——༸པཎ་ཆེན་རིན་པོ་ཆེ་གར་སོང་ཆ་མེད་དུ་གྱུར་ཏེ་མི་ལོ་ ༡༨ འཁོར་བའི་གདུང་འབོད་རྗེས་དྲན།
དེ་རིང་སྟེ་ཕྱི་ལོ་ ༢༠༡༣ ཟླ་ ༥ ཚེས་ ༡༧ ཉིན་ནི། ༸པཎ་ཆེན་སྐུ་ཕྲེང་བཅུ་གཅིག་པ་དགེ་འདུན་ཆོས་ཀྱི་ཉི་མ་མཆོག་རྒྱ་གཞུང་གིས་འཇུ་བཟུང་བཙན་ཁྲིད་འོག་གར་སོང་ཆ་མེད་གྱུར་ནས་མི་ལོ་ ༡༨ འཁོར་བའི་ཉིན་མོ་ཡིན་ལ། ༸པཎ་ཆེན་རིན་པོ་ཆེ་མཆོག་ནི་བོད་མི་ས་ཡ་དྲུག་གི་སེམས་ཁོང་ན་ནམ་ཡང་ལ་བ་མེད་པའི་བོད་ཆོས་ཀྱི་དབུ་ཁྲིད་གལ་ཆེ་ཆོས་ཤིག་ཆགས་ཡོད་སྟབས། “གནམ་ལ་ཉི་ཟླ་ཟུང་གཅིག ། ས་ལ་རྒྱལ་བ་པཎ་ཆེན།། ” ཞེས་བོད་ཁམས་ཡོངས་སུ་གྲགས་ཡོད།
ཕྱི་ལོ་ ༡༩༩༥ ཟླ་ ༥ ཚེས་ ༡༧ ཉིན། དགུང་ལོ་ ༦ ལ་སོན་མ་ཐག་པའི་༸པཎ་ཆེན་ཆུང་སྲིད་དགེ་འདུན་ཆོས་ཀྱི་ཉི་མ་མཆོག་དང་། ཁོང་གི་ཕ་མ་ནང་མི་དང་བཅས་པ་རྒྱ་གཞུང་གི་འཇུ་བཟུང་བཙན་ཁྲིད་ཀྱིས་གར་སོང་ཆ་མེད་དུ་གྱུར་ཡོད་ལ། ༸པཎ་ཆེན་ཆུང་སྲིད་མཆོག་གར་སོང་ཆ་མེད་དུ་གྱུར་བའི་ཉིན་མོ་དེ་ནི། ༸བོད་མིའི་བླ་ན་མེད་པའི་དབུ་ཁྲིད་༸གོང་ས་མཆོག་གིས་༸པཎ་ཆེན་སྐུ་ཕྲེང་བཅུ་བའི་ཡང་སྲིད་དུ་ངོས་འཛིན་ཡོངས་བསྒྲགས་གནང་བའི་རྗེས་ཀྱི་ཉིན་གསུམ་པ་དེ་ཆགས་ཡོད།