འགྲོ་བ་མིའི་ཐོབ་ཐང་།

13/05/2016 གསར་འགྱུར།

འདི་ག་ལྟེ་གནས་ཁང་གིས་རྒྱ་ནག་གཞུང་ཚབ་གི་བྱ་སྤྱོད་དེར་ངོ་རྒོལ་ཡོད།

འཇར་མན་གྲོས་ཚོགས་ཀྱི་འགྲོ་བ་མིའི་ཐོབ་ཐང་ཚོགས་ཆུང་གི་ཚོགས་གཙོ་སྐུ་ཞབས་བྷ་རན་ཌི་ལགས་ཀྱི་འདྲ་པར།

འདི་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གི་ངོས་ནས། འཇར་མན་གྲོས་ཚོགས་འཐུས་མི་དང་འགྲོ་བ་མིའི་ཐོབ་ཐང་དོན་གཉེར་བ་སྐུ་ཞབས་མའེ་ཀེལ་བྷ་རན(Michael Brand)ལགས་ལ་རྒྱ་གཞུང་གིས་གནོན་ཤུགས་སྤྲད་པའི་བྱ་སྤྱོད་དེར་མཐའ་གཅིག་ཏུ་ངོ་རྒོལ་ཡོད།

རྒྱལ་སྤྱིའི་སྤྱི་ཚོགས་ཀྱི་ངོས་ནས་རྒྱ་གཞུང་གིས་འཇར་མན་གྲོས་ཚོགས་འཐུས་མིར་ཚུལ་མིན་གྱི་གནོན་ཤུགས་སྤྲད་པའི་བྱ་སྤྱོ་དེར་སྐྱོན་བརྗོད་དྲག་པོ་བཏང་ཡོད་པ་མ་ཟད། བྱ་སྤྱོད་དེས་བོད་གཙོས་རྒྱ་ནག་སྐམ་ས་ཆེན་པོ་ནང་དང་། དེ་བཞིན། རྒྱལ་སྤྱིའི་སྒང་འགྲོ་བ་མིའི་ཐོབ་ཐང་བརྡལ་བཤིག་གཏོང་ཐབས་ཐད་རྒྱ་གཞུང་གིས་འདུན་པ་དང་ཧམ་སེམས་འཆང་བཞིན་པ་གསལ་སྟོན་བྱས་ཡོད།

འདི་ག་ལྟེ་གནས་ཁང་གི་ངོས་ནས་རྒྱ་གཞུང་གིས་བོད་གཙོས་རྒྱལ་ཁབ་ཕྱི་ནང་ཀུན་དུ་འགྲོ་བ་མིའི་ཐོབ་ཐང་རྡོལ་གཏོང་བཞིན་པའི་བྱ་སྤྱོད་དེར། རྒྱལ་སྤྱིའི་སྤྱི་ཚོགས་ཀྱིས་ངོ་རྒོལ་བྱ་དགོས་པའི་འབོད་སྐུལ་ཞུ་རྒྱུ་ཡོད།

14/03/2016 གསར་འགྱུར།

ཆབ་སྲིད་བཙོན་པའི་གནས་ཚུལ་སྐོར་གྱི་དྲ་རྒྱ་དབུ་འབྱེད་གསར་འགོད་གསལ་བསྒྲགས།

དེ་རིང་འདི་ག་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གི་ངོས་ནས། བོད་ནང་གི་ཆབ་སྲིད་བཙོན་པའི་གནས་ཚུལ་སྐོར་ལ་དབྱིན་ཡིག་གི་དྲ་རྒྱ་ལེགས་གྲུབ་ཀྱིས་དབུ་འབྱེད་ཐུབ་པ་བྱུང་བར་དགའ་སྤྲོ་སྐྱེ་བཞིན་ཡོད། ཕྱི་ལོ་ ༢༠༡༦ ཟླ་ ༣ ཚེས་ ༡༤ ནི་ཉིན་མོ་གལ་ཆེན་པོ་ཞིག་ཆགས་ཡོད་དེ། ༢༠༠༨ ལོར་བོད་ས་ཡོངས་སུ་ས་བྱི་ཞི་རྒོལ་ཆེན་མོ་བྱུང་ནས་ལོ་བརྒྱད་འཁོར་བའི་ཉིན་མོ་ཆགས་ཀྱི་ཡོད། ༢༠༠༨ ལོ་ནས་བཟུང་བོད་ནང་སྔར་ལས་ལྷག་པར་རྒྱ་གཞུང་གིས་བོད་མི་མང་པོ་འཇུ་བཟུང་བཙན་འཁྲིད་དང་གར་སོང་ཆ་མེད། སྡུག་སྦྱོང་ནར་གཅོད། ཁྲིམས་གཅོད་བཙོན་འཇུག དེ་བཞིན། བཙོན་འོག་ཏུ་འདས་གྲོངས་འགྲོ་བཞིན་པ་བཅས་ཀྱི་གནས་སྟངས་མཚམས་མ་ཆད་པར་མུ་མཐུད་བྱུང་དང་འབྱུང་བཞིན་ཡོད། ༢༠༠༨ ལོར་བོད་ས་ཡོངས་སུ་ས་བྱི་ཞི་བའི་ངོ་རྒོལ་ཆེན་མོ་བྱུང་དགོས་དོན་ནི། རྒྱ་གཞུང་གིས་བོད་ཐོག་འཛིན་པའི་དྲག་གནོན་དབང་བསྒྱུར་གྱི་མི་སེར་སྤེལ་བའི་སྲིད་ཇུས་ལག་བསྟར་གྱིས། བོད་མིའི་ཆོས་དང་རིག་གཞུང་། སྐད་ཡིག ཁོར་ཡུག འཚོ་གནས་བཅས་བརྡལ་བཤིག་བཏང་སྟེ་བོད་མིའི་ངོ་བོ་རྩ་བརླག་དང་། བོད་མིའི་གཞི་རྩའི་འགྲོ་བ་མིའི་ཐོབ་ཐང་དང་རང་དབང་མཐའ་དག་བཙན་འཕྲོག་བྱེད་བཞིན་པ་བཅས་ལ་ཐུག་ཡོད། ཆབ་སྲིད་བཙོན་པའི་གནས་ཚུལ་སྐོར་གྱི་དྲ་རྒྱ་འདི་བརྒྱུད་ནས། རྒྱལ་སྤྱིའི་སྒང་འགྲོ་བ་མིའི་ཐོབ་ཐང་ཐད་ཕྱག་ལས་གནང་མཁན་གྱི་གཞུང་དང་གཞུང་འབྲེལ་མ་ཡིན་པའི་ཚོགས་སྡེ། ཉམས་ཞིབ་པ་བཅས་ལ་དུས་ཐོག་བོད་ནང་གི་ཆབ་སྲིད་བཙོན་པའི་སྐོར་གྱི་གནས་ཚུལ་ཁ་གསལ་དང་ཁུངས་ལྡན་སྒོ་ནས་མཁོ་འདོན་བྱེད་ཐུབ་པར་ངོས་འཛིན་བྱེད་ཀྱི་ཡོད། དྲ་རྒྱ་འདིའི་ནང་འདི་ག་ལྟེ་གནས་ཁང་གི་ཆབ་སྲིད་བཙོན་པའི་མིང་ཐོ་གཞིར་བཟུང་། བོད་ནང་ཆབ་སྲིད་བཙོན་པ་རྣམས་ཀྱི་ལོ་རྒྱུས་གནས་ཚུལ་མཁོ་འདོན་དང་། རྒྱ་གཞུང་གིས་གསར་དུ་འཇུ་བཟུང་བྱས་པའི་ཆབ་སྲིད་བཙོན་པའི་མིང་ཐོ་དང་གནས་ཚུལ་དུས་ཐོག་དྲ་རྒྱའི་སྒང་གསར་འཇུག་བྱེད་ཀྱིན་ཡོད། དེ་བཞིན།…

19/02/2016 གསར་འགྱུར། / ལོ་འཁོར་སྙན་ཐོ།

༢༠༡༥ ལོའི་བོད་ནང་གི་འགྲོ་བ་ཐོབ་ཐང་གནས་སྟངས་ལོ་འཁོར་སྙན་ཐོ།

འདི་ག་ལྟེ་གནས་ཁང་གིས་ལོ་ལྟར་བོད་ནང་གི་འགྲོ་བ་མིའི་ཐོབ་ཐང་གནས་སྟངས་ཐད་ལོ་འཁོར་སྙན་ཐོ་རེ་འདོན་བཞིན་པ་ལྟར། ཕྱི་ལོ་ ༢༠༡༥ ལོའི་བོད་ནང་གི་འགྲོ་བ་མིའི་ཐོབ་ཐང་གནས་སྟངས་སྐོར་གྱི་ལོ་འཁོར་སྙན་ཐོ་དེ་བཞིན། ཕྱི་ལོ་ ༢༠༡༦ ཕྱི་ཟླ་ ༢ ཚེས་ ༡༩ ཉིན། བཞུགས་སྒར་རྡ་སའི་གངས་སྐྱིད་བོད་ཀྱི་དཔེ་མཛོད་ཚོགས་ཁང་དུ་བོད་ཡིག་དང་དབྱིན་ཡིག རྒྱ་ཡིག་བཅས་ཡིག་རིགས་གསུམ་གྱི་ཐོག་ནས་འགྲེམས་སྤེལ་བྱས་ཡོད། འདི་ལོའི་སྙན་ཐོའི་ནང་བོད་ནང་གི་ཆོས་ལུགས་དད་མོས་ལ་དམ་དྲག་དང་། བོད་མི་སྒེར་གྱི་རང་དབང་བཙན་འཕྲོག བོད་ཀྱི་རང་བྱུང་ཁོར་ཡུག བོད་ནང་གི་སྤྱི་དམངས་དང་ཆབ་སྲིད་ཐོབ་ཐང་གནས་སྟངས། རྒྱལ་སྤྱིའི་སྤྱི་ཚོགས་དང་འབྲེལ་བའི་བོད་ཀྱི་གནས་བབས་བཅས་དོན་ཚན་ཁག་ལྔ་ཐོག་ནས། ཕྱི་ལོ་ ༢༠༡༥ ལོར་རྒྱ་གཞུང་གིས་བོད་ནང་གི་འགྲོ་བ་མིའི་ཐོབ་ཐང་དང་གཞི་རྩའི་རང་དབང་ཁག་སྔར་ལྷག་རྡོག་རོལ་བཏང་ཡོད་པའི་གནས་སྟངས་གསལ་འདོན་བྱས་ཡོད། འདི་ག་ལྟེ་གནས་ཁང་གི་ཤེས་རྟོགས་བྱུང་བའི་གྲངས་འབོར་གཞིར་བཟུང་ལྟར་ན། ད་ལྟའི་ཆར་བོད་ནང་དུ་ཁྱོན་བསྡོམས་ཆབ་སྲིད་བཙོན་པ་གྲངས་ ༢༠༨༡ ཡོད་པ་དང་། དེའི་ཁྲོད་གྲྭ་བཙུན་གྲངས་ ༩༦༧ ཡོད། ཕྱི་ལོ་ ༢༠༡༥ ལོ་གཅིག་པུར་འཇུ་བཟུང་བཙོན་འཇུག་བྱས་པ་མི་གྲངས་ ༦༨ ཡོད། དེ་བཞིན། ཕྱི་ལོ་ ༢༠༡༤ ཕྱི་ཟླ་ ༩ ནས་ད་ལྟའི་བར་བོད་ནང་རང་ལུས་མེར་བསྲེགས་གཏོང་མཁན་ ༡༡ དང་། ཕྱི་ལོ་ ༢༠༡༥ ལོ་གཅིག་པུར་མི་ ༧ བྱུང་འདུག གཞན་ཡང་འདི་ལོར་བོད་ཡུལ་རྔ་པ་དང་ལི་ཐང་། དཀར་མཛེས་བཅས་ཀྱི་གཙོས་བོད་ཀྱི་ས་ཁུལ་ཁག་ནང་མི་སྒེར་རྐྱང་པ་ཁྲོམ་གཞུང་དུ་ཐོན་ནས་ཞི་བའི་སྐད་འབོད་ངོ་རྒོལ་བྱེད་མཁན་དམིགས་བསལ་ཤུགས་ཆེ་རུ་བྱུང་ཡོད། ལྷག་པར་དུ་རྒྱ་གཞུང་གིས་རྒྱལ་ཁབ་བདེ་འཇགས་དང་འཇིགས་སྐུལ་རིང་ལུགས་བཀག་སྡོམ་ལ་ཁ་གཡར་ཏེ་ནང་དོན་གསལ་ཁ་མེད་པའི་ཁྲིམས་འདྲ་མིན་གཏན་འབེབས་བྱས་ཐོག དོན་དངོས་ཐོག་མང་ཚོགས་ཀྱི་ཆོས་དད་དང་འགྲོ་བསྐྱོད། མི་སྒེར་གྱི་རང་དབང་བཅས་བརྒལ་བཤིག་གཏོང་ཐབས་སུ་བེད་སྤྱོད་བྱེད་ཀྱིན་ཡོད་པ་སོགས་ཐད་ཉམས་ཞིབ་ཀྱིས་གསལ་འདོན་བྱས་ཡོད། གནས་ཚུལ་ཞིབ་རྒྱས་མཁྱེན་འདོད་ཡོད་རིགས་ནས་གཤམ་འཁོད་དྲ་ཐག་བརྒྱུད་ནས་སྙན་ཐོ་ཆ་ཚང་ལྟ་ཀློག་བྱ་ཐུབ།

10/07/2015 གསར་འགྱུར།

བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ཁང་གིས་རྒྱ་གཞུང་གིས་རྒྱལ་སྲུང་བཅའ་ཁྲིམས་གསར་པ་གཏན་འབེབས་ཐད་སྐྱོན་བརྗོད་བསྒྲགས་གཏམ།

བོད་མདོ་སྨད་མཚོ་སྔོན་ཞིང་ཆེན་མཚོ་ལྷོ་ཁུལ་མང་ར་རྫོང་མགོ་མང་ཞང་ཐོག་ཏུ། རྒྱ་གཞུང་དྲག་ཆས་དམག་མིས་བོད་མིའི་མཐོང་ལམ་དུ་རྔམས་སྟོན་འཇིགས་སྐུལ་བྱེད་བཞིན་པ།པར་དབང་། (Frederic J. Brown/AFP/Getty Images)

འདི་ག་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གི་ངོས་ནས། ཕྱི་ལོ་ ༢༠༡༥ ཟླ་ ༧ ཚེས་ ༡ ཉིན་རྒྱ་གཞུང་གིས་གཏན་འབེབས་ལག་བསྟར་བྱས་པའི་རྒྱལ་སྲུང་བཅའ་ཁྲིམས་གསར་པ་དེའི་ཐད་བློ་འཚབ་ཆེན་པོ་བྱེད་བཞིན་ཡོད། མ་འོངས་པར་རྒྱ་གཞུང་གིས་བཅའ་ཁྲིམས་གསར་པ་དེ་བེད་སྤྱད་ནས། སྔར་ནས་བོད་ནང་འགྲོ་བ་མིའི་ཐོབ་ཐང་བརྡལ་བཤིག་གཏོང་བཞིན་པའི་གནས་སྟངས་དེ་སྔར་བར་ཛ་དྲག་ཏུ་འགྲོ་སྲིད་པར་ངོས་འཛིན་བྱེད་བཞིན་ཡོད།

རྒྱ་ནག་གི་རྒྱལ་སྲུང་བཅའ་ཁྲིམས་གསར་པ་དེ་ཡིས། འགྲོ་བ་མིའི་ཐོབ་ཐང་དང་ཁྲིམས་ཀྱི་དབང་བསྒྱུར། དེ་བཞིན། གཞན་པའི་རྒྱལ་ཁབ་དང་མི་རིགས་ཀྱི་བདེ་དོན་ཐད་བསམ་ཤེས་གུ་ཡངས་གང་ཡང་བྱས་མེད་པ་དང་། དེར་མ་ཟད་རྒྱལ་སྲུང་བཅའ་ཁྲིམས་གསར་པ་དེར་སྤྱི་བཤད་རང་བཞིན་དང་གསལ་ཁ་མེད་པའི་ཐ་སྙད་རིགས་བེད་སྤྱོད་བྱས་ཏེ། རྒྱ་གཞུང་གིས་མ་འོངས་པར་གདོང་གཏད་དགོས་པ་དང་རྩོད་ལེན་དགོས་རིགས་གྱི་གནས་ཚུལ་མཐའ་དག་རྒྱལ་ཁབ་ཀྱི་བདེ་འཇགས་དང་འབྲེལ་བའི་ཉེན་ཁར་བརྩིས་ཡོད། དེ་ནི་སྔར་ཁུངས་མ་འཁྱོལ་བའི་སྲིད་ཇུས་དེ་མུ་མཐུད་མཇུག་སྐྱོང་བྱ་ཐབས་ཤིག་རེད། རྒྱ་གཞུང་གིས་ཞི་བའི་སྒོ་ནས་གནད་དོན་རྣམས་ཐག་གཅོད་ཡོང་ཐབས་བྱེད་ཀྱིན་མེད་པར། རྒྱ་ནག་ནང་གི་གནད་དོན་མཐའ་དག་སྔར་བའི་ཛ་དྲག་ཏུ་གཏོང་བཞིན་ཡོད།

04/07/2015 གསར་འགྱུར།

བོད་ནང་དམར་ཤོག་མང་ཚོགས་ལམ་ཕྱོགས་ལས་འགུལ་སྐོར་ལ་ཉམས་ཞིབ་སྙན་ཐོ་ཞིག་འདོན་སྤེལ།

འདི་ག་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གིས། རྒྱ་གཞུང་གིས་བོད་ནང་དམར་ཤོག་མང་ཚོགས་ལམ་ཕྱོགས་སློབ་གསོ་ཟེར་བའི་ཆབ་སྲིད་ལས་འགུལ་སྤེལ་ཏེ། བོད་ཀྱི་ས་ཁུལ་ཁག་ནང་བོད་མིའི་སྤྱི་དམངས་ཁེ་དབང་དང་འགྲོ་བ་མིའི་ཐོབ་ཐང་རྩ་གཏོར་གཏོང་བཞིན་པའི་ཐད། <<ལམ་ཕྱོགས་དམར་པོ>> ཞེས་པའི་ཉམས་ཞིབ་སྙན་ཐོ་ཞིག་ཉེ་ཆར་བོད་ཡིག་ཐོག་འདོན་སྤེལ་བྱས་ཡོད།

ཞི་ཅིན་ཕིན་རྒྱ་ནག་དམར་ཤོག་སྲིད་འཛིན་ཆགས་རྗེས། རྒྱ་ནག་ཁྱོན་ཡོངས་ལ་དམར་ཤོག་ ‘མང་ཚོགས་ལམ་ཕྱོགས’ ཟེར་བའི་མའོ་ཡི་འཐབ་རྩོད་ལས་འགུལ་གྱི་མེ་རོ་བསྐྱར་དུ་གསོས་ཤིང་། ‘སྟག་དང་སྦྲང་མ་མཉམ་རྡུང’ གི་རུལ་སུངས་ངོ་རྒོལ་གྱི་འབོད་ཚིག་འོག་དམར་ཤོག་མཐོ་རིམ་དཔོན་རིགས་ ༡༠༠ ལྷག་ལ་ཞིབ་བཤེར་ཁྲིམས་གཅོད་དང་། ‘སྤྱོད་ངན་བཞི།’ ‘དབུས་དམར་ཤོག་གི་གཏན་འབེབས་བརྒྱད’ སོགས་ཀྱི་དྲིལ་བསྒྲགས་འོག གཞི་རིམ་དམར་ཤོག་ལས་བྱེད་པར་ཞིབ་བཤེར་གྱིས་དམར་གཙང་སྲིད་གཙང་ཟེར་བའི་ལས་འགུལ་སྤེལ་ཏེ། དམར་ཤོག་དང་མང་ཚོགས་བར་ཤ་དང་རུས་པ་ལྟ་བུའི་འབྲེལ་བ་ཟབ་མོ་འཛུགས་རྒྱུ་ཡིན་པ་དང་། ཁྲིམས་སྐྱོང་སྤྱི་ཚོགས་འཛུགས་རྒྱུ་ཡིན་སྐོར་དྲིལ་སྒྲོག་ཤུགས་ཆེན་བྱས་ཡོད། ཡིན་ནའང་། འདས་པའི་ལོ་ ༣ ལྷག་གི་ཞིས་ཅིན་ཕིན་གྱིས་སྲིད་བསྐྱངས་དུས་ཡུན་རིང་། དམར་ཤོག་ ‘མང་ཚོགས་ལམ་ཕྱོགས’ དང་འབྲེལ་ཏེ་བོད་ནང་དམ་དྲག་སྲིད་ཇུས་མང་པོ་ལག་བསྟར་བྱས་ཏེ། བོད་མིའི་འགྲོ་བ་མིའི་ཐོབ་ཐང་གནས་སྟངས་སྔར་བའི་ཇེ་ཞན་ཇེ་སྡུག་ཏུ་ཕྱིན་ཡོད།