གསར་འགྱུར།

སོག་ཙན་དན་དགོན་པའི་གྲྭ་ངག་དབང་འགྱུར་མེད་ལགས་མི་ལོ་ ༡༥ བཙོན་འཇུག་དུས་ཡུན་རྫོགས་ཏེ། ཟླ་འདིའི་ཕྱི་ཚེས་ ༢༠ ཉིན་གློད་གྲོལ་ཐོབ་ཡོད་པ་རེད།

འདི་ག་ལྟེ་གནས་ཁང་ལ་གནས་ཚུལ་འབྱོར་དོན། ཕྱི་ལོ་ ༢༠༡༥ ཟླ་ ༣ ཚེས་ ༢༠ ཉིན་གྱི་བོད་ནང་གི་ཆུ་ཚོད་ ༡ དང་ཕྱེད་ཀ་ཙམ་གྱི་སྟེང་། སོག་ཙན་དན་དགོན་པའི་གྲྭ་ངག་དབང་འགྱུར་མེད་ལགས། ལྷ་སའི་ཆུ་ཤུལ་བཙོན་ཁང་ནང་ལོ་ ༡༥ དུས་བཀག་བཙོན་འཇུག་གི་དུས་ཡུན་རྫོགས་ཏེ་གློད་གྲོལ་ཐོབ་ཡོད་པ་རེད།

གྲྭ་ངག་དབང་འགྱུར་མེད་ལགས་ནི་སོག་རྫོང་དབྲོག་རྟ་གྲོང་ཚོ་ནས་ཡིན་ཞིང་། ཕྱི་ལོ་ ༢༠༠༠ ཟླ་ ༣ ཚེས་ ༡༧ ཉིན་རྒྱ་གཞུང་ཉེན་རྟོག་པས་འཛིན་བཟུང་བྱས་ཡོད་པ་རེད། ཁོང་འཇུ་བཟུང་བྱ་དགོས་པའི་རྒྱུ་རྐྱེན་ནི། ཁོང་གིས་ ༢༠༠༠ ལོའི་ཟླ་ ༣ པའི་ནང་ “༸ གོང་ས་མཆོག་སྐུ་ཚེ་ཁྲི་ལོ་བརྟན་པར་ཤོག བོད་རང་བཙན་ཡིན། རྒྱ་དམར་བོད་ནས་ཕར་རྒྱུག་ཅིག” ཅེས་ཤིང་པར་རྒྱབ་པའི་ཡིག་ཆ་པར་སྐྲུན་བྱས་ཏེ། མི་མང་འདུ་འཛོམས་ཆེ་བའི་ས་ཁུལ་དུ་སྦྱར་བ་དང་འགྲེམས་གཏོར་བྱས་པར་བརྟེན། ཟླ་དེའི་ཕྱི་ཚེས་ ༡༧ ཉིན་རྒྱ་གཞུང་ཉེན་རྟོག་པས་འཇུ་བཟུང་བྱས་རྗེས། རྒྱ་གཞུང་གིས་ཁོང་ལ་ “རྒྱལ་ཁབ་ཀྱི་བདེ་འཇགས་ལ་གནོད་སྐྱོན་དང་ངན་སྐུལ་དྲིལ་བསྒྲགས་བྱས་པའི” ཉེས་འཛུགས་འོག ལོ་དེའི་ལོ་འཇུག་ལ་ནག་ཆུ་ས་ཁུལ་འབྲིང་རིམ་མི་མང་ཁྲིམས་ཁང་ཟེར་བས་ངག་དབང་འགྱུར་མེད་ལ་ལོ་ ༡༥ དུས་བཀག་བཙོན་འཇུག་ཁྲིམས་ཐག་བཅད་དེ། དང་ཐོག་ལྷ་སའི་གྲྭ་བཞི་བཙོན་ཁང་དང་། དེ་རྗེས་ཆུ་ཤུལ་བཙོན་ཁང་དུ་བཙོན་འཇུག་བྱས་ཡོད་པ་རེད།

ཟླ་འདིའི་ཕྱི་ཚེས་ ༡༧ ཉིན་བོད་མདོ་སྨད་རྔ་བ་ཀིརྟི་དགོན་པའི་གྲྭ་བློ་བཟང་སྐལ་བཟང་ལགས་ཀྱིས། རྫོང་མཁར་གཞུང་ལམ་སྟེང་ཞི་བའི་སྐད་འབོད་ངོ་རྒོལ་བྱེད་སྐབས། རྒྱ་གཞུང་ཉེན་རྟོག་པས་འཇུ་བཟུང་བཙན་འཁྲིད་བྱས་ཡོད་འདུག

འདི་ག་ལྟེ་གནས་ཁང་ལ་གནས་ཚུལ་འབྱོར་དོན། ཕྱི་ལོ་ ༢༠༡༥ ཟླ་ ༣ ཚེས་ ༡༧ ཉིན་གྱི་བོད་ནང་གི་ཆུ་ཚོད་ ༣ དང་སྐར་མ་ ༤༠ ཡས་མས་སུ། ད་ལྟ་རྒྱ་གཞུང་གིས་བོད་ས་བཅད་བགོས་ཀྱིས་མི་སེར་སྤེལ་བའི་ས་ཁོངས་ལྟར་བྱས་ན། ཟི་ཁྲོན་ཞིང་ཆེན་རྔ་བ་བོད་རིགས་རང་སྐྱོང་ཁུལ་རྔ་བ་རྫོང་གི་རྫོང་མཁར་གཞུང་ལམ་སྟེང་དུ། རང་ལོ་ ༡༩ ཡིན་པའི་རྔ་བ་ཀིརྟི་དགོན་པའི་གྲྭ་བ་བློ་བཟང་སྐལ་བཟང་ལགས་ཀྱིས། ལག་གཡོན་པས་༸གོང་ས་མཆོག་གི་སྐུ་པར་ཞིག་མཐོན་པོར་བཏེགས་ཤིང་ལག་པ་གཡས་པས་རླུང་རྟ་གཏོར་བཞིན། “བོད་ལ་རང་དབང་དགོས” ཞེས་སྐད་འབོད་གནང་ཡོད་ཀྱང་། ཅུང་ཙམ་ལས་མ་འགོར་བར་རྒྱ་གཞུང་ཉེན་རྟོག་མི་སྣ་བསླེབས་ནས་ཁོང་འཛིན་བཟུང་བཙན་ཁྲིད་བྱས་ཡོད་འདུག

ཟླ་འདིའི་ཕྱི་ཚེས་ ༡༤ དགོང་མོར་ཁམས་སོག་རྫོང་ཙན་དན་དགོན་པའི་གྲྭ་པ་ ༧ རྒྱ་གཞུང་ཉེན་རྟོག་པས་འཇུ་བཟུང་བཙན་འཁྲིད་བྱས་འདུག

འདི་ག་ལྟེ་གནས་ཁང་ལ་གནས་ཚུལ་འབྱོར་དོན། ཕྱི་ལོ་ ༢༠༡༥ ཟླ་ ༣ ཚེས་ ༡༤ དགོང་མོར། ད་ལྟ་རྒྱ་གཞུང་གིས་བོད་ས་བཅད་བགོས་ཀྱིས་མི་སེར་སྤེལ་བའི་ས་ཁོངས་ལྟར་བྱས་ན། བོད་རང་སྐྱོང་ལྗོངས་ནགས་ཆུ་ས་ཁུལ་སོག་རྫོང་ཙན་དན་དགོན་པའི་གྲྭ་པ་རྣམ་རྒྱལ་ཚུལ་ཁྲིམས་དང་། བློ་གྲོས་བསྟན་འཛིན། ཚུལ་ཁྲིམས་སྒོ་འབྱེད། ཚུལ་ཁྲིམས་རྣམ་རྒྱལ། ཐབས་མཁས་ལྷུན་འགྲུབ། འཇིག་མེད་ཚུལ་ཁྲིམས། འཇིག་མེད་གྲགས་པ་བཅས། གྲྭ་པ་ ༧ རྒྱ་གཞུང་ཉེན་རྟོག་པས་འཛིན་བཟུང་བཀག་ཉར་བྱས་ཡོད་འདུག ཡིན་ནའང་། ཁོང་རྣམ་པ་འཛིན་བཟུང་བྱེད་པའི་རྒྱུ་མཚན་ཅི་ཡིན་ཉེན་རྟོག་པས་འགྲེལ་བརྗོད་བྱས་མེད་པ་རེད།

 
ས་གནས་དེ་གའི་ཡུལ་མི་རྣམས་ཀྱི་ངོས་ནས། ཁོང་ཚོས་བོད་དོན་དང་འབྲེལ་བའི་པར་རིས་དང་གནས་ཚུལ་ཕན་ཚུན་གཏོང་རེས་བྱས་རྐྱེན་ཡིན་པའི་ཚོད་བགམ་བྱེད་བཞིན་ཡོད་འདུག ད་ལྟའི་ཆར་གྲྭ་པ་དེ་དག་ས་ཆ་གང་ཞིག་ཏུ་བཀག་ཉར་དང་གནས་སྟངས་ག་འདྲ་ཆགས་ཡོད་མེད་དང་། དེ་བཞིན། ཁོང་ཚོ་འཇུ་བཟུང་བྱེད་དགོས་དངོས་ཡོད་གནས་ཚུལ་སོགས་གང་ཡང་ཤེས་རྟོགས་ཐུབ་ཀྱི་མེད་པ་རེད།

བོད་མདོ་སྨད་རྔ་བ་ཀིརྟི་དགོན་པའི་གྲྭ་དགེ་འདུན་ཕུན་ཚོགས་ལགས་ཀྱིས། རྔ་བ་རྫོང་མཁར་གྱི་ཁྲོམ་གཞུང་དུ་ཞི་བའི་སྐད་འབོད་གོམ་བགྲོད་ཀྱིས་ངོ་རྒོལ་བྱེད་སྐབས། རྒྱ་གཞུང་ཉེན་རྟོག་པས་ཁོ་འཇུ་བཟུང་བཙན་འཁྲིད་བྱས་ཡོད་འདུག

འདི་ག་ལྟེ་གནས་ཁང་ལ་གནས་ཚུལ་འབྱོར་དོན། ཕྱི་ལོ་ ༢༠༡༥ ཟླ་ ༣ ཚེས་༨ ཉིན་གྱི་བོད་ནང་གི་ཉིན་རྒྱབ་ཆུ་ཚོད་ ༡ དང་ཕྱེད་ཀའི་སྟེང་། བོད་མདོ་སྨད་རྔ་བ་ཀིརྟི་དགོན་པའི་གྲྭ་དགེ་འདུན་ཕུན་ཚོགས་ལགས་ཀྱིས། ༧གོང་ས་མཆོག་གི་སྐུ་པར་ཆེན་པོ་ཞིག་ཁ་བཏགས་སེར་པོས་ལྗིབས་ནས་མགོའི་སྟེང་དུ་འཕྱར་ཏེ། ༼རྒྱལ་བ་རིན་པོ་ཆེ་བོད་ལ་ཕེབས་འཇུག་དགོས། བོད་ལ་རང་དབང་དང་འདྲ་མཉམ་དགོས།༽ཞེས་སྐད་འབོད་གནང་བཞིན། རྔ་བ་རྫོང་མཁར་གྱི་གཞུང་ལམ་སྟེང་ནས་ཞི་བའི་གོམ་བགྲོད་གནང་སྟེ་རྒྱ་གཞུང་གིས་བོད་ཐོག་འཛིན་པའི་དྲག་གནོན་དབང་སྒྱུར་གྱི་སྲིད་ཇུས་ལ་ངོ་རྒོལ་གནང་ཡོད་ཅིང་། ཆུ་ཚོད་ཅུང་ཙམ་ལས་མ་འགོར་བར་ཉེན་རྟོག་པ་འབྱོར་ཏེ་ཁོང་འཇུ་བཟུང་བཙན་ཁྲིད་བྱས་ཡོད་འདུག

ཆོ་འཕྲུལ་དུས་ཆེན་ཉིན་གྱི་མཚན་མོར་བོད་མདོ་སྨད་རྔ་བ་རྫོང་ཁོངས་སུ། བོད་རིགས་བུད་མེད་ནོར་ཕྱུག་ལགས་ཀྱིས་རང་ལུས་མེར་བསྲེགས་ཀྱིས་རྒྱ་གཞུང་གི་དྲག་གནོན་དབང་སྒྱུར་གྱི་སྲིད་ཇུས་ལ་ཞི་བའི་ངོ་རྒོལ་གནང་འདུག

འདི་ག་ལྟེ་གནས་ཁང་ལ་གནས་ཚུལ་འབྱོར་དོན། ཕྱི་ལོ་ ༢༠༡༥ ཟླ་ ༣ ཚེས་ ༥ སྟེ་ཆོ་འཕྲུལ་དུས་ཆེན་ཉིན་གྱི་མཚན་མོར། བོད་མདོ་སྨད་རྔ་བ་རྫོང་སྤྲོ་ཚིགས་ཡུལ་ཚོའི་རྡོ་བ་སྡེ་བའི་བུད་མེད་ནོར་ཕྱུག་ལགས་ཀྱིས་བོད་བསྟན་སྲིད་རང་དབང་ཆེད་རྒྱ་གཞུང་གི་དྲག་གནོན་དབང་སྒྱུར་སྲིད་ཇུས་ལ་ཞི་བའི་ངོ་རྒོལ་གྱིས་རང་ལུས་མེར་བསྲེགས་བཏང་སྟེ་འདས་གྲོངས་སུ་གྱུར་ཡོད་པ་དང་། ཁོང་མོས་མཚན་མོར་རང་ལུས་མེར་བསྲེགས་བཏང་བ་ཡིན་སྟབས་སྐུ་ཕུང་རྒྱ་ལག་ཏུ་ཤོར་མེད་ནའང་། རྒྱ་གཞུང་གིས་བཙན་འཕྲོག་བྱེད་པར་དོགས་ནས་ཕྱི་ཚེས་ ༦ ཉིན་གྱི་སྔ་དྲོ་ཕ་ཡུལ་གཅིག་པའི་མི་མང་གིས་འཕྲལ་དུ་སྐུ་ཕུང་ཞུགས་འབུལ་ཞུས་ཡོད་འདུག

ཕྱི་ལོ་ ༢༠༡༥ ལོའི་ཕྱི་ཟླ་ ༢ ཚེས་ ༧ ཉིན་གྱི་ཕྱི་དྲོ་ཆུ་ཚོད་ ༣ པའི་སྟེང་གངས་སྐྱིད་བོད་ཀྱི་དཔེ་མཛོད་ཚོགས་ཁང་དུ། འདི་ག་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གས་ཁང་གི་ངོས་ནས། ཕྱི་ལོ་ ༢༠༡༤ ལོའི་བོད་ནང་གི་འགྲོ་བ་མིའི་ཐོབ་ཐང་ཐད་ཀྱི་ལོ་འཁོར་སྙན་ཐོ་དེ།   དེབ་གཟུགས་དང་གློག་རྡུལ་པར་དེབ་གཉིས་ཀྱི་ལམ་ནས་འགྲེམས་སྤེལ་དང་། དེ་བཞིན། ལོ་འཁོར་སྙན་ཐོ་འདི་ཉིད་རྒྱལ་སྤྱིའི་སྤྱི་ཚོགས་ཁྲོད་ཁྱབ་སྤེལ་ཡོང་ཐབས་སུ་བོད་དབྱིན་རྒྱ་གསུམ་སྐད་ཡིག་ཐོག་པར་འགྲེམས་བྱས་ཡོད། ལྷག་པར་དུ་རྒྱ་རིགས་མང་ཚོགས་ཀྱིས་བོད་ནང་གི་འགྲོ་བ་མིའི་ཐོབ་ཐང་གནས་སྟངས་ཤེས་རྟོགས་ཡོང་བར་དམིགས་ནས། འདི་ག་ལྟེ་གནས་ཁང་གིས་ལོ་འཁོར་སྙན་ཐོ་རྒྱ་ཡིག་ཐོག་བཏོན་པ་ཐོག་མ་དེའང་ཆགས་ཡོད།

ལོ་འཁོར་སྙན་ཐོའི་ནང་། རྒྱ་གཞུང་གིས་དེ་སྔོན་རྒྱལ་ཚོགས་གཙོས་རྒྱལ་སྤྱིའི་ཚོགས་སྡེ་ཁག་ལ། བོད་ནང་གི་འགྲོ་བ་མིའི་ཐོབ་ཐང་གནས་སྟངས་མང་པོ་ཞིག་གི་ཐད་ལེགས་བཅོས་གཏོང་རྒྱུའི་ཁས་ལེན་བྱས་ཡོད་པ་རྣམས་དོན་དངོས་ལག་ལེན་བྱས་མེད་པར། བོད་ནང་གི་འགྲོ་བ་མིའི་ཐོབ་ཐང་གནས་སྟངས་མཐའ་དག་སྔར་བས་ཇེ་སྡུག་ཇེ་ཞན་དུ་གྱུར་ཡོད། དེ་བས་སྙན་ཐོའི་ནང་རྒྱ་གཞུང་གིས་བོད་མི་རྣམས་འཇུ་བཟུང་བཀག་སྡོམ་འོག་འདས་གྲོངས་བཏང་བ་དང་། བོད་མི་ཐུན་མོང་ལ་སྡུག་སྦྱོང་ཁྲིམས་གཅོད་གཏོང་བཞིན་པ། བོད་མིའི་འདུ་འཛོམས་རང་དབང་བརྡལ་བཤིག་བཏང་ཡོད་པ་བཅས། དོན་ཚན་གསུམ་དམིགས་བསལ་འབུར་དུ་བཏོན་ནས་གླེང་སློང་བྱས་ཡོད། གནད་དོན་དེ་གསུམ་གྱི་ཐོག་ནས་རྒྱ་གཞུང་གིས་བོད་མི་སྤྱི་ཡོངས་ལ་དྲག་གནོན་ཚབས་ཆེན་བྱས་ཡོད།

ཟླ་འདིའི་ཕྱི་ཚེས་ ༢༧ ཉིན་རྔ་བ་རྨེའུ་རུ་མ་ནས་ཡིན་པའི་རྩོམ་པ་པོ་རྨེའུ་བཟོད་པ་ལགས། རྒྱ་གཞུང་ཉེན་རྟོག་པས་ལམ་བར་ནས་འཇུ་བཟུང་འཁྲིད་ཀྱིས། ད་ལྟའི་ཆར་གར་ཡོད་གནས་སྟངས་ཤེས་རྟོགས་ཐུབ་ཀྱི་མེད་འདུག

འདི་ག་ལྟེ་གནས་ཁང་ལ་གནས་ཚུལ་འབྱོར་དོན། ཕྱི་ལོ་ ༢༠༡༤ ཟླ་ ༡༢ ཚེས་ ༢༧ ཉིན་གྱི་བོད་ནང་གི་ཕྱི་དྲོའི་ཆུ་ཚོད་བཞི་ལྔ་ཡས་མས་སུ། རྩོམ་པ་པོ་རྨེའུ་བཟོད་པ་ལགས་རྨེའུ་རུ་མའི་ཡུལ་ཚོ་ནས་རྔ་བ་རྫོང་ཐོག་ཏུ་རླངས་འཁོར་ཞིག་གི་ནང་དུ་འགྲོ་བཞིན་པའི་ལམ་བར་ནས། རྔ་བ་རྫོང་གི་བདེ་འཇགས་ལས་ཁུངས་དང་ཉེན་རྟོག་མི་སྣ་མཉམ་རུབ་ཐོག རྫིག་རྔམས་དྲག་པོའི་སྒོ་ནས་ཁོང་འཇུ་བཟུང་བྱས་ཡོད་པ་མ་ཟད་ཁོང་གི་ཅ་དངོས་རྣམས་ཀྱང་བཙན་འཁྱེར་བྱས་ཡོད་འདུག

རྩོམ་པ་པོ་རྨེའུ་བཟོད་པ་ལགས་བཙན་ཁྲིད་བྱེད་དགོས་དོན་རྒྱུ་མཚན་ཁ་གསལ་ཤེས་རྟོགས་བྱུང་མེད་ནའང་། ས་གནས་ཡུལ་མི་རྣམས་ཀྱིས་ཚོད་དཔག་བྱས་པ་ལྟར་ན། ཁོང་གིས་༼རྨེའུ་བཟོད་པའི་འཕྲིན་སྟེགས་༽ཟེར་བའི་སྒེར་ངོས་ཟིན་བྲིས་ཤིག་གཉེར་ནས། རང་དང་གཞན་གྱིས་བྲིས་པའི་བོད་ནང་གི་རང་ལུས་མེར་བསྲེགས་དང་། བོད་མིའི་རང་དབང་དང་བོད་དོན་འཐབ་རྩོད་སོགས་དང་འབྲེལ་བའི་རྩོམ་ཡིག་མང་པོ་ཞིག་སྔ་ཕྱིར་བརྒྱུད་སྤེལ་བྱས་དང་བྱེད་བཞིན་པ་མ་ཟད། ལྷག་པར་སྒེར་གཉེར་ཟིན་བྲིས་དེའི་ནང་དུ་༼རང་དབང་གི་ཆེད་དུ་ལག་པ་གནམ་ལ་ཕྱར་བ།༽ཞེས་པ་དང་། ཉིན་ཤས་སྔོན་རང་ལུས་མེར་སྲེག་གནང་མཁན་རྒྱལ་གཅེས་དཔའ་མོ་ཚེ་པེ་སྐྱིད་ལགས་ཀྱི་བློས་གཏོང་དང་ཆོད་སེམས་ཀྱི་སྐོར་ལ་ཁོང་གིས་རྒྱ་ཡིག་ཐོག་བྲིས་པའི་༼དཔའ་མོ།༽ཞེས་པ་དང་། ༼ཁྱི་རྒན་ཚང་ད་འདུག་གི་མི་འཇུག་ནས། བཙན་འཛུལ་བྱེད་རྒྱུ་མང་མེད་ན་ཉུང་མེད་༽སོགས་རྩོམ་ཡིག་སྤེལ་བའི་རྐྱེན་མིན་འགྲོ་སྙམ་པའི་སེམས་འཚབ་བྱེད་བཞིན་ཡོད་འདུག

ཟླ་འདིའི་ཕྱི་ཚེས་ ༢༦ ཉིན་བོད་མདོ་སྨད་རྔ་བ་རྫོང་ཐོག་ཏུ། གྲྭ་བློ་བཟང་འཕྲིན་ལས་ལགས་ཀྱིས་ཞི་བའི་སྐད་འབོད་ངོ་རྒོལ་གནང་རྗེས། རྒྱ་གཞུང་ཉེན་རྟོག་པས་ཁོང་འཇུ་བཟུང་བཙན་འཁྲིད་བྱས་ཡོད་པ་དང་། ཉིན་དེའི་དགོང་མོར་གྲྭ་བློ་བཟང་ལུང་རིགས་ལགས་ཀྱང་དགོན་པའི་ནང་ཉེན་རྟོག་པས་འཇུ་བཟུང་བཙན་འཁྲིད་བྱས་འདུག

འདི་ག་ལྟེ་གནས་ཁང་ལ་གནས་ཚུལ་འབྱོར་དོན། ཕྱི་ལོ་ ༢༠༡༤ ཟླ་ ༡༢ ཚེས་ ༢༦ ཉིན་གྱི་བོད་ནང་གི་ཆུ་ཚོད་༤ ཙམ་ལ། བོད་མདོ་སྨད་རྔ་བ་ཀིརྟི་དགོན་པའི་རང་ལོ་ ༢༡ ཡས་མས་ཡིན་པའི་གྲྭ་བློ་བཟང་འཕྲིན་ལགས་ཀྱིས། ༸གོང་ས་མཆོག་གི་སྐུ་པར་དང་བོད་ཀྱི་རྒྱལ་དར་མཉམ་སྦྱར་བྱས་པའི་འདྲ་པར་ཆེན་པོ་ཞིག་ལག་མགོར་མཐོན་པོར་འཕྱར་ཏེ། ༼༧རྒྱལ་དབང་བསྟན་འཛིན་རྒྱ་མཚོ་སྐུ་ཚེ་ཁྲི་ལོ་ནས་ཁྲི་ལོར་བརྟན་པར་ཤོག བོད་ལ་རང་དབང་དགོས།༽ ཞེས་སྐད་འབོད་བྱེད་བཞིན། རྔ་པ་རྫོང་གི་གཞུང་ལམ་དཀྱིལ་ནས་གོམ་བགྲོད་ཀྱིས་རྒྱ་གཞུང་གིས་བོད་ཐོག་འཛིན་པའི་མི་སེར་སྤེལ་བའི་དྲག་གནོན་དབང་བསྒྱུར་གྱི་སྲིད་ཇུས་ལ་ཞི་བའི་ངོ་རྒོལ་གནང་ཡོད་པ་རེད། ཡིན་ནའང་། ཁོང་གིས་སྐད་འབོད་གོམ་བགྲོད་ཀྱིས་ཉེན་རྟོག་ལས་ཁུངས་ཀྱི་མདུན་ཐད་ཀྱི་གཞུང་ལམ་སྟེང་སླེབས་མ་ཐག རྒྱ་གཞུང་ཉེན་རྟོག་འཕྲལ་དུ་ཁོང་འཇུ་བཟུང་གིས་གཅར་རྡུང་བྱེད་བཞིན་བཙན་ཁྲིད་བྱས་འདུག

ཕྱི་ཚེས་ ༢༣ ཉིན་བོད་མདོ་སྟོད་ཁམས་རྟའུ་ཉ་མཚོ་དགོན་པའི་དགེ་འདུན་པ་སྐལ་བཟང་ཡེ་ཤེས་ལགས་ཀྱིས། དགོན་པའི་ཉེ་འོག་ཏུ་ཡོད་པའི་རྒྱ་གཞུང་ཉེན་རྟོག་ལས་ཁུངས་ཀྱི་མདུན་དུ་རང་ལུས་མེར་བསྲེགས་ཀྱིས་སྐུ་གྲོངས་ཡོད་འདུག

འདི་ག་ལྟེ་གནས་ཁང་ལ་གནས་ཚུལ་འབྱོར་དོན། ཕྱི་ལོ་ ༢༠༡༤ ཟླ་ ༡༢ ཚེས་ ༢༣ ཉིན་གྱི་བོད་ནང་གི་སྔ་དྲོའི་ཆུ་ཚོད་ ༡༡།༣༠ ཙམ་ལ། རྟའུ་ཉ་མཚོ་དགོན་པའི་དགེ་འདུན་པ་སྐལ་བཟང་ཡེ་ཤེས་ལགས་ཀྱིས་དགོན་ཉེ་འོག་ཏུ་ཡོད་པའི་རྒྱ་ནག་གི་ཉེན་རྟོག་པ་དང་ལས་དོན་རུ་ཁག་གི་ལས་ཁུངས་མདུན་དུ། ༼༸གོང་ས་མཆོག་བོད་ནང་གདན་འདྲེན་ཞུ་དགོས། བོད་མི་རིགས་ལ་རང་དབང་སྤྲོད་དགོས།༽ ཞེས་པའི་འབོད་ཚིག་སྒྲོག་བཞིན་རང་ལུས་མེར་སྲེག་བཏང་སྟེ་རིང་པོ་མ་སོང་བར་མེ་ལྕེ་ཁྲོད་ནས་ས་ལ་འགྱེལ་ཡོད་འདུག དེ་ནས་ས་གནས་བོད་མི་མང་པོ་འཛོམས་ནས་ཁོང་གི་སྐུ་ཕོང་ལ་བདག་པོ་རྒྱག་རྩིས་བྱེད་སྐབས། རྒྱ་གཞུང་ཉེན་རྟོག་པ་དང་དམག་མི་སླེབས་ཏེ་གནམ་ལ་མེ་མདའ་བརྒྱབ་པ་དང་། ཉེན་རྟོག་རླངས་འཁོར་གྱི་ཉེན་བརྡའི་དུང་བརྡ་རྒྱག་པ་སོགས་བྱས་ཏེ། མང་ཚོགས་རྣམས་འཇིགས་སྐུལ་གྱིས་ཁ་འཐོར་དུ་བཏང་རྗེས། སྐུ་ཕོང་རླངས་འཁོར་ནང་བླུགས་ཏེ་བཙན་འཁྱེར་བྱས་ཡོད་འདུག

བོད་མདོ་སྨད་རྔ་བ་ས་ཁུལ་དུ་བུད་མེད་ཞིག་གིས་རང་ལུས་མེར་བསྲེགས་བཏང་སྟེ། རྒྱ་གཞུང་གིས་བོད་ཐོག་འཛིན་པའི་མི་སེར་སྤེལ་བའི་དྲག་གནོན་དབང་སྒྱུར་ལ་ཞི་བའི་ངོ་རྒོལ་གྱིས་འདས་གྲོངས་ཕྱིན་ཡོད་འདུག

འདི་ག་ལྟེ་གནས་ཁང་ལ་གནས་ཚུལ་འབྱོར་དོན། ཕྱི་ལོ་༢༠༡༤ ཟླ་༡༢ ཚེས་༢༢ ཉིན་གྱི་བོད་ནང་གི་ཕྱི་དྲོའི་ཆུ་ཚོད་༤ པ་ཡོལ་ཙམ་ལ་རྔ་བ་རྫོང་རྨེའུ་རུ་མ་ཡུལ་ཚོའི་སྲང་ལམ་སྨད་ཕྱོགས་ནས། རང་ལོ་༡༩ ཡིན་པའི་བུ་མོ་ཚེ་པེ་ལགས་ཀྱིས་རྒྱ་གཞུང་གིས་བོད་ཐོག་འཛིན་པའི་སྲིད་བྱུུས་ལ་ངོ་རྒོལ་ཆེད་སྐུ་ལུས་མེར་སྲེག་བཏང་སྟེ་ས་གནས་དེ་ག་རང་ནས་འདས་གྲོངས་སུ་གྱུར་ཡོད་ཅིང་། དེ་མ་ཐག་ཉེན་རྟོག་པས་ཁོང་མོའི་སྐུ་ཕུང་བཙན་འཁྱེར་བྱས་ཡོད་འདུག

ཁོང་མོ་ནི་རྔ་བ་ཁུལ་རྔ་བ་རྫོང་རྨེའུ་རུ་མ་ཡུལ་ཚོའི་རུ་ཆེན་བཞི་བའི་འཆི་རྡོར་ཚང་གི་ཕ་འཆི་རྡོར་༼འཆི་མེད་རྡོ་རྗེ་༽དང་། མ་ཅེན་དཔའ་གཉིས་ལ་བུ་བུ་མོ་དྲུག་ཡོད་པའི་ནང་གི་བཞི་པ་ཡིན་ཞིང་། ཆུང་ཆུང་སྐབས་ནས་སློབ་གྲྭར་འགྲོ་མྱོང་མེད་པར་ཕ་མ་མཉམ་དུ་འབྲོག་པའི་འཚོ་བ་བསྐྱལ་ནས་འཚར་ལོངས་བྱུང་བ་ཞིག་དང་། ཀུན་ཀྱིས་བསྟོད་བསྔགས་བྱེད་སའི་གཞུང་དྲང་གཤིས་འཇམ་གྱི་བུ་མོ་ཡ་རབས་ཤིག་ཡིན་འདུག

ད་དུང་གནས་ཚུལ་ཡོང་ཁུངས་ནས་བཤད་པ་ལྟར་ན། ལོ་ན་༦༠ ཡོལ་བའི་བུ་མོའི་ཕ་འཆི་རྡོར་དང་། ལོ་ན་ལྔ་བཅུ་ང་སྟོད་ཡིན་པའི་མ་ཅེན་དཔའ། གཅེན་པོ་ཡི་མེ་བཅས་ཉེན་རྟོག་པས་ཁྲིད་ཡོད་ཀྱང་། དངོས་སུ་བཀག་ཉར་བྱས་ཡོད་མེད་ཀྱི་གནས་ཚུལ་ཞིབ་ཕྲ་ཤེས་རྟོགས་ཐུབ་ཀྱི་མེད་པ་རེད།