རྒྱ་གཞུང་གིས་ཕྱི་ཟླ་༧ཚེས་༢༠ནས་གསེར་རྟ་བླ་རུང་སྒར་གཏོར་འགོ་བཙུགས་པ་ནས་ཟླ་ངོ་གཅིག་ཀྱང་མ་འགོར་པར། ཟླ་འདིའི་ཕྱི་ཚེས་༡༩ཉིན། བཙུན་མ་ཚེ་རིང་སྒྲོལ་མས་ཞེས་པ་དང་སེམས་དགའ། གཞན་ཡང་མིང་དུས་སོགས་གསལ་ཁ་མེད་པ་ཞིག་གིས་རང་ཤི་རྒྱབ་གྲབས་བྱས་པ།ཟླ་སྔོན་མའི་ཕྱི་ཚེས་༢༠ཉིན་རིག་འཛིན་སྒྲོལ་མས་རང་ཤི་རྒྱབ་པ་བཅས། དུས་ཡུན་ཐུང་ཐུང་ཟླ་ངོ་གཅིག་གི་རིང་བཙུན་མ་གསུམ་གྱི་ཚེ་སྲོག་ཤོར་ཅིང་། གཅིག་ལ་སྲོག་ཉེན་བྱུང་གྲབས་བྱས་འདུག་པའི་གནས་སྟངས་ལ་རྒྱ་གཞུང་གིས་སྡུག་གྱོང་རེད་ཅེས་ལན་སྤྲད་འདུག
འདི་ག་ལྟེ་གནས་ཁང་ལ་གནས་ཚུལ་འབྱོར་གནས་ལྟར་ན། ཕྱི་ཟླ་༨ཚེས་༡༩ཉིན(ཨེ་གླིང་ལྟར་ན་ཕྱི་ཚེས་༡༧ཉིན་བྱུང་བ་གསལ་)། གསེར་རྟ་བླ་རུང་སྒར་པདྨ་མཁའ་འགྲོ་འདུ་གླིང་དུ་སློབ་གཉེར་གནང་བཞིན་པའི་བཙུན་མ་ཚེ་རིང་སྒྲོལ་མས་བླ་རུང་སྒར་མུ་མཐུད་གཏོང་བཞིན་པའི་གནས་སྟངས་ལ་ལྟ་བཟོད་དང་སྡིག་སྲན་མ་ཐེག་པར་སྐེ་ལ་གནམ་ཐག་གོན་ནས་རང་ཤི་རྒྱབ་ཅིང་། མོས་ཤི་ཁར་ཁ་ཆེམས་ཤིག་ཡི་གེ་ཞིག་བཞག་པ་ཡོད་པའི་ནང་དུ། གཙོ་བོ་ད་ནི་རྒྱ་ནག་གཞུང་གིས་སྡོད་བཟོད་མེད་པ་བཟོ་བཞིན་འདུག གྲྭ་ཤག་ཚང་མ་གཏོར་འགྲོ་བཞིན་འདུག་ཅེས་འཁོད་ཡོད་འདུག