱི་ལོ་ ༢༠༠༩ ནས་ ༢༠༡༥ བར་རྒྱལ་ཁབ་ཀྱི་གསང་བ་ཕྱིར་བསྒྲགས་བྱེད་མཁན་དང་རྒྱལ་ཁབ་ཁ་བྲལ་གྱི་བྱ་སྤྱོད་སྤེལ་བའི་ནག་ཉེས་བཙན་འགེལ་བྱས་ཡོད་ཀྱང་། ཁོང་རང་ངོས་ནས་ངོས་ལེན་རྩ་བ་ནས་བྱས་མེད་སྐོར་བརྗོད་ཡོད་འདུག

བོད་མདོ་སྨད་མཛོད་དགེ་ཨ་སྐྱིད་སེ་ར་དགོན་པའི་གླིང་སྐོར་དུ། བོད་རིགས་བུད་མེད་བསོད་ནམས་འཚོ་ཡིས་རང་ལུས་མེར་བསྲེགས་གནང་སྟེ། རྒྱ་གཞུང་གིས་བོད་ཐོག་འཛིན་པའི་དྲག་གནོན་དབང་བསྒྱུར་གྱི་མི་སེར་སྤེལ་བའི་སྲིད་ཇུས་ལ་ཞི་བའི་ངོ་རྒོལ་གྱིས་འདས་གྲོངས་ཡོད་འདུག ཡིན་ནའང་། རྒྱ་གཞུང་གིས་བོད་ནང་དུ་དམ་དྲག་ཤུགས་ཆེན་བྱས་ཡོད་སྟབས་ད་ལྟའི་བར་དུ་གནས་ཚུལ་ཕྱི་ལོག་ཏུ་ཐོན་ཐུབ་མེད་པ་རེད།

འདི་ག་ལྟེ་གནས་ཁང་ལ་གནས་ཚུལ་འབྱོར་དོན། ཕྱི་ལོ་ ༢༠༡༦ ཟླ་ ༣ ཚེས་ ༢༣ རེས་གཟའ་ལྷག་པའི་བོད་ནང་གི་ཉིན་གུང་ཆུ་ཚོད་ ༡༢ དང་ཕྱེད་ཀ་ཙམ་གྱི་སྟེང་། ཁོ་མོའི་ཁྱོ་ག་སྐལ་བཟང་རྒྱ་མཚོ་དང་ཁོ་མོ་གཉིས་མཉམ་དུ་དགོན་པའི་གླིང་སྐོར་ལ་སྐོར་བར་བསྐྱོད་བཞིན་པའི་སྐབས། ཁོ་མོས་རང་ཉིད་ཀྱི་ཁྱོ་ག་ལ་ཁྱེད་རང་སྔོན་དུ་ག་ལེར་སོང་དང་། ང་རང་འཁོར་ཁང་དུ་གཅིག་སོང་ནས་ཡོང་དགོས་ཞེས་ལབ་ཡོད་པ་དང་། དེ་ནས་དུས་ཡུན་སྐར་མ་ཁ་ཤས་ཀྱི་རྗེས་སུ་དགོན་པའི་གྲྭ་ཕྲུག་ཅིག་གིས་རང་ལུས་མེར་བསྲེགས་གནང་སོང་ཞེས་སྐད་ཅོར་བརྒྱབ་ཡོད་པ་དང་། སྐབས་དེར་ཁོ་མོའི་ཁྱོ་གས་ཕྱིར་མིག་ལྟ་དུས་ཁོང་མོས་རང་ལུས་མེར་བསྲེགས་གནང་བཞིན། བོད་ལ་རང་དབང་དགོས། ༧རྒྱལ་བ་ཡིད་བཞིན་ནོར་བུ་ཕྱིར་བོད་ལ་ཕེབས་དགོས། ཞེས་འབོད་ཚིག་སྒྲོག་བཞིན་རྒྱུགས་ཡོང་གིན་ཡོད་འདུག སྐབས་དེར་གྲྭ་ཕྲུག་དེ་དང་ཁྱོ་ག་སྐལ་བཟང་རྒྱ་མཚོ་གཉིས་ཁོང་མོའི་ལུས་སྟེང་གི་མེ་གསོད་ཐབས་བྱས་ཡོད་པ་དང་། དེ་རྗེས་དགོན་པ་དེར་ཡོད་པའི་སྤུན་མཆེད་དགེ་འདུན་པ་ཚུལ་ཁྲིམས་ལགས་ཀྱང་སླེབས་ཏེ་རོགས་རམ་གྱིས་རླངས་འཁོར་ཞིག་ནང་བཞག་སྟེ་དགོན་པའི་བླ་མའི་གཟིམ་ཆུང་དུ་ཁྱེར་ཡོང་ཡོད་པ་དང་། དེ་དུས་ཀྱང་ཁོང་མོས་གོང་གསལ་འབོད་ཚིག་དང་གསོལ་འདེབས་ཤུགས་དྲགས་གནང་ཡོད་འདུག དེ་རྗེས་དགོན་པའི་གཟིམ་ཁང་ནས་སྨན་ཁང་དུ་འཁྱེར་རྩིས་ཀྱིས་དགོན་འདབས་སུ་སླེབས་སྐབས་འདས་གྲོངས་ཕྱིན་ཡོད་འདུག

མི་སྒེར་ཁེར་རྐྱང་གིས་ཞི་བའི་ངོ་རྒོལ་གོམ་བགྲོན་མཁན་གྲྭ་བློ་བཟང་བསྟན་པ་ལགས། ཉེ་ཆར་ལོ་གཉིས་ཀྱི་བཙོན་དུས་གཙང་སྟེ་ཟི་ཁྲོན་ཁྲིན་ཏུའུ་ནར་མ་སོན་པའི་ན་གཞོན་གྱི་བཙོན་ཁང་ཞིག་ནས་གློད་གྲོལ་བཏང་ཡོད་འདུག

ཕྱི་ལོ་ ༢༠༡༦ ཟླ་ ༥ ཚེས་ ༥ ཉིན། བོད་མདོ་སྨད་རྔ་པ་ཀིརྟི་དགོན་པའི་གྲྭ་བློ་བཟང་བསྟན་པ་ལགས། ལོ་གཉིས་ཀྱི་བཙོན་འཇུག་དུས་ཡུན་གཙང་སྟེ་ཕྱིར་གློད་ཡོད་འདུག ཉེ་སྔོན་བོད་ནང་མི་སྒེར་རྐྱང་པས་ལག་ཏུ་༧གོང་ས་མཆོག་གི་སྐུ་པར་འཕྱར་བཞིན་ཁྲོམ་གཞུང་དུ་ཞི་བའི་ངོ་རྒོལ་གོམ་བགྲོད་བྱེད་མཁན་མང་པོ་བྱུང་དང་འབྱུང་བཞིན་པ་ལྟར། ཁོང་གིས་ཕྱི་ལོ་ ༢༠༡༤ ཟླ་ ༤ ཚེས་ ༢༦ ཉིན་རྔ་པ་རྫོང་མཁར་གྱི་གཞུང་ལམ་སྟེང་། ལག་གཉིས་ཀྱིས་༧གོང་ས་མཆོག་གི་སྐུ་པར་མགོ་ལ་འཕྱར་ཏེ་༼བོད་ལ་རང་དབང་དགོས། རྒྱལ་བ་རིན་པོ་ཆེ་བོད་ལ་ཕེབས་འཇུག་དགོས།༽ ཞེས་ཞི་བའི་ངོ་རྒོལ་གོམ་བགྲོད་བྱས་པར་བརྟེན་ནས། རྒྱ་གཞུང་ཉེན་རྟོག་པས་འཇུ་བཟུང་བཙན་འཁྲིད་ཀྱིས་ཡུན་རིང་གར་སོང་ཆ་མེད་ཀྱི་གནས་སྟངས་ཆགས་མཐར། ལོ་དེའི་ཕྱི་ཟ་ ༡༡ ཚེས་ ༧ ཉིན་གྱི་སྔ་དྲོ་རྔ་པ་རང་སྐྱོང་ཁུལ་གྱི་སྲིད་འཛིན་ལྟེ་གནས་གྲོང་ཁྱེར་འབར་ཁམས་འབྲིང་རིམ་མི་དམངས་ཁྲིམས་ཁང་ཟེར་བས། ༼རྒྱལ་ཁབ་ལ་ངོ་ལོག་གི་བྱ་སྤྱོད་སྤེལ་བའི་༽ཉེས་མིང་འོག་ལོ་ ༢ ཀྱི་དུས་བཀག་བཙོན་འཇུག་གི་ཁྲིམས་ཐག་བཅད་ཡོད་པ་རེད། སྐབས་དེར་ནང་མིར་བརྡ་བརྒྱབ་སྟེ་ཁྲིམས་རར་ཟུར་ཉན་དུ་ཡོང་བཅུག་ཡོད་པ་ཙམ་ལས། སོ་སོ་སྒེར་དང་ནང་མིའི་ངོས་ནས་ཁྲིམས་རྩོད་པ་གླས་ཏེ་ཉེས་པ་དག་འབུལ་གྱི་གོ་སྐབས་གང་ཡང་སྤྲད་མེད་པ་རེད།

ཟླ་འདིའི་ཕྱི་ཚེས་ ༡ ཉིན་བོད་མདོ་སྨད་རྔ་པ་རྨེའུ་རུ་མའི་བུ་མོ་མང་དགའ་ལགས་ཀྱིས། ༧གོང་ས་མཆོག་གི་སྐུ་པར་འཕྱར་ཏེ་རྒྱ་གཞུང་གི་སྲིད་ཇུས་ལ་ཞི་བའི་ངོ་རྒོལ་བྱས་སྐབས། ས་གནས་ཉེན་རྟོག་པས་འཇུ་བཟུང་བཙན་འཁྲིད་ཀྱིས་གར་སོང་ཆ་མེད་དུ་གྱུར་འདུག

འདི་ག་ལྟེ་གནས་ཁང་ལ་གནས་ཚུལ་འབྱོར་དོན། ཕྱི་ལོ་ ༢༠༡༦ ཟླ་ ༣ ཚེས་ ༡ ཉིན་གྱི་བོད་ནང་གི་ཆུ་ཚོད་ ༡༢ ཙམ་ལ། བོད་མདོ་སྨད་རྔ་པ་རྫོང་རྨེའུ་རུ་མ་ཡུལ་ཚོའི་རུ་ཆེན་དང་པོའི་བཀྲ་ཤིས་གཡས་འཁྱིལ་ཚང་གི་བུ་མོ་མང་དགའ་ལགས་ཀྱིས། རྨེའུ་རུ་མའི་ཡུལ་ཚོའི་ཁྲོམ་ལམ་དུ་༸གོང་ས་སྐྱབས་མགོན་ཆེན་པོ་མཆོག་གི་སྐུ་པར་ཞིག་ལག་གཉིས་ཀྱིས་གནམ་ལ་འཕྱར་ཏེ་གོམ་བགྲོད་ཀྱིས། རྒྱ་ནག་གཞུང་གིས་བོད་ཐོག་འཛིན་པའི་དྲག་གནོན་དབང་བསྒྱུར་གྱི་མི་སེར་སྤེལ་བའི་སྲིད་ཇུས་ལ་ངོ་རྒོལ་སྐད་འབོད་གནང་ཡོད་ཅིང་། དེ་མ་ཐག་ས་གནས་ཉེན་རྟོག་པ་ཚོས་ཁོང་མོ་འཛིན་བཟུང་བཙན་ཁྲིད་བྱས་ཡོད་འདུག ད་ལྟའི་ཆར་གནས་སྟངས་གང་ཡང་ཤེས་རྟོགས་མི་ཐུབ་པར་གར་སོང་ཆ་མེད་དུ་གྱུར་ཡོད།

ཉེ་ཆར་རྒྱ་གཞུང་གིས་ཞི་བའི་སྐད་འབོད་གོམ་བགྲོད་གནང་མཁན་རྔ་པ་ཀིརྟི་དགོན་པའི་གྲྭ་དགེ་འདུན་ཕུན་ཚོགས་དང་བློ་བཟང་སྐལ་བཟང་གཉིས་ལ་བཙོན་འཇུག་ཁྲིམས་བཅད་ཡོད་པ་མ་ཟད། གྲྭ་བློ་བཟང་དགེ་འཕེལ་དང་འབྲུག་སྒྲ་གཉིས་གློ་བུར་འཇུ་བཟུང་བཙན་འཁྲིད་བྱས་ཡོད་འདུག

འདི་ག་ལྟེ་གནས་ཁང་ལ་གནས་ཚུལ་འབྱོར་དོན། རྔ་པ་ཀིརྟི་དགོན་པའི་རང་ལོ་ ༡༨ ཡིན་པའི་གྲྭ་དགེ་འདུན་ཕུན་ཚོགས་ལགས་ལ། ཕྱི་ལོ་ ༢༠༡༥ ཟླ་ ༡༠ པའི་ཟླ་མཇུག་ཙམ་ལ་རྔ་པ་བོད་རིགས་རང་སྐྱོང་ཁུལ་གྱི་ཁོངས་གཏོགས་བཀྲ་ཤིས་གླིང་རྫོང་དུ་ལོ་ ༤ བཙོན་འཇུག་ཁྲིམས་ཐག་བཅད་ཡོད་པ་དང་མི་འགྱང་པར་ཟི་ཁྲོན་མེན་ཡཱང་བཙོན་ཁང་དུ་བསྐྱལ་རྒྱུ་ཡིན་འདུག ཡིན་ནའང་། ཁོང་ལ་ནག་ཉེས་ཅི་ཞིག་བཙུགས་པ་དང་ཁྲིམས་ཐག་ཇི་ལྟར་བཅད་ཡོད་མེད་ཀྱི་གནས་ཚུལ་ཁ་གསལ་ཤེས་རྟོགས་ཐུབ་ཀྱི་མེད་པ་རེད།

དེ་སྔོན་དགེ་འདུན་ཕུན་ཚོགས་ལགས་འཇུ་བཟུང་སྐོར་ལ་འདི་ག་ལྟེ་གནས་ཁང་གིས་གནས་ཚུལ་སྤེལ་ཡོད་པ་ལྟར། འདི་ལོའི་ཕྱི་ཟླ་ ༣ ཚེས་ ༨ ཉིན་ཁོང་གིས་༸གོང་ས་མཆོག་གི་སྐུ་པར་ཆེན་པོ་ཞིག་ཁ་བཏགས་སེར་པོ་ཞིག་གིས་ལྗིབས་ཏེ་མགོ་ཐོག་ཏུ་འཕྱར་ནས། “རྒྱལ་བ་རིན་པོ་ཆེ་བོད་ལ་ཕེབས་འཇུག་དགོས། བོད་ལ་རང་དབང་དང་འདྲ་མཉམ་དགོས།” ཞེས་སྐད་འབོད་བྱེད་བཞིན། རྔ་པ་རྫོང་མཁར་གྱི་གཞུང་ལམ་སྟེང་གོམ་བགྲོད་བྱས་སྐབས། རྒྱ་གཞུང་ཉེན་རྟོག་པས་འཇུ་བཟུང་བཙན་འཁྲིད་བྱས་ཡོད། དེ་རྗེས་ད་ལྟའི་བར་གར་ཡོད་ཅི་བྱུང་གི་གནས་ཚུལ་གཅིག་ཀྱང་ཤེས་རྟོགས་མ་བྱུང་བར་ལྷག་ཡོད་པ་རེད།

ཉེ་ཆར་བོད་མདོ་སྨད་རྔ་པ་ཀིརྟི་དགོན་པའི་གྲྭ་བློ་བཟང་འཇམ་དབྱངས་དང་། རྔ་པ་སོ་རུ་སྡེ་བའི་འཕྲིན་ལས་དང་བློ་སངས་བཅས་ཀྱིས་རྔ་པ་རྫོང་མཁར་དུ་སྔ་ཕྱིར་ཞི་བའི་སྐད་འབོད་ངོ་རྒོལ་བྱས་པར་བརྟེན་ནསརྒྱ་གཞུང་གིས་འཇུ་བཟུང་བཙན་འཁྲིད་བྱས་ཡོད་པ་དང་། ད་ལྟའི་ཆར་ཁོང་ཚོའི་གནས་སྟངས་ག་འདྲ་ཆགས་ཡོད་མེད་ཀྱི་ཞིབ་ཕྲའི་གནས་ཚུལ་གང་ཡང་ཤེས་རྟོགས་ཐུབ་ཀྱི་མེད་པ་རེད།

འདི་ག་ལྟེ་གནས་ཁང་ལ་གནས་ཚུལ་འབྱོར་དོན། ཕྱི་ལོ་ ༢༠༡༥ ཟླ་ ༩ ཚེས་ ༢༣ ཉིན་གྱི་བོད་ནང་གི་ཕྱི་དྲོའི་ཆུ་ཚོད་བཞི་པ་ཙམ་ལ། བོད་མདོ་སྨད་རྔ་པ་ཀིརྟི་དགོན་པའི་གྲྭ་བློ་བཟང་འཇམ་དབྱངས་ལགས་ཀྱིས། ༼བོད་ལ་རང་དབང་དགོས། རྒྱལ་བ་རིན་པོ་ཆེ་བོད་ལ་གདན་འདྲེན་ཞུ་དགོས།༽ ཞེས་སྐད་འབོད་གནང་བཞིན། རྔ་པ་རྫོང་གི་དཔའ་བོའི་སྲང་ལམ་ནས་རྫོང་མཁར་གཞུང་ལམ་དུ་གོམ་བགྲོད་ཀྱིས་རྒྱ་གཞུང་ལ་ཞི་བའི་ངོ་རྒོལ་བྱས་ཡོད་ཀྱང་། དེ་མ་ཐག་དེར་ཡོད་རྒྱ་གཞུང་ཉེན་རྟོག་པ་ཚོས་ཁོང་འཇུ་བཟུང་བཙན་འཁྲིད་བྱས་ཡོད་འདུག དེ་རྗེས་ད་ལྟའི་བར་དུ་ཁོང་གི་གང་དུ་བཀག་ཉར་བྱས་ཡོད་མེད་དང་གནས་ཚུལ་ཅི་བྱུང་སྐོར་གྱི་ཞིབ་ཕྲའི་གནས་ཚུལ་གང་ཡང་ཤེས་རྟོགས་ཐུབ་ཀྱི་མེད་པ་རེད།

རྒྱ་གཞུང་ཉེན་རྟོག་པས་ཉེ་སྔོན་ཨ་མདོ་རྔ་པ་རྫོང་གི་ཁྲོམ་གཞུང་དུ་ཞི་བའི་སྐད་འབོད་བྱེད་མཁན་ཕོ་གསར་གཉིས་དང་། རང་ལོ་ ༦༤ ཡིན་པའི་རྒན་མོ་གུས་མོ་དང་། རང་ལོ་ ༢༩ ཡིན་བུད་མེད་རྡོ་རྗེ་སྒྲོལ་མ། དེ་བཞིན། དབྱར་གནས་གྲུབ་རྗེས་དབྱར་ས་ཚིགས་བརྒལ་བར་བསྐྱོད་མཁན་གྲྭ་པ་ལྔ་ལྷག་བཅས་བོད་མི་སྐོར་ཅིག་སྔ་ཕྱིར་འཇུ་བཟུང་བཙན་ཁྲིད་བྱས་ཡོད་འདུག

འདི་ག་ལྟེ་གནས་ཁང་ལ་གནས་ཚུལ་འབྱོར་དོན། ཕྱི་ལོ་ ༢༠༡༥ ཟླ་ ༩ ཚེས་ ༡༠ ཉིན་གུང་བོད་ཨ་མདོ་རྔ་པ་རྫོང་ཁྲོམ་གཞུང་དུ་ཕོ་གསར་གཉིས་ཀྱིས་རྒྱ་གཞུང་ལ་ངོ་རྒོལ་སྐད་འབོད་གནང་སྐབས། མི་མང་གིས་དེར་མཐུད་དེ་སྐད་འབོད་གནང་འདུག་ལ། སྐབས་དེར་ཉེན་རྟོག་པས་མི་མང་ཁྲོད་ནས་རང་ལོ་ ༦༤ ཡས་མས་ཡིན་པའི་རྒན་མོ་གུས་མོ་ལགས་འཛིན་བཟུང་བཙན་ཁྲིད་བྱས་ཡོད་པ་དང་། ད་ལྟའི་ཆར་ཁོང་མོ་གར་ཡོད་ཅི་བྱུང་གི་གནས་སྟངས་གསལ་པོ་ཤེས་རྟོགས་ཐུབ་ཀྱི་མེད་པ་རེད།

རྒྱ་གཞུང་གིས་བོད་ས་བཅད་བགོས་ཀྱིས་མི་སེར་སྤེལ་བའི་དྲག་གནོན་དབང་བསྒྱུར་གྱི་ད་ལྟའི་ཁོངས་ལྟར་བྱས་ན།  གུས་མོ་ལགས་ནི་ཟི་ཁྲོན་ཞིང་ཆེན་གྱི་ཁོངས་སུ་བཅད་བགོས་བྱས་ཡོད་པའི་རྔ་བ་བོད་རིགས་རང་སྐྱོང་ཁུལ་རྔ་པ་རྫོང་རོང་མཁར་སར་ཡུལ་ཚོའི་རུ་ཆེན་གཉིས་པའི་ཡིན་པ་དང་། ཁོ་མོའི་ཁྱོ་གའི་མིང་ནམ་མཁའ་སྐྱབས་ཟེར་པ་དང་། ཁོ་ཚོང་ལ་ནང་མི་དགུ་ཡོད་འདུག ཁོང་མོ་རྒྱུན་དུ་རྔ་པ་རྫོང་མཁར་གྱི་གཞུང་ལམ་གཙང་བཟོའི་ལས་ཀར་ཉིན་གླ་བྱེད་བཞིན་ཡོད་པ་རེད།  གཞན་ཉིན་དེའི་ངོ་རྒོལ་གནང་མཁན་གྱི་ཕོ་སར་གཉིས་དང་སྐབས་ཐོག་དེར་འཛིན་བཟུང་བྱས་པ་གཞན་ཁག་གི་མིང་དང་ཕ་ཡུལ་སོགས་ཤེས་རྟོགས་ཐུབ་ཀྱི་མེད་པ་རེད།

ཕྱི་ཚེས་བཅུ་ཉིན་རྔ་པ་རྫོང་མཁར་དུ་སྔར་ཕྱིར་རྔ་པ་ཀིརྟི་དགོན་པའི་གྲྭ་པ་གཉིས་ཀྱིས་ཞི་བའི་སྐད་འབོད་གོམ་བགྲོད་བྱས་པར། རྒྱ་གཞུང་གིས་ཁོང་གཉིས་འཇུ་བཟུང་བཙན་འཁྲིད་བྱས་ཡོད་པ་མ་ཟད། སྐབས་དེར་ཉེ་འཁོར་ནས་སྐད་འབོད་བྱེད་མཁན་ས་གནས་བོད་རིགས་མང་ཚོགས་རྣམས་ལའང་གཅར་རྡུང་འཇུ་བཟུང་བྱས་ཡོད་པ་རེད། རྒྱ་གཞུང་གིས་དྲག་པོའི་སྟོབས་ཤུགས་ཁོ་ནར་བརྟེན་ནས་བོད་མིའི་ཐོག་དྲག་གནོན་དབང་བསྒྱུར་བྱེད་ཤུགས་ཆེ་རུ་བཏང་བའི་རྐྱེན་གྱིས། བོད་ནང་དུ་མི་སྒེར་ཁེར་རྐྱང་ཁྲོམ་གཞུང་དུ་ཐོན་ཏེ་ཞི་བའི་ངོ་རྒོལ་སྐད་འབོད་བྱེད་མཁན་མང་རུ་འགྲོ་བཞིན་ཡོད།

འདི་ག་ལྟེ་གནས་ཁང་ལ་གནས་ཚུལ་འབྱོར་དོན། ཕྱི་ལོ་ ༢༠༡༥ ཟླ་ ༩ ཚེས་ ༡༠ ཉིན་གྱི་སྔ་དྲོ་རྔ་པ་ཀིརྟི་དགོན་གྱི་གྲྭ་ཨ་གྲགས་ལགས་ཀྱིས། “བོད་ལ་རང་དབང་དགོས། ༸རྒྱལ་བ་རིན་པོ་ཆེ་སྐུ་ཚེ་ཁྲི་ལོར་བརྟན་པར་ཤོག” ཅེས་རྒྱ་གཞུང་ལ་ངོ་རྒོལ་སྐད་འབོད་གནང་བཞིན་རྔ་པ་རྫོང་མཁར་གྱི་གཞུང་ལམ་དུ་ཞི་བའི་གོམ་བགྲོད་བྱས་ཡོད་པ་དང་། དེ་མ་ཐག་རྒྱ་གཞུང་ཉེན་རྟོག་པས་རིབ་རྡུང་བྱེད་བཞིན་ཁོང་འཇུ་བཟུང་བཙན་ཁྲིད་བྱས་ཡོད་པ་རེད། སྐབས་དེར་ཉེ་འཁོར་གྱི་བོད་མི་མང་པོས་སྐད་འབོད་བྱས་པར། ཉེན་རྟོག་པས་མི་མང་ལ་གང་བྱུང་གཅར་རྡུང་གཏོང་བཞིན་ཁག་ཅིག་འཛིན་བཟུང་བྱས་ཡོད་ཀྱང་། ད་ལྟའི་ཆར་མི་དེ་དག་གི་མིང་དང་ས་གནས་སོགས་ཞིབ་ཕྲ་ཤེས་རྟོགས་ཐུབ་ཀྱི་མེད་པ་རེད།

རྒྱ་གཞུང་གིས་བོད་ས་བཅད་བགོས་ཀྱིས་མི་སེར་སྤེལ་བའི་དྲག་གནོན་དབང་བསྒྱུར་ཀྱི་ད་ལྟའི་ས་ཁོངས་ལྟར་བྱས་ན། གྲྭ་ཨ་གྲགས་ལགས་ནི་ཟི་ཁྲོན་ཞིང་ཆེན་ཁོངས་སུ་བཅད་བགོས་བྱས་ཡོད་པའི་རྔ་བ་བོད་རིགས་རང་སྐྱོང་ཁུལ་རྔ་པ་རྫོང་ཆོས་རྗེ་མ་ཡུལ་ཚོའི་སོ་རུ་མ་སྡེ་བའི་ཡིན་པ་དང་། ད་ལྟ་ཁོང་རང་ལོ་ ༢༠ ཙམ་ཡིན་འདུག ཁོང་གི་ཕའི་མིང་ལ་འཛམ་པ་དང་མའི་མིང་ལ་རིག་ཁོ་ཟེར། ཁོང་ཚང་ལ་མིང་སྲིང་དགུ་ཡོད་པའི་ནང་ནས་ཆུང་ཤོས་དེ་ཡིན་པ་རེད། ཁོང་ཆུང་ཆུང་དུས་ནས་རྔ་པ་ཀིརྟི་དགོན་པར་ཆོས་ཞུགས་ཀྱིས་དེང་སྐབས་བློ་རིག་འཛིན་གྲྭ་ཡིན་འདུག ཕྱི་ལོ་ ༢༠༡༢ ལོར་ཁོང་གི་ཚ་བོ་གྲྭ་བློ་བཟང་ཚུལ་ཁྲིམས་ལའང་རང་ལུས་མེར་སྲེག་དང་འབྲེལ་བ་ཡོད་པའི་ཉེས་འཛུགས་བྱས་ཏེ་ལོ་ ༡༡ གི་བཙོན་འཇུག་ཁྲིམས་ཐག་བཅད་ནས་ད་ལྟའི་ཆར་བཙོན་ཁང་དུ་གནས་མུས་ཡིན་འདུག

དེ་རིང་གཟའ་ལྷག་པའི་ཉིན་བོད་མདོ་སྨད་རྔ་པ་རྫོང་མཁར་དུ། རྔ་པ་ཀིརྟི་དགོན་པའི་གྲྭ་འཇམ་དཔལ་རྒྱ་མཚོ་ལགས་ཀྱིས་ཞི་བའི་སྐད་འབོད་གོམ་བགྲོད་བྱས་པར། རྒྱ་གཞུང་ཉེན་རྟོག་པས་འཇུ་བཟུང་བཙན་འཁྲིད་བྱས་ཡོད་པ་རེད།

འདི་ག་ལྟེ་གནས་ཁང་དུ་གནས་ཚུལ་འབྱོར་དོན། ཕྱི་ལོ་ ༢༠༡༥ ཟླ་ ༩ ཚེས་ ༩ ཉིན་གྱི་བོད་ནང་གི་ཆུ་ཚོད་ ༡༢ ཙམ་ལ། བོད་མདོ་སྨད་རྔ་པ་ཀིརྟི་དགོན་པའི་གྲྭ་འཇམ་དཔལ་རྒྱ་མཚོ་ལགས་ཀྱིས། ལག་གཉིས་ཀྱིས་༸གོང་ས་མཆོག་གི་སྐུ་པར་ཆེན་པོ་ཞིག་མཐོན་པོར་བསྒྲེངས་ནས། བོད་ལ་རང་དབང་དགོས་པའི་ངོ་རྒོལ་སྐད་འབོད་གནང་བཞིན་རྔ་པ་རྫོང་མཁར་གྱི་གཞུང་ལམ་དུ་གོམ་བགྲོད་བྱས་ཡོད་ཀྱང་། སྐབས་དེར་ཉེན་རྟོག་པ་ཡོང་ནས་ཁོང་འཇུ་བཟུང་བཙན་ཁྲིད་བྱས་ཡོད་པ་དང་། ད་ལྟའི་ཆར་ཁོང་གར་ཡོད་ཅི་བྱུང་གི་གནས་ཚུལ་གང་ཡང་ཤེས་རྟོགས་མ་ཐུབ་ཀྱི་མེད་པ་རེད།