འདི་ག་ལྟེ་གནས་ཁང་ལ་གནས་ཚུལ་འབྱོར་དོན། ཕྱི་ལོ་ ༢༠༡༢ ལོའི་ཟླ་ ༡༡ ནང་དུ་བོད་མདོ་སྨད་རེབ་གོང་མདོ་བ་རུ་བསྟུད་མར་བོད་མིའི་རང་ལུས་མེར་སྲེག་གིས་རྒྱ་གཞུང་ལ་ངོ་རྒོལ་གྱི་གནས་ཚུལ་བྱུང་རྗེས། བོད་མི་མང་པོ་མངོན་ལྐོག་གཉིས་ནས་འཛིན་བཟུང་བྱས་ཡོད་པའི་ཁྲོད། རེབ་གོང་རོང་བོ་དགོན་ཆེན་གྱི་དགེ་འདུན་པ་རང་ལོ་ ༡༩ ཡིན་པའི་བརྩོན་འགྲུས་ཆོས་ལྡན་ལགས་ལ། རྨ་ལྷོ་ཁུལ་མི་མང་འབྲིང་རིམ་ཁྲིམས་ཁང་གིས་རང་ལུས་མེར་བསྲེགས་ལ་སྐུལ་སློང་གི་ཉེས་མིང་འོག ལོ་ ༢ གྱི་བཙོན་འཇུག་ཁྲིམས་ཐག་བཅད་དེ་ད་ལྟ་ཟི་ལིང་གི་བཙོན་ཁང་ཞིག་ཏུ་ཡོད་འདུག
ཕྱི་ལོ་ ༢༠༡༢ ཟླ་ ༡༡ ཚེས་ ༡༦ ཉིན་རེབ་གོང་མདོ་བ་མཁར་སྐྱ་ནས་ཡིན་པའི་དགེ་འདུན་པ་བརྩོན་འགྲུས་ཆོས་ལྡན་དང་། དཀོན་མཆོག་བསོད་ནམས་གཉིས་མཉམ་གཅིག་དུ་འཛིན་བཟུང་བཙན་ཁྲིད་བྱས་ཡོད་ལ། སྔར་ལོའི་ཕྱི་ཟླ་ ༡༡ ་པའི་ཚེས ༧ དང་ཚེས་ ༨ ། ཚེས་ ༡༢ བཅས་སུ། རེབ་གོང་མདོ་བ་ནས་བསྟུན་མར་བོད་མི་བཞིས་རང་ལུས་མེར་བསྲེགས་ཀྱིས། རྒྱ་གཞུང་གི་དྲག་གནོན་དབང་སྒྱུར་གྱི་མི་སེར་སྤེལ་བའི་སྲིད་ཇུས་ལ་ངོ་རྒོལ་བྱས་ཏེ་འདས་གྲོངས་ཕྱིན་ཡོད་པའི་གནས་ཚུལ་བྱུང་ཡོད་པ་ལྟར།