རྒྱ་གཞུང་གིས་བོད་ཐོག་འཛིན་པའི་དྲག་གནོན་དབང་བསྒྱུར་གྱི་མི་སེར་སྤེལ་བའི་སྲིད་ཇུས་ལ་ཞི་བའི་ངོ་རྒོལ་གནང་མཁན། བོད་མདོ་སྨད་རྔ་པ་ཀིརྟི་དགོན་པའི་གྲྭ་བློ་བཟང་ཐུབ་བསྟན་ལགས་ཀྱིས་ཞི་བའི་སྐད་འབོད་གོམ་བགྲོད་སྐབས། ས་གནས་རྒྱ་གཞུང་འགྲིམ་འགྲུལ་ཉེན་རྟོག་པས་སོ་སོའི་ལས་འགན་ཁྱབ་ཁོངས་ལ་བརྒལ་ཏེ་ཁྲིམས་འགལ་ཐོག་འཇུ་བཟུང་བཙན་འཁྲིད་བྱས་འདུག
ཕྱི་ལོ་ ༢༠༡༦ ཟླ་ ༥ ཚེས་ ༢ ཉིན་གྱི་བོད་ནང་གི་ཆུ་ཚོད་ ༣ ཡས་མས་ཙམ་ལ། རྔ་པ་རྫོང་གི་ཁྲོམ་གཞུང་དུ་གྲྭ་བློ་བཟང་ཐུབ་བསྟན་ལགས་ཀྱིས། ལག་ཏུ་༧གོང་ས་མཆོག་གི་སྐུ་པར་འཕྱར་ཏེ་སྐད་འབོད་བྱེད་བཞིན་ཞི་བའི་ངོ་གོལ་གོམ་བགྲོད་བྱས་ཡོད་པ་དང་། དེ་མ་ཐག་རྒྱ་གཞུང་འགྲིམ་འགྲུལ་ཉེན་རྟོག་པ་སླེབས་ནས་ཁོང་འཇུ་བཟུང་བཙན་འཁྲིད་བྱས་ཡོད་འདུག ད་ལྟའི་ཆར་ཁོང་གང་དུ་བཀག་ཉར་བྱས་ཡོད་མེད་དང་། གནས་སྟངས་ག་འདྲ་ཆགས་ཡོད་མེད་སོགས་ཞིབ་ཕྲའི་གནས་ཚུལ་གང་ཡང་ཤེས་རྟོགས་ཐུབ་ཀྱི་མེད་པ་རེད།
