འདི་ལོ་ཕྱི་ཟླ་ ༦ པའི་ཚེས་ ༡༠ ཉིན་ཡུལ་སྐོར་སྣེ་ཤན་པ་ཚེ་རིང་སྐྱིད་ལགས་ཀྱིས་སླར་ཡང་སྦྲ་ཆེན་རྫོང་རྒྱ་གཞུང་ཉེན་རྟོག་པས་བོད་ཀྱི་དགེ་འདུན་པ་གཉིས་ལ་མི་རིགས་དབྱེ་འབྱེད་ལག་བསྟར་བྱས་པར་གདོང་ལེན་བྱས་ཏེ་ཉེན་རྟོག་པར་ཁ་རྩོད་དྲག་པོ་བྱས་ཤིང་། ཕྱིས་སུ་སྐབས་དེའི་མི་རིགས་དབྱེ་འབྱེད་ཀྱི་གནས་ཚུལ་ཆ་ཚང་དཔང་རྟགས་དང་བཅས་སྤྱི་ཚོགས་དྲྭ་ལམ་དུ་སྤེལ་བར་བརྟེན་ཕྱི་ཟླ་ ༦ ཕའི་ཚེས་ ༢༩ ཉིན་ཡུལ་ཤུལ་གྲོང་ཁྱེར་ཉེན་རྟོག་པས་ཁོ་མོ་འཇུ་བཟུང་བྱས་ཏེ་“སྤྱི་ཚོགས་བདེ་འཇགས་ལ་གནོད་སྐྱོན”བཏང་བའི་ཉེས་མིང་འོག་ཉིན་གྲངས་བཅུ་ཙམ་ལ་སྲིད་འཛིན་བཀག་ཉར་བྱས་འདུག འདི་ནི་ཉེ་བའི་ལོ་ལྔའི་ནང་ཚུན་དུ་ཁོ་མོ་འཇུ་བཟུང་བྱེད་ཐེངས་བཞི་པ་དེ་ཆགས་ཡོད།
ཉེ་ལམ་ཕྱི་ཟླ་ ༦ པའི་ནང་དུ་ཚེ་རིང་མཚོ་ལགས་ཀྱིས་དགེ་འདུན་པ་ཁ་ཤས་ཁྲིད་ནས་ལྷ་ས་དང་སྟོད་ཀྱི་ཙ་རི་སོགས་སུ་གནས་སྐོར་ལ་སྐྱོད་སྐབས། ཕྱི་ཟླ་ ༦ ཚེས་ ༡༠ ཉིན་གྱི་དགོང་མོ་ཆུ་ཚོད་ ༥ ཡས་མས་སུ་ནག་ཆུ་གྲོང་ཁྱེར་སྦྲ་ཆེན་རྫོང་སྒོམ་རི་གྲོང་རྡལ་ཉེན་རྟོག་པས་དགེ་འདུན་པ་རྣམས་ལ་དགོན་པའི་དོ་དམ་ཨུ་ཡོན་ལྷན་ཁང་ཟེར་བ་དང་ས་གནས་སྲིད་གཞུང་གི་ཆོག་མཆན་མེད་པར་འགྲོ་མི་ཆོག་ཚུལ་བཤད་ནས་ཆུ་ཚོད་གཅིག་ཙམ་བཀག་འདུག དེ་ནས་སྦྲ་ཆེན་རྫོང་ཐོག་ཏུ་སླེབས་རྗེས་རྫོང་ཉེན་རྟོག་པས་མཚན་མོར་དགེ་འདུན་པ་མཐུ་སྟོབས་རྣམ་རྒྱལ་ལགས་དང་དགེ་འདུན་པ་གཞན་ཞིག་ཉེན་རྟོག་ཁང་དུ་བཙན་ཁྲིད་བྱས་འདུག ཚེ་རིང་མཚོ་ལགས་ཀྱིས་ཉེན་རྟོག་ལས་ཁུངས་ལ་ཁ་པར་བརྒྱབས་ནས་རྒྱ་མི་ཚོ་ལ་ཆོག་མཆན་སོགས་ཅི་ཡང་མི་དགོས་པ་ནང་བཞིན་མི་རིགས་འདྲ་མཉམ་གྱི་ཁྲིམས་དང་སྲིད་ཇུས་ལག་བསྟར་ཆེད་དགེ་འདུན་པ་ཚོའི་དགོངས་ཤོག་ཁུར་མེད་ཚུལ་དང་སྦྲ་ཆེན་ཉེན་རྟོག་པས་རྒྱ་ནག་གི་ཁྲིམས་དང་སྲིད་ཇུས་ལ་རྩིས་མེད་རྡོག་རོལ་བཏང་ནས་དགེ་འདུན་པ་གཉིས་པོ་ཁྲིམས་འགལ་ངང་འཇུ་བཟུང་བྱས་པ་འཕྲལ་དུ་གློད་བཀྲོལ་གཏོང་དགོས་ཚུལ་ནན་བཤད་གནང་འདུག སྦྲ་ཆེན་ཉེན་རྟོག་པས་དང་ཐོག་དགེ་འདུན་པ་གཉིས་འཇུ་བཟུང་བྱས་ཡོད་པ་ངོས་ལེན་མ་བྱས་ཀྱང་མཐར་ཁོང་གཉིས་འདྲི་རྩད་ཆེད་ཁྲིད་པ་ཡིན་ཚུལ་དང་ཉེན་རྟོག་པར་གཞོགས་འདེགས་ཡག་པོ་བྱས་ན་འདྲི་རྩད་ཚར་བ་དང་གློད་རྒྱུ་ཡིན་ཚུལ་བཤད་འདུག ཚེ་རིང་མཚོ་ལགས་ཀྱིས་ལག་བསྟར་དེ་ནི་ཞི་ཅིན་ཕིང་གི་མི་རིགས་འདྲ་མཉམ་གྱི་སྲིད་ཇུས་ལམ་སྟོན་དང་མི་རིགས་འདྲ་མཉམ་གྱི་ཁྲིམས་སྲིད་ཁག་དང་འགལ་ཡོད་པས་སྦྲ་ཆེན་རྫོང་སྔ་ཕྱི་བར་གསུམ་ལ་འདི་ལྟར་དབང་ཆ་ལོག་སྤྱོད་བྱེད་པའི་ལག་བསྟར་དེ་ཉིད་མཚམས་འཇོག་དགོས་ཚུལ་ཤོད་སྐབས་ཉེན་རྟོག་པས་ལས་ཁུངས་རེ་རེ་ལ་སྒྲིག་ཁྲིམས་མི་འདྲ་བ་རེ་ཡོད་ཚུལ་སོགས་ཀྱི་ལན་འདེབས་བྱས་འདུག
ཚེ་རིང་མཚོས་མུ་མཐུད་སྦྲ་ཆེན་རྫོང་དང་ནག་ཆུ་གྲོང་ཁྱེར་གྱི་ཉེན་རྟོག་ལས་ཁུངས་སོགས་སུ་ཚ་འདེད་ཡང་ཡང་བྱས་མཐར་མཚོན་མོའི་ཆུ་ཚོད་གསུམ་པ་ཡས་མས་སུ་དགེ་འདུན་པ་གཉིས་གློད་གྲོལ་ཐོབ་པ་བྱུང་འདུག
འདི་ནི་ཚེ་རིང་མཚོ་ལགས་ཀྱིས་རྒྱ་གཞུང་གི་མི་རིགས་དབྱེ་འབྱེད་བྱེད་པའི་ལག་བསྟར་ལ་སྐྱོན་བརྗོད་བྱས་ཏེ་བོད་མི་རྣམས་ལ་རྒྱ་རིགས་དང་འདྲ་མཉམ་གྱི་འགྲོ་འོང་ཐོབ་ཐང་དགོས་པ་རྩོད་ལེན་གནང་བའི་རྐྱེན་གྱིས་འཇུ་བཟུང་བཀག་ཉར་བྱས་པ་ཐེངས་བཞི་པ་དེ་ཆགས་ཡོད།
ན་ནིང་ཕྱི་ཟླ་ ༡༢ པའི་ནང་དུ་ཡང་སྦྲ་ཆེན་རྫོང་ཉེན་རྟོག་པས་ཚེ་རིང་མཚོ་ལགས་ཀྱིས་འགྲིམ་འགྲུལ་ཞིབ་བཤེར་ལ་གཞོགས་འདེགས་བྱས་མེད་པ་མ་ཟད་དྲྭ་ལམ་དུ་གནས་ཚུལ་ལ་འཁྱོག་བརྗོད་བྱས་ཚུལ་སོགས་བསྙད་དེ་ཉིན་གྲངས་བཅོ་ལྔའི་རིང་སྲིད་འཛིན་བཀག་ཉར་བྱས།
དེའི་སྔོན་ཙམ་གྱི་ཕྱི་ཟླ་ ༡༡ པའི་ནང་དུའང་ཁོ་མོས་རྒྱ་ནག་གཞུང་ཕྱོགས་ནས་རྒྱ་བོད་མི་རིགས་དབར་དབྱེ་འབྱེད་བྱེད་ཀྱི་ཡོད་པའི་གནས་ཚུལ་དང་བོད་ཡུལ་དུ་ཚོང་ལས་འཛུགས་བསྐྲུན་སོགས་སྤེལ་བར་ལས་ཁུངས་འདྲ་མིན་གྱི་དཔོན་པོ་ཚོས་བཤུ་གཞོག་བྱས་ནས་མགོ་འགྱོག་ཐབས་མེད་པ་བཟོ་བཞིན་པ་སོགས་ཀྱི་གནས་ཚུལ་བརྙན་ཐུང་གི་ལམ་ནས་མོ་རང་གི་སྤྱི་ཚོགས་དྲྭ་བྱང་སྐད་འཕྲིན་དང་འཁྱུག་དབྱངས་སོགས་སུ་སྤེལ་བར་བརྟེན་ཡུལ་ཤུལ་གྲོང་ཁྱེར་ཉེན་རྟོག་པས་“དྲྭ་རྒྱའི་སྒྲིག་ལམ་གཏོར་བཤིག་”དང་“གྲོང་ཁྱེར་གྱི་བདེ་འཇགས་གཏོར་བཤིག་”བཏང་སྟེ་“བསྙད་བརྐོ་ཟིང་སློང་”བྱས་པའི་ཉེས་མིང་འོག་ཉིན་གྲངས་བཅོ་ལྔ་ཙམ་ལ་འཇུ་བཟུང་བཀག་ཉར་བྱས།
དེ་བཞིན་སྔོན་ཕྱི་ལོ་ ༢༠༢༠ ལོའི་ཟླ་ ༡༡ པའི་ནང་དུའང་དྲྭ་ལམ་དུ་རྒྱལ་ཁབ་བདེ་འཇགས་དང་འབྲེལ་བའི་གནས་ཚུལ་སྤེལ་བར་བསྙད་དེ་ཚེ་རིང་མཚོ་ལགས་ཟི་ལིང་གྲོང་ཁྱེར་ནས་འཇུ་བཟུང་བྱས་རྗེས་ཁྲི་ཀ་རྫོང་བཀག་ཉར་ཁང་དུ་ཉིན་གྲངས་ ༡༠ རིང་བཅུག་ཅིང་རྒྱ་སྒོར་ ༡༠༠༠ གི་དངུལ་ཆད་བཅད་འདུག སྐབས་དེར་བཀག་ཉར་ཁང་དུ་བཅུག་པའི་རིང་ཉིན་ལྟར་ཟས་སུ་ཆུ་རྐྱང་དང་རླངས་བཙོས་བག་ལེབ་ཙམ་ལས་མ་སྤྲད་པར་ལྟོགས་སྐོམ་གྱི་མནར་གཅོད་བཏང་ཡོད་པ་མ་ཟད། ཉེན་རྟོག་པས་རྟག་ཏུ་ཁོང་མོ་དང་ལོ་ན་ ༨༠ སོན་པའི་ཁོང་མོའི་ཕ་རྒན་སོགས་ཁྱིམ་མི་ཡོངས་ལ་འཇིགས་སྐུལ་ཡང་ཡང་བྱས་པའི་གནས་ཚུལ་བྱུང་ཡོད།
ཕྱི་ལོ་ ༢༠༡༧ ལོར་ཚེ་རིང་མཚོས་ཡུལ་ཤུལ་ཁུལ་གྱི་ས་གནས་བོད་མི་ཚོར་རྒྱ་ནག་གཞུང་གིས་ཕྱི་བསྐྱོད་ལག་ཁྱེར་སྤྲོད་དགོས་ཞེས་ཁྲིམས་ལུགས་གཞིར་བཟུང་འབོད་སྐུལ་བྱས་རྗེས་ཡུལ་ཤུལ་ཁུལ་སྤྱི་བདེ་མི་སྣས་མི་བཏང་ནས་ཁོང་མོར་ཉེས་རྡུང་ཚབས་ཆེན་བཏང་པ་དང་རྗེས་ནས་མི་དེ་ཚོ་སྤྱིར་བཏང་གི་མི་སེར་ཡིན་པ་དང་ཆང་བཏུང་རྗེས་དོན་མེད་ཉེས་རྡུང་བཏང་བ་རེད་ལབ་ནས་ཁོང་མོར་དྲང་བདེན་གྱི་ཐག་གཅོད་བྱས་མེད་པ་སོགས་ཀྱི་བདེན་དཔང་ཡི་གེ་དྲ་ལམ་ཁག་ཏུ་བཀྲམས་མྱོང་།
ཚེ་རིང་མཚོ་ལགས་ནི་མདོ་སྨད་ཁྲི་ཀ་རྫོང་ནས་ཡིན་ཞིང་ད་ལྟའི་ཆར་སྐྱེ་དགུ་མདོ་རུ་གནས་སྡོད་གནང་སྟེ་དུས་རྒྱུན་བོད་ལྗོངས་འཛམ་གླིང་ཡུལ་སྐོར་ཀུང་ཟི་ཞེས་པར་ཡུལ་སྐོར་ལས་རིགས་གཉེར་བཞིན་ཡོད་པ་དང་ལྷ་ས་དང་མངའ་རིས་སོགས་བོད་ཁུལ་དང་དེ་མིན་ཕྱི་རྒྱལ་ཡུལ་གྲུ་ཁག་ཏུ་ཡུལ་སྐོར་འགྲིམ་འགྲུལ་གོ་སྒྲིག་ཞུ་བཞིན་ཡོད་པ་རེད།
ཕྱི་ལོ་ ༢༠༡༨ ལོའི་མཉམ་འབྲེལ་རྒྱལ་ཚོགས་ཀྱིས་རྒྱ་ནག་གི་འགྲོ་བ་མིའི་ཐོབ་ཐང་གི་རེས་འཁོར་ཞིབ་བཤེར་བྱས་པའི་མཐའ་བསྡོམས་ཞིབ་དཔྱད་ནང་དུ་རྒྱལ་ཚོགས་ཀྱི་རིགས་རུས་དབྱེ་འབྱེད་འགོག་པའི་ཚོགས་ཆུང་གིས་རྒྱ་གཞུང་གི་ངོས་ནས་བོད་མི་རྣམས་ལ་འགྲིམ་འགྲུལ་དང་འགུལ་སྐྱོད་ཀྱི་རང་དབང་གཅིག་མཚུངས་ཐོབ་ཕྱིར་དུ་སྒྲིག་གཞི་ལག་བསྟར་ཁག་ལ་བསྐྱར་ཞིབ་དགོས་པའི་དགོངས་འཆར་གནང་ཡོད།
རྒྱ་ནག་གི་ཉེས་དོན་ཁྲིམས་ཡིག་གིས་ཀྱང་རྩ་ཁྲིམས་སོགས་སུ་གསལ་བའི་ཁས་ལེན་དང་ཡོངས་སུ་འགལ་ནས་ཉེན་རྟོག་པས་གང་བྱུང་འཇུ་བཟུང་དང་ཁྲིམས་ཀྱི་བརྒྱུད་རིམ་ལ་བསྟུན་མི་དགོས་པར་སྲིད་འཛིན་བཀག་ཉར་བྱ་རྒྱུའི་དབང་ཚད་སྤྲད་ཡོད་པ་མ་ཟད་ལྷག་པར་དུ་“རྒྱལ་ཁབ་བདེ་འཇགས་”ཟེར་བར་སྦྲེལ་ནས་དུས་ཡུན་ངེས་མེད་ལ་བཙན་དབང་འོག་གར་སོང་ཆ་མེད་དུ་གཏོང་བའི་ཁྲིམས་འགལ་གྱི་སྦྱོར་བ་ལག་བསྟར་བྱ་རྒྱུའི་དབང་ཚད་ཀྱང་སྤྲད་ཡོད།
འདི་ག་ལྟེ་གནས་ཁང་གིས་རྒྱ་ནང་གཞུང་གི་རང་གི་རྩ་ཁྲིམས་སུ་གསལ་བའི་མི་ཐམས་ཅད་འདྲ་མཉམ་ཡིན་པའི་རྩ་དོན་དངོས་སུ་ལག་བསྟར་བྱས་ཏེ་བོད་མི་ཚོར་ནང་ཁུལ་གྱི་གནས་མཇལ་འགྲོ་སྐྱོད་དང་ཕྱི་སྐྱོད་གཉིས་ཀའི་བཀག་རྒྱ་མཐའ་དག་བཀྲོལ་ནས་ཐོབ་ཐང་འདྲ་མཉམ་སྤྲོད་དགོས་པའི་འབོད་སྐུལ་ནན་པོ་ཞུ་རྒྱུ་ཡིན།