ཉེ་ལམ་རེས་གཟའ་མིག་དམར་ཉིན་མཉམ་འབྲེལ་རྒྱལ་ཚོགས་སྤྱི་ཁྱབ་ལྷན་ཚོགས་ཀྱི་རྒྱལ་ཁབ་ ༡༥༤ ཡིས་རྒྱབ་སྐྱོར་གྱི་འོས་ཤོག་འཕངས་ཏེ་རྒྱ་ནག་བསྐྱར་དུ་འགྲོ་བ་མིའི་ཐོབ་ཐང་ལྷན་ཁང་གི་ཚོགས་མིར་འོས་འདེམས་བྱས་སོང་། འདི་ནི་རྒྱ་ནག་ཚོགས་མིར་འདེམས་ཐོན་བྱུང་བ་ཐེངས་དྲུག་པ་ཆགས་ཡོད་ཅིང་འོས་ཤོག་གི་གྲངས་ཚད་དེ་ནི་ཕྱི་ལོ་ ༢༠༢༠ ལོ་དང་བསྡུར་ན་རྒྱལ་ཁབ་ ༡༥ ཡི་རྒྱབ་སྐྱོར་མང་དུ་ཕྱིན་ཡོད། འགྲོ་བ་མིའི་ཐོབ་ཐང་ལྷན་ཁང་ནི་རྒྱལ་སྤྱིའི་ཁྱོན་ཡོངས་སུ་འགྲོ་བ་མིའི་ཐོབ་ཐང་འགན་སྲུང་དར་སྤེལ་བྱ་རྒྱུའི་འགན་འཁྲི་ཡོད་པའི་མཉམ་འབྲེལ་རྒྱལ་ཚོགས་ཀྱི་ལས་ཁུངས་གཙོ་བོ་དེ་ཡིན།
ཡིད་སྐྱོ་བའི་གནས་ཚུལ་དེའི་ཐད་འདི་ག་ལྟེ་གནས་ཁང་གི་འཛིན་སྐྱོང་འགན་འཛིན་བསྟན་འཛིན་ཟླ་བ་ལགས་ཀྱིས་གསུང་དོན་ལ་“དུས་ཡུན་རིང་པོར་འགྲོ་བ་མིའི་ཐོབ་ཐང་རྡོག་རོལ་ཚབས་ཆེན་གཏོང་མཁན་གྱི་རྒྱལ་ཁབ་རྒྱ་ནག་ལྟ་བུ་ཞིག་བསྟུན་མར་འགྲོ་བ་མིའི་ཐོབ་ཐང་ལྷན་ཁང་གི་ཚོགས་མིར་འོས་འདེམས་བྱུང་བ་དེ་ནི་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གི་ལམ་ལུགས་ལ་འགོས་ནད་ལྕི་མོ་ཐེབས་ཡོད་པའི་མཚོན་རྟགས་ཤིག་རེད།”
“མཉམ་འབྲེལ་རྒྱལ་ཚོགས་ཀྱི་རྒྱལ་སྤྱིའི་འགྲོ་བ་མིའི་ཐོབ་ཐང་འགན་སྲུང་བྱེད་པའི་ནུས་ཚད་ཇེ་ཞན་དུ་གཏོང་ཐབས་སུ་རྒྱ་ནག་ལྟ་བུའི་སྲིད་དབང་སྒེར་འཛིན་པ་ཚོས་འཆར་གཞི་ལྡན་པའི་ལམ་ནས་རྒྱལ་སྤྱིའི་འགྲོ་བ་མིའི་ཐོབ་ཐང་གི་ལམ་ལུགས་ལོག་སྤྱོད་བྱེད་པ་དང་། འགོག་རྐྱེན་སློང་བ། ལག་བསྟར་ནུས་མེད་དུ་གཏོང་བ་སོགས་བྱེད་བཞིན་ཡོད་པ་རྒྱལ་སྤྱིའི་སྤྱི་ཚོགས་ཀྱི་མཐོང་ཆོས་སུ་གྱུར་ཡོད། ”
ད་ནི་འགྲོ་བ་མིའི་ཐོབ་ཐང་ལྷན་ཁང་གི་ཚོགས་མི་འདེམས་སྲོལ་གྱི་ལམ་ལུགས་ལ་དུས་མཐུན་གྱི་ལེགས་བཅོས་གཏོང་དགོས་པའི་དུས་ལ་འབབ་ཡོད། ཚོགས་མི་ ༤༧ ཡོད་པའི་འགྲོ་བ་མིའི་ཐོབ་ཐང་ལྷན་ཁང་གི་ཚོགས་མི་ཚོ་འཛམ་གླིང་གི་མངའ་ཁོངས་འདྲ་མིན་ནས་འདེམས་དགོས་པའི་ཆ་རྐྱེན་དེ་གལ་ཆེན་ཡིན་ཡང་། ས་ཁོངས་སོགས་རྒྱབ་ལྗོངས་མི་འདྲ་བ་ཡོང་ཐབས་སུ་དོན་གྱི་སྙིང་པོ་འགྲོ་བ་མིའི་ཐོབ་ཐང་བློས་གཏོང་བྱས་པ་ཡིན་ན་ཧ་ཅང་མི་འོས་པ་ཞིག་རེད། དེར་བརྟེན་ད་ནས་བཟུང་ཚོགས་མི་ཚོ་ཐོབ་ཐང་འགན་སྲུང་བྱེད་ཚད་ཀྱི་གནས་རིམ་ལྟར་འདེམས་དགོས་པ་ཤིན་ཏུ་གལ་ཆེ། འདེམས་ཚུལ་དེས་རྒྱ་ནག་ལྟ་བུའི་འགྲོ་བ་མིའི་ཐོབ་ཐང་རྡོག་རོལ་གཏོང་མཁན་གྱི་རྒྱལ་ཁབ་ཚོ་ལྷན་ཚོགས་སུ་ཞུགས་ནས་དེ་ཡི་བྱ་གཞག་ལ་ཚུལ་མིན་གྱི་སྟངས་འཛིན་བྱེད་པའི་བྱ་སྤྱོད་རིགས་འགོག་ཐུབ་པ་ཡིན།
རྒྱ་ནག་གིས་རང་འཁྲིའི་འགྲོ་བ་མིའི་ཐོབ་ཐང་འགན་སྲུང་བྱེད་པའི་ལས་འགན་གཙང་ཁུར་ཐོག་འགྲོ་བ་མིའི་ཐོབ་ཐང་གི་གནས་བབ་ཡར་རྒྱས་གང་ཡང་གཏོང་ཐུབ་མེད་པས་དེ་ཉིད་རྒྱལ་སྤྱིའི་སྤྱི་ཆིངས་དྲུག་གི་ཆིངས་གནས་རྒྱལ་ཁབ་ཀྱི་ངོ་བོར་བསྡད་ཀྱང་དགེ་མཚན་ཅི་ཡང་མེད། དོན་དངོས་ཐོག་རྒྱ་ནག་གཞུང་གི་འོག་ནས་བོད་ནང་གི་འགྲོ་བ་མིའི་ཐོབ་ཐང་གི་གནས་བབ་དུས་ནས་དུས་སུ་ཇེ་ངན་ཇེ་སྡུག་ཏུ་གྱུར་ཏེ་ད་ལྟའི་ཆར་མིའི་རིགས་ལ་རྒོལ་བའི་ནག་ཉེས་ཀྱི་ཚད་དུ་སླེབས་ཡོད་པའི་དཔང་རྟགས་རིམ་བཞིན་འབྱུང་བཞིན་ཡོད།
རྒྱ་ནག་ལྟ་བུའི་འགྲོ་བ་མིའི་ཐོབ་ཐང་རྡོག་རོལ་ཚབས་ཆེན་གཏོང་མཁན་གྱི་རྒྱལ་ཁབ་ཅིག་འདི་ལྟར་བསྟུན་མར་འགྲོ་བ་མིའི་ཐོབ་ཐང་ལྷན་ཁང་གི་ཚོགས་མིར་འདེམས་པ་དེ་ནི་ལྷན་ཁང་གི་དགོས་དམིགས་ལ་རྒྱབ་འགལ་བྱས་པ་ཡིན་ལ། དེས་སྲིད་དབང་སྒེར་གཅོད་ཚོས་འགྲོ་བ་མིའི་ཐོབ་ཐང་རྩིས་མེད་གཏོང་བའི་ལམ་ལུགས་ལ་རྒྱབ་སྐྱོར་བྱས་པའི་རྣམ་པ་ཞིག་ཏུ་འགྱུར་བའི་ཉེན་ཁའང་ཡོད། དེར་བརྟེན་མཉམ་འབྲེལ་རྒྱལ་ཚོགས་ཀྱི་ཚོགས་ཞུགས་རྒྱལ་ཁབ་ཚོ་ཐེ་བའི་རྒྱལ་སྤྱིའི་སྤྱི་ཚོགས་ཧྲིལ་པོས་རྒྱ་ནག་གི་དབང་དུ་བློས་གཏོང་ཚད་མེད་བྱས་ཏེ་འགྲོ་བ་མིའི་ཐོབ་ཐང་རྩོད་ལེན་བྱེད་མཁན་སྙིང་སྟོབས་ཅན་གྱི་ཐོབ་ཐང་དོན་གཉེར་བ་ཡོངས་ལ་ཁ་ཞེ་གཉིས་མེད་ཀྱིས་རྒྱབ་སྐྱོར་བྱ་དགོས་པ་ནི་དོར་དུ་མེད་པའི་འགན་འཁྲི་ཞིག་ཡིན།
