རྒྱ་གཞུང་གིས་གསེར་རྟ་བླ་རུང་སྒར་གྱི་པདྨ་མཁའ་འགྲོ་སྲང་ལམ་ནས་གཏོར་བཤིག་གཏོང་འགོ་བཙུགས་ཤིང་། གནས་སྟངས་དེར་ལྟ་བཟོད་མ་ཐུབ་པར་དེ་གར་སློབ་གཉེར་གནང་བཞིན་པའི་བཙུན་མ་ཞིག་གིས་གནམ་ཐག་རྒྱབ་ནས་རང་ཤི་རྒྱབ་འདུག
གསར་ལམ་ཁག་ཏུ་གནས་ཚུལ་ཐོན་པ་ལྟར་ན། འདི་ལོ་(༢༠༡༦)ཕྱི་ཟླ་༧་ཕྱི་ཚེས་༢༠ ཉིན་རྒྱ་གཞུང་གིས་དོན་ཚན་༧ཅན་གྱི་ཡིག་ཆ་འགྲེམས་སྤེལ་གྱི་སྒོ་ནས་བླ་རུང་སྒར་གཏོར་བཤིག་གཏོང་འཆར་གྱི་ལས་གཞི་དངོས་སུ་འགོ་བརྩམས་ཤིང་། དེ་གའི་བཙུན་དགོན་ཆགས་ས་པདྨ་མཁའ་འགྲོ་སྲང་ལམ་ནས་བཤིག་འགོ་བཙུགས་པའི་གནས་སྟངས་ལ་ལྟ་བཟོད་མ་ཐུབ་པར་བཙུན་མ་རིག་འཛིན་སྒྲོལ་མ་ལགས་ཀྱིས་གནམ་ཐག་གོན་ནས་རང་ཤི་རྒྱབ་འདུག མོས་ཤི་ཁར་ཁ་ཆེམས་ཡི་གེ་ཞིག་བཞག་པའི་ནང་དུ། བླ་རུང་སྒར་དུ་སློབ་གཉེར་གནང་རིང་། རྒྱ་གཞུང་གིས་བསྟུད་མུར་སུན་གཙེར་དང་ཐེ་ཇུས་བྱས་པའི་བྱེད་བབ་དེར་མོས་སྡིག་སྲན་མ་ཐུབ་པར་ན་ཟུག་ཡང་ཡང་སློང་པ་གསལ་ཞིང་། ཤུལ་དུ་མི་དམངས་ཤོག་སྒོར་གང་འཚམས་ཤིག་བཞག་ཡོད་པ་དགོན་པར་སྤྲོད་རེ་ཞུས་འདུག་ཅེས་གསར་ལམ་ཁག་ཏུ་ཐོན་འདུག་པ་ལས། འདི་ག་ལྟེ་གནས་ཁང་དུ་གོང་གི་ཡིག་ཆ་ངོ་མ་ལག་སོན་མ་བྱུང་བས། ཁ་ཆེམས་ཀྱི་ནང་དོན་ཞིབ་ཆ་ད་ལྟའི་བར་ཤེས་རྟོགས་མ་བྱུང་བར་ལུས་ཡོད།