ཕྱི་ཚེས་བཅུ་ཉིན་རྔ་པ་རྫོང་མཁར་དུ་སྔར་ཕྱིར་རྔ་པ་ཀིརྟི་དགོན་པའི་གྲྭ་པ་གཉིས་ཀྱིས་ཞི་བའི་སྐད་འབོད་གོམ་བགྲོད་བྱས་པར། རྒྱ་གཞུང་གིས་ཁོང་གཉིས་འཇུ་བཟུང་བཙན་འཁྲིད་བྱས་ཡོད་པ་མ་ཟད། སྐབས་དེར་ཉེ་འཁོར་ནས་སྐད་འབོད་བྱེད་མཁན་ས་གནས་བོད་རིགས་མང་ཚོགས་རྣམས་ལའང་གཅར་རྡུང་འཇུ་བཟུང་བྱས་ཡོད་པ་རེད། རྒྱ་གཞུང་གིས་དྲག་པོའི་སྟོབས་ཤུགས་ཁོ་ནར་བརྟེན་ནས་བོད་མིའི་ཐོག་དྲག་གནོན་དབང་བསྒྱུར་བྱེད་ཤུགས་ཆེ་རུ་བཏང་བའི་རྐྱེན་གྱིས། བོད་ནང་དུ་མི་སྒེར་ཁེར་རྐྱང་ཁྲོམ་གཞུང་དུ་ཐོན་ཏེ་ཞི་བའི་ངོ་རྒོལ་སྐད་འབོད་བྱེད་མཁན་མང་རུ་འགྲོ་བཞིན་ཡོད།
འདི་ག་ལྟེ་གནས་ཁང་ལ་གནས་ཚུལ་འབྱོར་དོན། ཕྱི་ལོ་ ༢༠༡༥ ཟླ་ ༩ ཚེས་ ༡༠ ཉིན་གྱི་སྔ་དྲོ་རྔ་པ་ཀིརྟི་དགོན་གྱི་གྲྭ་ཨ་གྲགས་ལགས་ཀྱིས། “བོད་ལ་རང་དབང་དགོས། ༸རྒྱལ་བ་རིན་པོ་ཆེ་སྐུ་ཚེ་ཁྲི་ལོར་བརྟན་པར་ཤོག” ཅེས་རྒྱ་གཞུང་ལ་ངོ་རྒོལ་སྐད་འབོད་གནང་བཞིན་རྔ་པ་རྫོང་མཁར་གྱི་གཞུང་ལམ་དུ་ཞི་བའི་གོམ་བགྲོད་བྱས་ཡོད་པ་དང་། དེ་མ་ཐག་རྒྱ་གཞུང་ཉེན་རྟོག་པས་རིབ་རྡུང་བྱེད་བཞིན་ཁོང་འཇུ་བཟུང་བཙན་ཁྲིད་བྱས་ཡོད་པ་རེད། སྐབས་དེར་ཉེ་འཁོར་གྱི་བོད་མི་མང་པོས་སྐད་འབོད་བྱས་པར། ཉེན་རྟོག་པས་མི་མང་ལ་གང་བྱུང་གཅར་རྡུང་གཏོང་བཞིན་ཁག་ཅིག་འཛིན་བཟུང་བྱས་ཡོད་ཀྱང་། ད་ལྟའི་ཆར་མི་དེ་དག་གི་མིང་དང་ས་གནས་སོགས་ཞིབ་ཕྲ་ཤེས་རྟོགས་ཐུབ་ཀྱི་མེད་པ་རེད།
རྒྱ་གཞུང་གིས་བོད་ས་བཅད་བགོས་ཀྱིས་མི་སེར་སྤེལ་བའི་དྲག་གནོན་དབང་བསྒྱུར་ཀྱི་ད་ལྟའི་ས་ཁོངས་ལྟར་བྱས་ན། གྲྭ་ཨ་གྲགས་ལགས་ནི་ཟི་ཁྲོན་ཞིང་ཆེན་ཁོངས་སུ་བཅད་བགོས་བྱས་ཡོད་པའི་རྔ་བ་བོད་རིགས་རང་སྐྱོང་ཁུལ་རྔ་པ་རྫོང་ཆོས་རྗེ་མ་ཡུལ་ཚོའི་སོ་རུ་མ་སྡེ་བའི་ཡིན་པ་དང་། ད་ལྟ་ཁོང་རང་ལོ་ ༢༠ ཙམ་ཡིན་འདུག ཁོང་གི་ཕའི་མིང་ལ་འཛམ་པ་དང་མའི་མིང་ལ་རིག་ཁོ་ཟེར། ཁོང་ཚང་ལ་མིང་སྲིང་དགུ་ཡོད་པའི་ནང་ནས་ཆུང་ཤོས་དེ་ཡིན་པ་རེད། ཁོང་ཆུང་ཆུང་དུས་ནས་རྔ་པ་ཀིརྟི་དགོན་པར་ཆོས་ཞུགས་ཀྱིས་དེང་སྐབས་བློ་རིག་འཛིན་གྲྭ་ཡིན་འདུག ཕྱི་ལོ་ ༢༠༡༢ ལོར་ཁོང་གི་ཚ་བོ་གྲྭ་བློ་བཟང་ཚུལ་ཁྲིམས་ལའང་རང་ལུས་མེར་སྲེག་དང་འབྲེལ་བ་ཡོད་པའི་ཉེས་འཛུགས་བྱས་ཏེ་ལོ་ ༡༡ གི་བཙོན་འཇུག་ཁྲིམས་ཐག་བཅད་ནས་ད་ལྟའི་ཆར་བཙོན་ཁང་དུ་གནས་མུས་ཡིན་འདུག
གཞན་ཡང་། ཕྱི་ཚེས་ ༡༠ ཉིན་གྱི་བོད་ནང་གི་ཕྱི་དྲོའི་ཆུ་ཚོད་༦ པ་ཙམ་ལ་རྔ་པ་ཀིརྟི་དགོན་པའི་གྲྭ་བློ་བཟང་ལགས་ཀྱིས་ཀྱང་། “བོད་ལ་རང་དབང་དགོས། ༸རྒྱལ་བ་རིན་པོ་ཆེ་སྐུ་ཚེ་ཁྲི་ལོར་བརྟན་པར་ཤོག” ཅེས་རྒྱ་གཞུང་ལ་ངོ་རྒོལ་སྐད་འབོད་བྱེད་བཞིན་རྔ་པ་རྫོང་མཁར་གྱི་གཞུང་ལམ་དུ་ཞི་བའི་གོམ་བགྲོད་བྱས་སྐབས། དེ་མ་ཐག་རྒྱ་གཞུང་ཉེན་རྟོག་པས་འཛིན་བཟུང་བཙན་ཁྲིད་བྱས་ཡོད་པ་དང་། ད་ལྟའི་ཆར་ཁོང་གར་ཡོད་ཅི་བྱུང་གི་གནས་ཚུལ་ཤེས་རྟོགས་ཐུབ་ཀྱི་མེད་པ་རེད།
རྒྱ་གཞུང་གིས་བོད་ས་བཅད་བགོས་མི་སེར་སྤེལ་བའི་དྲག་གནོན་དབང་བསྒྱུར་གྱི་ད་ལྟའི་ས་ཁོངས་ལྟར་བྱས་ན།
གྲྭ་བློ་བཟང་ལགས་ནི་ཟི་ཁྲོན་ཞིང་ཆེན་ཁོངས་སུ་བཅད་བགོས་བྱས་ཡོད་པའི་རྔ་བ་བོད་རིགས་རང་སྐྱོང་ཁུལ་རྔ་པ་རྫོང་ཕྱུགས་ལས་འགབ་མ་ནས་ཡིན་པ་དང་། ད་ལྟ་ཁོང་རང་ལོ་ ༢༢ ཡིན་པ་རེད། ཁོང་གི་ཕའི་མིང་སྒ་ཚེ་དང་མའི་མིང་ལ་གནས་སྐྱིད་ཟེར། ཁོང་ཚང་ལ་མིང་སྲིང་མོ་ལྔ་ལྷག་ཡོད་པའི་ནང་ནས་བཞི་པ་ཡིན་འདུག ཁོང་ཆུང་ཆུང་དུས་ནས་རྔ་པ་ཀིརྟི་དགོན་པར་ཆོས་ཞུགས་ཀྱིས་དེང་སྐབས་བློ་རིག་འཛིན་གྲྭ་ཡིན་འདུག
དེ་བཞིན། གནས་ཚུལ་ཡོང་ཁུངས་ནས་བརྗོད་པ་ལྟར་ན། མི་སྐྱ་སྐོར་ཞིག་གིས་ཀྱང་ཕྱི་ཚེས་ ༡༠ ཉིན་གྱི་བོད་ནང་གི་ཉིན་གུང་ཙམ་ལ་རྔ་པ་རྫོང་མཁར་གྱི་ཁྲོམ་གཞུང་དུ་ངོ་རྒོལ་སྐད་འབོད་བྱེད་བཞིན་ཞི་བའི་གོམ་བགྲོད་བྱས་ཡོད་པའི་གནས་ཚུལ་འདུག་ཀྱང་ཞིབ་ཕྲ་ཤེས་རྟོགས་ཐུབ་མེད་པ་རེད།
འདས་པའི་བདུན་ཕྲག་གཅིག་ནང་བོད་མདོ་སྨད་རྔ་པ་རྫོང་ཐོག་ཏུ་བསྟུད་མར་ངོ་རྒོལ་སྐད་འབོད་གནང་མཁན་བཞི་བྱུང་ཡོད་པ་ཚང་མ་རྒྱ་གཞུང་ཉེན་རྟོག་པས་འཇུ་བཟུང་བཙན་ཁྲིད་བྱས་རྗེས་གང་དུ་བཀག་ཉར་བྱས་ཡོད་མེད་དང་གནས་སྟངས་ཅི་ཡིན་སོགས་གང་ཡང་ཤེས་རྟོགས་ཐུབ་ཀྱི་མེད་པར་གྱུར་ཡོད་པ་དང་། ཕྱི་ཚེས་ ༡༠ ཉིན་གྱི་བོད་བོད་ནང་གི་ཉིན་གུང་ཙམ་ནས་མི་སྒེར་གྱིས་བེད་སྤྱོད་བྱེད་བཞིན་པའི་དྲ་ལམ་ཡོངས་རྫོགས་བཅད་ཡོད་པ་དང་། ཁྲོམ་གཞུང་དང་ལམ་གྱི་བཞི་མདོ་ཁག་ལ་ཉེན་རྟོག་པའི་སྤྱི་སྤྱོད་རླངས་འཁོར་དང་རླངས་འཁོར་ཆུང་བ་མང་རུ་བཏང་ནས། ཉེན་རྟོག་པ་སྔར་བ་མང་པོ་ཁ་སྣོན་བྱས་ཡོད་པ་སོགས་དམ་བསྒྲགས་བྱེད་ཤུགས་ཇེ་ཆེར་བཏང་ཡོད་འདུག