རྒྱ་གཞུང་གིས་བོད་ཐོག་འཛིན་པའི་མི་སེར་སྤེལ་བའི་དྲག་གནོན་དབང་སྒྱུར་གྱི་སྲིད་ཇུས་ཀྱི་རྐྱེན་པས། བོད་ས་སྟོད་སྨད་བར་གསུམ་དུ་རང་ལུས་མེར་བསྲེགས་ཀྱི་ཞི་བའི་ངོ་རྒོལ་རིམ་པར་བྱུང་ཡོད་ལ། ཟླ་འདིའི་ཕྱི་ཚེས་ ༢༦ ཉིན་བོད་མདོ་སྨད་ཀླུ་ཆུ་རྫོང་རྨོག་རི་དགོན་པའི་གྲྭ་དཀོན་མཆོག་བསྟན་འཛིན་ལགས་ཀྱིས་རང་ལུས་མེར་བསྲེགས་གནང་སྟེ་སྐུ་གྲོངས་ཡོད་པ་དང་། ཉེ་བའི་ཟླ་འདིའི་ནང་སྔ་ཕྱིར་རང་ལུས་མེར་བསྲེགས་གཏོང་མཁན་ ༥ པ་དང་། ད་ལྟའི་བར་བོད་ནང་རང་བསྲེགས་གཏོང་མཁན་ ༡༡༤ པ་དེ་ཆགས་ཡོད་པ་རེད། ཡིན་ནའང་། རྒྱ་གཞུང་གིས་སོ་སོའི་ནོར་འཁྲུལ་ཅན་གྱི་སྲིད་ཇུས་དེ་ཡོ་བསྲང་གིས་བོད་མི་མང་གི་མངོན་འདོད་ལ་ཉན་འཇོག་བྱེད་རྒྱུ་ལས་ལྡོག་སྟེ། ཟླ་འདིའི་ཕྱི་ཚེས་ ༢༨ ཉིན་ནི་ “བོད་མི་ཞིང་བྲན་ཁྲི་ཚོ་བརྒྱ་ལ་བཅིངས་འགྲོལ་ཐོབ་པའི་དྲན་གསོའི་ཉིན་མོ ” རུ་བསྒྲགས་ཏེ། བཙན་དྲག་འོག་བོད་མི་ཚོར་དུས་དྲན་སྲུང་བརྩི་བྱེད་འཇུག་གི་ཡོད་འདུག