གསར་འགྱུར།

རྒྱ་གཞུང་གིས་གྲྭ་དགེ་འདུན་རྒྱ་མཚོ་ལགས་ལ་མི་གསོད་ཀྱི་ཉེས་མིང་བཀལ་ཏེ་ལོ་ ༦ བཙོན་འཇུག་ཁྲིམས་ཐག་བཅད་ཡོད་ཀྱང་། ཁོང་གིས་རྒྱ་གཞུང་གི་ནག་ཉེས་དེ་ངོས་ལེན་གནང་མེད་པ་རེད། དེ་བཞིན། ད་ལྟའི་ཆར་རང་ལུས་མེར་བསྲེགས་གནང་མཁན་བོད་མི་གཟུངས་འདུས་སྐྱབས་ལགས་འཚོ་བཞུགས་ཡོད་མེད་ཀྱང་གསལ་བོ་ཤེས་རྟོགས་ཐུབ་ཀྱིན་མེད་པ་རེད།

འདི་ག་ལྟེ་གནས་ཁང་ལ་གནས་ཚུལ་འབྱོར་དོན། ཕྱི་ལོ་ ༢༠༡༣ ཟླ་ ༡༢ ཚེས་ ༡༡ ཉིན། བསང་ཆུ་རྫོང་མི་དམངས་ཁྲིམས་ཁང་གིས། བླ་བྲང་འབོ་ར་དགོན་པའི་གྲྭ་དགེ་འདུན་རྒྱ་མཚོ་ལགས་སུ། ༼བསམ་བཞིན་མི་བསད་པ༽ཉེས་མིང་འོག་ལོ་ ༦ གི་དུས་བཀག་བཙོན་འཇུག་གི་ཁྲིམས་ཐག་བཅད་འདུག

རྒྱ་གཞུང་གིས་འབོ་ར་ས་ཁུལ་གྱི་བོད་མི་གཟུངས་འདུས་སྐྱབས་ལགས་ཀྱིར་རང་ལུས་མེར་བསྲེགས་གཏོང་དུས།   ཉེན་རྟོག་པས་མེ་གསོད་ཐབས་བྱ་སྐབས་གྲྭ་དགེ་འདུན་རྒྱ་མཚོ་སོགས་ཀྱིས་མེ་གསོད་མ་བཅུག་པར་ཁ་གཡར་བའི་ཐོག་ནས།  རྒྱ་གཞུང་གི་ཉེས་ཁྲིམས་དོན་ཚན་ ༢༣༢ པའི་འབྲི་དོན་ལྟར།  བསམ་བཞིན་མི་བསད་པའི་ནག་ཉེས་བཀལ་ཏེ་ཁྲིམས་ཐག་བཅད་པ་རེད། ཁྲིམས་ཐག་གཅོད་པའི་ཉིན་མོ་དེར་རྒྱ་གཞུང་གིས་ཁོང་གི་འབྲེལ་ཡོད་ནང་མི་ ༤ སྐད་བཏང་ཡོད་འདུག་ལ།  སྐབས་དེར་གྲྭ་དགེ་འདུན་རྒྱ་མཚོ་ལགས་ཀྱིས་རྒྱ་གཞུང་གིས་ཉེས་འཛུགས་དེ་དག་ངོས་ལེན་བྱས་མེད་པ་རེད།

ཉེ་ཆར་རྒྱ་གཞུང་གིས་དྲག་གནོན་འོག་འབྲི་རུ་རྫོང་ཁོངས་སུ་ཡོད་པའི་དཔལ་ལྡན་འབྲོང་སྣ་དགོན་པ་སྒོ་རྒྱག་བཅུག་ཡོད་པ་དང་། དགོན་པའི་རིག་གནས་དགེ་རྒན་འཇུ་བཟུང་བྱས་ཡོད་འདུག

འདི་ག་ལྟེ་གནས་ཁང་ལ་གནས་ཚུལ་འབྱོར་དོན་ལྟར་ན། ཉེ་ཆར་ཁམས་འབྲི་རུ་རྫོང་ཁོངས་སུ་ཡོད་པའི་ལོ་རྒྱུས་ཡུན་རིང་ལྡན་པའི་དཔལ་ལྡན་འབྲོང་སྣ་དགོན་པའི་ནང་དུ་ཛ་དྲག་གི་བཀག་སྡོམ་གནས་ཚུལ་བྱུང་བཞིན་ཡོད་པ་མ་ཟད། ཕྱི་ལོ་ ༢༠༡༣ ཟླ་ ༡༡ ཚེས་ ༡༩ ཉིན། དགོན་པ་དེའི་རིག་གནས་རྒན་གྲྭ་སྐལ་བཟང་དོན་འགྲུབ་ལགས་འཇུ་བཟུང་བྱས་ཡོད་འདུག

དེ་བཞིན། རྒྱ་གཞུང་གིས་གང་བྱུང་དུ་རྣམ་པ་འདྲ་མིན་དྲག་སྤྱོད་དང་མནར་གཅོད་ཚད་ལས་བརྒལ་བའི་སྒོ་ནས་དགེ་འདུན་པ་མང་པོ་འཇུ་བཟུང་དང་། དགོན་པའི་ཉེས་འགོག་སྒམ་ལ་སོགས་ཅ་དངོས་པོ་འཕྲོག་བཅོམ་དང་། ད་ལྟའི་ཆར་འབྲོང་སྣ་དགོན་དུ་གྲྭ་ཤག་ཚང་མ་སྒོར་ཤོག་བྱང་སྦྱར་ཏེ་སྒོ་རྒྱག་བཅུག་ཡོད་འདུག

རྒྱ་གཞུང་གིས་བཙན་དབང་གིས་ཤག་རོང་པོ་ཆོས་རྗེའི་ཡང་སྲིད་རྫུན་མ་ཐག་གཅོད་ཀྱིས་ཁྲི་འདོན་བྱ་རྒྱུ་ངོ་རྒོལ་གནང་མཁན་གྱི་ཉེས་དོགས་གཞིའི་འོག བོད་མི་མཚོ་སྐྱེས་ལགས་རྒྱ་གཞུང་གིས་འཇུ་བཟུང་བཙན་འཁྲིད་བྱས་འདུག

བོད་ནས་ཁུངས་ལྡན་གནས་ཚུལ་འབྱོར་གསལ་ལྟར་ན། ཟླ་འདིའི་ཕྱི་ཚེས་ ༡༣ ཉིན་ཁམས་ནག་ཆུ་རྫོང་རྟར་ཆེན་ཤང་ཨག་ཆེན་གྲོང་ཚོ་ནས་ཡིན་པའི་མིང་ལ་མཚོ་སྐྱེས་ཟེར་བ་ཞིག་རྒྱ་གཞུང་གིས་འཛིན་བཟུང་བཙན་ཁྲིད་བྱས་རྗེས་གར་སོང་ཆ་མེད་གྱུར་ཡོད་པ་རེད།

ཁྲིམས་འབྲི་རུ་རྫོང་གི་ཁྲིམས་ཁང་གིས་བོད་མི་འཕྲིན་ལས་ཚེ་དཀར་དང་། ཆོས་ཁྱབ། ཚེ་ལྷ་གསུམ་ལ་ཁོར་ཡུག་སྲུང་སྐྱོབ་ཀྱི་ལས་འགུལ་ཁྲོད་མཉམ་ཞུགས་བྱས་པ་དང་། རྒྱལ་ཁབ་ཁ་བྲལ་གྱི་ཉེས་མིང་འོག ལོ་ ༡༣ ནས་ ༣ བར་གྱི་དུས་བཀག་བཙོན་འཇུག་གི་ཁྲིམས་ཐག་བཅད་འདུག

འདི་ག་ལྟེ་གནས་ཁང་ལ་གནས་ཚུལ་འབྱོར་དོན། ཕྱི་ལོ་༢༠༡༣ ཟླ་ ༡༢ ཚེས་ ༡༩ ཉིན་འབྲི་རུ་རྫོང་མི་དམངས་ཁྲིམས་ཁང་གིས། འབྲི་རུ་གསེར་ཁང་གྲོང་ནས་ཡིན་པས་གླུ་བ་འཕྲིན་ལས་ཚེ་དཀར་ལ་དུས་བཀག་བཙོན་འཇུག་ལོ་ ༩ དང་།
གསེར་ཁང་གྲོང་ནས་ཡིན་པའི་ཆོས་ཁྱབ་ལ་དུས་བཀག་བཙོན་འཇུག་ལོ་ ༡༣ ། གྲོང་ཚོ་ལྔ་པ་ནས་ཡིན་པས་དེ་སྔོན་ཉེན་རྟོག་པའི་ལས་ཀ་བྱེད་མྱོང་བའི་ཚེ་ལྷ་དུས་བཀག་བཙོན་འཇུག་ལོ་ ༣ གསུམ་བཅས་ཀྱི་ཁྲིམས་ཐག་བཅད་ཡོད་འདུག

མཁན་པོ་ཀར་ཚེ་ལགས་ཀྱིས་ཁོང་ཉིད་བདེ་ཐང་ཡིན་པའི་ཁ་པར་འབྱོར་བའི་རྗེས། ཡང་བསྐྱར་ཁོང་ཉིད་བཀག་ཉར་འོག་གར་སོང་ཆ་མེད་དུ་གྱུར་ཡོད་སྟབས། ས་གནས་དགོན་གྲོང་གཉིས་ཀྱི་འཕྲེད་དར་འཕྱར་ཏེ་མཁན་པོ་གློད་དགོས་པའི་ཞི་བའི་གོམ་བགྲོད་བྱས་ཡོད་འདུག

འདི་ག་ལྟེ་གནས་ཁང་ལ་གནས་ཚུལ་འབྱོར་དོན། ཕྱི་ལོ་ ༢༠༡༣ ཟླ་ ༡༢ ཚེས་ ༦ གི་མཚན་མོའི་ཆུ་ཚོད་ ༡ ཡས་མས་ཙམ་ལ།  རྒྱ་ནག་ཁྲིན་ཏུའུ་གྲོང་ཁྱེར་ནས་ཁམས་ནང་ཆེན་རྫོང་ཇ་པ་དགོན་པའི་མཁན་པོ་ཀར་ཚེ་ལགས། བོད་རང་སྐྱོང་ལྗོངས་ཆབ་མདོ་ཉེན་རྟོག་པས་འཇུ་བཟུང་གིས་གར་སོང་ཆ་མེད་གྱུར་རྗེས། ས་གནས་སེར་སྐྱ་མང་ཚོགས་ ༤༠༠༠ ལྷག་གི་མཚན་རྟགས་བཀོད་དེ་མཁན་པོ་གློད་དགོས་པའི་ཞུ་སྐུལ་རིམ་པར་བྱས་པར་བརྟེན། ཕྱི་ཚེས་ ༡༠ ཉིན་མཁན་པོ་ཀར་ཚེ་ལགས་ཀྱིས་ཇ་པ་དགོན་པར་ཁ་པར་བཏང་སྟེ།  ཁོང་ཉིན་ཁྲིན་ཏུའུ་གྲོང་ཁྱེར་ནས་ཆབ་མདོ་ཉེན་རྟོག་པས་ཉིན་འགར་འཇུ་བཟུང་བཀག་ཉར་བྱས་སོང་བ་དང་། འཇུ་བཟུང་བྱེད་དོན་ནི་ཆབ་མདོ་ཀརྨ་དགོན་པའི་དོན་རྐྱེན་དང་འབྲེལ་ཡོད་པའི་དོགས་གཞི་ཡིན་ཡང་། ད་ལྟ་ཁོང་གི་སྐུ་གཟུགས་གནས་སྟངས་བདེ་འཚམས་ཡིན་སྐོར་གསུངས་ཡོད་སྟབས།  ས་གནས་མང་ཚོགས་ཀྱིས་ཁོང་གློད་བཀྲོལ་བཏང་ཟིན་པར་ཡིད་ཆེས་བྱས་ཡོད་པ་རེད།  ཡིན་ནའང་། རྗེས་སུ་མཁན་པོ་ཀར་ཚེ་ལགས་ལ་སྔར་བཞིན་འབྲེལ་བ་གང་ཡང་བྱེད་མ་ཐུབ་པར་གར་སོང་ཆ་མེད་དུ་གྱུར་ཡོད་འདུག

ཕྱི་ལོ་ ༢༠༡༣ ཟླ་ ༡༢ ཚེས་ ༡༩ ཉིན་གྱི་བོད་ནང་ཉིན་གུང་ཆུ་ཚོད་ ༢ དང་ཕྱེད་ཀ་ཡས་མས་སུ།  རྒྱ་གཞུང་གིས་བོད་ས་བཅད་བགོས་ཀྱི་ས་ཁོངས་ལྟར་བྱས་ན། ཀན་སུའུ་ཞིང་ཆེན་ཀན་ལྷོ་བོད་རིགས་རང་སྐྱོང་ཁུལ་བསང་ཆུ་རྫོང་ཨ་མཆོག་གྲོང་བརྡལ་དུ། ཨ་མཆོག་དགོན་ཆེན་གྱི་གྲྭ་བ་ཚུལ་ཁྲིམས་རྒྱ་མཚོ་ལགས་ཀྱིས། རྒྱ་གཞུང་གི་དྲག་གནོན་དབང་སྒྱུར་གྱི་མི་སེར་སྤེལ་བའི་སྲིད་ཇུས་ལ་ངོ་རྒོལ་གྱིས་སྐུ་གྲོངས་འདུག

འདི་ག་ལྟེ་གནས་ཁང་ལ་གནས་ཚུལ་འབྱོར་དོན། བོད་མདོ་སྨད་ཀན་ལྷོ་བསང་ཆུ་རྫོང་ཨ་མཆོག་གྲོང་བརྡལ་དུ།  དེ་རིང་ཉིན་གུང་ཆུ་ཚོད་ ༢ དང་ཕྱེད་ཡས་མས་སུ་ཨ་མཆོག་དགོན་ཆེན་གྱི་གྲྭ་བ་ཚུལ་ཁྲིམས་རྒྱ་མཚོ་ལགས་ཀྱིས།   བོད་བསྟན་པ་ཆབ་སྲིད་ཀྱི་སླད་དུ་རང་ལུས་མེར་བསྲེག་གནང་སྟེ་སྐུ་གྲོངས་ཡོད་པ་དང་། ས་གནས་སེར་སྐྱ་མང་ཚོགས་ཀྱིས་ཁོང་གི་སྐུ་ཕུང་ཨ་མཆོག་དཔོན་པར་གདན་འདྲེན་ཞུས་ཐོག  གྲྭ་བ་བཞི་བརྒྱ་ལྷག་གིས་མཆོད་འབུལ་དང་བསྔོ་བ་སྨོན་ལ་སོགས་གསུངས་ཡོད་འདུག

ཕྱི་ལོ་ ༢༠༡༢ ཟླ་ ༡༡ ཚེས་ ༢༣ ཉིན། རྒྱ་གཞུང་གིས་བོད་ས་བཅད་བགོས་ཀྱི་ས་ཁོངས་ལྟར་བྱས་ན། བོད་རང་སྐྱོང་ལྗོངས་ནག་ཆུ་ས་ཁུལ་འབྲི་རུ་རྫོང་ཚྭ་ཆུ་ཞང་ཏོ་ཐོ་གྲོང་ནས་ཡིན་པའི་དགེ་བའི་བཤེས་གཉེན་ངག་དབང་འཇམ་དབྱངས་ལགས་ལྷ་ས་ནས་འཇུ་བཟུང་བཙན་འཁྲིད་བྱས་ཡོད་པ་ལྟར། ཁོང་བཀག་ཉར་འོག་མནར་གཅོད་དྲག་པོ་བཏང་སྟེ་རྐྱེན་ལམ་དུ་བཏང་རྗེས། ཕྱི་ཟླ་ ༡༢ ཚེས་ ༡༧ ཉིན་ཁོང་གི་སྐུ་ཕུང་ཕྱིར་ནང་མིར་སྤྲད་ཡོད་འདུག

འདི་ག་ལྟེ་གནས་ཁང་ལ་གནས་ཚུལ་འབྱོར་དོན། ཕྱི་ལོ་ ༢༠༡༣ ཟླ་ ༡༡ ཚེས་ ༢༣ ཉིན། རྒྱ་གཞུང་གིས་དྲག་པོའི་བཙན་གནོན་འོག་ལྟར་མོས་དགོན་པ་སྒོ་བརྒྱབ་པ་དང་། ལྷ་ས་ནས་དགེ་བའི་བཤེས་མཉེན་ངག་དབང་འཇམ་དབྱངས་ལགས་དང་། ལྟར་མོས་དགོན་གྱི་གྲྭ་སྐལ་བཟང་ཕྱོགས་གླང་། གཞན་པའི་གྲྭ་པ་གཅིག་བཅས་མི་གསུམ་འཇུ་འཛིན་བཟུང་བཙན་འཁྲིད་བྱས་པ་མ་ཟད། ལྟར་མོས་དགོན་དུ་དམག་མི་ཕོན་ཆེན་བཏང་སྟེ་དགོན་པའི་ནང་ཡོངས་རྫོགས་བསྔོགས་བཤེར་དང་། ལྷག་པར་དུ་ངག་དབང་འཇམ་དབྱངས་ལགས་ཀྱི་གཟིམ་ཁང་ནང་བསྔོགས་ཏེ་གློག་ཀླད་གཉིས་ཀྱང་བཙན་འཕྲོག་བྱས་ཡོད་པ་རེད།

ལྷ་ས་ནས་ཁོང་གསུམ་འཇུ་བཟུང་བྱས་རྗེས། རྒྱ་གཞུང་གིས་ནང་མི་རྣམས་ལ་ཁོང་ཚོ་ཉེས་མིང་ཅི་ཞིག་འོག་འཇུ་བཟུང་བྱས་མིན་དང་། ས་གནས་གང་ཞིག་ཏུ་བཀག་ཉར་བྱས་ཡོད་མེད་གསལ་བཤད་གང་མ་བྱས་པར། ཟླ་གཅིག་ཙམ་རིང་གར་སོང་ཆ་མེད་དུ་གྱུར་མཐར། ཕྱི་ཟླ་ ༡༢ ཚེས་ ༡༧ ཉིན་རྒྱ་གཞུང་གིས་དགེ་བཤེས་ངག་དབང་འཇམ་དབྱངས་ལགས། བཀག་ཉར་འོག་གཅར་རྡུང་མནར་གཅོད་དྲག་པོ་བཏང་སྟེ་རྐྱེན་ལམ་དུ་བཏང་རྗེས། ཁོང་གི་སྐུ་ཕུང་ཕྱིར་ནང་མིར་སྤྲད་ཡོད་སྟབས། འབྲེལ་ཡོད་ནང་མིས་ཁོང་གི་སྐུ་ཕུང་སེ་ར་དགོན་པའི་དུར་ཁྲོད་དུ་ཞུགས་འབུལ་བྱས་འདུག སྐུ་ཕུང་ནང་མིར་སྤྲོད་སྐབས་ཀྱང་རྒྱ་གཞུང་འབྲེལ་ཡོད་མི་སྣས་གལ་སྲིད་གནས་ཚུལ་དེ་ཕྱིར་བསྒྲགས་བྱས་ཚེ། གནས་ཚུལ་ཕྱིར་སྒྲོག་བྱ་མཁན་རྣམས་དམར་གསོད་གཏོང་རྒྱུ་ཡིན་སྐོར་འཇིགས་སྐུལ་བྱས་ཡོད་འདུག

ཉེ་སྔོན་རྒྱ་གཞུང་ཉེན་རྟོག་པས་ཁམས་འབྲི་རུ་རྫོང་ཁོངས་ནས་རང་ལོ་ ༡༦ ཡིན་པའི་བསོད་ནམས་རྡོ་རྗེ་ལགས་འཇུ་བཟུང་བཙན་འཁྲིད་བྱས་ཡོད་པ་དང་། ད་ལྟའི་ཆར་ཁོང་གི་གནས་ཚུལ་ཅི་ཡང་ཤེས་རྟོགས་ཐུབ་ཀྱི་མེད་པ་རེད།

འདི་ག་ལྟེ་གནས་ཁང་ལ་གནས་ཚུལ་འབྱོར་དོན། རྒྱ་གཞུང་གིས་བོད་ས་བཅད་བགོས་ཀྱི་ད་ལྟའི་ཁོངས་ལྟར་བྱས་ན། བོད་རང་སྐྱོང་ལྗོངས་ནག་ཆུ་ས་ཁུལ་འབྲི་རུ་རྫོང་ཆགས་རྩེ་ཞང་དིས་ཐག་གྲོང་ཚོ་ལྔ་པའི་ཚེ་སྐྱོབ་ཚང་གི་བུ། རང་ལོ་ ༡༦ ཡིན་པའི་བསོད་ནམས་རྡོ་རྗེ་ལགས་ཀྱིས། ༢༠༡༣ ཕྱི་ཟླ་ ༡༡ ཚེས་ ༢༤ ཉིན་གྱི་དགོང་མོར། རྒྱ་དམར་གྱིས་བཙུགས་པའི་རིག་གནས་ཁང་ཞེས་པའི་ཁང་པ་ཞིག་ཡོད་པ་དེའི་ནང་། རྒྱ་གཞུང་གི་ལས་བྱེད་རྣམས་གཉིད་ཁུག་ཡོད་པའི་སྐབས་དང་བསྟུན་ནས། ཁང་པའི་ཕྱི་རོལ་གྱི་གྱང་ངོས་སུ་༼བོད་ལ་རང་དབང་མེད་༽ ཅེས་ཡི་གེ་བྲིས་ཤིང་། གཤམ་ཏུ་ཁོ་རང་ཉིད་ཀྱི་མིང་ཡང་བཀོད་ཡོད་འདུག

ཉེ་ཆར་ཁམས་ནང་ཆེན་ནས་ཡིན་པའི་མཁན་པོ་ཀར་ཚེ་དང་མཁན་པོ་འགྱུར་མེད་ཚུལ་ཁྲིམས་རྒྱ་གཉིས། རྒྱ་གཞུང་གིས་འཛིན་བཟུང་བཙན་ཁྲིད་ཀྱིས་ཉིན་ཤས་ཕྱིན་རྗེས། ས་གནས་མི་མང་གིས་རྩད་གཅོད་ནས་རྒྱ་གཞུང་ལ་གློད་དགོས་པའི་ཞུ་གཏུགས་ཤུགས་ཆེན་བྱས་པར་བརྟེན།  མཁན་པོ་གཉིས་གློད་དགོས་བྱུང་ཡོད་འདུག

འདི་ག་ལྟེ་གནས་ཁང་ལ་གནས་ཚུལ་འབྱོར་དོན།  ནང་ཆེན་རྫོང་གི་མཁན་པོ་ཀར་ཚེ་ལགས་དགོན་པའི་ཆེད་དུ་སྐུ་འདྲ་ཆེན་པོ་ཞིག་བསླུ་སར་ འགྲོ་བའི་སྐབས་དང་བསྟུན་ནས།  ཕྱི་ཟླ་ ༡༢ ཚེས་ ༦ མཚན་མོའི་ཆུ་ཚོད་ ༡ ཙམ་ལ། རྒྱ་ནག་ཁྲིན་ཏུའུ་གྲོང་ཁྱེར་ནས་གསང་བའི་ཐོག་འཛིན་བཟུང་བཙན་འཁྲིད་བྱས་ཏེ་གར་སོང་ཆ་མེད་དུ་གྱུར་འདུག

རྗེས་སུ་དགོན་པ་དང་ཡུལ་མིས་གནས་ཚུལ་དེ་ཤེས་རྟོགས་བྱུང་ནས།  དགོན་སྡེ་ཁག་གི་འཐུས་མི་དང་གྲོང་སྡེ་ཆེ་ཆུང་༣༠ ལྷག་གི་འཐུས་མི་རྣམས་མཉམ་འཛོམས་བྱས་ཏེ།  མཁན་པོ་ཁོང་མགྱོགས་མྱུར་དགོན་པར་རྩིས་སྤྲོད་མ་བྱས་ཚེ། ནང་ཆེན་རྫོང་གི་དགོན་སྡེ་དང་ཡུལ་སྡེ་སོ་སོས་རང་སྲོག་ལ་མི་འཛེམས་པར་ངོ་རྒོལ་ཤུགས་ཆེ་བྱ་རྒྱུ་ཡིན་ཞེས་ནས། ཡུལ་སྡེ་ཆེ་ཆུང་ ༣༠ ལྷག་ཙམ་གྱི་མི་མང་དང་།  ནང་ཆེན་རྫོང་ཐོག་དང་རྫོང་གི་ཉེ་སར་ཡོད་པའི་མི་མང་ ༤༠༠༠ ཙམ་གྱིས་ཞུ་ཡིག་ལ་ས་རྟགས་བཀོད་ནས་སྲིད་གཞུང་ལ་ཕུལ་བར་བརྟེན། ཕྱི་ཚེས་ ༡༠ ཉིན་གློད་གྲོལ་བཏང་ཡོད་འདུག  སྐབས་དེར་མཁན་པོས་དགོན་པར་ཞལ་པར་ཕུལ་ཏེ། ཁོང་ཉིན་ཤས་རིང་ཆབ་མདོའི་ཉེན་རྟོག་པས་བཙན་བཀག་བྱས་སོང་བ་བརྗོད་ཡོད་འདུག

མཁན་པོ་ཀར་ཚེ་ནི་ནང་ཆེན་ཕྱོགས་ཀྱི་མཁན་པོ་མིང་གྲགས་ཆེ་ཤོས་གྲས་ཤིག་ཡིན་པ་མ་ཟད། ཁོང་དེ་སྔོན་ནས་རྒྱ་གཞུང་གིས་ཐེངས་མང་འཛིན་བཟུང་བྱ་རྩིས་བྱས་ཡོད་པ་དང་། གལ་སྲིད་ཁོང་ནང་ཆེན་རྫོང་གི་ས་ཁོངས་བརྒལ་ནས་འགྲོ་དགོས་ཚེ།  ནང་ཆེན་རྫོང་སྲིད་གཞུང་ལ་ཐོ་འགོད་བྱེད་དགོས་ཀྱི་ཡོད་འདུག

རྒྱ་གཞུང་གིས་འབྲི་རུ་རྫོང་ལྟར་མོས་དགོན་གྲོང་གཉིས་སུ། ཆབ་སྲིད་སློབ་གསོའི་ལས་འགུལ་སྤེལ་ཏེ་དྲག་གནོན་བཀག་སྡོམ་ཤུགས་ཆེན་བྱེད་བཞིན་པར་བརྟེན། ད་ལྟའི་ཆར་དགོན་པའི་ནང་གྲྭ་བ་མེད་པར་སྒོ་རྒྱག་ཡོད་འདུག

འདི་ག་ལྟེ་གནས་ཁང་ལ་གནས་ཚུལ་འབྱོར་དོན།  ལྟར་མོས་དགོན་གྱིས་དུས་རྒྱུན་དགུན་ཁའི་གུང་གསེང་ཟླ་བ་གཅིག་རིང་ལ། གྲྭ་རྒྱུན་རྣམས་སོ་སོའི་ཁྱིམ་ཚང་ནང་གཏོང་བའི་ཆོས་ཕྱོགས་ཀྱི་བྱེད་སྒོ་ཞིག་ཡོད་པ་ལྟར། ཉེ་ཆར་འདི་ལོའི་དགུན་གསེང་སྐབས་རྒྱ་གཞུང་གི་ལས་དོན་མི་སྣ་རྣམས་དགོན་པར་འབྱོར་ནས། ཤུལ་དུ་དཀོན་གཉེར་སོགས་དགོན་པ་ལྟ་སྲུང་མཁན་གྲྭ་བཙུན་ཉུང་ཤས་ཤིག་བསྡད་ཡོད་པ་རྣམས་ལ།  གྲྭ་བ་རྣམས་གང་དུ་ཡོད་མེད་སྐོར་སྐད་ཆ་དྲིས་ཏེ།  གྲྭ་བ་རྣམས་ཚུར་དགོན་པའི་ནང་བསྡུས་དགོས་པ་དང་། རང་ལོ་བཅུ་བདུན་ལ་སོན་མེད་པའི་གྲྭ་བཙུན་རྣམས་དགོན་པའི་ནང་སྡོད་མི་ཆོག་པ་སོགས་བཤད་འདུག

དེ་བཞིན། དགོན་པའི་གྲྭ་ཤག་རྣམས་ཀྱི་ལྡེ་མིག་འཁྱེར་ཡོང་དགོས་པའི་བཙན་སྐུལ་བྱས་པར།  ཤུལ་དུ་སྡོད་མཁན་གྲྭ་བ་དེ་དག་གིས་གྲྭ་ཤག་སོ་སོའི་ལྡེ་མིག་རྣམས་ཁོང་ཚོའི་ལག་ཏུ་མེད་པའི་གནས་ཚུལ་བརྗོད་མ་ཐག  དགོན་པ་དམག་གིས་སྐོར་རྗེས་གྲྭ་ཤག་རྣམས་ཀྱི་སྒོ་ལྕགས་གཏོར་ཏེ། གྲྭ་ཤག་དག་ནང་ཡོད་པའི་གློག་ཀླད་སོགས་ཅ་དངོས་ཁག་ཅིག་བཙན་འཁྱེར་བྱས་ཡོད་པ་མ་ཟད། གྲྭ་བ་ཚོར་འབྲེལ་ཡོད་གྲོང་པ་དང་ཁྱིམ་ཚང་རྣམས་ཀྱང་དམག་གིས་བསྐོར་ཏེ།  ལྭ་ནག་པོ་གྱོན་པའི་དྲག་ཆས་དམག་མི་དག་གིས་མི་ཚང་ཡོངས་རྫོགས་བསྔོགས་བཤེར་བྱས་ཏེ།  ལག་ཐོག་ཁ་པར་དང་རླུང་འཕྲིན་ཉན་ཆས། འདྲ་པར། གྲི་རྙིང་པ། དངོས་པོ་བླུག་སྣོད་སྒམ་ཆུང་སོགས་ཅ་དངོས་ཙག་ཙིག་རྣམ་གྲངས་ཉི་ཤུ་ཙམ་བཙན་འཁྱེར་བྱས་ཡོད་འདུག

འདི་ལོ་རྒྱ་གཞུང་གིས་ནག་ཆུ་ས་ཁུལ་འབྲི་རུ་རྫོང་དུ། དམར་ཤོག་མང་ཚོགས་ལམ་ཕྱོགས་སློབ་གསོ་ཞེས་པ་སྤེལ་ཏེ། ས་གནས་བོད་རིགས་མང་ཚོགས་ཐོག་དྲག་གནོན་དང་། གསང་བའི་ཐོག་བོད་མི་མང་པོ་སྔ་ཕྱིར་འཇུ་བཟུང་བཙན་འཁྲིད་ཀྱིས་གར་སོང་ཆ་མེད་དུ་འགྱུར་བཞིན་ཡོད་པ་ལྟར། ཉེ་ཆར་ཡང་ཁམས་འབྲི་རུ་རྫོང་གི་གཞས་པ་གཉིས་འཇུ་བཟུང་བཙན་འཁྲིད་བྱས་འདུག

འདི་ག་ལྟེ་གནས་ཁང་ལ་གནས་ཚུལ་འབྱོར་དོན། ཕྱི་ལོ་ ༢༠༡༣ ཟླ་ ༡༡ ཚེས་ ༢༠ ཡས་མས་ཤིག་ལ། གླུ་བ་འཕྲིན་ལས་ཚེ་དཀར་ལགས་ནག་ཆུ་ཁུལ་གྲོང་ཁྱེར་ནས་གློ་བུར་འཇུ་བཟུང་བཙན་འཁྲིད་ཀྱིས་གར་སོང་ཆ་མེད་དུ་གྱུར་འདུག ཡིན་ནའང་། རྒྱ་གཞུང་གིས་ཁོང་འཇུ་བཟུང་དགོས་དོན་གྱི་ནག་ཉེས་གང་ཡང་གསལ་ཁ་བཏོན་མེད་པ་རེད།

གླུ་བ་ཁོང་གི་སྐྱེས་ཡུལ་ནི་རྒྱ་གཞུང་གིས་བོད་ས་བཅད་བགོས་ཀྱི་ས་ཁོངས་ལྟར་བྱས་ན།
བོད་རང་སྐྱོང་ལྗོངས་ནག་ཆུ་ས་ཁུལ་འབྲི་རུ་རྫོང་འབྲི་རུ་ཤང་སེར་ཁང་གྲོང་ནས་ཡིན་པ་རེད། ཁོང་གི་ཨ་ཕ་སྔོན་ནས་འདས་གྲོངས་ཕྱིན་ཡོད་སྟབས། ད་ལྟ་ཁོའི་ནང་དུ་བཟའ་ཟླ་དང་ཕྲུ་གུ་གཅིག ཨ་མ་བཅས་ཡོད་པ་དང་། ཁོང་ད་ལྟ་རང་ལོ་ ༢༢ ཡིན་འདུག

གླུ་བ་འཕྲིན་ལས་ཚེ་དཀར་ལགས་ནི། ནམ་རྒྱུན་མི་རིགས་ཀྱི་བདེ་སྡུག་དབྱངས་སུ་གྱེར་མཁན་གླུ་བ་ཞིག་ཡིན་ལ། ཁོང་གིས་༼མཐུན་སྒྲིལ་གྱི་ཨ་ལོང་༽ཞེས་པའི་འོད་སྡེར་ཀྱིས་མཚོན་པའི། མི་རིགས་རིག་གཞུང་གཅེས་འཛིན་སྐོར་བརྗོད་དོན་ཡིན་པའི་ཆེད་སྒྲིག་གླུ་གཞས་འོད་སྡེར་འགའ་ཤས་སྤྱི་ཚོགས་ཁྲོད་འགྲེམས་སྤེལ་བྱས་མྱོང་ཡོད་ལ། ཁོང་གི་གླུ་གཞས་ཁག་ལ་སྤྱི་ཚོགས་ཁྲོད་དགའ་མོས་བྱེད་མཁན་མང་པོ་ཡོད་འདུག