རྒྱ་གཞུང་གིས་བོད་རང་སྐྱོང་ལྗོངས་ཀྱི་ལྷ་ས་གྲོང་ཁྱེར་ཁུལ་དུ། སློབ་ཆུང་ཨང་རྩིས་བསླབ་གཞི་རྒྱ་བསྒྱུར་བྱེད་ཀྱིན་པ་དེ་ནི། བོད་མི་རིགས་ཀྱི་ “ སྐད་ཡིག་གཞན་བསྒྱུར ” བྱེད་ཐབས་ཀྱི་སྲིད་ཇུས་ཤིག་རེད།
བརྒྱུད་ལམ་ཁག་ཏུ་གནས་ཚུལ་ཐོན་པ་ལྟར་ན། བོད་རང་སྐྱོང་ལྗོངས་སློབ་གསོ་སྡེ་ཁག་ཟེར་བས་ “སློབ་སྦྱོང་གི་ལས་ཆོད་མཐོར་འདེགས” དང་། བོད་ཡིག་ཐོག་ཨང་རྩིས་སོགས་སློབ་དེབ་ཁག་བོད་ནང་པར་བསྐྲུན་བྱེད་པར་ “བརྒྱུད་རིམ་རྙོག་འཛིན་ཆེ་བ” བཅས་ལ་ཁ་གཡར་ཏེ། བོད་རང་སྐྱོང་ལྗོངས་ཟེར་བའི་ས་ཁོངས་སུ་སློབ་ཆུང་ཨང་རྩིས་སློབ་དེབ་རྒྱ་བསྒྱུར་བྱས་ཡོད་སྟབས། བོད་རིགས་ཤེས་ལྡན་པའི་སྡེ་ལ་སེམས་འཚབ་བྱུང་སྟེ་སྐྱོན་བརྗོད་དང་གླེང་སློང་ཤུགས་ཆེན་པོ་བྱུང་བཞིན་ཡོད་ལ། ཁོང་ཚོས་རྩོམ་ཡིག་གི་ལམ་ནས་རང་ཉིད་ཀྱི་ལྟ་ཚུལ་དང་མངོན་འདོད་གསལ་འདོན་བྱས་ཡོད་པ་མ་ཟད། བོད་རང་སྐྱོང་ལྗོངས་ནང་མི་རིགས་སློབ་གསོའི་ཐད་ཆ་ཆེན་པོ་དེ་རིགས་ལ་འབྲེལ་ཡོད་སྡེ་ཁག་དོ་སྣང་གནང་དགོས་པའི་འབོད་སྐུལ་ཞུས་ཡོད་པ་རེད།