བོད་རང་སྐྱོང་ལྗོངས་ཟེར་བའི་ཁོངས་གཏོགས་ཆབ་མདོ་ས་ཁུལ་སྨར་ཁམས་རྫོང་དུ། ས་གནས་ཉེན་རྟོག་པས་བོད་མི་ཞིག་བཀག་ཉར་བྱས་མཐར་བོད་མི་དེས་རང་སྲོག་བཅད་ཡོད་འདུག
གསར་འགྱུར་བརྒྱུད་ལམ་ཁག་ཏུ་གནས་ཚུལ་སྤེལ་བ་ལྟར་ན། རང་ལོ་ ༣༠ ཡིན་པའི་བོད་མི་བཀྲ་ཤིས་ལགས། རྒྱ་གཞུང་ཉེན་རྟོག་པས་སྨར་ཁམས་རྫོང་གཙང་ཤོད་ཡུལ་ཚོའི་མངགས་གཏོང་ཁང་དུ་བཀག་ཉར་བྱས་རྗེས། ཕྱི་ཟླ་ ༣ ཚེས་ ༡༡ ཉིན་བཀྲ་ཤིས་ལགས་ཀྱིས་བཀག་ཉར་ཁང་དུ་རང་སྲོག་བཅད་ཡོད་འདུག ཁོང་ག་དུས་འཇུ་བཟུང་བཀག་ཉར་བྱས་པ་ཡིན་མིན་གསལ་བོ་ཤེས་རྟོགས་ཐུབ་ཀྱི་མེད་ཀྱང་། འདི་ལོའི་ཕྱི་ཟླ་ ༣ ཚེས་ ༡༠ སྟེ་བོད་མིའི་རང་དབང་སྒེར་ལངས་གསུམ་བཅུ་དུས་དྲན་ཐེངས་ ༥༧ པའི་སྔོན་ཙམ་ལ་འཇུ་བཟུང་བཀག་ཉར་བྱས་པ་ཞིག་ཡིན་འདུག