སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེའི་ནང་མི་དང་ས་གནས་དད་ལྡན་མང་ཚོགས་ཀྱི་ཞུ་འབོད་རིམ་པར་ཞུས་པ་བརྒྱུད། རིན་པོ་ཆེའི་གདུང་ཐལ་ཕྱིར་ནང་མིར་རྩིས་སྤྲོད་ཁས་ལེན་བྱས་ཡོད་ཀྱང་། བོད་མི་བཞིས་རིན་པོ་ཆེའི་གདུང་ཐལ་གདན་འདྲེན་གྱི་ལམ་སྐབས་སུ་ཉེན་རྟོག་པས་ཕྱིར་བཙན་འཕྲོག་བྱས་ཡོད་པ་དང་། དེ་བཞིན། ཉེ་སྔོན་འཇུ་བཟུང་བཀག་ཉར་བྱས་པའི་རིན་པོ་ཆེའི་སྐུ་སྲིང་དང་ཚ་མོ་གཉིས་ཕྱིར་གློད་དེ་ནང་དུ་ལོག་ཡོད་ནའང་། ནང་མི་སྤུན་མཆེད་དག་གི་ཁ་པར་ཨང་གྲངས་ཚང་མར་ཕྱི་ཕྱོགས་འབྲེལ་གཏུགས་མི་ཐུབ་པ་བཟོས་ཡོད་པ་མ་ཟད། ནང་མི་སྤུན་མཆེད་ཚོར་ཚོགས་འདུ་བསྐངས་ཏེ་འཇིགས་སྐུལ་བྱས་ཡོད་འདུག
འདི་ག་ལྟེ་གནས་ཁང་ལ་གནས་ཚུལ་འབྱོར་དོན། ༢༠༡༥ ཕྱི་ཟླ་ ༧ ཚེས་ ༡༦ ཉིན་གྱི་ཞོགས་པར་ཁྲིན་ཏུའུ་གྲོང་ཁྱེར་གྱི་འདབས་འབྲེལ་ཁྲོན་ཏུང་བཙོན་ཁང་གིས། སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེའི་སྐུ་ཕུང་བཙན་གྱིས་མེར་བསྲེགས་བཏང་རྗེས། གདུང་ཐལ་ཕྱིར་ཕ་ཡུལ་དུ་འཁུར་མཁན་བོད་མི་བཞི་མ་གཏོགས་དེ་གར་བསྡད་བཅུག་མེད་པ་ལྟར། ཉིན་དེའི་ཕྱི་དྲོ་ཉེན་རྟོག་པ་འགའི་ལྟ་རྟོག་མཉམ་འཁྲིད་འོག་བོད་མི་བཞི་པོ་དེས་རིན་པོ་ཆེའི་གདུང་ཐལ་འཁུར་ནས་ཕྱིར་ཡུལ་དུ་ལོག་པའི་ལམ་བར་དུ། འཁྲིད་མཁན་ཉེན་རྟོག་པའི་བཀོད་འདོམ་ལྟར་དགོང་མོ་དེར་ལྕགས་ཟམ་རྫོང་དུ་སྡོད་བཅུག་རྗེས། གློ་བུར་ཉེན་རྟོག་པ་མང་པོ་ཞིག་སླེབས་ཏེ་རིན་པོ་ཆེའི་གདུང་ཐལ་ཕྱིར་ཕ་ཡུལ་དུ་འཁུར་ཆོག་གི་མ་རེད། དེ་ནི་རྒྱ་ནག་དབུས་གཞུང་གི་བཀའ་རེད་ཅེས་བརྗོད་ནས། ཁོང་ཚོའི་ལག་ནས་རིན་པོ་ཆེའི་གདུང་ཐལ་བཙན་འཕྲོག་བྱས་ཡོད་འདུག སྐབས་དེར་བོད་མི་བཞི་པོ་དེས་ང་ཚོས་འབྲེལ་ཡོད་ལ་ཞུ་བ་མང་པོ་བརྒྱབ་སྟེ་རིན་པོ་ཆེའི་གདུང་ཐལ་ཕྱིར་སྤྲོད་རྒྱུ་ཁས་ལེན་གྱིས་སྤྲད་པ་རེད། གདུང་ཐལ་ང་ཚོར་ཕྱིར་སྤྲོད་རོགས་ཞེས་ཞུ་བ་བརྒྱབ་ཡོད་ཀྱང་། ཉེན་རྟོག་པ་དེ་དག་གིས་སྣང་འཇོག་གང་ཡང་མ་བྱས་པར་གདུང་ཐལ་བཙན་འཕྲོག་བྱས་ཡོད་པར་མ་ཟད། གདུང་ཐལ་ལྕགས་ཟམ་ཁའི་ཆུ་ནང་དུ་འདེབས་རྒྱུ་ཡིན་སྐོར་ལབ་ཡོད་འདུག
