གསར་འགྱུར།

འདི་ག་ལྟེ་གནས་ཁང་ལ་གནས་ཚུལ་འབྱོར་དོན། དེ་རིང་ཕྱི་ཟླ་ ༦ ཚེས་ ༢༠ ཉིན། བོད་ནང་གི་རྩོམ་པ་པོ་འཇང་རྩེ་དོན་ཁོ་དང་།
རྩོམ་པ་པོ་བུད་དྷ་གཉིས་རྒྱ་ནག་མཱེན་ཡཱང་བཙོན་ཁང་ནང་། ལོ་བཞིའི་བཙོན་འཇུག་ཁྲིམས་ཆད་ཀྱི་དུས་ཡུན་རྫོགས་ཏེ་ཕྱིར་གློད་འདུག

རྩོམ་པོ་པོ་འཇང་རྩེ་དོན་ཁོ་ལགས་ནི་རྔ་བ་ཁུལ་ཁྱུང་མཆུ་རྫོང་ཟངས་དཀར་སྟོད་མ་ནས་ཡིན་པ་དང་། རྩོམ་པ་པོ་བུད་དྷ་ལགས་ནི་རྔ་བ་ཁུལ་བར་མ་ཞང་གི་སྨན་པ་སྡེ་བས་ཡིན་པ་རེད། རྩོམ་པ་པོ་ཁོང་གཉིས་ཕྱི་ལོ་ ༢༠༡༠ ཕྱི་ཟླ་ ༦ པའི་ཚེས་ ༢༡ ཉིན། རྔ་བ་ཁུལ་སྤྱི་བདེ་ཉེན་རྟོག་པས་ཁོང་རང་ཁྱིམ་ནས་འཇུ་བཟུང་བཙན་འཁྲིད་ཀྱིས་འདྲི་གཅོད་བཀག་སྡོམ་བྱས་མཐར། ལོ་དེའི་ཕྱི་ཟླ་ ༡༢ ཚེས་ ༣༠ ཉིན་རྔ་བ་ཁུལ་འབྲིང་རིམ་ཁྲིམས་ཁང་གིས་རྒྱལ་ཁབ་ཁ་བྲལ་ལ་ངལ་སྐུལ་བྱས་པའི་ཉེས་མིང་འོག་ལོ་ ༤ བཙོན་འཇུག་ཁྲིམས་བཅད་ཡོད། སྐབས་དེར་རྩོམ་པ་པོ་སྐལ་བཟང་སྦྱིན་ལགས་ཀྱང་འཇུ་བཟུང་གིས་ཁོང་གཉིས་དང་མཉམ་དུ་ལོ་གསུམ་གྱི་བཙོན་འཇུག་ཁྲིམས་ཐག་བཅད་ཡོད་པ་དང་། སྔར་ལོའི་ཕྱི་ཟླ་ ༧ པའི་ཚེས་ ༡༨ ཉིན་བཙོན་འཇུག་དུས་ཡུན་རྫོགས་ཏེ་ཕྱིར་གློད་ཡོད་པ་རེད།

རྩོམ་པ་པོ་འཇང་རྩེ་དོན་ཁོའམ་སྨྱུག་མིང་ལ་གཉན་དུ་འབོད་པ་ཁོང་རྒྱ་གཞུང་གིས་འཇུ་བཟུང་བཙོན་འཇུག་མ་བྱས་སྔོན་ལ། ཁོང་གིས་ཁྱུང་མཆུ་རྫོང་ལོ་རྒྱུས་ཉམས་ཞིབ་ཁང་དུ་ཕྱག་ལས་གཉེར་བཞིན་ཡོད་པ་རེད། ཁོང་དང་གྲོགས་པོ་ཚོས་ས་གནས་སུ་བོད་སྐད་བཤད་སའི་བྱིས་གཉོར་ཁང་ཆུང་ཆུང་ཞིག་ཀྱང་བཙུགས་ཡོད་འདུག ཁོང་ནི་ཟི་ཁྲོན་ཞིང་ཆེན་རྩོམ་པ་པོའི་མཐུན་ཚོགས་ཀྱི་ཚོགས་མི་ཡིན་པ་དང་། ཁོང་གིས་༼རོ་ལངས་༽དང་༼ལག་རྩལ་༽སོགས་དེབ་ཁ་ཤས་བརྩམས་ཡོད་པ་མ་ཟད། ༼དུས་རབས་ཀྱི་ང་༽ཞེས་པའི་དུས་དེབ་ཀྱི་རྩོམ་སྒྲིག་པའང་ཡིན་པ་རེད། ༼ཤར་དུང་རིའི་༽ཐོག་ཁོང་གིས་བོད་ནང་དོན་དངོས་གནས་སྟངས་བརྗོད་པའི་༼ང་ཚོའི་ལུས་ཐོག་ན་འགྲོ་བ་མིའི་ཐོབ་ཐང་ག་འདྲ་ཡོད་༽ཅེས་པའི་རྩོམ་ཡིག་སྤེལ་པ་རེད།

བོད་ནང་གི་བོད་མིའི་དངོས་ཡོད་དཀའ་སྡུག་གནས་བརྗོད་པའི་༼འཇིགས་བྲལ་༽གློག་བརྙན་ཕབ་ལེན་བྱེད་མཁན་དོན་གྲུབ་དབང་ཆེན་ལགས། ཕྱི་ལོ་ ༢༠༡༤ ལོའི་ཟླ་ ༦ ཚེས་ ༥ ཉིན་བཙོན་འཇུག་དུས་ཡུན་རྫོགས་ཏེ་ཕྱིར་གློད་ཡོད་པ་ལྟར། ཁོང་ཉིད་གང་མགྱོགས་ནང་མི་བཟའ་ཟླ་དང་ལྷན་འཛོམས་ཡོང་ཐུབ་རྒྱུར་འདི་ག་ལྟེ་གནས་ཁང་གི་ངོས་ནས་རེ་སྐུལ་བྱེད་བཞིན་ཡོད།

དོན་གྲུབ་དབང་ཆེན་ལགས་ཕྱི་ལོ་ ༢༠༠༨ ཟླ ༣ ཚེས་ ༢༦ ཉིན་ཟི་ལིང་གྲོང་ཁྱེར་དུ་རྒྱ་གཞུང་ཉེན་རྟོག་པས་འཇུ་བཟུང་བཙན་འཁྲིད་བྱས་རྗེས། ལོ་གཅིག་ལྷག་རིང་ཁྲིམས་འགལ་གྱིས་བཙོན་ཁང་ནག་པོའི་ནང་བཀག་ཉར་ཐོག འདྲི་གཅོད་ཀྱིས་གཅར་རྡུང་མནར་གཅོད་ཚད་མེད་བཏང་བ་མ་ཟད། ཟས་མ་མ་སྤྲད་པར་ལྟོགས་སྐོམ་མྱངས་བཅུག་ཡོད་པ་བཅས། རྒྱལ་སྤྱིའི་ཉེས་ཡང་ཚོགས་པར་འགྲེལ་བརྗོད་ཡོད། བཙོན་ཁང་ནག་པོ་དང་ངལ་རྩོལ་བསྒྱུར་བཀོལ་ཁང་བཅས་ནི། ཁྲིམས་གྱི་འགྲོ་ལུགས་གང་ཡང་བརྒྱུད་མ་དགོས་པའི་ཐོག་ནས། མང་ཚོགས་ལ་བཙོན་འཇུག་མནར་གཅོད་གཏོང་ཐབས་ཀྱི། ཁྲིམས་མེད་ལུགས་མེད་ཀྱི་བྱ་སྤྱོད་ཁོ་ན་ཞིག་ཆགས་ཡོད།

དེ་བཞིན།
ཕྱི་ལོ་ ༢༠༠༩ ཟླ་ ༡༢ ཚེས་ ༢༨ ཉིན་ཟི་ལིང་གྲོང་ཁྱེར་འབྲིང་རིམ་མི་དམངས་ཁྲིམས་ཁང་ཟེར་བས། དོན་གྲུབ་དབང་ཆེན་ལགས་ལ་ཁྲིམས་ཐག་གཅོད་སྐབས་ཀྱང་། ཁོང་གི་ནང་མི་སུ་གང་ལའང་སྐད་མ་བཏང་བར་གསང་བའི་ཐོག ལོ་ ༦ གི་དུས་བཀག་བཙོན་འཇུག་ཁྲིམས་ཐག་བཅད་དེ། ཟི་ལིང་གྲོང་ཁྱེར་གྱི་བཙོན་ཁང་ཞིག་ནང་བཙོན་འཇུག་དང་། རྗེས་སུ་མཚོ་སྔོན་ཞིང་ཆེན་བུད་མེད་བཙོན་ཁང་ཞེས་པའི་ནང་གནས་སྤོར་ཐོག བཙོན་འཇུག་དུས་ཡུན་མ་རྫོགས་བར་དེ་གར་བཙོན་འཇུག་མནར་གཅོད་བཏང་ཡོད་པ་རེད། བཙོན་འོག་ཏུ་མནར་གཅོད་འདྲ་མིན་བཏང་པར་བརྟེན་ནས་ཁོང་གི་གཟུགས་པོར་ནད་གཞི་ཕོག་ཡོད་ཀྱང་། རྒྱ་གཞུང་གིས་དུས་ཐོག་ཁྲིམས་མཐུན་སྨན་བཅོས་མཐུན་རྐྱེན་གང་ཡང་སྦྱར་མེད་པ་མེད་པ་མ་ཟད། ཐ་ན་ཁོང་གི་ནང་མིས་སྨན་རིགས་མཁོ་སྤྲོད་བྱས་པ་རྣམས་ཀྱང་བཀག་འགོག་བྱས་ཡོད།

འདི་ག་ལྟེ་གནས་ཁང་ལ་གནས་ཚུལ་འབྱོར་དོན། ཉེ་བའི་ཟླ་འདིའི་ནང་རྒྱ་གཞུང་གི་དཔོན་རིགས་ལས་བྱེད་རྣམས་ཁམས་སྡེ་དགུ་མདོ་ས་ཁུལ་དུ་བསྐྱོད་ནས། ཁྲི་འདུ་རྫོང་ཁོངས་སུ་ཡོད་པོའི་དགོན་སྡེ་ཁག་ནང་དགོན་པའི་དོ་དམ་ལྷན་ཁང་གི་ཚོགས་མི་རྣམས་བརྗེ་བོ་བརྒྱབ་སྟེ། དགོན་པའི་ནང་དོ་དམ་སྟངས་འཛིན་བྱེད་ཤུགས་ཆེ་རུ་གཏོང་བཞིན་ཡོད་འདུག

ལྷག་པར་དུ་ཁྲི་འདུ་རྫོང་རྫ་སྟོད་ཞང་གི་ཁོངས་སུ་ཡོད་པའི་ཟིལ་དཀར་དགོན་ཏུ། དགོན་པའི་དོ་དམ་ལྷན་ཁང་གི་ཚོགས་མི་རྣམས་ཀྱི་ལས་ཡུན་མ་རྫོགས་སྔོན་ལ། རྒྱ་གཞུང་གིས་དགོན་པའི་དོ་དམ་ལྷན་ཁང་གི་མགོ་བར་གཞུང་ཞབས་ལས་ཞིག་ཐད་བསྐོ་དང་། དོ་དམ་ལྷན་ཁང་གི་ཚོགས་མི་རྣམས་ཀྱང་དམངས་གཙོའི་ལམ་ལུགས་གང་ཡང་མ་བརྒྱུད་པར། ཐད་ཀར་ས་གནས་རྫོང་དང་ཞང་སྲིད་གཞུང་གིས་བསྐོ་འཇོག་བྱས་ཡོད་འདུག

ཕྱི་ལོ་ ༡༩༩༣ ལོར་འཛམ་གླིང་མཉམ་འབྲེལ་རྒྱལ་ཚོགས་ཀྱི་ངོས་ནས།  ཕྱི་ཟླ་ ༥ ཚེས་ ༣ ཉིན་ནི་རྒྱལ་སྤྱིའི་གསར་འགོད་རང་དབང་ཉིན་མོར་གཏན་འབེབས་བྱུང་བ་ལྟར།  རྒྱལ་སྤྱིའི་སྤྱི་ཚོགས་ཁྱོན་ཡོངས་སུ་ལོ་ལྟར་ཉིན་མོ་འདི་སྲུང་བརྩི་བྱེད་བཞིན་ཡོད་ལ།   དེ་བཞིན། རྒྱལ་སྤྱིའི་འགྲོ་བ་མིའི་ཐོབ་ཐང་ཡོངས་ཁྱབ་གསལ་བསྒྲགས་ཀྱི་དོན་ཚན་ ༡༩ པའི་ནང་དུའང་། སྒེར་ཚུགས་དང་སྣ་འཛོམས།  རང་དབང་ཅན་གྱི་གསར་འགྱུར་བརྒྱུད་ལམ་ཁག་འཛུགས་བསྐྲུན་དང་འཕེལ་རྒྱས། སྲུང་སྐྱོབ་བཅས་བྱེད་རྒྱུ་དེ་ནི།  རྒྱལ་ཁབ་གང་དེའི་དཔལ་འབྱོར་དང་དམངས་གཙོ་ཡར་རྒྱས་སྲུང་སྐྱོབ་ཐད་མེད་ཐབས་མེད་པའི་གཞི་རྩའི་ཆ་རྐྱེན་ཡིན་ཞེས་གསལ་འདོན་བྱས་ཡོད།

ཡིན་ནའང་། བོད་ས་ཡོངས་ལ་རྒྱ་གཞུང་གིས་བཙན་བཟུང་དབང་བསྒྱུར་བྱས་པ་ནས་ད་ལྟའི་བར་དུ།  བོད་ནང་འགྲོ་བ་མིའི་གཞི་རྩའི་ཐོབ་ཐང་ཁག་རིམ་པར་རྡོག་རོལ་བཏང་ཡོད་ལ།  ལྷག་པར་དུ། ཕྱི་ལོ་ ༢༠༠༨ ལོར་བོད་ས་ཡོངས་སུ་རང་དབང་རྩོད་ལེན་གྱི་ཞི་བའི་ངོ་རྒོལ་བྱུང་བའི་རྗེས།  རྒྱ་གཞུང་གིས་བོད་ནང་སྔར་བས་དམ་དྲག་བྱེད་ཤུགས་ཆེ་རུ་བཏང་སྟེ།  བོད་ནང་གི་གནས་འཕྲིན་དྲ་རྒྱ་དང་ཁ་པར། བརྡ་འཕྲིན་མཐའ་དག་ལ་བཀག་སྡོམ་ནན་མོ་བྱས་པ་མ་ཟད།  དྲ་རྒྱའི་ཐོག་བོད་ནང་གི་དངོས་ཡོད་གནས་སྟངས་སྐོར་གྱི་གསར་འགྱུར་དང་རྩོམ་ཡིག་སྤེལ་མཁན་བོད་མི་མང་པོ་སྔ་ཕྱིར་འཇུ་བཟུང་བཀག་ཉར་དང་བཙོན་འཇུག་ཁྲིམས་ཐག་བཅད་ཡོད། དེར་མ་ཟད་རྒྱལ་སྤྱིའི་ཉམས་ཞིབ་པ་དང་གསར་འགོད་པ་རྣམས་བོད་ནང་བསྐྱོད་རྒྱུར་བཀག་འགོག་བྱས་ཏེ།    བོད་ནང་གི་ད་ལྟའི་ཛ་དྲག་གནས་སྟངས་རྣམས་རྒྱལ་སྤྱིའི་སྤྱི་ཚོགས་ལ་ཤེས་རྟོགས་བྱུང་མ་བཅུག་པར། ཕྱོགས་ཡོངས་ནས་ནག་སུབ་དང་སྦོས་སྐོང་བྱེད་བཞིན་ཡོད།

དེ་རིང་ནི་༸པཎ་ཆེན་དགེ་འདུན་ཆོས་ཀྱི་ཉི་མ་མཆོག་དགུང་གྲངས་ཉེར་ལྔ་ཕེབས་པའི་འཁྲུངས་སྐར་ཉིན་མོ་ཡིན་པ་དང་། ཁོང་དགུང་ལོ་ ༦ ཐོག་ནས་གར་སོང་ཆ་མེད་དུ་གྱུར་རྗེས་བོད་མི་ཚོས་ཁོང་གི་འཁྲུངས་སྐར་ལ་སྲུང་བརྩི་ཞུས་ཏེ་ད་བར་ལོ་ངོ་ ༡༩ ཏག་ཏག་འཁོར་བཞིན་ཡོད། ཕྱི་ལོ་༡༩༩༥ ཟླ་༥ ཚེས་ ༡༤ ཉིན་བོད་ཀྱི་བླ་ན་མེད་པའི་དབུ་འཁྲིད་སྤྱི་ནོར་༸གོང་ས་སྐྱབས་མགོན་ཆེན་པོ་མཆོག་གིས་༸པཎ་ཆེན་སྐུ་ཕྲེང་བཅུ་པའི་ཡང་སྲིད་དུ་ངོས་འཛིན་གནང་རྗེས་རྒྱ་གཞུང་གིས་ཁོང་དང་ཡབ་ཡུམ་སྐུ་འཁོར་བཅས་ནག་ཆུ་ས་གནས་ལྷ་རི་རྫོང་བཞུགས་གནས་ནས་བཙན་ཁྲིད་བྱས་པ་མ་ཟད། རྒྱལ་སྤྱིའི་ཐོག་བཙན་ཁྲིད་བྱས་པ་ཁས་ལེན་རྩ་བ་ནས་མ་བྱས་ཁར་ཕྱི་ལོ་༡༩༩༥ ཟླ་ ༡༡ ཚེས་ ༢༩ ཉིན་རྒྱ་གཞུང་གིས་ཆབ་སྲིད་དགོས་མཁོའི་དབང་གིས་རྒྱལ་མཚན་ནོར་བུ་ཟེར་བའི་བོད་ཀྱི་བྱིས་པ་ཞིག་༸པཎ་ཆེན་སྐུ་ཕྲེང་བཅུ་པའི་ཡང་སྲིད་དུ་ངོས་འཛིན་བྱས་ཡོད། སྤྱི་ལོ་༡༩༩༦ ཟླ་༥ ཚེས་ ༡༤ ཉིན་རྒྱལ་སྤྱིའི་གནོན་ཤུགས་འོག་རྒྱ་གཞུང་གིས་༸པན་ཆེན་དགེ་འདུན་ཆོས་ཀྱི་ཉི་མའི་ཕ་མའི་རེ་བ་ལྟར་ཁ་བྲལ་རིང་ལུགས་པས་ཁོང་བཙན་ཁྲིད་བྱེད་རྒྱུའི་ཉེན་ཁ་ཡོད་པར་ཕྲུ་གུ་དཀྱུས་མ་ཞིག་གི་བདེ་འཇགས་ཆེད་ང་ཚོས་སྲུང་སྐྱོབ་བྱེད་བཞིན་ཡོད་སྐོར་བརྗོད་ཡོད། གལ་ཏེ་པཎ་ཆེན་དགེ་འདུན་ཆོས་ཀྱི་ཉི་མ་བྱིས་པ་དཀྱུས་མ་ཞིག་ཡིན་ན་དེ་ལ་རྒྱ་གཞུང་གིས་གསང་བའི་བཀག་ཉར་རྒྱུན་རིང་བྱེད་དགོས་དོན་མེད་ལ་བྱིས་པ་དཀྱུས་མ་ཞིག་གི་ཆེད་རྒྱལ་སྤྱིའི་ཐོག་རྫུམ་དང་གཡོ་སྒྱུ་ཁྲབ་དོན་མེད།   ༸པཎ་ཆེན་རིན་པོ་ཆེ་གར་སོང་ཆ་མེད་གྱུར་བ་དེས་རྒྱ་གཞུང་གི་བོད་པའི་ཆོས་དང་རིག་གཞུང་ལ་རྡོག་རོལ་རྩིས་མེད་བཏང་གི་ཡོད་པ་གསལ་པོ་བསྟན་ཡོད་ལ་དམིགས་བསལ་རྒྱ་གཞུང་གིས་བོད་པའི་ནང་ཆོས་དེ་ཆབ་སྲིད་ཐོག་བེད་སྤྱོད་བྱེད་རྒྱུ་ཡིན་པ་གསལ་པོ་རེད། ཕྱི་ལོ་༢༠༠༧ ལོར་རྒྱ་གཞུང་གིས་༼སྒྲིག་གཞི་ཨང་ལྔ་པ་༽ཟེར་བ་ཞིག་བཏོན་པའི་ནང་ནང་ཆོས་ཀྱི་བྱེད་སྒོའི་རིགས་ཐ་དག་དང་བླ་མ་ངོས་འཛིན་རིགས་སོགས་རྒྱ་གཞུང་གི་སྟངས་འཛིན་འོག་འགྲོ་དགོས་པས་ལས་རང་འཚམས་ཀྱི་སྤེལ་ན་ཁྲིམས་འགལ་ཡིན་ལུགས་འཁོད་ཡོད་པར། རྒྱལ་སྤྱིའི་གཞུང་དང་ཚོགས་སྡེ་སྒེར་པ་སོགས་ཀྱིས་དེའི་ཐད་ལ་སེམས་ཚབ་ཆེན་པོ་བྱེད་བཞིན་ཡོད་པ་དང་། ལྷག་པར་བོད་ཀྱི་ཆོས་དད་རང་དབང་དང་རིག་གཞུང་སོགས་ལ་རྒྱ་གཞུང་ནས་རྡོག་རོལ་ཚབས་ཆེན་གཏོང་བཞིན་ཡོད་པར་ངོས་འཛིན་བྱེད་ཀྱི་ཡོད།   ཕྱི་ལོ་༢༠༠༥ ལོར་༸པཎ་ཆེན་རིན་པོ་ཆེ་གར་སོང་ཆ་མེད་དུ་གྱུར་ཏེ་མི་ལོ་༡༠ འཁོར་བའི་དུས་དྲན་ཉིན་མཉམ་སྦྲེལ་རྒྱལ་ཚོགས་ཀྱི་ཆོས་དད་རང་དབང་ཐོག་དམིགས་བསལ་སྐུ་ཚབ་ནས་རྒྱ་གཞུང་ལ་བཏང་བའི་ཡི་གེའི་ནང་༸པཎ་ཆེན་རིན་པོ་ཆེ་མུ་མཐུད་བཀག་ཉར་བྱས་པ་དེས།…

འདི་ག་ལྟེ་གནས་ཁང་གི་ཡོངས་ཁྱབ་གསལ་བསྒྲགས།

དེ་རིང་ཕྱི་ཟླ་༤་ཚེས་༧ ནི་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་རྒྱ་གཞུང་གིས་བཙོན་འཇུག་བྱས་ཏེ་མི་ལོ་ཧྲིལ་པོ་༡༢ ཏག་ཏག་འགྲོ་བཞིན་ཡོད་པ་དང་། སྤྲུལ་སྐུའི་གཟུགས་གཞེའི་གནས་སྟངས་ཀྱང་ཧ་ཅང་གི་ཛ་དྲག་ཆགས་ཡོད་པའི་གནས་ཚུལ་ལ་གཞིགས་ན། སྤྲུལ་སྐུ་མཆོག་བཙོན་ཁང་ནང་ལོ་མང་རིང་མནར་གཅོད་སྡུག་བརྩུབ་འོག་སྐུ་གཟུགས་ཀྱི་གནས་སྟངས་སྐྱོ་པོ་ཆགས་ཡོད་ཁར། སྙིང་ལ་ན་ཚ་ལྗིད་པོ་ཕོགས་ཏེ། ས་ལ་ཐེངས་མང་འགྱེལ་བ་མ་ཟད། ལུས་པོ་འདར་སིག་གིས་འཁར་བར་བརྟེན་དགོས་པ་སོགས་ཀྱི་གནས་སྟངས་ཛ་དྲག་ཆགས་ཡོད་འདུག་ལ། སྤྲུལ་སྐུ་མཆོག་འཇུ་བཟུང་འོག་ཚུད་པ་ནས་ད་བར་ནང་མིར་ཐུགས་འཕྲད་ཐེངས་བདུན་ཙམ་ལས་བྱུང་མེད། ད་ལྟའི་ཆར་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་དགུང་གྲངས་ ༦༢ ཕེབས་པ་དང་། བཙོན་ཁང་ནང་སྡུག་སྦྱོང་མནར་གཅོད་འོག་སྐུ་གཟུགས་ཀྱི་གནས་སྟངས་ཛ་དྲག་ཆགས་ཡོད་སྟབས།

འདི་ག་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་ནས། རྒྱ་གཞུང་ལ་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་སྨན་བཅོས་ཆེད་གང་མྱུར་གློད་ཀྲོལ་ཡོང་བའི་འབུལ་སྐུལ་ནན་པོ་ཞུ་རྒྱུ་དང་། ཆབས་ཅིག་རྒྱལ་སྤྱིའི་གཞུང་དང་ཚོགས་སྡེ་ཁག་ནས་སྤྲུལ་སྐུ་མཆོག་སྨན་བཅོས་ཆེད་གང་མྱུར་གློད་ཀྲོལ་ཡོང་བའི་རྒྱ་གཞུང་ལ་འབུལ་སྐུལ་ཡོང་བའི་རེ་བ་ནན་པོ་ཞུ་རྒྱུ།

འདི་ག་ལྟེ་གནས་ཁང་དུ་གནས་ཚུལ་འབྱོར་གསལ། སྤྱི་ལོ་༢༠༡༤ ཟླ་༡ ཚེས་༡༤ ལ་བོད་ཤར་ཕྱོགས་འབྲི་རུ་རྫོང་དམུ་ཁྱིམ་གྲོང་གི་གྲོང་ཚོའི་འགོ་ཁྲིད་ངང་གྲགས་ལགས་དང་རིག་གསལ་གཉིས་ལ་ལོ་ངོ་བཅུ་རེར་ཁྲིམས་ཐག་བཅད་ཀྱང་ད་ལྟའི་ཆར་བཙོན་ཁང་གང་དུ་བཅུག་ཡོད་མེད་དང་། ཁོང་གཉིས་ཀྱི་གནས་སྟངས་གང་འདྲ་ཆགས་ཡོད་མེད་སོགས་ཤེས་རྟོགས་མ་ཐུབ་པར་ལུས་ཡོད།

དེ་ཡང་ངང་གྲགས་དང་རིག་གསལ་གཉིས་ཕྱི་ལོ་༢༠༡༣ ལོའི་ཟླ་ ༡༡ ཚེས་༢༤ ཉིན་འཇུ་བཟུང་བྱས་ཡོད་ཅིང་། ཁོང་གཉིས་འཇུ་བཟུང་བྱེད་དགོད་དོན་གཙོ་བོ་ནི། རྒྱ་གཞུང་གིས་འབྲི་རུ་རྫོང་གི་ཁྱིམ་ཚང་སོ་སོའི་ཁང་ཐོག་ཏུ་སྐར་ལྔའི་དར་དམར་བསྒྲེང་འཛུགས་དགོས་པའི་བཀའ་ཁྱབ་བཏང་བར་མ་ཉན་པ་དང་། འབྲི་རུ་མི་མང་ ༡༠༠༠ ལྷག་ཙམ་འབྲི་རུ་རྫོང་དུ་འདུ་འཛོམས་ཀྱིས་རྒྱ་གཞུང་ལ་ངོ་རྒོལ་སྐབས་དམུ་ཁྱིམ་གྲོང་གི་གྲོང་མི་ཡང་མང་པོ་འཛོམས་ཡོད་པ། དེ་བཞིན་རྒྱ་གཞུང་གིས་འབྲོང་སྣ་དགོན་པ་སྒོ་རྒྱག་པར་དམུ་ཁྱིམ་གྲོང་གི་མི་མང་ནས་ངོ་རྒོལ་བྱས་པ་དང་། དེ་སྔོན་ངང་གྲགས་ཚང་ལ་མི་གྲངས་བཅུ་བདུན་ལྷག་ཙམ་གྱིས་གསང་བའི་ཐོག་ཆབ་སྲིད་ཀྱི་ཚོགས་འདུ་འཚོགས་པ་སོགས་ཀྱི་བརྒྱུད་སྐུལ་བྱས་པ་དང་གྲོང་ཚོའི་འགོ་འཁྲིད་ཀྱི་འགན་འཁྲི་ཡག་པོ་མ་ཁྱེར་བའི་ཉེས་མིང་འོག་འཇུ་བཟུང་བྱས་ཏེ། ཕྱི་ལོ་ ༢༠༡༤ ཟླ་ ༡ ཚེས་ ༡༤ ཉིན་ཁོང་གཉིས་ལ་ལོ་བཅུ་རེར་དུས་བཀག་བཙོན་འཇུག་གི་ཁྲིམས་ཐག་བཅད་འདུག

རྒྱ་གཞུང་གིས་ཁྲིམས་མཐུན་འགྲོ་ལུགས་གང་ཡང་མ་བརྒྱུད་པར་གསང་བའི་ཐོག   ན་གཞོན་རྩོམ་པ་པོ་ཚུལ་ཁྲིམས་རྒྱལ་མཚན་ལགས་ལ་ལོ་ ༡༣ དང་། ཉེན་རྟོག་པ་ཟུར་བ་གཡུལ་རྒྱལ་ལགས་ལ་ལོ་ ༡༠ བཅས་ཀྱི་དུས་བཀག་བཙོན་འཇུག་གི་ཁྲིམས་ཐག་བཅད་འདུག  ཁོང་གཉིས་ལ་ཁྲིམས་བཅད་ནས་ཟླ་བཞི་ལྷག་ཕྱིན་ཡོད་ནང་། རྒྱ་གཞུང་གིས་ཉེ་ཆར་མ་གཏོགས་ནང་མིར་ཁོང་གཉིས་གར་ཡོད་གྱི་གནས་སྟངས་ཤེས་རྟོགས་དང་། ཁོང་གཉིས་ལ་ཐུག་འཕྲད་སོགས་ཅི་ཡང་བྱེད་བཅུག་མེད་པར་ཡུན་རིང་གར་སོང་ཆ་མེད་ཀྱི་གནས་སྟངས་འོག་ལྷག་དགོས་བྱུང་ཡོད་འདུག

འདི་ག་ལྟེ་གནས་ཁང་ལ་གནས་ཚུལ་འབྱོར་དོན།  ཕྱི་ལོ་ ༢༠༡༣ ཟླ་ ༡༠ ཚེས་ ༢༨ ཉིན། བོད་རང་སྐྱོང་ལྗོངས་མི་དམངས་ཁྲིམས་ཁང་ནས། ཁམས་ནགས་ཤོད་འབྲི་རུ་རྫོང་གི་ན་གཞོན་རྩོམ་པ་པོ་ཚུལ་ཁྲིམས་རྒྱལ་མཚན་ལགས་ལ་ལོ་ ༡༣ དང་། གཡུལ་རྒྱལ་ལགས་ལ་ལོ་ ༡༠ བཅས་ཀྱི་དུས་བཀག་བཙོན་འཇུག་གི་ཁྲིམས་ཐག་བཅད་འདུག

༢༠༡༣ ལོའི་ཟླ ༩ པའི་ཚེས ༢༧ ཉིན། ཁམས་འབྲི་རུ་རྫོང་འབྲི་རུ་ཤང་མོ་བ་གྲོང་དང་སྨོན་ཁྱིམ་གྲོང་གཙོས་པའི་ས་གནས་ཡུལ་མི་རྣམས་ཀྱིས། རྒྱ་གཞུང་གི་རྒྱལ་དར་སོ་སོའི་ཁང་སྟེང་དུ་སྒྲེང་འཛུགས་མ་བྱས་པར། རྒྱལ་མོ་རྔུལ་ཆུར་གཡུགས་པའི་གནས་ཚུལ་ལྷག་པ་ནས་བཟུང་།   རིམ་བཞིན་ཟླ་དེའི་ཚེས ༢༨ ཉིན་འབྲི་རུ་རྫོང་མི་དམངས་སྲིད་གཞུང་མདུན་དུ་བོད་མི་སྟོང་ཕྲག་ལྷག་འཛོམས་ནས། ཟས་བཅད་ངོ་རྒོལ་དང་སྦྲགས་ཏེ་མཚན་ཉལ་བྱས་པ་མ་ཟད།  མོ་བ་གྲོང་དང་སྨོན་ཁྱིམ་གྲོང་སོགས་ནས་ཉེས་མེད་འཛིན་བཟུང་བྱས་པའི་ས་གནས་ཡུལ་མི་རྣམས་ཀྱི་རྒྱབ་ལངས་བྱས་ཡོད། དེ་ཙམ་དུ་མ་ཟད།  ཁོང་ཚོས་འཛིན་བཟུང་བྱས་པ་དེ་དག་འཕྲལ་དུ་གློད་བཀྲོལ་གཏོང་དགོས་པའི་རེ་འདུན་ཤུགས་ཆེ་བཏོན།  ཉིན་མོ་དེར་འབྲི་རུ་རྫོང་གི་སློབ་གྲྭ་ཆུང་འབྲིང་སོགས་ཀྱིས་ངོ་རྒོལ་བྱས་ནས་ཉིན་ལྔ་དྲུག་རིང་ལ་སློབ་གྲྭ་སྟོང་པ་ཆགས་པ་སོགས། ས་གནས་རྫོང་ཁུལ་དུ་གནས་ཚུལ་ཛ་དྲག་ཆགས་ཡོད་པ་རེད།

དེ་སྔོན་འབྲི་རུ་འབྲོང་སྣ་དགོན་པར་རྒྱ་གཞུང་གིས་སྔ་ཕྱིར་དྲག་གནོན་བཀག་སྡོམ་བྱས་ཏེ། དགོན་པའི་ཆོས་ཀྱི་བྱེད་སྒོ་ཁག་བཀག་འགོག་དང་གྲྭ་བ་མང་པོ་འཇུ་བཟུང་བཙོན་འཇུག གྲྭ་ཤག་མང་པོ་སྒོ་བརྒྱབ་བཅུག་པའི་གནས་ཚུལ་ཐོན་ཡོད་པ་ལྟར། དགོན་པའི་དབུ་མཛད་ཐར་འདོད་རྒྱལ་མཚན་ལགས་ཀྱང་སྔར་ལོའི་ཕྱི་ཟླ་ ༡༢ པོའི་ནང་འཇུ་བཟུང་བཙན་འཁྲིད་ཀྱིས།  འདི་ལོའི་ཕྱི་ཟླ་ ༡ པོའི་ནང་ཆབ་སྲིད་ཉེས་མིང་འོག་ལོ་ ༡༨ ཀྱི་བཙོན་འཇུག་ཁྲིམས་ཐག་བཅད་ཡོད་འདུག

འདི་ག་ལྟེ་གནས་ཁང་ལ་གནས་ཚུལ་འབྱོར་དོན། བོད་མདོ་ཁམས་ནགས་ཤོད་འབྲི་རུ་འབྲོང་སྣ་དགོན་པའི་དབུ་མཛད་དང་ཀྲུའུ་རིན་གཅིག་ལྕོགས་ཡིན་པ་གྲྭ་ཐར་འདོད་རྒྱལ་མཚན་ལགས། ཕྱི་ལོ་ ༢༠༡༣ ཟླ་ ༡༢ པའི་ནང་ས་གནས་རྒྱ་གཞུང་ཉེན་རྟོག་པས་འཇུ་བཟུང་བཙན་ཁྲིད་རྗེས། འབྲེལ་ཡོད་ནང་མིས་ཁོང་འཇུ་བཟུང་དགོས་དོན་དང་ས་གནས་གང་དུ་བཀག་སྐྱིལ་བྱས་མེད་སོགས་ཀྱི་གནས་ཚུལ་གང་ཡང་ཤེས་རྟོགས་མ་ཐུབ་པར་ཟླ་འགའི་རིང་གར་སོང་ཆ་མེད་དུ་གྱུར་མཐར། ཕྱི་ལོ་ ༢༠༡༤ ཟླ་ ༡ པོའི་ནང་རྒྱ་གཞུང་གིས་ཁོང་ལ་ལོ་ ༡༨ ཀྱི་དུས་བཀག་བཙོན་འཇུག་གི་ཁྲིམས་ཐག་བཅད་ཡོད་སྐོར་བསྒྲགས་ཡོད་འདུག  ཡིན་ནའང་། ཁོང་ལ་བཙོན་འཇུག་ཁྲིམས་ཐག་གཅོད་དགོས་པའི་ཉེས་མིང་དང་ཁྲིམས་ཁང་གང་ནས་ཁྲིམས་ཐག་བཅད་པ། ད་ལྟའི་ཆར་བཙོན་ཁང་གང་ཞིག་ཏུ་བཙོན་འཇུག་བྱས་ཡོད་མེད་ཀྱི་གནས་ཚུལ་ད་དུང་ཤེས་རྟོགས་ཐུབ་ཀྱི་མེད་པ་རེད།

ཉེ་ཆར་འདས་གྲོངས་ཕྱིན་པའི་ཆབ་སྲིད་བཙོན་པ་སྒོ་ཤུལ་བློ་བཟང་ལགས་ལ།  རྒྱ་གཞུང་གིས་བཀག་ཉར་འདྲི་གཅོད་དང་དུས་བཀག་བཙོན་འཇུག་བཅས་ཀྱི་སྐབས་སུ།  རྒྱལ་སྤྱི་ཁྲིམས་ལུགས་དང་རྒྱ་གཞུང་རང་གི་ཁྲིམས་དང་འགལ་བའི་ཐོག་ནས། བཙན་གྱིས་གཟུགས་པོར་ཟུག་གཟེར་དང་གཅོང་ནན་བཟོ་བྱེད་ཀྱི་དུག་སྨན་དང་དུག་ཁབ་བརྒྱབ་སྟེ།  མི་སྤྱོད་ལས་འདས་པའི་མནར་གཅོད་སྣ་ཚོགས་མྱངས་བཅུགས་ནས་ལུས་པོ་སྐམ་རུད་དུ་གྱུར་ནས་གསོན་ཐབས་བྲལ་བ་བཟོས་རྗེས།  བཙོན་ཁང་ནང་གདུག་རྩུབ་ཁྲིམས་གཅོད་འོག་དམར་གསོད་བྱས་པའི་ཉེས་མིང་ལས་གཡོལ་ཆེད། བཙོན་འཇུག་དུས་ཡུན་མ་རྫོགས་གོང་བཙོན་ཁང་ནས་ཕྱིར་ཕུད་བཏང་རྗེས།  རང་ཁྱིམ་དུ་ཟླ་འགའ་ལས་གསོན་མ་ཐུབ་པར་འདས་གྲོངས་སུ་གྱུར་ཡོད་པ་རེད།

མཉམ་འབྲེལ་རྒྱལ་ཚོགས་ཀྱིས་གཏན་ལ་ཕབ་པའི་༼གདུག་རྩུབ་ཁྲིམས་གཅོད་དང་། གཞན་པའི་དམའ་འབེབས་བརྙས་བཅོས་དང་མི་སྤྱོད་ལས་འདས་པའི་མནར་གཅོད་བྱ་སྤྱོད་རིགས་བཀག་སྡོམ་སྤྱི་ཆིངས༽དོན་ཚན་གཉིས་པའི་ནང་། རྒྱལ་ཁབ་སོ་སོས་ཁྲིམས་བཟོ་ལྷན་ཁང་དང་སྲིད་གཞུང་། ཁྲིམས་འཛིན་ལྷན་ཁང་བཅས་ཀྱི་ངོས་ནས་རང་ཉིད་ཀྱི་མངའ་ཁོངས་ནང་གདུག་རྩུབ་ཁྲིམས་གཅོད་རིགས་བཀག་སྡོམ་བྱེད་དགོས་པ་དང་། རྒྱལ་ཁབ་ཀྱི་ཆབ་སྲིད་ལ་གཡོ་འགུལ་དང་དམག་འཁྲུག་འབྱུང་ཉེན། དམག་འཁྲུག་གི་གནས་སྐབས་སོགས་སྤྱི་ཚོགས་གནས་སྟངས་ག་འདྲ་ཞིག་གི་འོག་ཏུའང་། སྲིད་གཞུང་དང་དཔོན་རིགས་གང་གི་བཀའ་མངགས་ལྟར་གདུག་རྩུབ་ཁྲིམས་གཅོད་རིགས་གཏན་ནས་ལག་བསྟར་བྱེད་མི་ཆོག་པར་གཏན་འགོག་བྱེད་དགོས་པ་གསལ་ཡོད།

ཉེ་ཆར་རྒྱ་གཞུང་གིས་བོད་རང་སྐྱོང་ལྗོངས་ནག་ཆུ་ས་ཁུལ་གྱི་ཁོངས་གཏོགས། ཁམས་སོག་རྫོང་ཙན་དན་དགོན་པའི་གྲྭ་དགེ་འདུན་གྲགས་པ་དང་ཆོས་དབྱིངས་སྐལ་ལྡན། ཁྲི་རྡོ་ཡུལ་ཚོའི་དྲིལ་མདའ་དགོན་པའི་གྲྭ་ཚངས་དབྱངས་རྒྱ་མཚོ་དང་ཚེ་དབང་། ཨ་ཚེ། རྒྱལ་མཚན་བཅས་གྲྭ་ ༦ སྔ་ཕྱིར་འཇུ་བཟུང་བཀག་ཉར་བྱས་ཡོད་པ་དང་། ཙན་དན་དགོན་པའི་གྲྭ་རྣམ་རྒྱལ་ཚུལ་ཁྲིམས་ལྟ་རྟོགས་བཀག་སྡོམ་འོག་ཡོད་འདུག དེ་བཞིན། ས་གནས་མི་མང་དང་གྲྭ་བཙུན་མང་པོར་གང་བྱུང་ཉེས་འདོགས་འོག་འབོད་འགུགས་འདྲི་གཅོད་བྱེད་བཞིན་ཡོད་འདུག

འདི་ག་ལྟེ་གནས་ཁང་ལ་གནས་ཚུལ་འབྱོར་དོན། ཕྱི་ལོ་ ༢༠༡༤ ཟླ་ ༣ ཚེས་ ༡༤ ཉིན། ཁམས་སོག་རྫོང་ཙན་དན་དགོན་པའི་ནང་དུ་རྒྱ་གཞུང་གི་རྒྱལ་དར་མེར་སྲེག་བཏང་བ་མ་ཟད། དགོན་པར་བཅའ་སྡོད་ལས་བྱེད་ཀྱི་སྒོ་ངོས་སུ་“བོད་རང་བཙན་ཡིན”ཞེས་པའི་ཡི་གེ་བྲིས་པར་བརྟེན། རྒྱ་གཞུང་ཉེན་རྟོག་པས་དོགས་གཞིའི་འོག་གྲྭ་དགེ་འདུན་གྲགས་པ་འཇུ་བཟུང་བཙན་འཁྲིད་བྱས་ཡོད་འདུག གྲྭ་དགེ་འདུན་གྲགས་པ་ནི་སོག་རྫོང་གཡག་ལ་ཡུལ་ཚོའི་གཡང་ངེ་གྲོང་གི་གཡང་གཟིགས་ཚང་གི་ཡིན་པ་དང་། ད་ལྟ་ཁོང་རང་ལོ་ ༢༠ རེད་འདུག

དེ་བཞིན། ཕྱི་ལོ་ ༢༠༡༤ ཟླ་ ༣ ཚེས་ ༡༦ ཉིན། སོག་རྫོང་ཙན་དན་དགོན་གྱི་གྲྭ་པ་ཆོས་དབྱིངས་སྐལ་ལྡན་ལགས་ཀྱིས། རྒྱ་ནག་གཞུང་ལ་ངོ་རྒོལ་གྱི་རྩོམ་ཡིག་ཅིག་འཕྲིན་ཐུང་བརྒྱུད་གྲོགས་པོ་ཚོ་དང་། དགོན་པའི་ནང་གི་ལས་དོན་འགོ་ཁྲིད་ཚོའི་ཁ་པར་ཐོག་བསྐུར་བར་བརྟེན། རྒྱ་གཞུང་གི་ཉེན་རྟོག་པས་ཁོང་འཇུ་བཟུང་བཙན་འཁྲིད་བྱས་ཡོད་འདུག ད་ལྟའི་ཆར་ཁོང་གང་དུ་བཀག་ཉར་བྱས་ཡོད་མེད་ཤེས་རྟོགས་ཐུབ་པ་རེད། གྲྭ་ཆོས་དབྱིངས་སྐལ་ལྡན་ལགས་ནི་སོག་རྫོང་གཡག་ལ་ཡུལ་ཚོའི་གཡེག་གུ་གྲོང་གི་ལྷ་འཁྱིལ་ཚང་གི་ཡིན་པ་དང་། ད་ལྟ་ཁོང་རང་ལོ་ ༢༠ ཡིན་འདུག