Tag: མདོ་སྨད།

རྒྱ་གཞུང་གི་དྲག་གནོན་དབང་བསྒྱུར་ལ་ཞི་བའི་ངོ་རྒོལ་གྱིས་རང་ལུས་མེར་བསྲེག་གནང་སྟེ་འདས་གྲོངས་ཕྱིན་པའི་རྒྱལ་གཅེས་དཔའ་བོ་གཉིས་ཀྱི་སྐུ་པར་ཉེ་ཆར་ལག་སོན་བ་ལྟར་འདོན་སྤེལ་བྱས་ཡོད།

ད་ལྟའི་བར་བོད་ནང་དུ་རང་ལུས་མེར་བསྲེག་གནང་སྟེ། རྒྱ་གཞུང་གིས་བོད་ཐོག་འཛིན་པའི་དྲག་གནོན་དབང་བསྒྱུར་གྱི་མི་སེར་སྤེལ་བའི་སྲིད་ཇུས་ལ་ཞི་བའི་ངོ་རྒོལ་བྱེད་མཁན་རྒྱལ་གཅེས་དཔའ་བོ་དཔའ་མོ་ ༡༤༥ དང་། བཙན་བྱོལ་སྤྱི་ནང་རང་ལུས་མེར་བསྲེག་གནང་མཁན་རྒྱལ་གཅེས་བོ་ ༨ བཅས། ཁྱོན་བོད་ཕྱི་ནང་གཉིས་སུ་རང་ལུས་མེར་བསྲེགས་གནང་མཁན་ ༡༥༣ བྱུང་ཡོད།

ཡིན་ནའང་། རྒྱ་གཞུང་གིས་བོད་ནང་དུ་དམག་མི་ཕོན་ཆེན་པོ་འགྲེམས་འཇོག་གིས་བོད་མིའི་འགྲོ་བསྐྱོད་ལ་བཀག་སྡོམ་ནན་མོ་བྱེད་ཀྱིན་པ་མ་ཟད། ཁ་པར་དང་དྲ་རྒྱ་སོགས་བརྒྱུད་ལམ་ཁག་ལའང་ཞིབ་བཤེར་ནན་མོ་བྱས་ཏེ་བཀག་སྡོམ་བྱེད་ཀྱིན་ཡོད་སྟབས། བོད་ནང་བྱུང་བའི་རང་ལུས་མེར་བསྲེག་གྱི་གནས་ཚུལ་རྣམས་དུས་ཐོག་ཤེས་རྟོག་ཐུབ་དཀའ་བ་དང་། ཁོང་ཚོའི་པར་རིས་དང་ལོ་རྒྱུས་ཞིབ་ཕྲ་ཤེས་རྒྱུ་ཧ་ཅང་ཁག་པོ་ཆགས་ཡོད། ལྷག་པར་དུ་རང་ལུས་མེར་བསྲེག་གནང་མཁན་ཁག་ཅིག་གིས་རང་ལུས་མེར་བཏང་བའི་རྗེས་སུ། ཁོང་ཚོ་འཆི་གསོན་གྱི་གནས་ཚུལ་ཡང་ཤེས་རྟོགས་མི་ཐུབ་པར་གྱུར་ཡོད།

བོད་མདོ་སྨད་རྔ་བ་ཀིརྟི་དགོན་པའི་གྲྭ་བློ་བཟང་ཚེ་རིང་ལགས་ཀྱིས་རྫོང་མཁར་གཞུང་ལམ་དུ། ཞི་བའི་ཞི་བའི་སྐད་འབོད་གོམ་བགྲོད་ཀྱིས་རྒྱ་གཞུང་གིས་བོད་ཐོག་འཛིན་པའི་དྲག་གནོན་དབང་བསྒྱུར་གྱི་མི་སེར་སྤེལ་བའི་སྲིད་ཇུས་ལ་ངོ་རྒོལ་བྱས་འདུག

འདི་ག་ལྟེ་གནས་ཁང་ལ་གནས་ཚུལ་འབྱོར་དོན། ཕྱི་ལོ་ ༢༠༡༦ ཟླ་ ༦ ཚེས་ ༧ ཉིན་གྱི་བོད་ནང་གི་ཕྱི་དྲོའི་དུས་ཚུད་ ༤ ཙམ་ལ་བོད་མདོ་སྨད་རྔ་བ་ཀིརྟི་དགོན་པའི་རང་ལོ་ ༢༠ ཡིན་པའི་དགེ་འདུན་པ་བློ་བཟང་ཚེ་རིང་ལགས་ཀྱིས། ༸གོང་ས་མཆོག་གི་སྐུ་པར་ཆེན་པོ་ཞིག་གནམ་ལ་འཕྱར་ནས་ “རྒྱལ་བ་རིན་པོ་ཆེ་སྐུ་ཚེ་ཁྲི་ལོ་ནས་ཁྲི་ལོ་བརྟན་པར་ཤོག བོད་ལ་རང་དབང་དགོས” ཞེས་པའི་འབོད་ཚིག་སྒྲོག་བཞིན། རྔ་བ་རྫོང་མཁར་གྱི་གཞུང་ལམ་དུ་ཞི་བའི་སྐད་འབོད་གོམ་བགྲོད་གནང་ཡོད་པ་དང་། གནས་ཚུལ་དེ་བྱུང་མ་ཐག་ས་གནས་ཉེན་རྟོག་པ་རྣམས་ཀྱིས་ཁོང་འཇུ་བཟུང་བཙན་ཁྲིད་བྱས་འདུག ད་ལྟའི་ཆར་གང་དུ་བཀག་ཉར་བྱས་ཡོད་མེད་སོགས་ཞིབ་ཕྲའི་གནས་ཚུལ་ཤེས་རྟོགས་ཐུབ་ཀྱི་མེད་པ་རེད།

རྒྱ་གཞུང་གིས་བོད་མདོ་སྨད་ཨ་མཆོག་ས་ཆའི་གོང་སྔོན་བླ་རིར་ལོ་མང་རིང་གཏེར་ཁ་བསྔོག་འདོན་གྱིས་རང་བྱུང་ཁོར་ཡུག་རྩ་གཏོར་དང་། ཨ་མཆོག་མི་དམངས་ཀྱི་དད་མོས་ལ་དོ་ཕོག་དང་། སྤྱི་ཚོགས་འཆམ་མཐུན་ལ་གནོད་སྐྱོན་བཟོས་པར་བརྟེན། ཉེ་ཆར་ཨ་མཆོག་མང་ཚོགས་ཀྱིས་གཏེར་ཁ་བསྔོག་མཚམས་འཇོག་དགོས་པའི་ཞི་བའི་ངོ་རྒོལ་བྱས་ཡོད་ཀྱང་། རྒྱ་གཞུང་གིས་དམག་མི་མང་པོ་ཆེད་གཏོང་གིས་མང་ཚོགས་ལ་དྲག་རྡུང་བྱས་ཏེ་གནས་ཚུལ་ཧ་ཅང་ཛ་དྲག་ཆགས་བཞིན་ཡོད་འདུག

རྒྱ་གཞུང་གིས་བོད་ས་བཅད་བགོས་ཀྱིས་མི་སེར་སྤེལ་བའི་དྲག་གནོན་དབང་བསྒྱུར་གྱི་ད་ལྟའི་ས་ཁོངས་དབྱེ་བགོས་ལྟར་བྱས་ན། རྒྱ་ནག་ཀན་སུའུ་ཞིང་ཆེན་ཁོངས་སུ་བཅད་བགོས་བྱས་ཡོད་པའི་ཀན་ལྷོ་བོད་རིགས་རང་སྐྱོང་ཁུལ་བསང་ཆུ་རྫོང་ཨ་མཆོག་ཞང་གི་ས་ཆར་ཡོད་པའི་ཨ་མཆོག་ཚོ་བ་བརྒྱད་ཀྱི་བླ་རི་གོང་སྔོན་དུ། རྒྱ་གཞུང་གིས་འདས་པའི་ལོ་བཅུ་གྲངས་ལྷག་གི་རིང་གཏེར་ཁ་བསྔོག་འདོན་བྱས་རྐྱེན། གཅིག་ནས་གཏེར་ཁ་བསྔོག་འདོན་གྱི་རྐྱེན་པས། ཁོར་ཡུག་ལ་གནོན་སྐྱོན་ཐེབས་ཏེ་གཏེར་ཁའི་ཉེ་ཁུལ་དུ་གནས་པའི་ས་གནས་མང་ཚོགས་ཀྱི་བདེ་ཐང་དང་འཚོ་གནས་ལ་དཀའ་ངལ་འཕྲད་ཀྱིན་ཡོད། གཉིས་ནས་གཏེར་ཁ་བསྔོག་འདོན་གྱི་རྐྱེན་པས། ཨ་མཆོག་ཚོ་བ་བརྒྱད་ཀྱི་བླ་རི་གཉན་ཆེན་གོང་སྔོན་བཙག་རལ་ཏུ་བཏང་ནས་ས་གནས་མང་ཚོགས་ཀྱི་དད་མོས་ལ་དོ་ཕོག་ཚབ་ཆེན་བཟོས་ཡོད། གསུམ་ནས་གཏེར་ཁ་བསྔོག་འདོན་གྱི་རྐྱེན་པས། གཏེར་ཁའི་ཉེ་འདབས་ཀྱི་སྡེ་བ་དང་ཁྱིམ་ཚང་ཁག་ཅིག་ལ་རྒྱ་གཞུང་གིས་ལྐོག་དངུལ་སྤྲད་དེ་གཏེར་ཁ་བསྔོག་རྒྱུར་རྒྱབ་སྐྱོར་ཡོང་ཐབས་བྱས་པར་བརྟེན། ཨ་མཆོག་ཚོ་བརྒྱད་ཀྱི་ནང་ཁུལ་དུ་མི་མཐུན་པའི་རྩོད་རྙོག་བྱུང་སྟེ་སྤྱི་ཚོགས་འཆམ་མཐུན་ལ་གཏོར་སྐྱོན་བཟོས་པ་བཅས་ཀྱི་རྐྱེན་པས། ཨ་མཆོག་མང་ཚོགས་ཀྱིས་འབྲེལ་ཡོད་ས་གནས་སྲིད་གཞུང་ལ་གཏེར་ཁ་བསྔོག་འདོན་མཚམས་འཇོག་དགོས་པའི་ཞུ་གཏུགས་རིམ་པས་བྱས་ཀྱང་། རྒྱ་གཞུང་གིས་མང་ཚོགས་ཀྱི་རེ་འདུན་ཡ་མེད་བཏང་བར་བརྟེན། ཉེ་ཆར་ཨ་མཆོག་ཚོ་བ་བརྒྱད་ཀྱི་མང་ཚོགས་འདུ་འཛོམས་ཐོག་གཏེར་ཁ་བསྔོག་འདོན་མཚམས་འཇོག་དགོས་པའི་ཞི་བའི་ངོ་རྒོལ་གནང་ཡོད་པ་རེད།

རྔ་པ་ཀིརྟི་དགོན་པའི་གྲྭ་བློ་མིག་ལགས་ལོ་གཅིག་ལྷག་རིང་རྒྱ་གཞུང་ཉེན་རྟོག་པས་འཇུ་བཟུང་བཀག་ཉར་བྱས་མཐར། དེ་རིང་ལུང་དགུ་རྫོང་དུ་ཁོང་ལ་ལོ་བདུན་དང་ཕྱེད་ཀའི་བཙོན་འཇུག་ཁྲིམས་ཐག་བཅད་འདུག

འདི་ག་ལྟེ་གནས་ཁང་ལ་གནས་ཚུལ་འབྱོར་དོན། རྒྱ་གཞུང་གིས་རྩོམ་པ་པོ་གྲྭ་བློ་མིག་ལགས་རྒྱལ་ཁབ་ཀྱི་གསང་བ་ཕྱིར་བསྒྲགས་དང་རྒྱལ་ཁབ་ཁ་བྲལ་གྱི་བྱ་སྤྱོད་སྤེལ་བའི་ཉེས་འཛུགས་འོག ཡོངས་བསྒྲགས་མ་ཡིན་པར་གསང་བའི་ཐོག་ལོ་ ༧ ཕྱེད་ཀའི་དུས་བཀག་བཙོན་འཇུག་གི་ཁྲིམས་ཐག་བཅད་ཡོད་པ་དང་། ཁོང་ལ་ཁྲིམས་གཅོད་སྐབས་ནང་མིར་བརྡ་ལན་གང་བཏང་མེད་པ་མ་ཟད། ཁྲིམས་ཐག་ག་དུས་བཅད་མིན་སྐོར་ཡང་ནང་མིར་གསལ་བཤད་བྱས་མེད་པ་རེད།

དེའང་ཕྱི་ལོ་ ༢༠༡༦ ཟླ་ ༥ ཚེས་ ༩ ཉིན། རྔ་པ་བོད་རིགས་རང་སྐྱོང་ཁུལ་ལུང་དགུ་རྫོང་མི་དམངས་ཁྲང་ཟེར་བས་རྩོམ་པ་པོ་གྲྭ་བློ་བཟང་འཇམ་དབྱངས་ལགས་དང་ཁོང་གི་ནང་མི་ཆུ་ཚོད་ཕྱེད་ཀའི་ཐུག་འཕྲད་བྱེད་བཅུག་ཡོད་པ་དང་། སྐབས་དེར་རྩོམ་པ་པོ་ཁོང་གིས་ནང་མིར་བཤད་རྒྱུར་རྒྱ་གཞུང་གིས་ཁོང་ལ་ཕྱི་ལོ་ ༢༠༠༩ ནས་ ༢༠༡༥ བར་རྒྱལ་ཁབ་ཀྱི་གསང་བ་ཕྱིར་བསྒྲགས་བྱེད་མཁན་དང་རྒྱལ་ཁབ་ཁ་བྲལ་གྱི་བྱ་སྤྱོད་སྤེལ་བའི་ནག་ཉེས་བཙན་འགེལ་བྱས་ཡོད་ཀྱང་། ཁོང་རང་ངོས་ནས་ངོས་ལེན་རྩ་བ་ནས་བྱས་མེད་སྐོར་བརྗོད་ཡོད་འདུག

བོད་མདོ་སྨད་མཛོད་དགེ་ཨ་སྐྱིད་སེ་ར་དགོན་པའི་གླིང་སྐོར་དུ། བོད་རིགས་བུད་མེད་བསོད་ནམས་འཚོ་ཡིས་རང་ལུས་མེར་བསྲེགས་གནང་སྟེ། རྒྱ་གཞུང་གིས་བོད་ཐོག་འཛིན་པའི་དྲག་གནོན་དབང་བསྒྱུར་གྱི་མི་སེར་སྤེལ་བའི་སྲིད་ཇུས་ལ་ཞི་བའི་ངོ་རྒོལ་གྱིས་འདས་གྲོངས་ཡོད་འདུག ཡིན་ནའང་། རྒྱ་གཞུང་གིས་བོད་ནང་དུ་དམ་དྲག་ཤུགས་ཆེན་བྱས་ཡོད་སྟབས་ད་ལྟའི་བར་དུ་གནས་ཚུལ་ཕྱི་ལོག་ཏུ་ཐོན་ཐུབ་མེད་པ་རེད།

འདི་ག་ལྟེ་གནས་ཁང་ལ་གནས་ཚུལ་འབྱོར་དོན། ཕྱི་ལོ་ ༢༠༡༦ ཟླ་ ༣ ཚེས་ ༢༣ རེས་གཟའ་ལྷག་པའི་བོད་ནང་གི་ཉིན་གུང་ཆུ་ཚོད་ ༡༢ དང་ཕྱེད་ཀ་ཙམ་གྱི་སྟེང་། ཁོ་མོའི་ཁྱོ་ག་སྐལ་བཟང་རྒྱ་མཚོ་དང་ཁོ་མོ་གཉིས་མཉམ་དུ་དགོན་པའི་གླིང་སྐོར་ལ་སྐོར་བར་བསྐྱོད་བཞིན་པའི་སྐབས། ཁོ་མོས་རང་ཉིད་ཀྱི་ཁྱོ་ག་ལ་ཁྱེད་རང་སྔོན་དུ་ག་ལེར་སོང་དང་། ང་རང་འཁོར་ཁང་དུ་གཅིག་སོང་ནས་ཡོང་དགོས་ཞེས་ལབ་ཡོད་པ་དང་། དེ་ནས་དུས་ཡུན་སྐར་མ་ཁ་ཤས་ཀྱི་རྗེས་སུ་དགོན་པའི་གྲྭ་ཕྲུག་ཅིག་གིས་རང་ལུས་མེར་བསྲེགས་གནང་སོང་ཞེས་སྐད་ཅོར་བརྒྱབ་ཡོད་པ་དང་། སྐབས་དེར་ཁོ་མོའི་ཁྱོ་གས་ཕྱིར་མིག་ལྟ་དུས་ཁོང་མོས་རང་ལུས་མེར་བསྲེགས་གནང་བཞིན། བོད་ལ་རང་དབང་དགོས། ༧རྒྱལ་བ་ཡིད་བཞིན་ནོར་བུ་ཕྱིར་བོད་ལ་ཕེབས་དགོས། ཞེས་འབོད་ཚིག་སྒྲོག་བཞིན་རྒྱུགས་ཡོང་གིན་ཡོད་འདུག སྐབས་དེར་གྲྭ་ཕྲུག་དེ་དང་ཁྱོ་ག་སྐལ་བཟང་རྒྱ་མཚོ་གཉིས་ཁོང་མོའི་ལུས་སྟེང་གི་མེ་གསོད་ཐབས་བྱས་ཡོད་པ་དང་། དེ་རྗེས་དགོན་པ་དེར་ཡོད་པའི་སྤུན་མཆེད་དགེ་འདུན་པ་ཚུལ་ཁྲིམས་ལགས་ཀྱང་སླེབས་ཏེ་རོགས་རམ་གྱིས་རླངས་འཁོར་ཞིག་ནང་བཞག་སྟེ་དགོན་པའི་བླ་མའི་གཟིམ་ཆུང་དུ་ཁྱེར་ཡོང་ཡོད་པ་དང་། དེ་དུས་ཀྱང་ཁོང་མོས་གོང་གསལ་འབོད་ཚིག་དང་གསོལ་འདེབས་ཤུགས་དྲགས་གནང་ཡོད་འདུག དེ་རྗེས་དགོན་པའི་གཟིམ་ཁང་ནས་སྨན་ཁང་དུ་འཁྱེར་རྩིས་ཀྱིས་དགོན་འདབས་སུ་སླེབས་སྐབས་འདས་གྲོངས་ཕྱིན་ཡོད་འདུག

མི་སྒེར་ཁེར་རྐྱང་གིས་ཞི་བའི་ངོ་རྒོལ་གོམ་བགྲོན་མཁན་གྲྭ་བློ་བཟང་བསྟན་པ་ལགས། ཉེ་ཆར་ལོ་གཉིས་ཀྱི་བཙོན་དུས་གཙང་སྟེ་ཟི་ཁྲོན་ཁྲིན་ཏུའུ་ནར་མ་སོན་པའི་ན་གཞོན་གྱི་བཙོན་ཁང་ཞིག་ནས་གློད་གྲོལ་བཏང་ཡོད་འདུག

ཕྱི་ལོ་ ༢༠༡༦ ཟླ་ ༥ ཚེས་ ༥ ཉིན། བོད་མདོ་སྨད་རྔ་པ་ཀིརྟི་དགོན་པའི་གྲྭ་བློ་བཟང་བསྟན་པ་ལགས། ལོ་གཉིས་ཀྱི་བཙོན་འཇུག་དུས་ཡུན་གཙང་སྟེ་ཕྱིར་གློད་ཡོད་འདུག ཉེ་སྔོན་བོད་ནང་མི་སྒེར་རྐྱང་པས་ལག་ཏུ་༧གོང་ས་མཆོག་གི་སྐུ་པར་འཕྱར་བཞིན་ཁྲོམ་གཞུང་དུ་ཞི་བའི་ངོ་རྒོལ་གོམ་བགྲོད་བྱེད་མཁན་མང་པོ་བྱུང་དང་འབྱུང་བཞིན་པ་ལྟར། ཁོང་གིས་ཕྱི་ལོ་ ༢༠༡༤ ཟླ་ ༤ ཚེས་ ༢༦ ཉིན་རྔ་པ་རྫོང་མཁར་གྱི་གཞུང་ལམ་སྟེང་། ལག་གཉིས་ཀྱིས་༧གོང་ས་མཆོག་གི་སྐུ་པར་མགོ་ལ་འཕྱར་ཏེ་༼བོད་ལ་རང་དབང་དགོས། རྒྱལ་བ་རིན་པོ་ཆེ་བོད་ལ་ཕེབས་འཇུག་དགོས།༽ ཞེས་ཞི་བའི་ངོ་རྒོལ་གོམ་བགྲོད་བྱས་པར་བརྟེན་ནས། རྒྱ་གཞུང་ཉེན་རྟོག་པས་འཇུ་བཟུང་བཙན་འཁྲིད་ཀྱིས་ཡུན་རིང་གར་སོང་ཆ་མེད་ཀྱི་གནས་སྟངས་ཆགས་མཐར། ལོ་དེའི་ཕྱི་ཟ་ ༡༡ ཚེས་ ༧ ཉིན་གྱི་སྔ་དྲོ་རྔ་པ་རང་སྐྱོང་ཁུལ་གྱི་སྲིད་འཛིན་ལྟེ་གནས་གྲོང་ཁྱེར་འབར་ཁམས་འབྲིང་རིམ་མི་དམངས་ཁྲིམས་ཁང་ཟེར་བས། ༼རྒྱལ་ཁབ་ལ་ངོ་ལོག་གི་བྱ་སྤྱོད་སྤེལ་བའི་༽ཉེས་མིང་འོག་ལོ་ ༢ ཀྱི་དུས་བཀག་བཙོན་འཇུག་གི་ཁྲིམས་ཐག་བཅད་ཡོད་པ་རེད། སྐབས་དེར་ནང་མིར་བརྡ་བརྒྱབ་སྟེ་ཁྲིམས་རར་ཟུར་ཉན་དུ་ཡོང་བཅུག་ཡོད་པ་ཙམ་ལས། སོ་སོ་སྒེར་དང་ནང་མིའི་ངོས་ནས་ཁྲིམས་རྩོད་པ་གླས་ཏེ་ཉེས་པ་དག་འབུལ་གྱི་གོ་སྐབས་གང་ཡང་སྤྲད་མེད་པ་རེད།

ས་གནས་བོད་མིའི་རྩྭ་ས་དང་ས་ཁང་བཙན་འཕྲོག་གནས་སྟངས་ཞུ་གཏུག་བྱེད་མཁན། བོད་མདོ་སྨད་མཛོད་དགེ་ཐང་སྐོར་སྡེ་བའི་བོད་མི་ཕུར་ཁོ་དང་། རིན་རྡོ། འཇིགས་བྱེད་སྐྱབས། ཀིརྟི་ཡེ་ཤེས་བཅས་ལ། ༼བསྙད་བརྐོ་ཟིང་སློང་༽གི་ཉེས་མིང་འོག་དུས་བཀག་བཙོན་འཇུག་ཁྲིམས་ཐག་བཅད་འདུག

བརྒྱུད་ལམ་ཁག་གིས་གནས་ཚུལ་སྤེལ་གསལ་ལྟར་ན། ཕྱི་ལོ ༢༠༡༦ ཟླ་ ༤ ཚེས་ ༡༡ ཉིན། མཛོད་དགེ་རྫོང་མི་དམངས་ཁྲིམས་ཁང་ཟེར་བས། ཐང་སྐོར་ཡུལ་ཚོའི་སྐ་བར་མ་སྡེ་བའི་རྩྭ་ས་དང་ས་ཁང་བཙན་འཕྲོག་གི་བྱ་སྤྱོད་གོང་རིམ་དུ་ཞུ་གཏུགས་བྱེད་མཁན། བོད་མི་འཇིག་བྱེད་སྐྱབས་ལ་ལོ་ ༣ གྱི་དུས་བཅད་བཙོན་འཇུག་དང་། ཕུར་ཁོ་དང་རིན་ཆེན་རྡོ་རྗེ། ཀིརྟི་ཡེ་ཤེས་གསུམ་ལ་ལོ་ ༢ རེའི་དུས་བཅད་བཙོན་འཇུག་ཁྲིམས་ཐག་བཅད་རྗེས། ཟླ་ ༦ རེའི་བཀག་སྡོམ་དུས་ཡུན་འཕར་སྣོན་ཐོག་༼ཉེས་ཆད་ཕྱིར་འགྱངས༽ཀྱི་ལམ་ལུགས་ལྟར། ཕྱིར་སོ་སོའི་ཁྱིམ་དུ་བསྐྱལ་ཏེ་ཉེན་རྟོག་པས་ལྟ་རྟོག་སྟངས་འཛིན་འོག་རང་ཁྱིམ་དུ་བཀག་སྡོམ་བྱས་ཡོད་འདུག

གསར་ལམ་ཁག་ཏུ་གནས་ཚུལ་ཐོན་པ་ལྟར་ན། མགོ་ལོག་སྟོང་སྐྱབས་དགོན་གྱི་དགེ་འདུན་པ་ཁྲི་བཙན་ནམ་སྨྱུག་མིང་དུ་ཁྲི་བོད་ཁྲག་ཟེར་བ་ཁོང་། ཕྱི་ལོ་ ༢༠༡༦ ཟླ་ ༣ ཚེས་ ༡༩ ཉིན་བཙོན་འཇུག་དུས་ཡུན་གཙང་སྟེ་གློད་གྲོལ་བཏང་ཡོད་འདུག ཡིན་ནའང་། ད་ལྟའི་བར་བཙོན་འཇུག་མནར་གཅོད་མྱངས་བའི་བརྒྱུད་རིམ་ཁྲོད། ཁོང་གི་གཟུགས་པོའི་གནས་སྟངས་ག་འདྲ་ཆགས་ཡོད་མེད་ཀྱི་ཞིབ་ཕྲའི་གནས་ཚུལ་ཤེས་རྟོགས་ཐུབ་ཀྱི་མེད་པ་རེད།

འདི་ག་ལྟེ་གནས་ཁང་གིས་དེ་སྔོན་གྲྭ་ཁྲི་བཙན་ལགས་རྒྱ་གཞུང་གིས་འཇུ་བཟུང་སྐོར་ལ་གནས་ཚུལ་སྤེལ་ཡོད་པ་ལྟར། ཕྱི་ལོ་ ༢༠༡༣ ཟླ་ ༣ པའི་ཚེས་ ༡༡ ཉིན་གྲྭ་ཁྲི་བཙན་ལགས་དགའ་བདེ་རྫོང་ཐོག་ཏུ་བསྐྱོད་སྐབས། རྒྱ་གཞུང་དྲག་ཆས་ཉེན་རྟོག་པས་རྫོང་ཐོག་ནས་གློ་བུར་ཁོང་འཇུ་བཟུང་བཙན་ཁྲིད་བྱས་ཏེ་ཡུན་རིང་གར་སོང་ཆ་མེད་དུ་གྱུར་མཐར། རྩོམ་ཡིག་བྲིས་ནས་སྤྱི་ཚོགས་ལ་འཁྲུག་རྐྱེན་བསླངས་པ་དང་རྒྱལ་ཁབ་ཁ་བྲལ་གཏོང་ཐབས་བྱས་པ་སོགས་ཀྱི་ཉེས་མིང་བཀལ་ཏེ་ཁྲིམས་ཐག་བཅད་ཡོད་འདུག ཡིན་ནའང་། རྒྱ་གཞུང་གིས་བོད་ནང་དུ་བརྒྱུད་ལམ་ཁག་ལ་དམ་དྲག་ཤུགས་ཆེན་པོ་བྱེད་བཞིན་ཡོད་སྟབས། ཁོང་ལ་ཁྲིམས་གཅོད་བྱས་པའི་བརྒྱུད་རིམ་དང་བཙོན་འཇུག་སྐོར་གྱི་ཞིབ་ཕྲའི་གནས་ཚུལ་རིགས་ཤེས་རྟོགས་གསལ་བོ་བྱུང་ཐུབ་མེད་ཀྱང་། ཉེ་ཆར་ཁོང་བཙོན་འཇུག་དུས་ཡུན་གཙང་སྟེ་གློད་གྲོལ་བཏང་ཡོད་གནས་ཚུལ་ཐོན་པ་རེད།

  དེ་རིང་འདི་ག་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གི་ངོས་ནས། བོད་ནང་གི་ཆབ་སྲིད་བཙོན་པའི་གནས་ཚུལ་སྐོར་ལ་དབྱིན་ཡིག་གི་དྲ་རྒྱ་ལེགས་གྲུབ་ཀྱིས་དབུ་འབྱེད་ཐུབ་པ་བྱུང་བར་དགའ་སྤྲོ་སྐྱེ་བཞིན་ཡོད། ཕྱི་ལོ་ ༢༠༡༦ ཟླ་ ༣ ཚེས་ ༡༤ ནི་ཉིན་མོ་གལ་ཆེན་པོ་ཞིག་ཆགས་ཡོད་དེ། ༢༠༠༨ ལོར་བོད་ས་ཡོངས་སུ་ས་བྱི་ཞི་རྒོལ་ཆེན་མོ་བྱུང་ནས་ལོ་བརྒྱད་འཁོར་བའི་ཉིན་མོ་ཆགས་ཀྱི་ཡོད། ༢༠༠༨ ལོ་ནས་བཟུང་བོད་ནང་སྔར་ལས་ལྷག་པར་རྒྱ་གཞུང་གིས་བོད་མི་མང་པོ་འཇུ་བཟུང་བཙན་འཁྲིད་དང་གར་སོང་ཆ་མེད། སྡུག་སྦྱོང་ནར་གཅོད། ཁྲིམས་གཅོད་བཙོན་འཇུག དེ་བཞིན། བཙོན་འོག་ཏུ་འདས་གྲོངས་འགྲོ་བཞིན་པ་བཅས་ཀྱི་གནས་སྟངས་མཚམས་མ་ཆད་པར་མུ་མཐུད་བྱུང་དང་འབྱུང་བཞིན་ཡོད། ༢༠༠༨ ལོར་བོད་ས་ཡོངས་སུ་ས་བྱི་ཞི་བའི་ངོ་རྒོལ་ཆེན་མོ་བྱུང་དགོས་དོན་ནི། རྒྱ་གཞུང་གིས་བོད་ཐོག་འཛིན་པའི་དྲག་གནོན་དབང་བསྒྱུར་གྱི་མི་སེར་སྤེལ་བའི་སྲིད་ཇུས་ལག་བསྟར་གྱིས། བོད་མིའི་ཆོས་དང་རིག་གཞུང་། སྐད་ཡིག ཁོར་ཡུག འཚོ་གནས་བཅས་བརྡལ་བཤིག་བཏང་སྟེ་བོད་མིའི་ངོ་བོ་རྩ་བརླག་དང་། བོད་མིའི་གཞི་རྩའི་འགྲོ་བ་མིའི་ཐོབ་ཐང་དང་རང་དབང་མཐའ་དག་བཙན་འཕྲོག་བྱེད་བཞིན་པ་བཅས་ལ་ཐུག་ཡོད། ཆབ་སྲིད་བཙོན་པའི་གནས་ཚུལ་སྐོར་གྱི་དྲ་རྒྱ་འདི་བརྒྱུད་ནས། རྒྱལ་སྤྱིའི་སྒང་འགྲོ་བ་མིའི་ཐོབ་ཐང་ཐད་ཕྱག་ལས་གནང་མཁན་གྱི་གཞུང་དང་གཞུང་འབྲེལ་མ་ཡིན་པའི་ཚོགས་སྡེ། ཉམས་ཞིབ་པ་བཅས་ལ་དུས་ཐོག་བོད་ནང་གི་ཆབ་སྲིད་བཙོན་པའི་སྐོར་གྱི་གནས་ཚུལ་ཁ་གསལ་དང་ཁུངས་ལྡན་སྒོ་ནས་མཁོ་འདོན་བྱེད་ཐུབ་པར་ངོས་འཛིན་བྱེད་ཀྱི་ཡོད། དྲ་རྒྱ་འདིའི་ནང་འདི་ག་ལྟེ་གནས་ཁང་གི་ཆབ་སྲིད་བཙོན་པའི་མིང་ཐོ་གཞིར་བཟུང་། བོད་ནང་ཆབ་སྲིད་བཙོན་པ་རྣམས་ཀྱི་ལོ་རྒྱུས་གནས་ཚུལ་མཁོ་འདོན་དང་། རྒྱ་གཞུང་གིས་གསར་དུ་འཇུ་བཟུང་བྱས་པའི་ཆབ་སྲིད་བཙོན་པའི་མིང་ཐོ་དང་གནས་ཚུལ་དུས་ཐོག་དྲ་རྒྱའི་སྒང་གསར་འཇུག་བྱེད་ཀྱིན་ཡོད། དེ་བཞིན།…

གྲྭ་འཇིགས་མེད་རྒྱ་མཚོའམ་ཡོངས་གྲགས་སུ་འཇིགས་མེད་མགོ་རིལ་ལགས་བཙོན་འཇུག་དུས་ཡུན་རྫོགས་ལ་ཉེ་བའི་སྐབས་དང་བསྟུན་ནས།  གློ་བུར་ལན་ཀྲི་ཏཱ་ཞ་ཕིན་བཙོན་ཁང་གི་སྨན་ཁང་ནང་ཁྲིད་ཡོད་སྟབས། ཁོང་གི་ནང་མི་དང་སློབ་ཕྲུག་དག་ལ་བློ་འཚབ་དང་དོགས་སློང་ཤུགས་ཆེན་པོ་བྱུང་འདུག

འདི་ག་ལྟེ་གནས་ཁང་ལ་གནས་ཚུལ་འབྱོར་དོན། བླ་བྲང་རྒྱུད་སྟོད་གྲྭ་ཚང་གི་དགེ་འདུན་པ་འཇིགས་མེད་རྒྱ་མཚོའམ། སྤྱི་ཚོགས་ཐོག་ཡོངས་གྲགས་སུ་འཇིགས་མེད་མགོ་རིལ་ཞེས་འབོད་པ་ཁོང་ལ་རྒྱ་གཞུང་གིས་༼རྒྱལ་ཁབ་ཁ་བྲལ་གྱི་ལས་འགུལ་སྤེལ་བའི་༽ཉེས་འཛུགས་འོག་ལོ་ ༥ ཁྲིམས་བཅད་དེ་བཙོན་འཇུག་བྱས་ཡོད་པ་ལྟར། ༢༠༡༦ ཕྱི་ཟླ་ ༣ པའི་ཟླ་མགོར་བཙོན་ཁང་གི་འབྲེལ་ཡོད་མི་སྣས་གྲྭ་འཇིགས་མེད་རྒྱ་མཚོ་ཁོང་ད་ལྟ་ལན་ཀྲིག་ཏཱ་ཞའ་ཕིན་བཙོན་ཁང་གི་སྨན་ཁང་ནང་ཁྲིད་ཡོད་པའི་གནས་ཚུལ་ཞིག་ཁོང་གི་ནང་མིར་ཁ་པར་བརྒྱུད་བརྡ་ལན་འབྱོར་ཡོད་འདུག