གསར་འགྱུར།

ཕྱི་ལོ་ ༢༠༡༣ ཟླ་ ༡༡ ཚེས་ ༡༢ ཉིན།  རྒྱ་ནག་གཞུང་ནི་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ཚོགས་ཆུང་གི་ཚོགས་མི་རྒྱལ་ཁབ་གྲས་སུ་བདམས་ཡོད་པ་རེད།  སྤྱིར་མཉམ་འབྲེལ་རྒྱལ་ཚོགས་འགྲོ་བ་མིའི་ཐོབ་ཐང་ཚོགས་ཆུང་ནི།  ཕྱི་ལོ་ ༢༠༠༦ ལོར་གསར་དུ་འཛུགས་ཤིང་། རྒྱལ་སྤྱིའི་འགྲོ་བ་མིའི་ཐོབ་ཐང་ཐད་ལྟ་རྟོགས་བྱེད་མཁན་ཚོགས་སྡེ་གལ་ཆེ་ཤོས་དེ་ཆགས་ཡོད།  ཚོགས་ཆུང་དེར་ཚོགས་མི་རྒྱལ་ཁབ་ ༤༧ ཡོད་པ་རྣམས་མཉམ་འབྲེལ་རྒྱལ་ཚོགས་ཀྱི་གྲོས་ཚོགས་བརྒྱུད་འདེམས་ཐོན་གནང་གི་ཡོད་ལ།  ཚོགས་ཆུང་གི་འོས་འགན་གཙོ་བོ་ནི་འཛམ་གླིང་ཡུལ་ལུང་སོ་སོའི་འགྲོ་བ་མིའི་ཐོབ་ཐང་གནས་སྟངས་སྲུང་སྐྱོབ་དང་ཡར་རྒྱས།  རྒྱལ་སྤྱིའི་ཁྲིམས་སྒྲིག་གཞིར་བཟུང་རྒྱལ་ཚོགས་ཀྱི་ཚོགས་ཞུགས་རྒྱལ་ཁབ་ཚང་མའི་ནང་འགྲོ་བ་མིའི་ཐོབ་ཐང་བརྩི་སྲུང་དང་ལག་བསྟར་དོན་འཁྱོལ་ཡོང་བར་འགན་ལེན་བྱ་དགོས་པ་དེ་ཆགས་ཡོད།

འདི་ལོར་མཉམ་འབྲེལ་རྒྱལ་ཚོགས་འགྲོ་བ་མིའི་ཐོབ་ཐང་ཚོགས་ཆུང་གི་ཚོགས་མི་རྒྱལ་ཁབ་གྲས་སུ་རྒྱ་གཞུང་འདེམས་ཐོན་ཡོང་ཉེན་ཐད།  འདས་པའི་ཟླ་འགའི་ནང་རྒྱལ་སྤྱིའི་སྤྱི་ཚོགས་ཀྱིས་ཧ་ཅང་བློ་འཚབ་ཆེན་པོ་གནང་ཡོད།  དེ་བཞིན།  མཉམ་འབྲེལ་རྒྱལ་ཚོགས་འགྲོ་བ་མིའི་ཐོབ་ཐང་ལྷན་ཚོགས་ཀྱི་གྲོས་ཆོད་ཡིག་ཆ་ཨང་  ༦༠། ༢༥༡ པའི་དོན་ཚན་བརྒྱད་པའི་ནང་།  ༼འགྲོ་བ་མིའི་ཐོབ་ཐང་ལྷན་ཚོགས་ཀྱི་ཚོགས་མི་རྒྱལ་ཁབ་འོས་འདེམས་སྐབས།  མཉམ་འབྲེལ་རྒྱལ་ཚོགས་ཀྱི་ཚོགས་ཞུགས་རྒྱལ་ཁབ་དག་གིས་འོས་མི་རྒྱལ་ཁབ་གང་དེས།  འདས་པའི་དུས་ཡིན་ནང་འགྲོ་བ་མིའི་ཐོབ་ཐང་ཡར་རྒྱས་དང་སྲུང་སྐྱོབ་ཐད།  རང་ངོས་ནས་བྱས་རྗེས་དང་ནུས་པ་ག་རེ་བཏོན་ཡོད་མེད་གཞི་རྩར་བཟུང་བའི་ཐོག་ནས་འོས་འདེམས་བྱ་དགོས།༽  ཞེས་གསལ་ཡོད་མོད།   ད་ལྟའི་བར་དུ་རྒྱ་ནག་གཞུང་གིས་འགྲོ་བ་མིའི་ཐོབ་ཐང་རྡོག་རོལ་བཏང་པའི་དངོས་ཡོད་གནས་སྟངས་དང་། རྒྱལ་སྤྱིའི་གཞུང་འབྲེལ་མ་ཡིན་པའི་ཚོགས་སྡེ་ཁག་མང་པོས་ངོ་རྒོལ་བྱས་མིན་ལ་མ་བལྟོས་པར།  ཐེངས་འདིར་འགྲོ་བ་མིའི་ཐོབ་ཐང་ཚོགས་ཆུང་གི་ཚོགས་མི་རྒྱལ་ཁབ་གྲས་སུ་རྒྱ་ནག་གཞུང་འདེམས་ཐོན་བྱུང་ཡོད་པ་རེད།

ཕྱི་ལོ་ ༢༠༡༣ ཟླ་ ༡༡ ཚེས་ ༡༡ ཉིན་སྟེ། རྒྱ་གཞུང་དམར་ཤོག་སྐབས་བཅོ་བརྒྱད་པའི་ཚོགས་འདུ་ཐེངས་གསུམ་པའི་སྐབས་དང་བསྟུན་ནས། མགོ་ལོག་ཁུལ་པདྨ་རྫོང་གི་མཁར་གྲོང་སྲང་ལམ་དུ། ཨ་སྐྱོང་ཇོ་ནང་དགོན་པའི་གྲྭ་ཚེ་རིང་རྒྱལ་ལགས་ཀྱིས་རང་ལུས་མེར་བསྲེགས་གནང་སྟེ། རྒྱ་གཞུང་གིས་བོད་ཐོག་འཛིན་པའི་དྲག་གནོན་དབང་སྒྱུར་གྱི་མི་སེར་སྤེལ་བའི་སྲིད་ཇུས་ལ་ཞི་བའི་ངོ་རྒོལ་གནང་འདུག ཁོང་ནི་བོད་ནང་རང་ལུས་མེར་བསྲེགས་གནང་མཁན་ ༡༢༢ པ་དང་། པདྨ་རྫོང་དུ་རང་ལུས་མེར་བསྲེགས་གནང་མཁན་ ༢ དེ་ཆགས་ཡོད།

འདི་ག་ལྟེ་གནས་ཁང་ལ་གནས་ཚུལ་འབྱོར་དོན། ཕྱི་ལོ་ ༢༠༡༣ ཟླ་ ༡༡ ཚེས་ ༡༡ ཉིན་གྱི་བོད་ནང་གི་ཕྱི་དྲོའི་ཆུ་ཚོད་ ༥ ཡས་མས་ཙམ་ལ། བོད་མདོ་སྨད་མགོ་ལོག་པདྨ་རྫོང་གི་སྲང་ལམ་བཞི་མདོའི་ཉེ་ཁུལ་དུ། རང་ལོ་ ༢༠ ཡིན་པའི་གྲྭ་ཚེ་རིང་རྒྱལ་གྱིས་རང་ལུས་མེར་བསྲེགས་གནང་སྟེ། རྒྱ་གཞུང་གི་དྲག་གནོན་དབང་སྒྱུར་གྱི་མི་སེར་སྤེལ་བའི་སྲིད་ཇུས་ལ་ཞི་བའི་ངོ་རྒོལ་བྱས་ཡོད་པ་རེད།

རང་ལུས་མེར་བསྲེགས་ཀྱི་གནས་ཚུལ་དངོས་སུ་མཐོང་མཁན་ཞིག་གིས་བརྗོད་པ་ལྟར་ན། གྲྭ་ཚེ་རིང་རྒྱལ་ལགས་ཀྱིས་རྫོང་མཁར་གྱི་བཞི་མདོའི་ཉེ་ཁུལ་ནས་རང་ལུས་ལ་མེ་སྒྲོན་རྗེས། རྫོང་སྲིད་གཞུང་གི་ཕྱོགས་སུ་གོམ་པ་བཅུ་གྲངས་ཤིག་རྒྱུགས་ནས་སར་འགྱེལ་ཡོད་པ་དང་། སྐབས་དེར་ཁོང་གིས་ “རྒྱལ་བ་བསྟན་འཛིན་རྒྱ་མཚོ་མཁྱེན།” ཞེས་ཐེངས་མང་པོར་གསོལ་འདེབས་གནང་བཞིན་པ་གོ་ཐོས་བྱུང་འདུག

ཉེ་ཆར་རྒྱ་གཞུང་གིས་བཙན་དྲག་གིས་འབྲི་རུ་རྫོང་དུ་སྤེལ་བཞིན་པའི་དམར་ཤོག་ལམ་ཕྱོགས་སློབ་གསོའི་ལས་འགུལ་ལ།  ས་གནས་བོད་མི་མང་ཚོགས་ཀྱིས་ཞི་བའི་ངོ་རྒོལ་རིམ་པར་བྱུང་རྗེས། རྒྱ་གཞུང་གིས་མེ་དམའ་དང་དུག་རླངས་སོགས་དྲག་ཆས་སྤྱད་དེ་ཁྲག་དྲི་བྲོ་བའི་དྲག་གནོན་དང་འཇུ་བཟུང་བཀག་ཉར་གྱི་གནས་ཚུལ་གཅིག་འཕྲོར་གཉིས་མཐུད་ཀྱིས་བྱུང་བཞིན་པ་ལྟར།  ཕྱི་ལོ་ ༢༠༡༣ ཟླ་ ༢ ནས་ ༣ བར་བོད་ཤར་ཕྱོགས་ཁམས་ནགས་ཤོད་འབྲི་རུ་རྫོང་གཤམ་ཆུ་ཤང་དུ། སྔ་ཕྱིར་བོད་མི་ ༡༥ འཇུ་བཟུང་བཙན་འཁྲིད་དང་། ཉེ་སྔོན་བོད་མི་ ༢ བཅས་ཁྱོན་བསྡོམས་མི་ ༡༧ འཇུ་བཟུང་བཀག་ཉར་བྱས་འདུག

འདི་ག་ལྟེ་གནས་ཁང་ལ་གནས་ཚུལ་འབྱོར་དོན།  རྒྱ་གཞུང་གིས་བོད་ས་བཅད་བགོས་ཀྱི་ད་ལྟའི་ས་ཁོངས་ལྟར་བྱས་ན། བོད་རང་སྐྱོང་ལྗོངས་ནག་ཆུ་ས་ཁུལ་འབྲི་རུ་རྫོང་གཤམ་ཆུ་ཤང་སྟེང་མཁར་གྲོང་ནས།  ཟླ་འདིའི་ཕྱི་ཚེས་ ༣ གྱི་མཚན་མོ་ནས་ཚེས་ ༤ ཉིན་བར། རྒྱ་གཞུང་ཉེན་རྟོག་པ་དང་དྲག་ཆས་ཉེན་རྟོག་པས་སྔ་ཕྱིར་བོད་མི་ ༡༥ འཇུ་བཟུང་བཙན་འཁྲིད་བྱས་འདུག

རྒྱ་གཞུང་གི་འཇུ་བཟུང་བཀག་ཉར་འོག་ཚུད་མཁན་གྲས་སུ་བུད་མེད ༣ ཡོད་པ་རེད།  ཁོང་གསུམ་ནི་རང་ལོ ༤༩ ཡིན་པའི་གསར་སྐྱིད།  རང་ལོ ༤༧ ཡིན་པའི་མཚོ་ཕན།  རང་ལོ ༢༥ ཡིན་པའི་གཡང་སྐྱིད་བཅས་ཡིན་པ་དང་། གཞན་པའི་སྐྱེས་པ་བཅུ་གཉིས་ནི་རང་ལོ ༢༢ ཡིན་པའི་ཚེ་རིང་།  རང་ལོ ༢༡ ཡིན་པའི་ཚེ་རིང་ཕུན་ཚོགས།  རང་ལོ ༢༡ ཡིན་པའི་བཀྲ་རྡོར།  རང་ལོ ༡༧ ཡིན་པའི་ཀུན་གྲགས།  རང་ལོ ༤༡ ཡིན་པའི་དགའ་སྦུག  རང་ལོ ༢༢ ཡིན་པའི་བསྟན་པ།  རང་ལོ ༢༧ ཡིན་པའི་ཐུབ་ཆེན།  རང་ལོ ༢༥ ཡིན་པའི་བསོད་བཀྲ། རང་ལོ་ ༢༡ ཡིན་པའི་ཚེ་རིང་བྱང་ཆུབ། རང་ལོ་ ༢༣ ཡིན་པའི་འཇིགས་མེད་ཕུན་ཚོགས། རང་ལོ་ ༢༤ ཡིིན་པའི་ལམ་བཟང་། རང་ལོ་ ༡༩ ཡིན་པའི་ཚེ་དབང་ལྷ་སྐྱབས་སོགས་ཡིན་འདུག

རྔ་བ་རྫོང་མཁར་གྲོང་ཁུལ་གྱི་སྡེ་བ་དང་པོའི་ཁྱིམ་ཚང་བཅུ་དྲུག་གི་ས་ཞིང་རྣམས། འདས་པའི་ལོ་ ༢༧ གྱི་ཡར་སྔོན་ནས་བསླུ་ཁྲིད་ཧམ་འཕྲོག་བྱས་རྗེས། ད་ལྟའི་བར་དུ་མང་ཚོགས་ཀྱི་འཚོ་བར་དཀའ་ངལ་རིམ་པར་འཕྲད་དེ། ཉེ་ཆར་ཁྱིམ་ཚང་དེ་དག་གི་རྒན་རྒོན་རྣམས་འུ་ཐུག་ཐབས་ཟད་ཀྱིས་ཕྱི་རུ་ཐོན་ནས། ཤོར་ཟིན་པའི་སོ་སོའི་ས་ཞིང་ཐོག་ནས་གྱོད་ཉལ་ཞི་རྒོལ་བྱེད་དགོས་བྱུང་འདུག

འདི་ག་ལྟེ་གནས་ཁང་ལ་གནས་ཚུལ་འབྱོར་དོན། ཕྱི་ལོ་ ༡༩༨༦ ནས་རྔ་པ་རྫོང་གིས་མཁར་གྲོང་ཁུལ་གྱི་སྡེ་བ་དང་པོའི་ཁྱིམ་ཚང་བཅུ་དྲུག་གི་ས་ཞིང་མུའུ་ ༤༠ བསླུ་འཁྲིད་གཡོ་འཕྲོག་བྱས་རྗེས། ཁྱིམ་ཚང་དེ་དག་གི་འཚོ་བའི་ཐད་དཀའ་ངལ་རིམ་པར་འཕྲད་ཡོད་སྟབས། སྔ་ཕྱིར་ཞུ་གཏུགས་རེ་སྐུལ་ཐེངས་ ༥༠ ལྷག་བརྒྱབ་ཡོད་ཀྱང་། ས་གནས་རྒྱ་གཞུང་གིས་སྔར་གྱི་ཁས་ལེན་དག་སྣང་མེད་དུ་གཡུགས་ནས། ཞིང་པའི་ཁྱིམ་ཚང་དེ་དག་གི་དཀའ་ངལ་རྣམས་མ་སེལ་བར་ད་ལྟའི་བར་ནར་འགྱངས་བྱས་ཡོད་སྟབས། ཕྱི་ལོ་ ༢༠༡༣ ཟླ་ ༩ ༡༤ ཉིན་ཁྱིམ་དེ་དག་གི་རྒན་རྒོན་མི་སྣ་ ༡༦ གིས་མིང་དང་མཛུབ་ཐེལ་བརྒྱབ་པའི་ཞུ་གཏུགས་ཡི་གེ་ཞིག་ས་གནས་ཀྱི་འབྲེལ་ཡོད་སྡེ་ཁག་སོ་སོར་ཕུལ་ཐོག ཕྱི་ཟླ་ ༩ ཚེས་ ༡༧ ་ནས་མགོ་བརྩམས་ཏེ་ཤོར་ཟིན་པའི་སོ་སོའི་ཞིང་སའི་ཐོག་གུར་ཕུབ་སྟེ་གྱོད་ཉལ་ཞི་རྒོལ་བྱས་ཡོད་པ་རེད།

ལོ་སྔོན་མའི་རྒྱའི་ལོ་སར་ཉིན་ཁམས་བྲག་མགོ་རུ་མང་གི་ཞི་རྒོལ་གནས་ཚུལ་བྱུང་རྗེས། རྒྱ་གཞུང་ཉེན་རྟོག་པ་འབྲོག་སར་ཡོང་སྟེ་མེ་མདའ་བརྒྱབ་ནས་ཡེ་ཤེས་བསམ་འགྲུབ་དང་གྲྭ་ཡེ་ཤེས་རིག་གསལ་གཉིས་དམར་གསོད། ཁོང་གཉིས་ཀྱི་སྤུན་མཆེད་ཡོན་ཏན་བཟང་པོ་འཇུ་བཟུང་བཙན་འཁྲིད་བྱས་མཐར། ས་གནས་མང་ཚོགས་ཀྱི་ཞུ་གཏུགས་རིམ་ཞུས་བརྒྱུད་རང་ཁྱིམ་དུ་བཟང་བཙོན་འོག་གློད་ཡོད་ཀྱང་། ད་ལྟའི་ཆར་ཁོང་གི་གཟུགས་པོ་གཅུང་ཅན་དུ་གྱུར་ཡོད་རྐྱེན། ཤུལ་ལུས་ནང་མི་རྣམས་ཀྱི་འཚོ་བར་དཀའ་ངལ་འཕྲད་ཉེན་ཡོད་འདུག

ཕྱི་ལོ་༢༠༡༢ ཟླ་ ༡ ཚེས་ ༡༣ སྟེ་རྒྱའི་ལོ་སར་ཉིན། བོད་མདོ་ཁམས་བྲག་མགོ་རྫོང་ཐོག་ཏུ་བོད་མིའི་ཞི་རྒོལ་ལ་རྒྱ་གཞུང་གིས་ཡ་ང་བའི་དམར་གསོད་དྲག་གནོན་བྱས་པ་མ་ཟད། ལོ་དེའི་ཕྱི་ཟླ་ ༢ ཚེས་ ༩ ཉིན་རྒྱ་གཞུང་དྲག་ཆས་ཉེན་རྟོག་པ་རྣམས་ནོར་བ་འབྲོག་སར་ཕྱིན་ཏེ། ཡེ་ཤེས་བསམ་འགྲུབ་ཀྱི་ཁང་ཁྱིམ་གྱི་མཐའ་སྐོར་རྗེས་ནང་མིའི་ཐོག་གང་བྱུང་མེ་མདའ་བརྒྱབ་ནས། དེ་སྔོན་བྲག་མགོའི་ཞི་རྒོལ་ཁྲོད་རྨས་སྐྱོན་ཕོག་མཁན་གྲྭ་ཡེ་ཤེས་རིག་གསལ་དང་། ཁོང་གི་སྤུན་མཆེད་ཡེ་ཤེས་བསམ་འགྲུབ་གཉིས་དམར་གསོད་བྱས་ཡོད་ལ། སྐབས་དེར་སྤུན་མཆེད་ཡོན་ཏན་བཟང་པོར་མེ་མདས་བརྒྱབ་སྟེ་རྨས་རྗེས་འཇུ་བཟུང་བཙན་ཁྲིད་ཀྱིས་བཀག་ཉར་དང་། རང་ལོ་ ༧༠ ཙམ་ཡིན་པའི་ཁོ་ཚོའི་ཨ་མ་སངས་ལྷ་དང་བྱིས་པ་ལྔ་ལའང་མེ་མདས་བརྒྱབ་སྟེ་རྨས་བཟོས་པ་མ་ཟད། རྗེས་སུ་ཡོན་ཏན་བཟང་པོར་མི་བསད་ཀྱི་ཉེས་པ་བཙུགས་ཏེ་སྲོག་ཁྲིམས་གཅོད་རྩིས་བྱས་ཡོད་ཀྱང་། ས་གནས་མང་ཚོགས་ཀྱིས་དྲང་བདེན་མིན་པའི་ཁྲིམས་གཅོད་དེར་ཞུ་གཏུགས་རིམ་པར་བྱས་པར་བརྟེན། ཕྱི་ལོ་ ༢༠༡༣ ཟླ་ ༤ ཚེས་ ༢༡ ཁོང་ཕྱིར་གློད་དེ་རང་ཁྱིམ་དུ་ལོ་གསུམ་རིང་བཟང་བཙོན་གྱི་ཚུལ་དུ་བཀག་ཉར་འོག་སྡོད་དགོས་བྱུང་ཡོད་པ་རེད། ཡིན་ནའང་། རྒྱ་གཞུང་གིས་ཁ་པར་དང་དྲ་རྒྱའི་བརྒྱུད་ལམ་ཁག་ལ་དམ་དྲག་ཤུགས་ཆེན་བྱེད་བཞིན་པའི་རྐྱེན་གྱིས། སྐབས་དེའི་ཞིབ་ཕྲའི་གནས་ཚུལ་རིགས་ཤེས་རྟོགས་ཐུབ་ཁག་པོ་ཆགས་ཡོད།

ཉེ་སྔོན་བོད་ནས་རྒྱ་གར་ལ་བཙན་བྱོལ་དུ་འབྱོར་མཁན་ཞིག་གིས། འདི་ག་ལྟེ་གནས་ཁང་ལ་སྐབས་དེའི་གནས་ཚུལ་སྐོར་བརྗོད་དོན། རྒྱ་གཞུང་དྲག་ཆས་ཉེན་རྟོག་པ་བྲག་མགོ་ནོར་བའི་འབྲོག་སར་འོངས་སྟེ། གྲྭ་ཡེ་ཤེས་རིག་གསལ་དང་ཁོའི་སྤུན་མཆེད་ཡེ་ཤེས་བསམ་འགྲུབ་གཉིས་དམར་གསོད་དང་། ཡོན་ཏན་བཟང་པོར་མེ་མདས་བརྒྱབ་སྟེ་རྨས་སྐྱོན་བཟོས་རྗེས་བཙན་འཁྲིད་ཀྱིས་གར་སོང་ཆ་མེད་དུ་གནས་ཚུལ་དེ་བྱུང་རྗེས། ཉིན་ ༡༥ ཙམ་གྱི་རྗེས་སུ་ཡོན་ཏན་བཟང་པོ་མ་ཤི་བར་དར་རྩེ་མདོའི་སྨན་ཁང་ཞིག་ཏུ་ཡོད་རབས་གོ་ཐོས་བྱུང་ཡང་། ཁོང་གི་གཟུགས་པོའི་གནས་སྟངས་ངོ་མ་ཅི་ཡིན་ཤེས་རྟོགས་བྱུང་མེད། དེ་ནས་ཉིན་ ༢༠ ཙམ་གྱི་རྗེས་སུ་ཁོང་དར་རྩེ་མདོ་ཡི་བཙོན་ཁང་ཞིག་ཏུ་བཙོན་འཇུག་བྱས་ཡོད་པ་ཤེས་ཡོད། ཡིན་ན་ཡང་། ཁོང་ལ་ཁྲིམས་ཐོག་ནས་ཉེས་འཛུགས་དང་བཙོན་འཇུག་ཁྲིམས་ཐག་བཅད་ཡོད་མེད། ད་དུང་གཟུགས་གཞིའི་གནས་སྟངས་སོགས་གང་འདྲ་ཆགས་མིན་ཤེས་རྟོགས་མེད་པར་ལུས་ཤིང་། དེ་ནས་ཟླ་བ་གཅིག་ཙམ་གྱི་རྗེས་སུ་དར་རྩེ་མདོ་ཡི་མི་མང་ཁྲིམས་ཁང་ནས་ཡོན་ཏན་བཟང་པོའི་ཁྱིམ་དུ་ཡི་གེ་ཞིག་འབྱོར་བའི་ནང་། ཡོན་ཏན་བཟང་པོས་རྒྱལ་ཁབ་ཀྱི་ལས་དོན་ལ་འགོག་རྐྱེན་བཟོས་ཏེ་མི་མང་ཉེན་རྟོག་པ་ལ་མེ་མདའ་བརྒྱབ་ནས་གཅིག་བསད་ཅིང་གཉིས་རྨས་པ་དང་། གཞན་ད་དུང་ཁོང་གི་ཁྱིམ་དུ་འགད་རྫས་དང་མེད་མདའ་རིང་ཐུང་གསུམ་རྙེད་ཡོད་པར་བརྟེན། ཁོང་ལ་སྲོག་ཐོག་གི་ཁྲིམས་ཐག་བཅད་ཡོད་པས་ཁྱིམ་མི་རྣམས་ལ་བསམ་འཆར་ཡོད་ཚེ་ཉིན་བཅོ་ལྔའི་ནང་ཚུད་ཞུ་གཏུགས་བྱ་དགོས་པའི་བཀའ་བཏང་ཡོད་འདུག

ཉེ་སྔོན་ནས་བཟུང་བོད་མདོ་སྨད་རྔ་བ་ཁུལ་ཟུང་ཆུ་རྫོང་དམུ་དགེ་ས་ཁུལ་དུ་རྒྱ་གཞུང་གིས་ས་གནས་བོད་རིགས་ཞང་འབྲོག་མང་ཚོགས་ཀྱི་ས་ཆ་བཙན་འཕྲོག་བྱས་པར་བརྟེན། ས་གནས་བོད་རིགས་མང་ཚོགས་ཀྱི་འཚོ་བར་དཀའ་ངལ་སྣ་ཚོགས་འཕྲལ་བཞིན་པ་མ་ཟད། དམུ་དགེ་དགོན་པ་གཙོས་ས་གནས་ཞང་གྲོང་ཁག་ནང་ཉེན་རྟོག་ཁང་མང་པོ་གསར་རྒྱག་བྱས་ཏེ་ལྟ་རྟོགས་བཀག་སྡོམ་ཤུགས་ཆེ་རུ་གཏོང་བཞིན་ཡོད་པ་ལྟར།

འདི་ག་ལྟེ་གནས་ཁང་ལ་གསར་དུ་དེའི་སྐོར་གྱི་གནས་ཚུལ་དང་པར་རིས་འབྱོར་དོན། དམུ་དགེ་དགོན་པའི་ནང་དུ་རྒྱ་གཞུང་ཉེན་རྟོག་པས་དུས་རྒྱུན་སྐོར་གཡེང་བྱེད་བཞིན་པ་མ་ཟད། ལྟ་རྟོགས་བཀག་སྡོམ་ཆེད་དགོན་པའི་ནང་བརྙན་མིག་གསུམ་བཙུགས་ཡོད་པ་དང་། བརྙན་མིག་དེ་གསུམ་ནི་གྲྭ་མང་ཆོས་ར་འཚོགས་སའི་དགོན་པའི་ཚོགས་ཆེན་འདུ་ཁང་གི་སྒོ་དང་། དགོན་པའི་ཁྲི་བ་དང་ལས་སྣེ་རྣམས་སྡོད་སའི་འཇམ་དབྱངས་བཞད་པའི་གཟུམ་ཁང་གི་སྒོ། བོད་མི་དད་ལྡན་མཇལ་བ་རྣམས་ཀྱིས་ཕྱག་སྐོར་དང་འདུ་འཛོམས་བྱེད་སའི་གནས་བཀྲ་ཤིས་འཁོར་ལོའི་དགོན་གྱི་རི་སྒང་བཅས་སུ་བཙུགས་ཡོད་འདུག བརྙན་མིག་དེ་གསུམ་གྱིས་དགོན་པའི་ནང་གནས་ཚུལ་ག་རེ་བྱུང་གི་ཡོད་ཆ་ཚང་གསལ་བོ་མཐོང་ཐུབ་ཀྱི་ཡོད་འདུག

རྒྱ་གཞུང་གིས་བོད་ནང་རང་ལུས་མེར་བསྲེགས་གཏོང་མཁན་རྣམས་ཀྱི་ནང་མི་དང་། གྲོགས་པོ་སོགས་ལ་ཉེས་མིང་སྣ་ཚོགས་བཀལ་ཏེ་འཇུ་བཟུང་ཁྲིམས་གཅོད་བྱེད་བཞིན་ཡོད་པ་ལྟར། རྒྱལ་གཅེས་དཔའ་བོ་གྲུབ་མཆོག་ལགས་ཀྱི་རང་བསྲེགས་ངོ་རྒོལ་དང་འབྲེལ་བའི་ཐོག་ནས། བོད་མི་གསུམ་ལ་ཉེན་རྟོག་པས་མེ་གསོད་པར་བཀག་འགོག་བྱས་པའི་ཉེས་མིང་འོག་བཙོན་འཇུག་ཁྲིམས་ཐག་བཅད་འདུག ཕྱི་ལོ་ ༢༠༡༣ ཟླ་ ༡ ཚེས་ ༡༨ ཉིན། བོད་མདོ་སྨད་རྔ་བ་ཁུལ་ཁྱུང་མཆུ་རྫོང་སྦྲ་ཆེན་ཡུལ་ཚོ་རུ་ཁག་གཉིས་པའི་གཙོས་རུ་མའི་ཕ་ཀྱོག་པོ་དང་མ་གཡང་མཚོ་གཉིས་ཀྱི་བུ། རང་ལོ་ ༢༨ ཡིན་པའི་གྲུབ་མཆོག་ལགས་ཀྱིས་སྦྲ་ཆེན་མཐུན་སྒྲིལ་ཐང་དུ་རང་ལུས་མེར་བསྲེཊ་གནང་སྟེ།  རྒྱ་གཞུང་གི་དྲག་གནོན་དབང་སྒྱུར་གྱི་མི་སེར་སྤེལ་བའི་སྲིད་ཇུས་ལ་ངོ་རྒོལ་གྱིས་འདས་གྲོངས་ཕྱིན་ཡོད་ལ།  སྐབས་དེར་ས་གནས་མང་ཚོགས་ཀྱིས་ཁོང་གི་སྐུ་ཕུང་འགེབས་སྲུང་གིས།  རྒྱ་གཞུང་ཉེན་རྟོག་པ་དང་མང་ཚོགས་བར་རྩོད་རྙོག་བྱུང་ཡོད་པ་ལྟར། འདི་ག་ལྟེ་གནས་ཁང་ལ་གནས་ཚུལ་འབྱོར་དོན།  རྒྱལ་གཅེས་དཔའ་བོ་གྲུབ་མཆོག་ལགས་ཀྱིས་རང་ལུས་མེར་བསྲེགས་རྗེས། རྒྱ་གཞུང་གིས་ཉེན་རྟོག་པ་དང་ལས་བྱེད་མི་སྣས་མེ་གསོད་རྒྱུར་བཀག་འགོག་བྱས་པའི་ཉེས་འོག   ཕྱི་ལོ་ ༢༠༡༣ ཟླ་ ༡ ཚེས་ ༢༢ ཉིན། བོད་མི་གུར་མགོན་དང་ནོར་བུ་རྡོ་རྗེ། བསོད་ནམ་ཡར་འཕེལ་གསུམ་འཛིང་བཟུང་བཀའ་རྒྱ་བསྒྲགས་ཏེ། གལ་སྲིད་ཁོང་གསུམ་གྱིས་མགོ་འདོགས་ཞུས་པ་ཡིན་ན་ཁྲིམས་ཆད་ཡང་མོ་གཅོད་རྒྱུ་ཡིན་སྐོར་བརྗོད་ནས།  ཁོང་གསུམ་འཇུ་བཟུང་གིས་ཁྱུང་ཆུ་རྫོང་དུ་བཀག་ཉར་འདྲི་བརྩད་བྱས་ཡོད་འདུག འདི་ལོའི་ཕྱི་ཟླ་ ༧ པའི་ཟླ་དཀྱིལ་ཙམ་ལ་ཁྱུང་མཆུ་རྫོང་མི་མང་ཁྲིམས་ཁང་གིས། ས་གནས་རྫོང་ཁོངས་ཀྱི་ཞང་ཁག་གི་མགོ་ཁྲིད་དང་ལས་བྱེད། ཁོང་གསུམ་གྱི་ནང་མི་གཉིས་རེ་བཅས་འབོད་འགུག་ཐོག   གུར་མགོན་དང་བསོད་ནམས་ཡར་འཕེལ་གཉིས་ལ་ལོ་ ༤ རེ་དུས་བཀག་བཙོན་འཇུག་དང་།  ནོར་བུ་རྡོ་རྗེ་ལ་ལོ་ ༥ དུས་བཀག་བཙོན་འཇུག་བཅས་ཀྱི་ཁྲིམས་ཐག་བཅད་ཡོད་པ་དང་།…

ན་གཞོན་རྩོམ་པ་པོ་ཞོགས་དྲིལ་ནི། ཁམས་འབྲི་རུ་རྫོང་ཤག་ཆུ་ཞང་ནས་ཡིན་ལ། ཕྱི་ལོ་ ༢༠༡༣ ཟླ་ ༡༠ ཚེས་ ༡༡ ཉིན་གྱི་མཚན་མོའི་ཆུ་ཚོད་ ༡ ཙམ་རྒྱ་གཞུང་ཉེན་རྟོག་པས་གསང་བའི་ཐོག་འཇུ་བཟུང་བཙན་ཁྲིད་བྱས་ཏེ།  ད་ལྟའི་ཆར་གར་སོང་ཆ་མེད་དུ་གནས་སྟངས་ཆགས་འོག་ལྷག་ཡོད། ཁོང་གིས་སྔ་ཕྱིར་ <<ཁ་བ་ལ་འཁྲེར་བའི་དུང་སེམས་ཀྱི་ཅོང་སྒྲ།>>  དང་   <<གངས་རིའི་ལས་དབང་།>>  ཞེས་པའི་དེབ་གཉིས་བརྩམས་ཏེ་འགྲེམས་དང་། <<གངས་རིའི་ལས་དབང་།>>  ཞེས་ལོ་དེབ་ཀྱི་རྩོམ་སྒྲིག་པ་བཅས་གནང་ཡོད་ལ།   རྒྱ་ཡིག་དྲ་རྒྱའི་སྒེར་གཉེར་ཟིན་སྟེང་རྒྱ་ཡིག་གི་ལམ་ནས་རྩོམ་ཡིག་སྣ་ཚོགས་སྤེལ་ཡོད་པ་རེད།

གཤམ་དུ་རྩོམ་པ་པོ་ཁོང་གིས་རྒྱ་ཡིག་ཐོག་བརྩམས་པའི་ <<འཆི་འོས་པའི་དཀོན་མཆོག>>  དང་  <<སྐྱུག་བྲོ་བའི་ལྷ།>> སྙན་རྩོམ་གཉིས་བོད་སྒྱུར་བྱས་ཡོད། སྐྱུག་བྲོ་བའི་ལྷ་ཞེས་པ་ནི་རྩོམ་འཕྲོར་ལས་པའི་སྙན་རྩོམ་ཞིག་ཡིན་པས། རྩོམ་པ་པོ་རང་ཉིད་ཀྱིས་རྒྱ་ཡིག་གི་མ་རྩོམ་སྟེང་མུ་འགོད་ཞེས་བྲིས་འདུག  ཡིག་སྒྱུར་སྐབས་མ་རྩོམ་གྱི་བརྗོད་དོན་ཇི་མ་ཇི་བཞིན་གྲ་མ་ཉམས་དྲི་མ་ཡལ་བ་ཞིག་འབྱུང་ཁག་སྟབས། རྒྱ་ཡིག་མ་རྩོམ་གྱི་དྲ་ཐག་འདི་གར་ཕུལ་ཡོད་པས།  ཀློག་པ་པོ་རྣམས་ཀྱིས་རྩོམ་གྱི་བརྗོད་སྙིང་གི་གཞི་འཛིན་ས་མ་རྩོམ་རང་བྱེད་དགོས་པ་ཐུགས་འཇགས་ཡོང་བ་ཞུ།

http://danzhengjia6508.tibetcul.com/home.php?mod=space&uid=17012&do=blog&id=146627

http://amy928.tibetcul.com/home.php?mod=space&uid=17012&do=blog&id=144260

རྒྱ་གཞུང་གིས་འབྲི་རུ་རྫོང་ཤག་ཆུ་གྲོང་རྡལ་གྱི་བསྟན་འཛིན་རང་གྲོལ་འཇུ་བཟུང་བཙན་འཁྲིད་ཀྱིས་གར་སོང་ཆ་མེད་གྱུར་ཡོད་པ་མ་ཟད། ཁོང་གློད་ཡོང་བར་རེ་སྐུལ་ཞུ་མཁན་མང་ཚོགས་ཁྲོད་ནས་མི་བཅུ་གྲངས་ཤིག་འཇུ་བཟུང་དང་། གཞན་རྣམས་ཀྱང་འཇུ་བཟུང་བྱ་སྲིད་པའི་འཇིགས་སྐུལ་དང་། མི་རིགས་ལ་གཉའ་གནོན་དང་ཁྱད་གསོད་ཀྱི་སྡིག་ར་སྣ་ཚོགས་སྐུལ་ཡོད་འདུག

ཕྱི་ལོ་ ༢༠༡༣ ཟླ་ ༡༠ ཚེས་ ༡༨ ཉིན་གྱི་ཞོགས་པར། འབྲི་རུ་རྫོང་ཤག་ཆུ་གྲོང་བརྡལ་ནས་ཡིན་པའི་བསྟན་འཛིན་རང་གྲོལ་གྱིས་བུ་ཕྲུག་སློབ་གྲྭར་བསྐྱལ་ཏེ་ཕྱིར་ལོག་པའི་ལམ་བར་ནས། རྒྱ་གཞུང་ཉེན་རྟོག་པས་ཁོང་འཇུ་བཟུང་བཙན་འཁྲིད་ཀྱིས་གར་སོང་ཆ་མེད་དུ་གྱུར་འདུག བསྟན་འཛིན་རང་གྲོལ་ནི་རྒྱ་གཞུང་གིས་བོད་ས་བཅད་བགོས་ཀྱི་ས་ཁོངས་ལྟར་ན། བོད་རང་སྐྱོང་ལྗོངས་ནག་ཆུ་ས་ཁུལ་འབྲི་རུ་རྫོང་ཤག་ཆུ་གྲོང་རྡལ་གྱི་གྲོང་ཚོ་བཞི་པའི་ཡིན་པ་དང་། ཁོང་ད་ལྟ་རང་ལོ་ ༣༤ ཡིན་པ་རེད། ཁོང་གི་བཟའ་ཟླ་མིང་ལ་ཚེ་རིང་པད་འཛོམས་དང་རང་ལོ་ ༢༦ ཡིན་འདུག ཁོང་གཉིས་ལ་བུ་ཕྲུག་གསུམ་ཡོད་པ་དང་། ཁྱིམ་ཚང་གི་འཚོ་རྟེན་གཙོ་བོ་ནི་སྒེར་གཉེར་ཚོང་ལས་ལ་བརྟེན་གྱི་ཡོད་འདུག

ཉེ་ཆར་འབྲི་རུ་རྫོང་དུ་རྒྱ་དམག་གིས་བོད་རིགས་མང་ཚོགས་ལ་དྲག་གནོན་གྱིས་ཛ་དྲག་གནས་ཚུལ་བྱུང་བའི་རྗེས།  རྒྱ་གཞུང་ཉེན་རྟོག་པས་སྔ་ཕྱིར་བོད་མི་མང་པོ་འཇུ་བཟུང་བཙན་ཁྲིད་ཀྱིས་གར་སོང་ཆ་མེད་དུ་འགྱུར་བཞིན་ཡོད་པ་མ་ཟད།  ནག་ཆུ་ས་ཁུལ་ཕྱི་ལོགས་ཀྱི་མདོ་སྟོད་སྨད་ཁུལ་གྱི་དགོན་སྡེ་ཁག་ནང་སློབ་གཉེར་བྱེད་བཞིན་པའི།  ཕ་ཡུལ་འབྲི་རུ་རྫོང་ཁོངས་ནས་ཡིན་པའི་གྲྭ་བཙུན་ལ་རྣམས་ལའང་དྲི་གཅོད་བཀག་སྡོམ་བྱེད་མགོ་བརྩམས་ཡོད་འདུག

འདི་ག་ལྟེ་གནས་ཁང་ལ་གནས་ཚུལ་འབྱོར་དོན།  ཕྱི་ལོ་ ༢༠༡༣ ཟླ་ ༡༠ ཚེས་ ༡༥ ཉིན།  རྒྱ་གཞུང་ཉེན་རྟོག་པས་ཁ་པར་དང་བརྒྱུད་ལམ་ཁག་ནས་གསང་བ་ཕྱིར་བསྒྲགས་བྱས་པའི་ཉེས་འཛུགས་འོག   འབྲི་རུ་རྫོང་གཤམ་ཆུ་ཞང་ཡར་ལྡིང་གྲོང་ནས་བོད་མི་ཟླ་བ་ལྷུན་གྲུབ་དང་བཙུན་མ་བྱམས་པ་གཉིས་འཇུ་བཟུང་བཙན་འཁྲིད་བྱས་ཡོད་འདུག  རྒྱ་གཞུང་གིས་བོད་ས་བཅད་བགོས་ཀྱི་ད་ལྟའི་ཁོངས་ལྟར་བྱས་ན།  ཁོང་གཉིས་ནི་བོད་རང་སྐྱོང་ལྗོངས་ནག་ཆུ་ས་ཁུལ་འབྲི་རུ་རྫོང་གཤམ་ཆུ་ཞང་ཡར་ལྡིང་གྲོང་ཚོ་ནས་ཡིན་ལ། ཟླ་བ་ལྷུན་གྲུབ་ད་ལྟ་རང་ལོ་ ༡༩ དང་། བཙུན་པ་བྱམས་པ་རང་ལོ་ ༢༠ ཡིན་འདུག

རྒྱ་གཞུང་ཉེན་རྟོག་པས་འབྲི་རུ་རྫོང་གི་བོད་རིགས་གཞོན་སྐྱེས་རྩོམ་པ་པོ་ཞིག་དང་། ཉེན་རྟོག་ལས་བྱེད་ཟུར་པ་ཞིག་བཅས་བོད་མི་གཉིས་ལ། འབྲི་རུ་རྫོང་དུ་མང་ཚོགས་ཀྱི་ཞི་བའི་ངོ་རྒོལ་སྐབས་ཁྲིམས་འགལ་གྱི་གཏམ་བཤད་སྤེལ་ཡོད་པའི་ཉེས་འཛུགས་འོག་འཇུ་བཟུང་བཙན་ཁྲིད་ཀྱིས་གར་སོང་ཆ་མེད་གྱུར་ཡོད་པ་རེད།

འདི་ག་ལྟེ་གནས་ཁང་ལ་གནས་ཚུལ་འབྱོར་དོན། ཕྱི་ལོ་ ༢༠༡༣ ཟླ་ ༡༠ པའི་ཚེས ༡༡ ཉིན་འབྲི་རུ་རྫོང་གི་ཉེན་རྟོག་མི་སྣ་གཤམ་ཆུ་ཤང་སྟེང་མཁར་གྲོང་དུ་ཕྱིན་ཏེ། བོད་ནང་གི་མཚན་མོ་ཆུ་ཚོད་ ༡ ཙམ་ལ་གློ་བུར་དུ་གཞོན་སྐྱེས་རྩོམ་པ་པོ་ཚུལ་ཁྲིམས་རྒྱལ་མཚན་གྱི་ཁྱིམ་དུ་འཛུལ་ཏེ་ཁོང་འཇུ་བཟུང་བཙན་ཁྲིད་བྱས་ཡོད་པ་མ་ཟད། རྩོམ་པ་པོ་ཁོང་གི་སྡོད་ཁང་ཕྱི་ནང་ཚང་མར་སྔོག་བཤེར་ནན་མོ་བྱས་ཏེ། ཁོང་གི་གློག་ཀླད་དང་ཁ་པར། དཔེ་དེབ་སོགས་ཀྱང་བཙན་འཁྱེར་བྱས་ཡོད་པ་དང་། ཕྱི་ཚེས་ ༡༡ ཉིན་གྱི་སྔ་དྲོ་ཁོང་གི་གྲོགས་པོ་གཞོན་སྐྱེས་རྩོ་པོ་པོ་གཡུལ་རྒྱལ་ལགས་ཀྱང་འབྲི་རུ་རྫོང་གཤམ་ཆུ་ཤང་སྟེང་མཁར་གྲོང་ནས་གློ་བུར་འཇུ་བཟུང་བཙན་ཁྲིད་བྱས་ཡོད་འདུག