བོད་མདོ་སྨད་རྨ་ཆུ་ས་ཁུལ་གྱི་གླུ་བ་སྐལ་བཟང་ཡར་འཕེལ་ལགས་ལ། རྒྱ་གཞུང་གིས་ཆབ་སྲིད་ཉེས་མིང་བཀལ་ཏེ་ལོ་ ༤ བཙོན་འཇུག་ཁྲིམས་ཐག་བཅད་ཡོད་འདུག
རྒྱ་གཞུང་གིས་ལོ་ ༤ བཙོན་འཇུག་ཁྲིམས་ཐག་བཅད་ཟིན་པའི་གླུ་བ་སྐལ་བཟང་ཡར་འཕེལ་ལགས།འདི་ག་ལྟེ་གནས་ཁང་ལ་གནས་ཚུལ་འབྱོར་དོན། རྒྱ་གཞུང་གིས་བོད་རིགས་གླུ་བ་སྐལ་བཟང་ཡར་འཕེལ་ལགས་ལ་ཆབ་སྲིད་ཀྱི་ཉེས་མིང་གཡོགས་ཏེ། ཕྱི་ལོ་ ༢༠༡༣ ཟླ་ ༧ ཚེས་ ༡༤ ཡས་མས་ཤིག་བོད་ཀྱི་རྒྱལ་ས་ལྷ་ས་རུ་འཇུ་བཟུང་ཐོག རྒྱ་ནག་ཁྲིན་ཏུའུ་གྲོང་ཁྱེར་གྱི་ལྟ་སྲུང་ཁང་ཞིག་ཏུ་ལོ་ ༡ དང་ཟླ་ ༦ ལྷག་ལ་བཀག་ཉར་འདྲི་གཅོད་བྱས་མཐར། ཕྱི་ལོ་ ༢༠༡༤ ཟླ་ ༡༡ ཚེས་ ༢༧ ཉིན་རྒྱ་ནག་ཁྲིན་ཏུའུ་གྲོང་ཁྱེར་ཁྲིམས་ཁང་ཞིག་གིས། ཁོང་ལ་ལོ་ ༤ ཡི་དུས་བཀག་བཙོན་འཇུག་གི་ཁྲིམས་ཐག་བཅད་ཡོད་འདུག རྒྱ་གཞུང་གིས་གླུ་བ་སྐལ་བཟང་ཡར་འཕེལ་ལགས་ལ་ཁྲིམས་གཅོད་སྐབས། ཁོང་ལ་ཆབ་སྲིད་ཀྱི་ཉེས་མིང་ཅི་ཞིག་གཡོགས་ཡོད་མེད་དང་། ཁྲིམས་རྩོད་པ་གླ་རྒྱུའི་ཐོབ་ཐང་དང་ཁྲིམས་རར་ནང་མི་ཟུར་ཉན་དུ་ཞུགས་བཅུག་ཡོད་མེད་སོགས། ཞིབ་ཕྲའི་གནས་ཚུལ་གང་ཡང་ཤེས་རྟོགས་ཐུབ་ཀྱི་མེད་པ་རེད།
