འདི་ག་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་དུ་ཁུངས་ལྡན་གྱི་གནས་ཚུལ་འབྱོར་བ་ལྟར་ན་ཉེ་ལམ་ཕྱི་ཟླ་ ༡༠ པའི་ཟླ་འགོར་རང་ལོ་ ༣༤ ཡིན་པའི་རྔ་བ་ཀིརྟི་དགོན་པའི་གྲྭ་བློ་བཟང་ཆོས་འཕེལ་ལགས་རྒྱ་གཞུང་གིས་འཇུ་བཟུང་བཀག་ཉར་བྱས་ཡོད་འདུག ད་ལྟའི་ཆར་ཁོང་འདི་ལྟར་གློ་བུར་དུ་འཇུ་བཟུང་བྱེད་དགོས་པའི་རྒྱུ་མཚན་དང་གང་དུ་བཀག་ཉར་བྱས་ཡོད་མེད་སོགས་ཞིབ་ཕྲའི་གནས་ཚུལ་གང་ཡང་ཤེས་རྟོགས་མི་ཐུབ་པར་བཙན་དབང་འོག་གར་སོང་ཆ་མེད་དུ་གྱུར་བའི་གནས་བབ་འོག་ལྷག་ཡོད་འདུག སྤྱིར་གྲྭ་བློ་བཟང་ཆོས་འཕེལ་ལགས་དེ་སྔོན་ཕྱི་ལོ་ ༢༠༠༨ ལོར་ལྷ་ས་དང་ཕྱི་ལོ་ ༢༠༡༡ ལོར་རྔ་བ་ནས་ཐེངས་གཉིས་འཛིན་བཟུང་གིས་ཟླ་བ་བཞི་ལྷག་རེ་བཀག་ཉར་བྱས་མྱོང་འདུག
