གསར་འགྱུར།

བོད་མདོ་ཁམས་རྟའུ་རྫོང་ཁང་སར་ཞང་དུ་བོད་མི་བསྟན་འཛིན་རྒྱ་མཚོ་ལགས་ཀྱིས་རྒྱ་གཞུང་གི་དྲག་གནོན་ལ་ཞི་བའི་ངོ་རྒོལ་གྱིས་ཞི་བའི་རང་ལུས་མེར་བསྲེགས་གནང་སྟེ་འདས་གྲོངས་སུ་གྱུར་ཡོད་འདུག

འདི་ག་ལྟེ་གནས་ཁང་ལ་གནས་ཚུལ་འབྱོར་དོན། ཕྱི་ལོ་ ༢༠༡༥ ཟླ་ ༥ ཚེས་ ༢༠ ཉིན་གྱི་བོད་ནང་གི་ཕྱི་དྲོའི་ཆུ་ཚོད་ ༨ ཙམ་ལ། བོད་མདོ་ཁམས་རྟའུ་རྫོང་ཁང་སར་ཞང་ཐོག་ཏུ་བོད་མི་བསྟན་འཛིན་རྒྱ་མཚོ་ལགས་ཀྱིས། རྒྱ་གཞུང་གིས་བོད་ནང་དྲག་གནོན་དབང་བསྒྱུར་གྱི་མི་སེར་སྤེལ་བའི་སྲིད་ཇུས་ཞི་བའི་ངོ་རྒོལ་གྱིས་རང་ལུས་མེར་བསྲེགས་གནང་སྟེ་འདས་གྲོངས་ཕྱིན་ཡོད་འདུག

བསྟན་འཛིན་རྒྱ་མཚོ་ལགས་ཀྱིས་ས་གནས་ཁང་སར་ཞང་ས་གནས་རྒྱ་གཞུང་གི་ཚོགས་ཁང་ཞིག་ཡོད་པ་དེའི་ཉེ་འགྲམ་ནས་རང་ལུས་མེར་བསྲེགས་གནང་ཡོད་པ་དང་། སྐབས་དེར་ས་གནས་མང་ཚོགས་མང་པོ་འདུ་འཛོམས་ཀྱིས་ཞི་བའི་སྐད་འབོད་ཀྱང་བྱས་ཡོད་འདུག ཡིན་ནའང་། དེ་མ་དག་རྒྱ་གཞུང་ཉེན་རྟོག་པ་དང་དྲག་ཆས་དམག་མི་ཕོན་ཆེན་འབྱོར་ཏེ་གང་བྱུང་མང་ཚོགས་ལ་གཅར་རྡུང་བྱེད་བཞིན། ཁོང་གི་སྐུ་ཕུང་ཉེན་རྟོག་པས་བཙན་འཕྲོག་གྱིས་ཁྱེར་ཡོད་པ་མ་ཟད། སྔ་ཕྱིར་དེ་གར་འདུ་འཛོམས་དང་ཞི་བའི་སྐད་འབོད་གནང་མཁན་མང་ཚོགས་མང་པོ་འཇུ་བཟུང་བཀག་ཉར་བྱས་ཡོད་འདུག

དེ་རིང་ཕྱི་ཚེས་ ༢༡ ཉིན་ས་གནས་རྒྱ་གཞུང་གིས་བསྟན་འཛིན་རྒྱ་མཚོ་ལགས་ཀྱི་ནང་མིར་བརྡ་བཏང་སྟེ། བསྟན་འཛིན་རྒྱ་མཚོ་ལགས་ད་ལྟ་གྲོངས་ཟིན་ཡོད་པ་དང་། ནང་མི་གཉིས་དར་རྩེ་མདོ་རུ་ཡོང་དགོས་སྐོར་བརྗོད་འདུག དེ་སྔོན་རྟའུ་རྫོང་དུ་བཙུན་མ་དབང་ཆེན་སྒྲོལ་མས་རང་ལུས་མེར་བསྲེགས་སྐབས། རྒྱ་གཞུང་གིས་ཁོང་གི་སྐུ་ཕུང་ནང་མིར་རྩིས་སྤྲོད་མ་བྱས་པར་གློག་གི་པུར་སྒམ་ནང་མེར་བསྲེགས་བཏང་ཡོད་པ་ལྟར། བསྟན་འཛིན་རྒྱ་མཚོ་ལགས་ཀྱི་སྐུ་ཕུང་ཡང་དེ་ལྟར་མེར་བསྲེགས་ཀྱིས་ནང་མིར་རྩིས་སྤྲོད་བྱེད་མི་སྲིད་པར་ས་གནས་མང་ཚོགས་ཀྱིས་ཚོད་དཔག་བྱེད་ཀྱིན་ཡོད་འདུག

བོད་མདོ་ཁམས་ནགས་ཤོད་འབྲི་རུ་ནས་ཡིན་པའི་གླུ་བ་མགོན་པོ་བསྟན་འཛིན་ལགས་ལ། རྒྱ་གཞུང་གིས་ལོ་གསུམ་དང་ཟླ་དྲུག་གི་བཙོན་འཇུག་ཁྲིམས་ཐག་བཅད་འདུག

འདི་ག་ལྟེ་གནས་ཁང་ལ་གནས་ཚུལ་འབྱོར་དོན། མདོ་ཁམས་ནགས་ཤོད་འབྲི་རུ་རྫོང་ནས་ཡིན་པའི་གླུ་བ་མགོན་པོ་བསྟན་འཛིན་ལགས་ལ། ཕྱི་ལོ་ ༢༠༡༥ ཟླ་ ༤ ཚེས་ ༡༥ ཉིན་རྒྱ་གཞུང་གིས་ལོ་ ༣ དང་ཟླ་ ༦ དུས་བཀག་བཙོན་འཇུག་གི་ཁྲིམས་ཐག་བཅད་པ་དང་། ཆབ་སྲིད་ཁེ་དབང་ལོ་ ༤ ལ་བཙན་འཕྲོག་བྱས་ཡོད་འདུག

འདི་ག་ལྟེ་གནས་ཁང་གིས་དེ་སྔོན་གླུ་བ་མགོན་པོ་བསྟན་འཛིན་ལགས་འཇུ་བཟུང་སྐོར་ལ་གནས་ཚུལ་བཏོན་ཡོད་པ་ལྟར། གླུ་བ་ཁོང་ནི་ཕྱི་ལོ་ ༢༠༡༣ ཕྱི་ཟླ་ ༡༡ ཚེས་ ༣༠ དགོང་མོར། རྒྱ་གཞུང་ཉེན་རྟོག་པས་ལྷ་ས་གྲོང་དུ་འཇུ་བཟུང་བཙན་འཁྲིད་ཀྱིས་གར་སོང་ཆ་མེད་དུ་གྱུར་རྗེས། ད་ལྟའི་བར་ལོ་གཅིག་དང་ཟླ་ལྔ་ལྷག་གི་རིང་བཀག་ཉར་འདྲི་གཅོད་འོག་ལྷག་ཡོད་པ་རེད།

འདི་གར་གནས་ཚུལ་འབྱོར་དོན་ལྟར་ན། དུས་ཡུན་རིང་པོའི་བཀག་ཉར་འདྲི་གཅོད་སྐབས། ཁོང་ལ་སྡུག་སྦྱོང་མནར་གཅོད་བཏང་བར་བརྟེན་ནས་གཟུགས་པོར་ན་ཚ་ཕོག་ཡོད་པ་དང་། ཉེ་སྔོན་ཁོང་རྒྱ་གཞུང་ཉེན་རྟོག་པས་བསྐོར་སྲུང་འོག་སྨན་ཁང་ནང་འཁྲིད་བཞིན་པ་ས་གནས་མང་ཚོགས་ཀྱིས་མཐོང་ཡོད་པ་མ་ཟད། སྐབས་དེར་བླངས་པའི་ཁོང་གི་འདྲ་པར་ཞིག་ལག་སོན་བྱུང་ཡོད་པའི་སྟེང་དུ། གཞས་པ་མགོན་པོ་བསྟན་འཛིན་ལགས་ལ་ཁ་རས་གཡོག་བཅུག་ཡོད་པ་རེད། རྒྱུན་ལྡན་གྱི་གནས་ཚུལ་ལྟར་ན་གློ་གཅོང་གི་རིགས་དང་། ཡང་ན། ན་ཚ་ཅུང་ཉེན་ཚབས་ཅན་གྱི་རིགས་ཡིན་ཚེ་གཞན་ལ་མི་འགོས་པའི་ཆེད་ནད་པར་ཁ་རས་གཡོག་འཇུག་གི་ཡོད་པ་རེད། དེར་བརྟེན། ཁོང་ལ་ཕོག་ཡོད་པའི་ན་ཚ་དེའི་ཐད་རང་བཞིན་གྱིས་བློ་འཚབ་དང་དོགས་སློང་ཡོང་དགོས་པ་ཆགས་འདུག

རྒྱ་གཞུང་གིས་བོད་ས་བཅད་བགོས་ཀྱིས་མི་སེར་སྤེལ་བའི་དབང་སྒྱུར་ས་ཁོངས་ལྟར་བྱས་ན། ཟི་ཁྲོན་ཞིང་ཆེད་དཀར་མཛེས་བོད་རིགས་རང་སྐྱོང་ཁུལ་རྟའུ་རྫོང་དུ་འབོད་པའི་ཁོངས་གཏོགས། རྟའུ་ཉི་མཚོ་དགོན་པའི་གྲྭ་ཚེ་དབང་ཆོས་འཕེལ་ལགས་ཟླ་འདིའི་ཕྱི་ཚེས་ ༡༨ ཉིན་རྒྱ་གཞུང་ཉེན་རྟོག་པས་གློ་བུར་འཇུ་བཟུང་བཙན་འཁྲིད་བྱས་ཡོད་འདུག

འདི་ག་ལྟེ་གནས་ཁང་ལ་གནས་ཚུལ་འབྱོར་དོན། ཕྱི་ལོ་ ༢༠༡༥ ཟླ་ ༥ ཚེས་ ༡༨ ཉིན་གྱི་བོད་ནང་གི་ཞོགས་པའི་ཆུ་ཚོད་ ༡༠ དང་ཕྱེད་ཀ་ཙམ་ལ། རྒྱ་གཞུང་ཉེན་རྟོག་པས་རྟའུ་ཉི་མཚོ་དགོན་པའི་གྲྭ་ཚེ་དབང་ཆོས་འཕེལ་ལགས་སྦག་སྦག་ཞོན་ནས་ཡོང་བཞིན་པའི་ལམ་སྐབས། རྒྱ་གཞུང་ཉེན་རྟོག་པས་གཅིག་བཞད་གྲོང་འདབས་ནས་གློ་བུར་བཙན་འཁྲིད་བྱས་ཡོད་འདུག ད་ལྟའི་ཆར་ཁོང་འཇུ་བཟུང་བྱས་པའི་རྒྱུ་རྐྱེན་ཅི་ཡིན་དང་གནས་སྟངས་ག་འདྲ་ཡིན་མིན་གྱི་ཞིབ་ཕྲའི་གནས་ཚུལ་ཤེས་རྟོགས་མེད་པར་ལྷག་ཡོད་འདུག

རྒྱ་གཞུང་གིས་བོད་ས་བཅད་བགོས་ཀྱིས་མི་སེར་སྤེལ་བའི་དབང་སྒྱུར་ས་ཁོངས་ལྟར་བྱས་ན། ཟི་ཁྲོན་ཞིང་ཆེད་དཀར་མཛེས་བོད་རིགས་རང་སྐྱོང་ཁུལ་དུ་འབོད་པའི་ཁོངས་གཏོགས། དཀར་མཛེས་དགོན་པའི་གྲྭ་དཔལ་ལྡན་འཕྲིན་ལས་ལགས། ཟླ་འདིའི་ཕྱི་ཚེས་ ༡༧ ཉིན་ཟི་ཁྲོན་ཏིག་ཡཱང་བཙོན་ནང་ལོ་བདུན་གྱི་བཙོན་འཇུག་དུས་བཀག་གཙང་སྟེ་གློད་གྲོལ་ཐོབ་ཡོད་འདུག

འདི་ག་ལྟེ་གནས་ཁང་ལ་གནས་ཚུལ་འབྱོར་དོན། སྐྱེས་ཡུལ་བོད་མདོ་ཁམས་དཀར་མཛེས་མདའ་མདོག་ཡུལ་ཚོ་ནས་ཡིན་པའི་དཀར་མཛེས་དགོན་པའི་གྲྭ་དཔལ་ལྡན་འཕྲིན་ལས་ལགས། ཕྱི་ལོ་ ༢༠༡༥ ཟླ་ ༥ ཚེས་ ༡༧ གྱི་ཉིན་གུང་ཙམ་ལ་རྒྱ་ནག་ཟི་ཁྲོན་ཏིག་ཡཱང་བཙོན་ནང་ལོ་ ༧ གྱི་བཙོན་འཇུག་དུས་བཀག་གཙང་སྟེ་གློད་གྲོལ་ཐོབ་སྟེ་དཀར་མཛེས་རྫོང་ཉེན་རྟོག་པར་རྩིས་སྤྲོད་བྱས་ཡོད་འདུག ཡིན་ནའང་། དཀར་མཛེས་རྫོང་ཉེན་རྟོག་པས་ས་གནས་ཡུལ་མིའི་ངོས་ནས་གྲྭ་དཔལ་ལྡན་འཕྲིན་ལས་ལགས་བཙོན་གྲོལ་ཐོབ་པར་ཕེབས་བསུ་སྣེ་ལེན་རྒྱ་ཆེན་པོ་བྱ་རྒྱུར་དོགས་ཟོན་གྱིས་དུས་འགྱངས་བྱས་ཏེ་ས་གནས་མདའ་མདོག་ཡུལ་ཚོའི་ཉེན་རྟོག་ཁང་ལ་རིམ་པས་རྩིས་སྤྲོད་བྱས་མཐར། ཕྱི་ཚེས་ ༡༨ ཉིན་གྱི་ཐོ་རེངས་མཚན་གྱི་ཆུ་ཚོད་ ༣ ཙམ་ལ་ས་གནས་མདའ་མདོག་ཡུལ་ཚོའི་ཉེན་རྟོག་ཁང་གིས་གསང་བའི་ཐོག་ནས་ནང་མི་འབོད་འགུགས་ཀྱིས་རྩིས་སྤྲོད་བྱས་ཡོད་འདུག ཡིན་ནའང་། ཁོང་རང་ཁྱིམ་དུ་འབྱོར་སྐབས་ནང་མི་གཉེན་ཉེ་དང་ས་གནས་གྲོང་མི་སྐོར་ཞིག་གིས་ཁོང་ལ་ཁ་བཏགས་བསྐྲོན་ཏེ་ཕེབས་བསུ་བྱས་ཡོད་འདུག

༢༠༡༢ ལོ་ནས་བཟུང་བོད་རང་སྐྱོང་ལྗོངས་ཁོངས་སུ་བོད་མིའི་ཕྱི་བསྐྱོད་ལམ་ཡིག་ཕྱིར་བསྡུ་བྱས་ཏེ་བོད་མི་རྣམས་ཕྱི་ཕྱོགས་སུ་འགྲོ་བསྐྱོད་མི་ཐུབ་པའི་བཀག་སྡོམ་བཟོས་ཡོད། ཕྱི་ལོ་ ༢༠༡༢ ཟླ་ ༤ ཚེས་ ༢༩ ཉིན་བོད་རང་སྐྱོང་ལྗོངས་ཀྱིས་འགྲེམས་བསྒྲགས་བྱས་པའི་བོད་མིའི་ཕྱི་བསྐྱོད་ལམ་ཡིག་བཀག་སྡོམ་ཐད་ཀྱི་ཡིག་ཆ་ཞིག་འདི་ག་ལྟེ་གནས་ཁང་ལ་ལག་སོན་བྱུང་བའི་ནང་། རྒྱ་གཞུང་གིས་བོད་རང་སྐྱོང་ལྗོངས་ཁོངས་སུ་བོད་མི་ཚང་མའི་འགྲོ་བསྐྱོད་རང་དབང་རྡོག་རོལ་བཏང་ཡོད། དེར་མ་ཟད། ཕྱི་ལོ་ ༢༠༡༤ ལོ་ནས་བཟུང་སྔར་ལས་ལྷག་པར་འགྲོ་བསྐྱོད་བཀག་སྡོམ་ཤུགས་ཆེ་རུ་བཏང་སྟེ། བོད་མི་རྣམས་ཆོས་ལུགས་བྱེད་སྒོ་དང་གནས་ཆེན་ཁག་ཏུ་མཆོད་འཇལ་ཆེད་བསྐྱོད་རྒྱུར་ཡང་བཀག་སྡོམ་བྱས་ཡོད།

རྒྱ་གཞུང་ནི་ <<ཆབ་སྲིད་དང་སྤྱི་དམངས་ཐོབ་ཐང་ཐད་ཀྱི་རྒྱལ་སྤྱིའི་སྤྱི་ཆིངས>> ལ་མཚན་རྟགས་བཀོད་དེ་ངོས་འཛིན་བྱེད་མཁན་ཚོགས་མི་རྒྱལ་ཁབ་གྲས་ཀྱི་གཅིག་ཆགས་ཡོད་པའི་ངོས་ནས། སྤྱི་ཆིངས་དེའི་དོན་ཚན་ ༡༢ པའི་ནང་གསེས་ཚན་པ་ ༢ པའི་ནང་། རྒྱལ་ཁབ་ཀྱི་ཁྲིམས་མཐུན་སྤྱི་དམངས་རྣམས་རྒྱལ་ཁོངས་སུ་རང་དབང་སྒོས་འགྲོ་བསྐྱོད་དང་གནས་སྡོད་ཀྱི་ཐོབ་ཐང་ཡོད་པ་མ་ཟད། སྤྱི་དམངས་མི་སུ་ཞིག་ཡིན་ཡང་སོ་སོའི་རྒྱལ་ཁོངས་ཚུད་པའི་རྒྱལ་ཁབ་གང་རུང་ནས་ཀྱང་ཁ་འབྲལ་རྒྱུའི་རང་དབང་ཡོད་པ་གསལ་བོར་བཀོད་ཡོད། དེ་བཞིན། འགྲོ་བ་མིའི་ཐོབ་ཐང་ལས་དོན་ལྷན་ཚོགས་ཀྱི་སྤྱིར་བཏང་འགྲེལ་བརྗོད་ཡིག་ཆ་ཨང་ ༢༧ པའི་ནང་། དུས་ཚོད་ཀྱི་ཚད་བཀག་དང་དམིགས་ཡུལ་གང་རུང་ལ་ཁག་དཀྲི་བྱས་ཏེ་རྒྱལ་སྤྱིའི་ནང་འགྲུལ་བསྐྱོད་ཐད་བཀག་འགོག་བཟོ་མི་ཆོག་པའི་ཐད་འགྲེལ་བརྗོད་བྱས་ཡོད། གལ་སྲིད། རྒྱལ་ཁབ་ཀྱི་བདེ་འཇགས་དང་སྤྱི་བའི་སྒྲིག་ལམ། སྤྱི་བའི་འཕྲོད་བསྟེན་དང་བཟང་སྤྱོད། མི་གཞན་གྱི་ཐོབ་ཐང་དང་རང་དབང་བཅས་སྲུང་སྐྱོབ་ཁོ་ནའི་ཆེད་དུ་དགོས་ངེས་ཚད་བཀག་བཟོ་ཆོག་པ་མ་གཏོགས། གཞན་སྲིད་གཞུང་གི་ངོས་ནས་འགྲུལ་བསྐྱོད་ལ་བཀག་སྡོམ་བྱེད་པ་ནི་འགྲོ་བ་མིའི་ཐོབ་ཐང་རྡོག་རོལ་གྱི་གནད་དོན་ཚབས་ཆེན་ཞིག་ཏུ་ངོས་འཛིན་བྱས་ཡོད།

དེ་སྔོན་རྒྱ་གཞུང་གིས་ཆབ་སྲིད་ཉེས་མིང་འོག་ལོ་ ༦ བཙོན་འཇུག་ཁྲིམས་ཐག་བཅད་པའི་གླུ་བ་བློ་བློ་ལགས། ད་ལྟའི་ཆར་ཟི་ལིང་གྲོང་ཁྱེར་གྱི་ཉེ་འདབས་བཙོན་ཁང་ཞིག་ནང་བཙོན་འཇུག་བྱས་ཡོད་པ་དང་། བཙོན་འོག་ཏུ་སྡུག་སྦྱོང་མནར་བཏང་བར་བརྟེན་ནས་ཁོང་གི་གཟུགས་པོའི་གནས་སྟངས་སྐྱོ་བོ་ཆགས་ཡོད་འདུག

འདི་ག་ལྟེ་གནས་ཁང་ལ་གནས་ཚུལ་འབྱོར་དོན། བོད་རིགས་གླུ་བ་བློ་བློ་ལགས་རྒྱ་གཞུང་གིས་ལོ་གཅིག་དང་ཕྱེད་ཀ་ལྷག་གི་རིང་བཙོན་འོག་སྡུག་སྦྱོང་མནར་གཅོད་བཏང་བར་བརྟེན་ནས། ད་ལྟའི་ཆར་ཁོང་གི་གཟུགས་པོའི་གནས་སྟངས་སྐྱོ་བོ་ཆགས་ཡོད་པ་འདུག གླུ་བ་བློ་བློ་ལགས་ཀྱིས་ <<བོད་དར་ཆ་སྒྲེངས་ཤིག་གངས་བུ་ཚོ>> ཞེས་པའི་ཆེད་སྒྲིག་གླུ་གཞས་འོད་སྡེར་འགྲེམས་སྤེལ་བྱས་རྗེས། རྒྱ་གཞུང་གིས་ཁོང་གི་གཞས་ཚིག་ལ་ཆབ་སྲིད་དང་འགལ་བའི་ནང་དོན་ཡོད་སྐོར་གྱི་ཉེས་མིང་འོག་འཇུ་བཟུང་བྱས་ཡོད་པ་རེད། དང་ཐོག་ཁོང་དུས་ཐུང་རིང་འཇུ་བཟུང་བཀག་ཉར་གྱིས་ཕྱིར་གློད་ཡོད་ཀྱང་། རྗེས་སུ་བསྐྱར་དུ་འཇུ་བཟུང་བཀག་ཉར་བྱས་ཏེ་ཕྱི་ལོ་ ༢༠༡༣ ཟླ་ ༢ ཚེས་ ༢༣ ཉིན་རྒྱ་གཞུང་གིས་ཁོང་ལ་ལོ་ ༦ དུས་བཀག་བཙོན་འཇུག་གི་ཁྲིམས་ཐག་བཅད་ཡོད་པ་དང་། སྐབས་དེར་ཁོང་རང་ལོ་ ༣༠ ཡིན་འདུག

ཁ་སང་ཞོགས་པར་བོད་མདོ་སྨད་རྔ་བ་རྫོང་ཨ་འདུས་རྒྱ་དས་སྡེ་བའི་བོད་མི་གནས་སྐྱབས་ཀྱིས་རང་ལུས་མེར་བསྲེགས་ཀྱིས། རྒྱ་ནག་དམར་གཞུང་གི་བོད་ལ་བཙན་འཛུལ་གྱིས་མི་སེར་སྤེལ་བའི་དྲག་གནོན་དབང་སྒྱུར་གྱི་སྲིད་ཇུས་ལ་ཞི་བའི་ངོ་རྒོལ་བྱས་ཡོད་འདུག

འདི་ག་ལྟེ་གནས་ཁང་ལ་གནས་ཚུལ་འབྱོར་དོན། ཕྱི་ལོ་ ༢༠༡༥ ཟླ་ ༤ ཚེས་ ༡༦ ཉིན་གྱི་ཞོགས་པ་སྔ་བོ་བོད་མདོ་སྨད་རྔ་བ་རྫོང་ཨ་འདུས་རྒྱ་དས་སྡེ་བའི་རང་ལོ་ ༤༥ ཡིན་པའི་བོད་མི་དམ་དཀར་རམ་གནས་སྐྱབས་ལགས་ཀྱིས། རང་ཉིད་སྡོད་སའི་ཁང་པའི་ར་སྐོར་ནང་དུ་སྐུ་ལུས་མེར་སྲེག་གནང་ནས་འདས་གྲོངས་སུ་གྱུར་ཡོད་ཅིང་། རྗེས་སུ་སྐུ་ཕུང་ཉེན་རྟོག་པས་ཁྱེར་ཡོད་འདུག

ཁོང་གིས་སྐུ་ལུས་མེར་སྲེག་མ་གནང་པའི་སྔོན་ལ་རང་ཉིད་སྡོད་སའི་ར་སྐོར་ནང་དུ། ༧གོང་ས་མཆོག་དང་༧པཎ་ཆེན་རིན་པོ་ཆེ་རྣམ་གཉིས་ཀྱི་སྐུ་པར་དང་། ཁོ་རང་གི་ནང་མིའི་འདྲ་པར་སོགས་སྒྲིག་ཤོམ་བྱས་ཐོག མདུན་དུ་ཡོན་ཆབ་ཕུལ་བ་དང་མེ་ཏོག་སྒྲིག་པ་སོགས་བྱས་རྗེས། དེའི་ཉེ་གཤམ་གྱི་གོམ་པ་ལྔ་ཙམ་གྱི་སར་སྐུ་ལུས་མེར་སྲེག་བཏང་ཡོད་འདུག

ཁོང་གི་མེར་བསྲེགས་ཞི་རྒོལ་གྱི་གནས་ཚུལ་དང་འབྲེལ་ནས། རྒྱ་གཞུང་ཉེན་རྟོག་པས་ཁོང་གི་སྤུན་གནས་གང་དང་། མག་པ་ཚེ་རིང་བསམ་འགྲུབ་གཉིས་ཀྱང་འདྲི་གཅོད་བྱེད་པར་ཁྲིད་ཡོད་འདུག

འདི་ག་ལྟེ་གནས་ཁང་གི་ཡོངས་ཁྱབ་གསལ་བསྒྲགས།

དེ་རིང་ཕྱི་ཟླ་ ༤་ཚེས་༧ ནི་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་རྒྱ་གཞུང་གིས་བཙོན་འཇུག་བྱས་ཏེ་མི་ལོ་ཧྲིལ་པོ་ ༡༣ ཏག་ཏག་འགྲོ་བཞིན་ཡོད་པ་དང་། བཙོན་ཁང་ནང་སྤྲུལ་སྐུ་ཁོང་ལོ་མང་རིང་མནར་གཅོད་སྡུག་སྦྱོང་བཏར་བར་བརྟེན་ནས། དེ་སྔོན་སྙིང་ལ་ན་ཚ་ལྗིད་པོ་ཕོགས་ཏེ་ས་ལ་ཐེངས་མང་འགྱེལ་མྱོང་ཡོད་པ་དང་། ལུས་པོ་འདར་སིག་གིས་འཁར་བར་བརྟེན་ནས་འགྲོ་བསྐྱོད་བྱ་དགོས་ཐུག་ཡོད་ལ། སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་ཁོང་དགུང་ལོ་ ༦༣ ལ་སོན་ཡོད་པ་དང་། ད་ལྟའི་ཆར་ཡང་ཁོང་གི་སྐུ་གཟུགས་གནས་སྟངས་སྔར་བཞིན་ཧ་ཅང་ཛ་དྲག་ཆགས་ཡོད་པ་རེད།

དེ་བཞིན། སྤྲུལ་སྐུ་ཁོང་ཐོག་མར་འཇུ་བཟུང་བཙོན་འཇུག་བྱས་ནས་ད་ལྟའི་བར། ཁྱོན་བསྡོམས་ཐེངས་ ༧ ལ་མ་གཏོགས་ནང་མི་རྣམས་ལ་ཐུག་འཕྲད་བྱེད་བཅུག་མེད་པ་རེད། ཁོང་ནང་མི་དང་ཐུག་འཕྲད་མཐའ་མ་དེ་ཕྱི་ལོ་ ༢༠༡༣ ཟླ་ ༡༡ པ་ཆགས་ཡོད་ལ། དེ་རྗེས་ནས་ད་ལྟའི་བར་བར་ལོ་གཅིག་དང་ཟླ་བ་ལྔ་ལྷག་ཕྱིན་ཡོད་ཀྱང་། རྒྱ་གཞུང་གིས་ཁོང་ནང་མིར་ཐུག་འཕྲད་གཅིག་ཀྱང་བྱེད་བཅུག་མེད་པ་རེད། རྒྱ་གཞུང་གི་འབྲེལ་ཡོད་ཁྲིམས་ཡིག་ནང་། བཙོན་པའི་ནང་མིས་དུས་བཅད་ལྟར་དོ་བདག་ལ་ཐུག་འཕྲད་བྱེད་པའི་ཐོབ་ཐང་དང་། བཙོན་པར་འཕྲིན་ཡིག་ལམ་ནས་གནས་ཚུལ་ཤེས་རྟོགས་བྱེད་ཆོག་པའི་ཐོབ་ཐང་ཡོད་སྐོར་བཀོད་ཡོད་པ་རེད། ཡིན་ནའང་། སྤྲུལ་སྐུ་ཁོང་ལ་བཙོན་པ་སྤྱི་མཚུངས་ལྟར་ཁྲིམས་མཐུན་གྱི་ཐོབ་ཐང་མ་སྤྲད་པར། དམིགས་བསལ་བཀག་སྡོམ་མནར་གཅོད་གཏོང་བཞིན་པའི་གནས་ཚུལ་འདི་ནི། འཛམ་གླིང་འགྲོ་བ་མིའི་ཡོངས་ཁྱབ་ཐོབ་ཐང་དང་རྒྱ་གཞུང་རང་ཉིད་ཀྱི་ཁྲིམས་ལུགས་དང་རྩ་འགལ་ཆགས་ཡོད།

འདི་ག་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་ནས། རྒྱ་གཞུང་ལ་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་སྨན་བཅོས་ཆེད་གང་མྱུར་གློད་གྲོལ་ཡོང་བའི་འབུལ་སྐུལ་ནན་པོ་ཞུ་རྒྱུ་དང་། ཆབས་ཅིག་རྒྱལ་སྤྱིའི་གཞུང་དང་ཚོགས་སྡེ་ཁག་ནས་སྤྲུལ་སྐུ་མཆོག་སྨན་བཅོས་ཆེད་གང་མྱུར་གློད་ཀྲོལ་ཡོང་བའི་རྒྱ་གཞུང་ལ་འབུལ་སྐུལ་ཡོང་བའི་རེ་བ་ནན་པོ་ཞུ་བཞིན་ཡོད། དེ་བཞིན། སྤྲུལ་སྐུ་མཆོག་ལ་བཙོན་པ་སྤྱི་མཚུངས་ལྟར་སོ་སོའི་ནང་མིར་ཐུག་འཕྲད་དང་སྨན་བཅོས་ཀྱི་མཐུན་འགྱུར་གྱི་ཐོབ་ཐང་སྤྲོད་དགོས་པའི་འབོད་སྐུལ་ཞུ་རྒྱུ་ཡིན།

རྒྱ་གཞུང་གིས་རྒྱུ་མཚན་ཁ་གསལ་མེད་པའི་སྒོ་ནས། སོག་ཙན་དགོན་པའི་གྲྭ་པ་གསུམ་དང་ས་གནས་མི་སྐྱ་གཅིག་བཅས་འཇུ་བཟུང་བཙན་འཁྲིད་བྱས་འདུག

འདི་ག་ལྟེ་གནས་ཁང་ལ་གནས་ཚུལ་འབྱོར་དོན། ཕྱི་ཟླ་ ༣ ཚེས་ ༢༨ ཉིན་གྱི་མཚན་མོར་སོག་ཙན་དན་དགོན་པའི་གྲྭ་ཆོས་དཔལ་ཟླ་བ་དང་། གྲྭ་འཇིགས་མེད་དབང་རྒྱལ། གྲྭ་ཆོས་དབྱིངས་ཆོས་དགའ། མི་སྐྱ་རྡོ་རྗེ་གྲགས་པ་བཅས་རྒྱ་ནག་གིས་ཛིན་བཟུང་བྱས་འདུག ཁོང་རྣམས་འཛིན་བཟུང་བྱེད་དགོས་དོན་གང་ཡིན་སྐོར་ལ་རྒྱ་གཞུང་གི་གསལ་བཤད་གང་ཡང་བྱས་མེད་པ་རེད།

གྲྭ་ཆོས་དཔལ་ཟླ་བ་ནི་རང་ལོ་ ༢༧ ཡིན་པ་དང་། སོག་རྫོང་གི་གཡག་ལ་ཡུལ་ཚོའི་གྲོང་ཚོ་གཉིས་པའི་སྒོ་པེ་རང་གྲོལ་གྱི་བུ་ཡིན་འདུག ཁོང་དེ་སྔོན་ ༢༠༡༢ ཟླ་ ༡ ཚེས་ ༡༥ ཉིན་རྒྱ་ནག་གཞུང་གི་ཉེན་རྟོག་པས་འཛིན་བཟུང་བྱས་ཏེ། ལོ་དེའི་ཟླ་ ༢ པའི་ཚེས་ཤར་ཙམ་ལ་གསང་བའི་ངང་དུས་བཀག་བཙོན་འཇུག་ཁྲིམས་ཐག་ལོ་གཉིས་བཅད་མྱོང་ཡོད་པ་རེད། ད་རེས་ནི་རྒྱ་གཞུང་གིས་འཇུ་བཟུང་ཐེངས་གཉིས་པ་དེ་ཆགས་ཡོད།

རྒྱ་གཞུང་གིས་མཚན་ལ་སོག་རྫོང་ཙན་དན་དགོན་པའི་གྲྭ་བློ་བཟང་ཟླ་བ་བཙན་ཁྲིད་ཀྱིས་གར་སོང་ཆ་མེད་དུ་གྱུར་འདུག

འདི་ག་ལྟེ་གནས་ཁང་ལ་གནས་ཚུལ་འབྱོར་དོན། ཟླ་ ༣ ཚེས་ ༢༠ མཚན་མོར་སོག་རྫོང་ཙན་དན་དགོན་པའི་གྲྭ་བློ་བཟང་ཟླ་བ་རྒྱ་གཞུང་གི་ཉེན་རྟོག་པས་བཙན་ཁྲིད་བྱས་ནས་གར་སོང་ཆ་མེད་ཀྱི་གནས་ཚུལ་བྱུང་འདུག གསང་བའི་ངང་ནས་བཙན་ཁྲིད་བྱས་སྟབས་ཞིབ་ཕྲའི་གནས་ཚུལ་ཤེས་མཁན་བྱུང་མི་འདུག

དེང་སྐབས་རྒྱ་གཞུང་གིས་འཕྲིན་ཕྲན་(wechat)གྱི་བརྒྱུད་ལམ་ཁག་ལ་ཞིབ་བཤེར་བྱེད་བཞིན་ཡོད་སྟབས། ས་གནས་དེ་གའི་ཡུལ་མི་མང་ཚོགས་ཀྱི་ངོས་ནས། འཕྲིན་ཕྲན་བརྒྱུད་ལམ་ནས་རྒྱ་གཞུང་གི་ལྟ་སྤྱོད་དང་མི་མཐུན་པའི་པར་རིས་དང་ཡིག་ཆ་ཉར་བའི་ཉེས་མིང་འོག་འཛིན་བཟུང་བྱས་པ་ཞིག་ཡིན་སྲིད་པའི་ཚོད་དཔག་བྱེད་བཞིན་ཡོད་འདུག

གྲྭ་ངག་དབང་རྒྱལ་མཚན་རྒྱ་གཞུང་གིས་གློ་བུར་འཇུ་བཟུང་བཙན་འཁྲིད་ཀྱིས་གར་སོང་ཆ་མེད་དུ་གྱུར་ཡོད་སྟབས། ས་གནས་ཡུལ་མིས་བརྩད་གཅོད་སྐབས་ནག་ཆུའི་ཉེན་རྟོག་ཁང་ཞིག་ཏུ་བཀག་ཉར་བྱས་ཡོད་པ་ཤེས་རྟོགས་བྱུང་འདུག

འདི་ག་ལྟེ་གནས་ཁང་ལ་གནས་ཚུལ་འབྱོར་དོན། འདི་ལོའི་ཕྱི་ཟླ་ ༢ ཚེས་ ༢༤ ཉིན་གྱི་མཚན་མོར་གྲྭ་ངག་དབང་རྒྱལ་མཚན་རྒྱ་གཞུང་ཉེན་རྟོག་པའི་བཙན་ཁྲིད་བྱས་ཏེ་གར་སོང་ཆ་མེད་དུ་གྱུར་འདུག དེ་ལྟར་ཁོང་གློ་བུར་དུ་བརླག་རྐྱེན་ས་གནས་ཡུལ་མི་རྣམས་ཀྱིས་བརྩད་གཅོད་སྐབས། ནག་ཆུ་ཁུལ་གྱི་ཉེན་རྟོག་ཁང་ཞིག་ཏུ་བཀག་ཉར་བྱས་ཡོད་པ་ཤེས་རྟོགས་བྱུང་འདུག ཁོང་འཇུ་བཟུང་བྱེད་དགོས་པའི་རྒྱུ་མཚན་ཅི་ཡིན་ཤེས་རྟོགས་ཐུབ་ཀྱི་མེད་པ་རེད།

གྲྭ་ངག་དབང་རྒྱལ་མཚན་ནི་ནག་ཆུ་རྫོང་རྟར་ཆེན་ཡུལ་ཚོའི་གོང་སུམ་གྲོང་སྡེ་ནས་ཡིན་པ་དང་། ཁོང་གི་ཕ་མིང་ལ་ཚེ་རིང་མི་འགྱུར་དང་མ་མིང་ལ་མར་འཛིན་ཟེར་ཞིང་རང་ལོ་ ༤༡ ཡིན་འདུག དེ་སྔོན་ཤག་རོང་པོ་དགོན་གྱི་གྲྭ་པ་ཡིན་འདུག དགོན་པའི་སྒྲིག་ཁོངས་སུ་ཡོད་དུས་སྲིད་གཞུང་གི་མི་སྣས་དགོན་པར་ཆབ་སྲིད་སློབ་གསོ་སྤྲོད་སྐབས། སྲིད་གཞུང་གི་མི་སྣ་དང་ཁ་རྩོད་མང་པོ་ཤོར་མྱོང་བ་དང་། རྒྱུ་རྐྱེན་དེ་ལ་རྟེན་ནས་དེ་སྔོན་ཤག་རོང་པོ་དགོན་ལ་ཟླ་ ༥ ཚེས་ ༢༠ ཉིན་གྱི་དོན་རྐྱེན་དུ་སྙད་པའི་ཛ་དྲག་གནས་སྟངས་འོག ཁོང་དགོན་པའི་སྒྲིག་ཁོངས་ནས་ཕྱིར་འཐེན་མི་བྱེད་ཀ་མེད་བྱུང་ཡོད་འདུག