དེ་རིང་ནི་༸པཎ་ཆེན་རིན་པོ་ཆེ་སྐུ་ཕྲེང་བཅུ་པ་མཆོག་གི་ཡང་སྲིད་༸པཎ་ཆེན་དགེ་འདུན་ཆོས་ཀྱི་ཉི་མ་མཆོག་རང་ལོ་ ༢༨ ཕེབས་པའི་སྐུའི་འཁྲུངས་སྐར་ཉིན་མོ་ཡིན་ལ། དེ་བཞིན། རྒྱ་གཞུང་གིས་༸ཁོང་དང་ཁོང་གི་ཡབ་ཡུམ་སྐུ་འཁོར་དང་བཅས་གཞིས་ཀ་ནས་བཙན་འཁྲིད་ཀྱིས་གར་སོང་ཆ་མེད་གྱུར་མི་ལོ་༢༢ འཁོར་ཅིང་། ༧ཁོང་ནི་འཛམ་གླིང་སྟེང་གར་སོང་ཆ་མེད་གྱུར་རིང་ཤོས་སྟེ་ཆགས་ཡོད། རྒྱ་གཞུང་ལ་མཚོན་ན་དེ་ནི་གསང་རྒྱ་ཆེ་ཤོས་ཤིག་ཀྱང་ཆགས་ཡོད་དེ། འདིའི་ཐད་ཀྱི་གནས་ཚུལ་གསར་ཤོས་ནི་བོད་རང་སྐྱོང་ལྗོངས་ཀྱི་འཐབ་ཕྱོགས་གཅིག་གྱུར་པུའུ་ཡི་ལས་བྱེད་ནོར་བུ་དོན་གྲུབ་ཟེར་བས། ཕྱི་ལོ་༢༠༡༥ཟླ་༩ཚེས་༦ ཉིན། གསར་འགོད་པའི་འདྲི་བ་དང་བསྟུན་ནས། ཁོང་གིས༧པཎ་ཆེན་རིན་པོ་ཆེ་ཡིས་མུ་མཐུད་སློབ་སྦྱོང་གནང་བཞིན་པ་དང་། བདེ་ཐང་རེད། མི་ཚེ་དཀྱུས་མ་ཞིག་བསྐྱལ་བཞིན་པ་རེད་ཅེས་ལན་སྐྱོན་པ་ཙམ་ལས། དེ་མིན་ལས་གནས་ཚུལ་གསལ་ཁ་གང་མང་བཟོས་མེད། ཡིན་ན་ཡང་། རྒྱལ་སྤྱིའི་བདའ་འདེད་དང་འདྲི་བརྩད་ལ་གསལ་ཁ་མེད་ཅིང་མག་མོག་གི་སྐད་ཆ་དེ་ནི་བོད་ཀྱི་ཆོས་ཀྱི་དབུ་འཁྲིད་ཅིག་གར་སོང་ཆ་མེད་དུ་གྱུར་བའི་ཡ་ལན་མིན་པར་གཡོ་ཟོལ་ཙམ་དུ་སོང་ཡོད་པ་ཡིན། མི་ལོ་༢༢རིང་གར་སོང་ཆ་མེད་དུ་གྱུར་བ། ༸པཎ་ཆེན་རིན་པོ་ཆེ་མཆོག་མུ་མཐུད་བཀག་ཉར་གསང་སྦས་བྱས་པ་དེས། རྒྱ་གཞུང་གིས་འགྲོ་བ་མིའི་ཐོབ་ཐང་སྲུང་སྐྱོབ་ཐད་དོ་ཁུར་གང་ཡང་མེད་པར། འགྲོ་བ་མིའི་གཞི་རྩའི་ཐོབ་ཐང་ཁག་རྡོག་རོལ་གཏོང་བཞིན་པ་གསལ་བོར་བསྟན་ཡོད། སྤྱིར་གར་སོང་ཆ་མེད་དུ་གྱུར་བ་ནི་ཁྲིམས་འགལ་གྱི་ཉེས་སྤྱོད་ཅིག་ཆགས་ཡོད། དེའི་རྒྱུ་མཚན་ནི་གར་སོང་ཆ་མེད་དུ་གྱུར་བའི་གནས་སྟངས་དེས། འགྲོ་བ་མིའི་གཞི་རྩའི་ཐོབ་ཐང་ཁག་ལ་བརྡལ་བཤིག་གཏོང་བཞིན་ཡོད་དེ། འགྲོ་བ་མིའི་གཞི་རྩའི་བདེ་འཇགས་དང་ཆེ་མཐོང་གི་ཐོབ་ཐང་། མི་སྤྱོད་ལས་འདས་པའི་མནར་གཅོད་མྱོང་མི་དགོས་པའི་རང་དབང་། འཛིན་བཟུང་བཀག་ཉར་སྐབས་མིའི་འདུ་ཤེས་འཛིན་དགོས་པའི་ཐོབ་ཐང་། ཁྲིམས་གཏུགས་ཀྱི་ཐོབ་ཐང་། དྲང་བདེན་ཁྲིམས་གཅོད་ཀྱི་ཐོབ་ཐང་། ཁྱིམ་ཚང་དང་ཚེ་སྲོག་གི་ཐོབ་ཐང་སོགས་རྡོག་རོལ་གཏོང་བཞིན་ཡོད། རྒྱ་གཞུང་གི་ <<རྩ་ཁྲིམས>>…