རྒྱ་གཞུང་གིས་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེའི་འདས་རྐྱེན་ཐད་བསྐྱར་ཞིབ་བརྟག་དཔྱད་ཀྱིས་གསལ་ཁ་བཟོ་དགོས་པ་དང་། སྐུའི་སྲིང་མོ་སྒྲོལ་དཀར་མ་སྨད་གཉིས་ཁྲིམས་འགལ་འཇུ་བཟུང་བ་འཕྲལ་དུ་གློད་གྲོལ་གཏོང་དགོས་པའི་འབོད་སྐུལ་བྱེད་བཞིན་ཡོད།
འདི་ག་ལྟེ་གནས་ཁང་ལ་གནས་ཚུལ་འབྱོར་དོན། ཕྱི་ལོ་ ༢༠༡༥ ཟླ་ ༧ ཚེས་ ༡༧ ཉིན། ཟི་ཁྲོན་ཁྲིན་ཏུའུ་གྲོང་ཁྱེར་གྱི་ཟ་ཁང་ཞིག་ནང་ནས། སྤྲུལ་སྐུ་བསྟན་འཛིན་བདེ་ལེགས་ཀྱི་སྐུ་སྲིང་རང་ལོ་ ༥༢ ཡིན་པའི་སྒྲོལ་དཀར་ལྷ་མོ་དང་། ཁོ་མོའི་བུ་མོ་རང་ལོ་ ༢༥ ཡིན་པ་ཉི་མ་ལྷ་མོ་གཉིས་ལི་ཐང་རྫོང་གི་ཉེན་རྟོག་པས་འཇུ་བཟུང་བཙན་འཁྲིད་བྱས་ཡོད་པ་དང་། དེ་རྗེས་གནས་ཚུལ་གང་ཡང་ཤེས་རྟོག་ཐུབ་ཀྱི་མེད་པར་གར་སོང་ཆ་མེད་དུ་གནས་སྟངས་འོག་ལྷག་ཡོད་པ་རེད།
རྒྱ་གཞུང་གིས་རིན་པོ་ཆེའི་ནང་མི་དེ་གཉིས་འཇུ་བཟུང་དགོས་དོན་ནི། སྐུའི་སྲིང་མོ་སྒྲོལ་དཀར་ལྷ་མོ་ལགས་ཀྱིས་རིན་པོ་ཆེའི་འདས་རྐྱེན་ཐད་བསྐྱར་ཞིབ་བརྟག་དཔྱད་དགོས་པའི་ཞུ་གཏུགས་བྱས་པ་དང་། རིན་པོ་ཆེའི་གདུང་ཐལ་ཕྱིར་ནང་མིར་རྩིས་སྤྲོད་དགོས་པའི་རེ་འདུན་བཏོན་པར་བརྟེན་ནས་འཇུ་བཟུང་བྱས་པ་ཞིག་ཆགས་ཡོད།