བོད་མིའི་ཐོབ་ཐང་འཐབ་རྩོད་པ་ཚེ་རིང་མཚོ་ལགས་ཀྱིས་རྒྱ་གཞུང་གིས་རྒྱ་བོད་གཉིས་ཀྱི་བར་མི་རིགས་དབྱེ་འབྱེད་བྱེད་ཀྱིན་ཡོད་པ་ཐེར་འདོན་བྱས་པས་འཇུ་བཟུང་བཀག་ཉར་བྱས་འདུག 

ཕྱི་ཟླ་ ༡༠ པའི་ཚེས་ ༡༦ ཉིན་སྤེལ་བའི་བརྙན་ཐུང་ནང་དུ་ཚེ་རིང་མཚོ་ལགས་ཀྱིས་རྒྱ་སྐད་ཀྱི་ལམ་ནས་གསུང་དོན་ལ་“དེང་གི་དུས་སུ་རང་གིས་མི་ཚེ་གང་པོར་སློབ་སྦྱོང་བྱས་ཤིང་རང་གི་རྨི་ལམ་དང་རེ་འདུན་ལྟར་ཕ་ཡུལ་ནས་བྱ་གཞག་ཅིག་སྒྲུབ་ཐབས་བྱས་ན་ལས་ཁུངས་འདྲ་མིན་གྱི་དཔོན་པོ་ཚོས་ཡོད་ཚད་ཁོང་ཚོར་དབང་བར་སྙམ་པའི་ས་བདག་རིང་ལུགས་ཀྱི་བསམ་བློ་དེའི་འོག་ནས་དབང་ཆ་སྒེར་གཅོད་བྱས་ཏེ་མཐའ་ན་བུད་མེད་ཀྱི་བྱུག་རྫས་ཤིག་བཟོས་པ་ཡིན་ན་ཡང་། གཡས་གཡོན་ཚང་མ་ནས་བཤུ་གཞོག་བྱེད་ཀྱིན་འདུག ཁོང་ཚོ་ནི་མཚོ་གྲུ་གཅིག་གི་ནང་གི་ཇག་ཚོགས་རེད། རང་གི་ཕ་ཡུལ་དུ་ཚོང་ལས་འཛུགས་བསྐྲུན་ཞིག་བྱེད་འདོད་ན་ཁོང་ཚོས་ཡར་ལངས་རྒྱུ་མེད་པ་བཟོ་ཐག་གཅོད་རེད་འདུག ཚོང་ལས་ཙག་ཙིག་ཅིག་གཉེར་རྒྱུའི་དེབ་སྐྱེལ་ཞུ་དགོས་ནའང་ཡིན་གཅིག་དཔོན་པོ་ཚོའི་ཁ་ལ་ཉན་དགོས་པ་བཟོས་འདུག དེ་འདྲ་མ་བྱས་ན་ཁོང་ཚོས་ཐབས་བརྒྱ་ཇུས་སྟོང་གིས་ཁྱོད་རང་རྩ་མེད་བཟོ་སེམས་ཐག་རེད་འདུག འདི་ནི་སློབ་ཆེན་སློབ་མ་ཚོས་ས་གནས་རང་ནས་བྱ་བ་སྒྲུབ་མི་ཐུབ་པ་དང་འཛུགས་སྐྲུན་མི་ཐུབ་པའི་རྒྱུ་རྐྱེན་གཙོ་བོ་དེ་རེད།  འོ་ན་ང་ཚོས་གནད་དོན་འདི་ཇི་ལྟར་གདོང་ལེན་བྱེད་དགོས་རེད་ལབ་ན། ཁོ་ཚོས་ས་བདག་རིང་ལུགས་དང་སྒེར་གཅོད་དཔོན་པོའི་བསམ་བློ་དེ་ལ་འཐབ་དགོས།  དཔོན་པོ་ཆགས་རྗེས་རང་གི་ཟླ་ཕོགས་བླངས་ནས་ཁུ་སིམ་མེར་ལས་དོན་སྒྲུབ་རོགས། ང་ཚོ་རྟག་པར་གྱོང་ཁུར་ནས་འདུག་མཁན་དེ་འདྲ་མིན། གལ་ཏེ་ཡིན་གཅིག་ཁྲིམས་འགལ་གྱི་བྱ་བ་དེ་དག་བསྒྲུབ་དགོས་ན་ང་ཚོ་ཁྲིམས་ཁང་ནས་ཐུག ཐབས་གཞན་གང་ཡང་མི་འདུག རྒྱལ་ཁབ་ཀྱིས་ཀྱང་ཁྲིམས་འགལ་དེ་རིགས་དག་ཐེར་བྱེད་བཞིན་ཡོད་རེད་”སོགས་གསུངས་འདུག 

དེ་བཞིན་ཕྱི་ཟླ་ ༡༠ པའི་ཚེས་ ༡༩ ཉིན་སྤེལ་བའི་བརྙན་ཐུང་ནང་དུ་ཁོ་མོས་ཕྱི་ལོ་ ༢༠༡༦ ལོར་ཡུལ་ཤུལ་གྲོང་ཁྱེར་དུ་ཚོང་ཁང་བཙུགས་ཀྱང་རྗེས་སུ་བཙན་ཤེད་ཀྱིས་ཕྱིར་ཕུད་བྱས་ཡོད་པ་དང་མོ་རང་ཡང་བསྐྱར་ཡོང་ནས་ཡུལ་ཤུལ་དུ་ཚོང་གི་རྩ་བ་བཙུགས་ནས་འཕེལ་རྒྱས་གཏོང་ཐུབ་པ་བྱ་རྒྱུ་ཡིན་ཞེས་གསུངས་འདུག་ཅིང་ཡུལ་ཤུལ་སོགས་བོད་ཁུལ་ཡོངས་ལ་དྲང་བདེན་མ་ཡིན་པའི་གནད་དོན་མང་པོ་འབྱུང་བཞིན་པ་དཔེ་མཚོན་གྱི་ལམ་ནས་གསུངས་འདུག