གསར་འགྱུར།

ཁ་སང་སྔ་དྲོ་བོད་མདོ་སྨད་ཨ་མཆོག་ཏུ་བོད་མི་ཞིག་གིས་རང་ལུས་མེར་བསྲེགས་ཀྱིས་རྒྱ་གཞུང་ལ་ངོ་རྒོལ་བྱས་ཏེ་སྐུ་གྲོངས་ཡོད་འདུག

གསར་འགྱུར་བརྒྱུད་ལམ་ཁག་ཏུ་གནས་ཚུལ་ཐོན་པ་ལྟར་ན། ཕྱི་ལོ་ ༢༠༡༤ ཟླ་ ༡༢ ཚེས་ ༡༦ ཉིན་གྱི་བོད་ནང་གི་ཆུ་ཚུད་ ༩ པ་ཙམ་ལ། ཀན་ལྷོ་ཁུལ་བསང་ཆུ་རྫོང་ཨ་མཆོག་ཞང་ཉེན་རྟོག་ཁང་གི་སྒོ་མདུན་དུ། རང་ལོ་ ༣༤ ཡིིན་པའི་བོད་མི་སངས་རྒྱས་མཁར་ལགས་ཀྱིས་རང་ལུས་མེར་བསྲེགས་བཏང་སྟེ། རྒྱ་གཞུང་ལ་ཞི་བའི་ངོ་རྒོལ་གྱིས་སྐུ་གྲོངས་ཡོད་འདུག འདི་ག་ལྟེ་གནས་ཁང་གིས་བཙན་བྱོལ་དུ་གནས་བཞུགས་ཨ་མཆོག་ས་ཆའི་མི་འགའ་ཤས་ལ་གནས་ཚུལ་དེའི་སྐོར་བཀའ་འདྲི་བྱས་པར། ཁོང་ཚོའི་ངོས་ནས་ཀྱང་གནས་ཚུལ་དེ་དངོས་བདེན་ཡིན་པ་བརྗོད་བྱུང་།

ཁམས་འབྲི་རུ་རྫོང་རྒྱ་ཤོད་གཡང་ཤོག་དམ་སེན་ཚ་ཤང་ཟེར་བའི་ཁོངས་གཏོགས། དབུ་གཞུང་གྲོང་ཚོའི་སྡེ་དཔོན་འབའ་ཆེན་རྒྱལ་བ་ལགས། ཉེ་ཆར་ས་གནས་རྒྱ་གཞུང་གིས་དམར་གསོད་བཏང་ཡོད་པ་མ་ཟད། ཁོང་ལ་རྒྱབ་སྐྱོར་གནང་མཁན་མང་ཚོགས་ ༥༠ ལྷག་འཇུ་བཟུང་བཙན་འཁྲིད་བྱས་ཡོད་འདུག

འདི་ག་ལྟེ་གནས་ཁང་ལ་གནས་ཚུལ་འབྱོར་དོན། རྒྱ་གཞུང་གིས་བོད་ས་བཅད་བཟུང་གིས་མི་སེར་སྤེལ་བའི་ད་ལྟའི་དབང་བསྒྱུར་ས་ཁོངས་ལྟར་བྱས་ན། བོད་རང་སྐྱོང་ལྗོངས་ཟེར་བའི་ནག་ཆུ་ས་ཁུལ་གྱི་ཁོངས་སུ་བསྡུས་ཡོད་པའི་འབྲི་རུ་རྫོང་གཡང་ཤོག་ཤང་དབུ་གཞུང་གྲོ་ཚོའི་སྡེ་དཔོན་ཡིན་ཞིང་། ད་ལྟ་རང་ལོ་ ༥༠ ཡས་མས་ལ་སོན་པའི་འབའ་ཆེན་རྒྱལ་བའམ་སྔར་གྱི་གྲྭ་མིང་ལ་ངག་དབང་སྨོན་ལམ་ཞུ་བ་ཁོང་། འབྲི་རུ་རྫོང་གི་དམར་ཤོག་དྲུང་ཆེ་ཀྲང་ཀཱང་ཟེར་བས་བཀའ་མངགས་ལྟར། ས་གནས་རྒྱ་གཞུང་ཉེན་རྟོག་པ་དང་བཅའ་སྡོད་དམག་མིའི་མགོ་གཙོ་ཞིག་གིས། ཕྱི་ལོ་ ༢༠༡༤ ཟླ་ ༡༡ ཚེས་ ༢༡ ཉིན་གཡང་ཤོག་ཤང་དུ་དམར་གསོད་བཏང་ཡོད་པ་མ་ཟད། གྲོང་ཚོ་དེའི་མང་ཚོགས་ལྔ་བཅུ་ཙམ་འཇུ་བཟུང་བྱས་ཏེ་གཡང་ཤོག་ཞང་དུ་བཀག་ཉར་བྱས་མཐར་འབྲི་རུ་རྫོང་དུ་བཙན་འཁྲིད་བྱས་ཡོད་པ་རེད། ཁོང་ཚོའི་ཁྲོད་ནས་མིང་ཤེས་རྟོགས་བྱུང་ཡོད་པ་ཁག་ཅིག་ནི། དཔའ་དགའ་དང་ནད་མེད། དྲོ་རིལ། བཀྲ་ཤིས་བཅས་ཡིན་འདུག དོན་རྐྱེན་དེའི་གཞི་རྩའི་གནད་དོན་ཞིབ་ཕྲ་ཁ་གསལ་ཤེས་རྟོགས་ཐུབ་ཀྱི་མེད་ཀྱང་། སྡེ་དཔོན་འབའ་ཆེན་རྒྱལ་བ་ལགས་ནི་བོད་མི་རིགས་ཀྱི་ཆོས་དང་རིག་གཞུང་རྒྱུན་འཛིན་དར་སྤེལ་དང་། ས་གནས་དགོན་གྲོང་གཉིས་ཀྱི་སྐྱ་སེར་མང་ཚོགས་ལ་ཞབས་འདེགས་སྒྲུབ་མཁན་ཞིག་ཡིན་སྟབས། མང་ཚོགས་ཀྱིས་ཁོང་ལ་གུས་བརྩི་དང་ཁོང་གི་ཕྱག་ལས་ལ་རྒྱབ་སྐྱོར་ཤུགས་ཆེན་པོ་གནང་བཞིན་ཡོད་འདུག དེར་བརྟེན་རྒྱ་གཞུང་གིས་ཁོང་གི་ཤུགས་རྐྱེན་མེད་པ་བཟོ་ཆེད་དམར་གསོད་བཏང་བ་ཞིག་ཡིན་པར་ས་གནས་མང་ཚོགས་ཀྱིས་ངོས་འཛིན་བྱེད་བཞིན་ཡོད་འདུག

རྒྱ་གཞུང་གིས་ཆབ་སྲིད་ཀྱི་ཉེས་མིང་འོག་ལོ་ ༡༥ བཙོན་འཇུག་ཁྲིམས་ཐག་བཅད་དེ། ལྷ་སའི་ཆུ་ཤུར་བཙོན་ཁང་དུ་བཙོན་འཇུག་བྱས་ཡོད་པའི་བོད་མི་བསྟན་འཛིན་ཆོས་གྲགས་ལགས། བཙོན་འོག་ཏུ་འདས་པའི་ལོ་ ༦ ལྷག་རིང་མི་སྤྱོད་ལས་འདས་པའི་སྡུག་སྦྱོང་མནར་གཅོད་ཚད་མེད་བཏང་སྟེ་གསོན་ཐབས་མེད་པ་བཟོས་རྗེས། བཙོན་འོག་འདས་གྲོངས་ཕྱིན་པའི་ནག་ཉེས་ལས་གཡོལ་ཐབས་སུ། ཟླ་འདིའི་ཕྱི་ཚེས་ ༢ ཉིན་ཕྱིར་ནང་རྩིས་སྤྲོད་བྱས་ཡོད་ཀྱང་། ཕྱི་ཚེས་ ༥ ཉིན་གྱི་བོད་ནང་ཆུ་ཚོད་ ༡ ཙམ་འདས་གྲོངས་ཕྱིན་ཡོད་འདུག

འདི་ག་ལྟེ་གནས་ཁང་ལ་གནས་ཚུལ་བྱོར་དོན།   ༢༠༠༨ ལོའི་ཕྱི་ཟླ་ ༣ ཚེས་ ༡༤ གྱི་ལྷ་སའི་ངོ་རྒོལ་ཁྲོད་མཉམ་ཞུགས་གནང་མཁན་གཙོ་བོ་ཡིན་པའི་ཉེས་མིང་འོག   ལོ་ ༡༥ དུས་བཀག་བཙོན་འཇུག་ཁྲིམས་ཐག་བཅད་དེ་ལྷ་ས་ཆུ་ཤུར་བཙོན་ཁང་དུ་བཙོན་འཇུག་བྱས་ཡོད་པའི། རང་ལོ་ ༣༣ ཡིན་པའི་ཆབ་སྲིད་བཙོན་པ་བསྟན་འཛིན་ཆོས་གྲགས་ལགས། བཙོན་འོག་ཏུ་སྡུག་སྦྱོང་མནར་གཅོད་ཚད་ལས་བརྒལ་བ་བཏང་བའི་རྐྱེན་གྱིས་གཟུགས་པོའི་གནས་སྟངས་ཛ་དྲག་ཆགས་ཏེ། ཉེ་བའི་ཟླ་གཅིག་གི་སྔོན་ཙམ་ལ་ལྷ་ས་གྲོང་ཁྱེར་མི་དམངས་སྨན་ཁང་ཟེར་བའི་ནང་བསྐྱལ་ཡོད་འདུག

སྐབས་དེ་དུས་བསྟན་འཛིན་ཆོས་ལགས་ཀྱི་གཟུགས་པོ་སྐམ་རིད་དུ་གྱུར་ཏེ་ཤ་མདོགས་ནག་པོ་ཆགས་པ་དང་། ཡར་མར་འགྲོ་བསྐྱོད་མི་ཐུབ་པར་གཅུན་སྐྱག་ཡང་མལ་ཁྲིའི་སྟེང་འདོར་དགོས་ཆགས་ཡོད་པ་མ་ཟད། ཁ་ནས་ཁྲག་ནག་པོ་སྐྱུག་པ་དང་དྲན་ཤེས་ཉམས་སྟེ་མི་ངོ་མི་ཟིན་པར་གྱུར་ཡོད་ནའང་། སྨན་བཅོས་སྐབས་ཀྱང་ཁོང་ལ་སྔར་བཞིན་རྐང་ལྕགས་བརྒྱབ་ཡོད་པ་མ་ཟད། བཙོན་སྲུང་བ་མི་བཞིས་སྐོར་སྲུང་ལྟ་རྟོགས་འོག་ཡོད་འདུག

བོད་མདོ་སྨད་རྔ་བའི་གླུ་བ་དང་གླུ་གཞས་སྒྲིག་སྦྱོར་བ་པདྨ་རིག་འཛིན་དང་། གཞན་པའི་མི་གཉིས་བཅས་ལ་རྒྱ་གཞུང་གིས་ཆབ་སྲིད་ཀྱི་ཉེས་མིང་བཀལ་ཐོག ཁྲིན་ཏུའུ་གྲོང་ཁྱེར་ཅེན་ཉོས་ཆས་འབྲིང་རིམ་མི་དམངས་ཁྲིམས་ཁང་ཟེར་བས་ཁྲིམས་ཐག་བཅད་ཡོད་འདུག

འདི་ག་ལྟེ་གནས་ཁང་ལ་གནས་ཚུལ་འབྱོར་དོན། བོད་མདོ་སྨད་རྔ་བའི་གླུ་བ་པདྨ་རིག་འཛིན་ལགས་ལ། ཆབ་སྲིད་དང་འབྲེལ་བ་ཡོད་པའི་བོད་སྐད་གླུ་གཞས་འོད་སྡེར་སྒྲིག་སྦྱོར་དང་པར་སྐྲུན་བྱས་པའི་ཉེས་མིང་འོག ཕྱི་ལོ་ ༢༠༡༤ ཟླ་ ༡༡ ཚེས་ ༢༧ ཉིན་རྒྱ་ནག་ཁྲིན་ཏུའུ་གྲོང་ཁྱེར་ཅེན་ཉོས་ཆས་འབྲིང་རིམ་མི་དམངས་ཁྲིམས་ཁང་ཟེར་བས་ལོ་ ༢ དང་ཟླ་ ༦ གི་དུས་བཀག་བཙོན་འཇུག་ཁྲིམས་ཐག་དང་། རྒྱ་སྒོར་ ༥༠༠༠༠ ཉེས་ཆད་བཅད་ཡོད་འདུག

རྒྱ་གཞུང་གིས་གླུ་བ་པདྨ་རིག་འཛིན་ལགས་ཕྱི་ལོ་ ༢༠༡༣ ཟླ་ ༥ ཚེས་ ༧ ཉིན་ཁྲིན་ཏུའུ་ནས་འཇུ་བཟུང་བཙན་ཁྲིད་བྱས་ཤིང་། ད་བར་ལོ་ ༡ དང་ཟླ་ ༦ ལྷག་རིང་བཀག་ཉར་ཁང་དུ་འདྲི་གཅོད་བཀག་ཉར་བྱས་ཡོད་པ་རེད། ཁོང་ལ་ཁྲིམས་ཐག་གཅོད་སྐབས་ཁྲིམས་རར་ཟུར་ཉན་དུ་ནང་མི་རེ་ཟུང་ཡོང་བཅུག་ཡོད་ཀྱང་། ནང་མིར་ཁྲིམས་རྩོད་པ་གླ་རྒྱུའི་ཐོབ་ཐང་སྤྲད་མེད་པ་རེད།

བོད་མདོ་སྨད་རྨ་ཆུ་ས་ཁུལ་གྱི་གླུ་བ་སྐལ་བཟང་ཡར་འཕེལ་ལགས་ལ། རྒྱ་གཞུང་གིས་ཆབ་སྲིད་ཉེས་མིང་བཀལ་ཏེ་ལོ་ ༤ བཙོན་འཇུག་ཁྲིམས་ཐག་བཅད་ཡོད་འདུག

འདི་ག་ལྟེ་གནས་ཁང་ལ་གནས་ཚུལ་འབྱོར་དོན། རྒྱ་གཞུང་གིས་བོད་རིགས་གླུ་བ་སྐལ་བཟང་ཡར་འཕེལ་ལགས་ལ་ཆབ་སྲིད་ཀྱི་ཉེས་མིང་གཡོགས་ཏེ། ཕྱི་ལོ་ ༢༠༡༣ ཟླ་ ༧ ཚེས་ ༡༤ ཡས་མས་ཤིག་བོད་ཀྱི་རྒྱལ་ས་ལྷ་ས་རུ་འཇུ་བཟུང་ཐོག རྒྱ་ནག་ཁྲིན་ཏུའུ་གྲོང་ཁྱེར་གྱི་ལྟ་སྲུང་ཁང་ཞིག་ཏུ་ལོ་ ༡ དང་ཟླ་ ༦ ལྷག་ལ་བཀག་ཉར་འདྲི་གཅོད་བྱས་མཐར། ཕྱི་ལོ་ ༢༠༡༤ ཟླ་ ༡༡ ཚེས་ ༢༧ ཉིན་རྒྱ་ནག་ཁྲིན་ཏུའུ་གྲོང་ཁྱེར་ཁྲིམས་ཁང་ཞིག་གིས། ཁོང་ལ་ལོ་ ༤ ཡི་དུས་བཀག་བཙོན་འཇུག་གི་ཁྲིམས་ཐག་བཅད་ཡོད་འདུག རྒྱ་གཞུང་གིས་གླུ་བ་སྐལ་བཟང་ཡར་འཕེལ་ལགས་ལ་ཁྲིམས་གཅོད་སྐབས། ཁོང་ལ་ཆབ་སྲིད་ཀྱི་ཉེས་མིང་ཅི་ཞིག་གཡོགས་ཡོད་མེད་དང་། ཁྲིམས་རྩོད་པ་གླ་རྒྱུའི་ཐོབ་ཐང་དང་ཁྲིམས་རར་ནང་མི་ཟུར་ཉན་དུ་ཞུགས་བཅུག་ཡོད་མེད་སོགས། ཞིབ་ཕྲའི་གནས་ཚུལ་གང་ཡང་ཤེས་རྟོགས་ཐུབ་ཀྱི་མེད་པ་རེད།

ཉེ་ཆར་རྔ་བ་ཀིརྟི་དགོན་པའི་གྲྭ་བློ་བཟང་བསྟན་པ་དང་བློ་བཟང་རྒྱ་མཚོ་གཉིས་ལ། རྒྱལ་ཁབ་ལ་ངོ་ལོག་བྱས་པའི་ཉེས་འཛུགས་འོག་བཙོན་འཇུག་ཁྲིམས་ཐག་བཅད་ཡོད་འདུག

འདི་ག་ལྟེ་གནས་ཁང་ལ་གནས་ཚུལ་འབྱོར་དོན། ཕྱི་ལོ་༢༠༡༤ ཟླ་༡༡ ཚེས་༧ ཉིན་གྱི་བོད་ནང་གི་སྔ་དྲོའི་ཆུ་ཚོད་༡༡ ཙམ་ལ། རྔ་བ་རང་སྐྱོང་ཁུལ་གྱི་ལྟེ་གནས་འབར་ཁམས་འབྲིང་རིམ་མི་མང་ཁྲིམས་ཁང་ཟེར་བས། རྒྱལ་ཁབ་ལ་ངོ་ལོག་གི་བྱ་སྤྱོད་སྤེལ་བའི་ཉེས་མིང་འོག རྔ་བ་ཀིརྟི་དགོན་པའི་གྲྭ་བློ་བཟང་བསྟན་པ་ལགས་ལ་ལོ་ ༢ དང་། གྲྭ་བློ་བཟང་རྒྱ་མཚོ་གཉིས་ལགས་ལ་ལོ་ ༣ བཅས་ཀྱི་བཙོན་འཇུག་ཁྲིམས་ཐག་བཅད་ཡོད་འདུག ཁོང་གཉིས་ལ་ཁྲིམས་ཐག་གཅོད་སྐབས་ནང་མིར་བརྡ་བརྒྱབ་སྟེ་ཁྲིམས་རར་ཟུར་ཉན་དུ་ཡོང་བཅུག་ཡོད་ཀྱང་། སོ་སོ་དང་ནང་མིའི་ངོས་ནས་ཁྲིམས་རྩོད་པ་གླས་ཏེ་ཉེས་འཛུགས་དག་འབུལ་བྱ་རྒྱུའི་གོ་སྐབས་གང་ཡང་སྤྲད་མེད་པ་རེད། མི་འགྱང་པར་ཁོང་གཉིས་ས་གནས་གཞན་གྱི་བཙོན་ཁང་དུ་བསྐྱར་རྒྱུ་ཡིན་འདུག

འདི་ག་ལྟེ་གནས་ཁང་ལ་གནས་ཚུལ་འབྱོར་དོན། ཕྱི་ལོ་ ༢༠༡༤ ཟླ་ ༡༡ ཚེས་ ༣ ཉིན་གྱི་བོད་ནང་གི་ཆུ་ཚོད་ ༩ དང་ཕྱེད་ཀའི་ཐོག རྔ་བ་རྫོང་མི་དམངས་ཁྲིམས་ཁང་ཟེར་བས་ཁྲིམས་ར་འཚོགས་ཏེ་མི་བསད་ཀྱི་ཉེས་འཛུགས་འོག བོད་མི་སྒྲོལ་མ་མཚོར་ལོ་ ༣ དང་། དཀོན་མཆོག་བློ་གྲོས་ལ་ལོ་ ༣ ། དགེ་འདུན་འཕེལ་རྒྱས་ལ་ལོ་ ༢ བཅས་ཀྱི་བཙོན་འཇུག་ཁྲིམས་ཐག་བཅད་འདུག

 

གནས་ཚུལ་དེའི་བྱུང་རྐྱེན་བརྒྱུད་རིམ་ནི། ཕྱི་ལོ་ ༢༠༡༣ ལོའི་ཟླ་ ༡༢ ཚེས་ ༣ ཉིན་རྔ་བ་རྫོང་རྨེའུ་རུ་མའི་ཡུལ་ཚོ་གསེར་སྡེ་ནས། བོད་མི་དཀོན་མཆོག་ཚེ་བརྟན་ལགས་ཀྱིས་རང་ལུས་མེར་བསྲེགས་ཀྱིས་རྒྱ་གཞུང་ལ་ཞི་བའི་ངོ་རྒོལ་གནང་རྗེས། རྒྱ་གཞུང་གིས་གནས་ཚུལ་དེར་རྐྱེན་བྱས་ཏེ་རྨེའུ་རུ་མའི་ཡུལ་མི་ ༢༠ ལྷག་འཇུ་བཟུང་བཀག་ཉར་བྱས་ཡོད་ཀྱང་། མི་ཁག་ཅིག་ཉིན་བཅུ་གྲངས་འགའ་ཤས་རིང་བཀག་ཉར་གཅར་རྡུང་བྱས་མཐར་རིམ་པར་གློད་ཡོད་པ་རེད། ཡིན་ནའང་། དེའི་ཁྲོད་ནས་སྒྲོལ་མ་མཚོ་དང་དཀོན་མཆོག་བློ་གྲོས། དགེ་འདུན་འཕེལ་རྒྱས། གྲྭ་བློ་བཟང་རྒྱ་མཚོ། གྲྭ་བསྟན་པ་བཅས་མི་ ༡༠ ལ་ནག་ཉེས་ལྕི་མོ་བཀལ་ཏེ་ད་ལྟའི་བར་བཀག་ཉར་གྱིས་ཟླ་ ༡༡ ལྷག་ཕྱིན་ཡོད་པ་དང་། ཉེ་ཆར་ཁྲིམས་ར་འཚོགས་ཏེ་ཁོང་ཚོའི་ཁྲོད་ནས་སྒྲོལ་མ་མཚོ་དང་དཀོན་མཆོག་བློ་གྲོས། དགེ་འདུན་འཕེལ་རྒྱས་གསུམ་ལ་བཙོན་འཇུག་ཁྲིམས་ཐག་བཅད་ཡོད་པ་རེད།