གསར་འགྱུར།

དེ་རིང་ནི་བོད་མིའི་མང་གཙོ་དབུ་བརྙེས་ནས་ལོ་ངོ་ ༥༤ འཁོར་བའི་ཉིན་རེད། འདི་ག་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གི་ངོས་ནས། རྒྱ་ཆེའི་གཞིས་བྱེས་བོད་རིགས་སྤུན་ཟླ་ཡོངས་ལ་གལ་ཆེའི་དུས་དྲན་ཉིན་མོར་འཚམས་འདྲི་ཞུ་བཞིན་ཡོད། མི་ལོ་ ༥༤ ཡར་སྔོན་ཏེ་ཕྱི་ལོ་ ༡༩༦༠ ཟླ་ ༩ ཚེས་ ༢ ཉིན། ༧གོང་ས་སྐུ་ཕྲེང་བཅུ་བཞི་པ་མཆོག་གི་ཐུགས་དགོངས་ལམ་སྟོན་འོག ཐོག་དང་པོའི་བོད་མི་མང་སྤྱི་འཐུས་ཀྱིས་ལས་འཁུར་དམ་འབུལ་ཞུས་ཡོད། དེ་ནི་འདས་པའི་བོད་ཀྱི་ལོ་རྒྱུས་ཐོག་གཞུང་གི་ཆབ་སྲིད་ལམ་ལུགས་དངོས་སུ་མང་གཙོའི་ལམ་དུ་བསྐྱོད་པའི་གོམ་པ་ཐོག་མ་དེ་ཆགས་ཡོད།

དེ་བཞིན། འདས་པའི་མི་ལོ་བཅུ་གྲངས་འགའ་ཤས་རིང་བོད་མིའི་མང་གཙོའི་འཕེལ་རིམ་ཁྲོད། དབུ་ཁྲིད་དང་མི་དམངས་གཉིས་ཐད་ནས་གལ་ཆེའི་རང་བཞིན་གྱི་ཐག་གཅོད་དང་འབད་འབུངས་རིམ་པར་གནང་ཡོད་དེ། བོད་མི་མང་སྤྱི་འཐུས་ཐོག་མར་འོས་འདེམས་བྱུང་བའི་རྗེས། ཕྱི་ལོ་ ༡༩༦༣ ལོར་མ་འོངས་བོད་ཀྱི་རྩ་ཁྲིམས་ཟིན་བྲིས་གཏན་འབེབས་དང་། ༡༩༩༡ ལོར་བཙན་བྱོལ་བོད་མིའི་བཅའ་ཁྲིམས་ལག་བསྟར། ༢༠༠༡ ལོར་བཀའ་བློན་ཁྲི་པ་མི་དམངས་ཀྱིས་ཐད་ཀར་འོས་འདེམས། དེ་བཞིན། གཞུང་འབྲེལ་མ་ཡིན་པའི་ཚོགས་པ་ཁག་གསར་འཛུགས། ལྷག་པར་དུ་ ༢༠༡༡ ལོའི་ཕྱི་ཟླ་ ༣ པའི་ནང་། ༧གོང་ས་མཆོག་གིས་ཆབ་སྲིད་སྐུ་དབང་མང་གཙོའི་ལམ་ནས་འོས་འདེམས་བྱས་པའི་མགོ་ཁྲིད་ལ་རྩིས་སྤྲོད་གནང་བ་བཅས། ལོ་རྒྱུས་རང་བཞིན་ལྡན་པའི་མང་གཙོའི་འཕེལ་འགྱུར་རིམ་པར་བྱུང་ཡོད།

འདི་ག་ལྟེ་གནས་ཁང་གནས་ཚུལ་འབྱོར་དོན། མདོ་ཁམས་དཀར་མཛེས་དགོན་པའི་སྤྲུལ་སྐུ་སྤང་རི་སྣ་རིན་པོ་ཆེ་མཆོག་འཇུ་བཟུང་བཙོན་འཇུག་འོག་ལོ་ ༦ དང་ཟླ ༣ ལྷག་ཕྱིན་ཡོད་པ་ལྟར། ཉེ་ཆར་བོད་མི་ཞིག་སྒེར་གྱི་ལས་དོན་དང་འབྲེལ་བའི་ཐོག་ནས་ཟི་ཁྲོན་མཱེན་ཡང་བཙོན་ཁང་དུ་བསྐྱོད་སྐབས། བཙོན་ཁང་དེ་གར་གློ་བུར་སྤང་རི་སྣ་རིན་པོ་ཆེ་མཐོང་ཡོད་པ་དང་། དེ་དུས་རིན་པོ་ཆེ་ཁོང་གི་སྐུ་གཟུགས་གནས་སྟངས་ནི་བློ་ཡིད་ལ་འཆར་དཀའ་བའི་ཧ་ལས་པའི་སྐྱོ་བོ་ཆགས་ཡོད་འདུག དེ་བརྟེན། བཙོན་འོག་ཏུ་ཁོང་ལ་སྡུག་སྦྱོང་མནར་གཅོད་འདྲ་མིན་བཏང་སྟེ། སྐུ་གཟུགས་གནས་སྟངས་ལ་ཉེན་ཁ་འཕྲད་བཞིན་པའི་ཐད། ས་གནས་བོད་རིགས་དད་ལྡན་མང་ཚོགས་ཀྱི་ངོས་ནས་བློ་འཚབ་ཆེན་པོ་བྱེད་བཞིན་འདུག

༢༠༠༨ ལོའི་ཕྱི་ཟླ་ ༥ ཚེས་ ༡༤ ཉིན། དཀར་མཛེས་རྫོང་ཐོག་ཏུ་སྤང་རི་སྣ་དགོན་པའི་བཙུན་མ་ ༨༠ ལྷག་གིས་ཞི་བའི་ཁྲོམ་སྐོར་སྐབས། རྒྱ་གཞུང་ཉེན་རྟོག་པས་བཙུན་མ་ ༥༥ འཇུ་བཟུང་བྱས་རྗེས། རིན་པོ་ཆེ་ཁོང་གནས་ཚུལ་དེར་འབྲེལ་བ་ཡོད་པར་སྙན་འདོགས་ཀྱིས་རྗེས་འདེད་ལྟ་རྟོགས་བྱས་པ་དང་། ཟླ་དེའི་ཕྱི་ཚེས་ ༡༨ ཉིན་གྱི་བོད་ནང་གི་ཐོ་རངས་ཆུ་ཚོད་ ༤ དང་ཕྱེད་ཀ་ཙམ་ལ་རྒྱ་དམག་གིས་རིན་པོའི་གཟིམ་ཁང་གི་མཐའ་སྐོར་ཏེ། ཁོང་ཉིད་འཇུ་བཟུང་བཙན་འཁྲིད་རྗེས་ཟླ་བ་མང་པོའི་རིང་གར་སོང་ཆ་མེད་དུ་གྱུར་ཡོད་པ་མ་ཟད། དམག་མི་དང་ཉེན་རྟོག་པ་ ༢༠༠༠ ལྷག་གིས་སྤང་རི་སྣ་དང་ཡར་སྟེང་བཙུན་དགོན་གཉིས་ཀྱང་མཐའ་སྐོར་ནས་དམ་དྲག་བཀག་སྡོམ་བྱས་ཡོད་པ་རེད།

ཉེ་སྔོན་འདི་ག་ལྟེ་གནས་ཁང་ལ་ ༢༠༠༨ ལོའི་ཞི་རྒོལ་སྐབས། ལྷ་ས་གྲོང་ཁྱེར་ཞི་ཧྲན་རོ་ཁང་ནང་བཞག་ཡོད་པའི་འདས་པོ་མི་སྐོར་ཅིག་གི་ཐོ་གཞུང་དང་། སྐབས་དེར་རྐྱེན་འདས་ཕྱིན་པའི་བོད་མི་བཞིའི་ཕུང་པོ་ལ། ལྷ་ས་གྲོང་ཁྱེར་ཉེན་རྟོག་ཁང་ཉེས་དོན་ཚན་རིག་ལག་རྩལ་ཞིབ་འཇུག་ཁང་གི་ཞིབ་དཔྱད་འགན་འཛིན་དང་ཁྲིམས་ལུགས་སྨན་པ་ལིས་ཝིན་ཀྲན་(李文展li wan zhan)དང་། འགན་འཛིན་དང་ཁྲིམས་ལུགས་སྨན་པ་ཝང་ཀྲི་ཞའེ་(王志学wang zhi xue)གཉིས་ཀྱིས། ཕྱི་ལོ་ ༢༠༠༨ ལོའི་ཕྱི་ཟླ་ ༣ ཚེས་ ༢༡ ཉིན་ཞིབ་དཔྱད་བྱས་པའི་༼ལྷ་ས་གྲོང་ཁྱེར་ཉེན་རྟོག་ཁང་ཉེས་དོན་ཚན་རིག་ལག་རྩལ་གསལ་འབྱེད་ཡིག་ཆ༽ཞེས་པའི་ནང་ཁུལ་གནང་བའི་ཡིག་ཆ་བཅས་ལག་སོན་བྱུང་བའི་ནང་། ལྷ་ས་གྲོང་ཁྱེར་དུ་བོད་མིའི་ཞི་རྒོལ་སྐབས་རྒྱ་དམག་གིས་གསོད་རྨས་རང་བཞིན་ཅན་གྱི་མཚོན་ཆ་སྤྱད་དེ། ཞི་རྒོལ་བྱུང་ཡུལ་ས་ཆ་སོ་སོར་བོད་མི་མང་པོ་དམར་གསོད་བཏང་ཡོད་པའི་དཔང་རྟགས་གསལ་བོ་ཡོད་པ་རེད།

 གཅིག གསོད་རྨས་རང་བཞིན་ཅན་གྱི་མཚོན་ཆ་སྤྱད་མེད་ཅེས་པ་རྫུན་རེད།

 ༢༠༠༨ ལོར་བོད་ཀྱི་རྒྱལ་ས་ལྷ་ས་རུ་མང་ཚོགས་རང་བཞིན་གྱི་བོད་མིའི་ཡར་ལངས་ཞི་རྒོལ་བྱུང་རྗེས། ས་གནས་བོད་རིགས་མང་ཚོགས་ཀྱིས་ཕྱི་ཕྱོགས་ཀྱི་གསར་ལམ་ཁག་ཏུ། སྐབས་དེར་རྒྱ་གཞུང་དམག་མི་དང་དྲག་ཆས་ཉེན་རྟོག་པས་མེ་མདའ་དང་། ཁྲབ་ལྡན་འཁོར་ལོ་སོགས་སྤྱད་དེ་བོད་མི་ཞི་རྒོལ་བར་དྲག་གནོན་བྱས་ཐོག བོད་མི་ཧ་ཅང་མང་པོ་དམར་གསོད་བཏང་བའི་སྐོར་ཕྱིར་བསྒྲགས་ཡོད་ལ། དེ་བཞིན། ཕྱི་ཟླ་ ༣ ཚེས་ ༢༨ ཉིན་རྒྱ་གཞུང་གིས་གོ་སྒྲིག་འོག་ཕྱི་རྒྱལ་གྱི་གཞུང་ཚབ་དང་གསར་འགོད་པ་ཁག་ཅིག་ལྷ་ལྡན་གཙུག་ལག་ཁང་དུ་རྟོགས་ཞིབ་སྐོར་བསྐྱོད་སྐབས།  གྲྭ་བཙུན་ཉི་ཤུ་ལྷག་གིས་ཕྱི་རྒྱལ་འཐུས་ཚབ་མི་སྣ་དེ་དག་གི་མདུན་སར་ངུ་འབོད་བྱེད་བཞིན་སྐབས་དེའི་དངོས་མཐོང་གནས་ཚུལ་རྣམས་ཕྱིར་བསྒྲགས་ཡོད་པ་ལྟར། དེ་དུས་དགེ་འདུན་པ་ཞིག་གིས་རྒྱ་གཞུང་དམག་མིས་མེ་མདའ་བརྒྱབས་ཏེ་བོད་མི་བསད་པའི་རོ་དངོས་སུ་མཐོང་བའི་སྐོར་ནན་གྱིས་བརྗོད་ཡོད།

ཕྱི་ལོ་ ༢༠༠༨ ལོར་བོད་ས་ཡོངས་སུ་ཞི་བའི་ཡར་ལངས་ངོ་རྒོལ་རིམ་པར་བྱུང་པ་ལྟར། ཆབ་སྲིད་བཙོན་ཟུར་མགོན་པོ་འཕྲིན་ལས་ལགས་དང་། ཁོང་གི་སྤུན་མཆེད་ཉི་ཟླ་བཟང་པོ་ལགས་གཉིས་ནས་ཀྱང་།  ཞི་བའི་སྐད་འབོད་གནང་བར་བརྟེན་ནས།  རྒྱ་གཞུང་གིས་འཇུ་བཟུང་ཉེས་རྡུང་རིམ་པར་བཏང་མཐར། ཕྱི་ལོ་ ༢༠༠༩ ལོའི་ཕྱི་ཟླ་ ༧ ཚེས་ ༡༦ ཉིན། ༼རྒྱལ་ཁབ་ཁ་བྲལ་གྱི་ངལ་སྐུལ་བྱས་པའི༽ཉེས་མིང་འོག  ཁོང་ལ་ལོ་ ༢ དང་ཟླ་ ༦ ཁྲིམས་ཐག་དང་། ཁོང་གི་སྤུན་མཆེད་ལ་ལོ་ ༢ ཁྲིམས་བཅས་བཅད་དེ།  ཟི་ཁྲོན་ཏིག་ཡཱང་བཙོན་ཁང་ནང་བཙོན་འཇུག་མནར་གཅོད་ཀྱིས་བསྒྱུར་བཀོད་བཏང་མཐར།   ༢༠༡༠ ཕྱི་ཟླ་ ༡༢ ཚེས་ ༢༡ ཉིན་བཙོན་འཇུག་དུས་ཡིན་རྫོགས་ནས་ཟི་ཁྲོན་ཏིག་ཡཱང་བཙོན་ནས་ཀློད་དེ་ཕྱིར་རང་ཡུལ་དུ་ལོག་རྗེས།  དཀར་མཛེས་རྫོང་གསེར་མཁར་ཞིང་གིས་ཁོང་བཟང་བཙོན་འོག  ལོ་ ༢ ཀྱི་ཆབ་སྲིད་ཐོབ་ཐང་བཙན་འཕྲོག་གི་བཀག་སྡོམ་སློབ་སྐུལ་དུས་ཡུན་ལག་བསྟར་བྱས་ཡོད་པ་དང་། ༢༠༡༣ ལོའི་ཕྱི་ཟླ་ ༡༢ ཚེས་ ༢༠ ཉིན་བཀག་སྡོམ་སློབ་སྐུལ་གྱི་དུས་ཡུན་རྫོགས་ཏེ།  དཀར་མཛེས་རྫོང་ཁྲིམས་སྲིད་སྡེ་ཁག་གསེར་མཁར་ཡན་ལག་ཁྲིམས་སྲིད་ཁང་ནས།  ཁོང་གི་བཀག་སྡོམ་སློབ་སྐུལ་གྱི་བཟང་བཙོན་དུས་ཡིན་རྫོགས་ནས་ཀློད་གྲོལ་བཏང་ཡོད་པ་རེད།

ཆབ་སྲིད་བཙོན་ཟུར་མགོན་པོ་འཕྲིན་ལས་ལགས། བཙོན་འཇུག་དུས་བཀག་རྫོགས་ཏེ་ཀློད་གྲོལ་ཐོབ་རྗེས།  བྲོས་བྱོལ་གྱིས་ཉེ་ཆར་རྒྱ་གར་དྷ་རམ་ས་ལར་ཆབ་སྲིད་སྐྱབས་བཅོལ་དུ་འབྱོར་ཡོད་པ་རེད། རྒྱ་གཞུང་གིས་བོད་ས་བཅད་བགོས་ཀྱི་ད་ལྟའི་ས་ཁོངས་ལྟར་བྱས་ན། ཁོང་ནི་ཟི་ཁྲོན་ཞིང་ཆེན་དཀར་མཛེས་བོད་རིགས་རང་སྐྱོང་ཁུལ་དཀར་མཛེས་རྫོང་གསེར་མཁར་ཤང་གི་ཡུལ་མི་ཡིན་པ་དང་། ཆུང་དུས་སུ་ཤང་སློབ་ཆུང་ནང་འཛིན་རིམ་དྲུག་པའི་བར་སློབ་གཉེར་བྱས་རྗེས། རང་ལོ་ ༡༧ སྟེང་གསེར་མཁར་ཤང་ཁོངས་སུ་ཡོད་པའི་ས་སྐྱ་ཉ་བྲག་དགོན་པའི་ཆོས་སྒོར་ཞུགས་ཏེ་ནང་བསྟན་རིག་གནས་ལ་སློབ་གཉེར་གནང་ཡོད་པ་རེད། ད་ལྟ་ཁོང་རང་ལོ་ ༢༥ ཡིན་པ་དང་།  ཁོང་གི་ནང་མའི་འཚོ་རྟེན་གཙོ་བོ་ནི་ཞིང་ལས་ཡིན་འདུག

༼རེབ་གོང་ནས་བོད་ཀྱི་རྒྱལ་དར་བསྒྲེངས་པའི་སྔ་རྗེས༽ཞེས་པའི་དེབ་འདི་ནི། བོད་མི་ཆབ་སྲིད་བཙོན་ཟུར་བསྟན་འཛིན་ཉི་མ་ལགས་ཀྱིས་བརྩམས་པ་ཡིན་ལ། དེབ་འདིའི་ནང་རྩོམ་པ་པོ་ཁོང་གིས་ཞི་བའི་ལམ་ནས་སོ་སོའི་རང་དབང་རྩོད་ལེན་བྱས་པར་བརྟེན། རྒྱ་གཞུང་གིས་འཇུ་བཟུང་བཀག་བསྐྱིལ་དང་གཅར་རྡུང་འདྲི་གཅོད་བྱས་པའི་བརྒྱུད་རིམ་དང་། དེ་བཞིན། རང་ཡུལ་དུ་འདུག་བཟོད་བྲལ་ཏེ་རྒྱ་གར་དུ་བྲོས་བྱོལ་བྱས་པའི་ལམ་སྐབས་ཀྱི་དཀའ་སྡུག་སོགས། རྒྱ་གཞུང་གིས་བོད་ཐོག་འཛིན་པའི་དྲག་གནོན་དབང་སྒྱུར་གྱི་མི་སེར་སྤེལ་བའི་སྲིད་ཇུས་འོག བོད་མི་དཀྱུས་མ་ཞིག་མྱངས་བའི་དཀའ་སྡུག་གི་མི་ཚེ་ལོ་རྒྱུས་བྲིས་ཡོད།

ཕྱི་ལོ་ ༡༩༥༩ ལོ་ནས་བཟུང་ད་ལྟའི་བར་རྒྱ་གཞུང་གིས་བོད་ཐོག་དྲག་གནོན་དབང་སྒྱུར་གྱི་མི་སེར་སྤེལ་ཏེ། བོད་ས་ཡོངས་སུ་མི་རིགས་ཀྱི་ངོ་བོ་མཚོན་པའི་ཆོས་དང་རིག་གཞུང་རྣམས་རྩ་གཏོར་དང་། བོད་མིའི་ཆོས་དད་དང་འགྲོ་བསྐྱོད། གཏམ་བརྗོད། འདུ་འཛོམས་རང་དབང་སོགས་ཀྱིས་མཚོན་པའི། འགྲོ་བ་མིའི་གཞི་རྩའི་ཐོབ་ཐང་ཁག་རྡོག་རོལ་བཏང་དང་གཏོང་བཞིན་པར་བརྟེན། བོད་མི་སྐྱ་སེར་ཕོ་མོ་རྒན་གཞོན་དབྱེར་མེད་ཀྱིས་སོ་སོའི་འགྲོ་བ་མིའི་ཐོབ་ཐང་དང་རང་དབང་། མི་རིགས་ཀྱི་བདག་དབང་བཅས་རྩོད་ལེན་ཆེད། རྒྱ་གཞུང་གི་དྲག་གནོན་སྲིད་ཇུས་ལ་ཞི་བའི་འཐབ་རྩོད་རབ་དང་རིམ་པ་གནང་དང་གནང་བཞིན་ཡོད།

ཟླ་འདིའི་ཕྱི་ཚེས་༨་ཉིན་གསེར་རྟ་བླ་རུང་ཆོས་སྒར་གྱི་གྲྭ་ངག་ཆུང་ལགས་མི་ལོ་༦་རིང་གི་དུས་བཀག་བཙོན་འཇུག་གི་དུས་ཡུན་རྫོགས་ཏེ་ད་ལྟ་ཀློད་གྲོལ་བཏང་ཡོད་འདུག

དེ་སྔོན་རྒྱ་ནག་གཞུང་གིས་གྲྭ་ངག་ཆུང་ལགས་ཀྱིས་བོད་ནང་གི་གནས་ཚུལ་ཕྱི་ཕྱོགས་སུ་ཁྱབ་བསྒྲགས་བྱས་པའི་ཉེས་མིང་འོག་ཁོང་དང་ཁོང་གི་སྤུན་མཆེད་ཆེ་བ་དགེ་འདུན་པ་བཀྲ་ཕུན་དང་སློབ་གླིང་དེའི་དགེ་འདུན་པ་གཞན་གྲྭ་འགུ་དྲག་བཅས་རྒྱ་ནག་ཁྲིན་ཏུའུ་གྲོང་ཁྱེར་ནས་ཕྱི་ལོ་༢༠༠༨ཟླ་༧ཚེས་༨་ཉིན་གྱི་དགོང་མོ་གསང་བའི་ཐོག་འཇུ་བཟུང་བྱས་ཡོད་པ་རེད།འཇུ་བཟུང་བྱས་པའི་རྗེས་སུ་བཀྲ་ཕུན་ལགས་དང་འགུ་དྲག་གཉིས་ཀློད་འདུག་མོད།ཡིན་ཡང་གྲྭ་ངག་ཆུང་ལགས་མུ་མཐུད་དུ་བཀག་ཉར་བརྒྱུད་ཕྱི་ཕྱོགས་སུ་བོད་ནང་གི་གནས་ཚུལ་ཁྱབ་བསྒྲགས་བྱས་པ་སོགས་ཀྱི་ཉེས་མིང་འོག་ལོ་༦་གི་དུས་བཀག་བཙོན་འཇུགགི་ཁྲིམས་ཆད་བཏང་ཡོད་པ་རེད།ཁོང་ལ་རྒྱ་གཞུང་གིས་གསང་བའི་ཐོག་ཁྲིམས་ཆད་བཏང་བ་དེ་ཁོང་གི་ནང་མི་གཉེན་འབྲེལ་སོགས་ཀྱིས་ཟླ་ངོ་གཉིས་ཀྱི་རྗེས་སུ་མ་གཏོགས་ཤེས་རྟོགས་བྱུང་མེད་པ་དང་།ཁོང་རང་འཛིན་བཟུང་བཀག་ཉར་བྱེད་དུས་དགུང་ལོ་༣༩་ལས་སོན་མེད་པ་རེད།

གཞན་ཁོང་རང་ཆོས་རྗེ་མཁན་ཆེན་འཇིགས་མེད་ཕུན་ཚོགས་མཆོག་གི་སྐུ་ཚ་ཡིན་པས་ཆུང་དུས་ནས་གསེར་རྟ་བླ་རུང་ཆོས་སྒར་དུ་འཛུལ་ཞུགས་ཀྱིས་ལོ་ངོ་ཉི་ཤུ་ལྷག་གི་རིང་ལ་ནང་ཆོས་སློབ་གཉེར་གནང་ཡོད་པ་དང་།དགོན་པའི་ནང་དུ་བཞུགས་དུས་ཀྱང་ལས་སྣེ་ཆེ་ཆུང་འདྲ་མིན་གྱི་འགན་ཁུར་མྱོང་བར་མ་ཟད།འཇུ་བཟུང་བྱེད་སྐབས་ཀྱང་ཆོས་སྡེའི་བཟང་སྤྱོད་ལས་ཁང་གི་འགན་འཛིན་གྱི་གྲས་སུ་ཡོད་འདུག་ལ་དེ་སྔ་ཁྲིན་ཏུའུ་རུ་ཡོང་དོན་ཡང་དགོན་པའི་ལས་དོན་ཞིག་གི་ཆེད་དུ་ཡིན་པ་རེད།གཞན་ཁྲིམས་ཐག་བཅད་པའི་རྗེས་སུ་ཁོང་རང་ཁྲིན་ཏུའུ་གྲོང་ཁྱེར་དང་ཐག་མིང་རིང་བའི་ཡཱའ་ཨན་བཙོན་ཁང་དུ་བཙོན་འཇུག་བྱས་ཡོད་འདུག    

ཁམས་འབྲི་རུ་རྫོང་བརླན་ཆུ་ཤང་འགོམ་དགོན་གསར་དགོན་པའི་གྲྭ་བསྟན་འཛིན་ལྷུན་གྲུབ་ལགས་འདི་ལོའི་ཟླ་ ༥་ ནང་ཤག་ཆུ་གྲོང་དུ་ཕེབས་སྐབས། མི་དམངས་གིས་ཞུས་དོན་ལྟར་མི་རིགས་དང་སྐད་ཡིག་གི་གནས་བབས་སྐོར་ལ་བཀའ་སློབ་ཅིག་གནང་བཞིན་པའི་དུས་སུ་རྒྱ་མིའི་ཉེན་རྟོག་པས་བཙན་འཁྲིད་བྱས་ཡོད་འདུག

གྲྭ་བསྟན་འཛིན་ལྷུན་གྲུབ་ལགས་ནི་ཤག་ཆུ་ཤང་དགེ་སྣེ་གྲོང་ནས་ཡིན་ལ་ཆུང་དུས་ནས་འགོམ་དགོན་གསར་དགོན་དུ་འཛུལ་ཞུགས་བྱས་པ་དང་།༢༠༠༢ ཡས་མས་ནས་འབྲི་གུང་མཐིལ་སོགས་སུ་སྒྲུབ་པར་བཞུགས་ལ་མཉམ་དུ་ནང་པའི་གཞུང་ལུགས་གཙོ་བའི་རིག་གནས་ཐུན་མོང་ལ་གསན་བསམ་མཛད། ཕྱིེས་སུ་རང་ཡུལ་དུ་ཕྱིར་ཕེབས་ནས་རང་དགོན་འགོམ་དགོན་གསར་དགོན་དུ་ཚོགས་བླའི་འགན་ཁུར་བར་མ་ཟད་ཞོར་དུ་གྲྭ་བ་རྣམས་ལ་འཆད་ཁྲིད་དང་། ལྷག་དཀར་ཉིན་མོར་གྲོང་པ་ཁག་གི་ནང་དུ་ནང་ཆོས་ངོ་སྤྲོད་དང་རྩོད་པ་འདུམས་སྒྲིག དེ་མིན་དཀར་ཟས་ལ་སྤྱོད་པའི་བསྐུལ་མ་གནངས་བ་སོགས་ཆོས་སྲིད་ཁྲིམས་གསུམ་ཀུན་དང་མཐུན་པའི་ཡར་བསྐུལ་གྱི་ལས་འགུལ་ཡང་སྣ་མང་སྤེལ་གྱི་ཡོད་པ་རེད། ལྷག་པར་དུ་ཁོང་གིས་ནམ་རྒྱུན་ཡུལ་མི་རྣམས་ལ་མི་རིགས་ཀྱི་ལ་རྒྱའི་སྐོར་ཆོད་སེམས་བརྟན་པོས་ངང་འགྲེལ་བཤད་རྒྱག་བཞིན་ཡོད་པས།ཡུལ་མི་ཚོའི་ངོས་ནས་ཀྱང་ཁོང་ལ་གདེང་འཇོག་ཆེན་པོ་བྱེད་བཞིན་ཡོད་པ་རེད། ན་ནིང་རྒྱ་གཞུང་གིས་ནགས་ལྷའི་གཏེར་ཁ་སྔོགས་འདོན་བྱེད་སྐབས་ཁོང་གིས་ཡུལ་མི་རྣམས་ལ་བཀག་འགོག་བྱེད་དགོས་པའི་སྐུལ་མ་བྱས་ཚུལ་དང། དངོས་སུ་མི་དམངས་ལ་བཀའ་སློབ་གནང་བ་དང་ནགས་ལྷ་སྲུང་སྐྱོབ་བྱེད་མཁན་དག་ལ་ཁ་བཏགས་གཡོགས་པས་རྒྱ་གཞུང་ཧ་ཅང་མ་དགའ་བ་ཆགས་ཡོད་པར་བཤད་ཀྱི་འདུག

འཛམ་གླིང་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ཡོངས་ཁྱབ་གསལ་བསྒྲགས་ནང་།“སྐྱེ་བོ་ཐམས་ཅད་ཁྲིམས་ཀྱི་མདུན་སར་འདྲ་མཉམ་ཡིན་པ་དང༌། ཁྲིམས་ཀྱི་ཐོག་ནས་དབྱེ་འབྱེད་མེད་པར་འདྲ་མཉམ་གྱིས་སྲུང་སྐྱོབ་བྱེད་དགོས་པའི་ཐོབ་ཐང་ཡོད།”ཅེས་གསལ་ཡོད།   རྒྱ་གཞུང་གིས་འགྲོ་བ་མིའི་ཐོབ་ཐང་ཡོངས་ཁྱབ་གསལ་བསྒྲགས་ཀྱིས་མཚོན་པའི།  མཉམ་འབྲེལ་རྒྱལ་ཚོགས་ཀྱི་བཅའ་ཁྲིམས་དང་སྤྱི་ཆིངས་མང་པོར་མཚན་རྟགས་བཀོད་ཡོད་ཀྱང་། དོན་དངོས་ཐོག་རྒྱ་གཞུང་གིས་རྒྱལ་སྤྱིའི་ཁྲིམས་གཞི་དེ་དག་ལག་ལེན་བསྟར་གྱི་མེད་པ་མ་ཟད།  དམར་ཤོག་གཅིག་སྡུད་སྲིད་དབང་སྲ་བརྟན་ཡོང་ཐབས་ཀྱི་ཁྲིམས་དང་སྒྲིག་གཞི་སྣ་ཚོགས་བཟོས་ཏེ།  མུ་མཐུད་འགྲོ་བ་མིའི་ཐོབ་ཐང་རྡོག་རོལ་དང་མི་དམངས་ཀྱི་ཁྲིམས་མཐུན་ཁེ་དབང་བཙན་འཕྲོག་བྱེད་བཞིན་ཡོད།

མ་གཞི་རྒྱ་ནག་ནི་མཉམ་འབྲེལ་རྒྱལ་ཚོགས་ཀྱི་ཚོགས་ཞུགས་རྒྱལ་ཁབ་གྲས་ཀྱི་གཅིག་པའི་ཆ་ནས། རྒྱལ་ཚོགས་ཀྱི་བཅའ་ཁྲིམས་དང་སྤྱི་ཆིངས་ཁག་སོ་སོའི་རྒྱལ་ཁབ་ནང་ཁྱབ་བརྡལ་དང་གོ་རྟོགས་སྤེལ་རྒྱུའི་འོས་འགན་ཡོད་པ་རེད། ཡིན་ནའང་། རྒྱ་གཞུང་གིས་དེ་ལས་ལྡོག་སྟེ་མང་ཚོགས་ཀྱིས་རྒྱལ་ཚོགས་ཀྱི་བཅའ་ཁྲིམས་ཁག་གི་དགོངས་དོན་མཁྱེན་རྟོགས་ཡོང་རྒྱུ་བཀག་འགོག་བྱེད་ཀྱིན་ཡོད།  དེར་བརྟེན་འདི་ག་ལྟེ་གནས་ཁང་གིས་རྒྱ་ཆེ་བོད་རིགས་མང་ཚོགས་ཀྱིས་རྒྱལ་ཚོགས་ཀྱི་བཅའ་ཁྲིམས་ཁག་ནང་བཀོད་པའི་འགྲོ་བ་མིའི་ཐོབ་ཐང་དང་གཞི་རྩའི་ཁེ་དབང་དག་མཁྱེན་རྟོགས་ཡོང་ཆེད།<བཙན་དབང་འོག་གར་སོང་ཆ་མེད་འགྱུར་རིགས་འགོག་པའི་རྒྱལ་སྤྱིའི་ཁྲིམས་ཡིག>དང་། <མནར་གཅོད་འགོག་པའི་ཁྲིམས་ཡིག་དང་། གདུག་རྩུབ་ཆེ་ལ་མི་སྤྱོད་ལས་འདས་པའི་ཉེས་ཁྲིམས་གཅོད་པའི་བྱ་སྤྱོད་གཞན་དག་འགོག་ཐབས་ཀྱི་ཁྲིམས་ཡིག>གིས་མཚོན་པའི་རྒྱལ་ཚོགས་ཀྱི་གལ་ཆེའི་ཁྲིམས་ཡིག་ཁག་ཅིག་བོད་བསྒྱུར་ཐོག  <<མཉམ་འབྲེལ་རྒྱལ་ཚོགས་ཀྱི་བཅའ་ཁྲིམས་ཁག>>ཅེས་པའི་དེབ་འདི་པར་འགྲེམས་བྱས་པ་ཡིན།

ཕྱི་ཟླ་ ༦ ཚེས་ ༢༦ ཉིན་ནི། མཉམ་འབྲེལ་རྒྱལ་ཚོགས་ཀྱིས་རྒྱལ་སྤྱིའི་མནར་གཅོད་བཀག་སྡོམ་ཉིན་མོར་སྲུང་བརྩི་ཞུ་བཞིན་པ་ལྟར། འདི་ག་ལྟེ་གནས་ཁང་གི་ངོས་ནས་ཀྱང་ཉིན་མོ་འདི་བཞིན་སྲུང་བརྩི་ཞུ་བཞིན་ཡོད། ཉིན་མོ་འདིར་རྒྱལ་སྤྱིའི་སྤྱི་ཚོགས་ཀྱི་ངོས་ནས། གཅིག་སྡུད་ལམ་ལུགས་ཀྱི་དྲག་པོའི་སྲིད་དབང་འོག་མནར་གཅོད་མྱངས་དང་མྱོང་བཞིན་པའི་འཛམ་གླིང་གི་སྐྱེས་བོ་ཚང་མར་རྒྱབ་སྐྱོར་དང་གདུང་སེམས་མཉམ་སྐྱེད་ཞུ་བཞིན་ཡོད་ལ། ལྷག་པར་དུ་འགྲོ་བ་མིའི་གཞི་རྩའི་ཐོབ་ཐང་སྟེ། སྨྲ་བརྗོད་རང་དབང་དང་བསམ་བློ་རང་དབང་། འདུ་འཛོམས་རང་དབང་སོགས་ལོངས་སྤྱོད་ཆེད། མི་སྤྱོད་ལས་འདས་པའི་མནར་གཅོད་འོག་ཚུད་མཁན་ཚོར་དམིགས་བསལ་གུས་བརྩི་དང་ཆེ་མཐོང་ཞུ་བཞིན་ཡོད།

དེ་རིང་གི་ཉིན་མོ་འདིར་འདི་ག་ལྟེ་གནས་ཁང་གི་ངོས་ནས། མཉམ་འབྲེལ་རྒྱལ་ཚོགས་ཀྱི་ཚོགས་ཆེན་གྱིས་གཏན་ལ་ཕབ་པའི་གྲོས་གཞི་ཨང་གྲངས་ ༥༢།༡༤༩ གཞིར་བཟུང་། ཕྱི་ཟླ་ ༦ ཚེས་ ༢༦ ཉིན་སྟེ་མཉམ་འབྲེལ་རྒྱལ་ཚོགས་ཀྱི་རྒྱལ་སྤྱིའི་མནར་གཅོད་བཀག་འགོག་ཉིན་མོའི་དམིགས་ཡུལ་ཁག་ལམ་ལྷོངས་ཡོང་བར་འབད་བརྩོན་དང་ཡིད་ཆེས་བརྟན་པོ་བཅངས་བཞིན་ཡོད། དུས་དྲན་ཉིན་མོ་འདིའི་དམིགས་ཡུལ་ནི་མཐའ་གཅིག་ཏུ་མནར་གཅོད་རིགས་རྩ་མེད་གཏོང་རྒྱུ་དང་། རྒྱལ་ཚོགས་ཀྱིས་ ༡༩༨༧ ལོའི་ཟླ་ ༦ ཚེས་ ༢༦ ཉིན་གཏན་ལ་ཕབ་པའི་མི་སྤྱོད་ལས་འདས་པའི་མནར་གཅོད་བཀག་སྡོམ་སྐོར་གྱི་སྤྱི་ཆིངས་རྣམས་ལག་བསྟར་དོན་འཁྱོལ་ཡོང་རྒྱུ་དེ་རེད།