དེ་རིང་བཙན་དབང་འོག་གར་སོང་ཆ་མེད་དུ་གྱུར་བའི་མནར་གཅོད་ཕོག་མཁན་རྣམས་ཀྱི་རྒྱལ་སྤྱིའི་ཉིན་མོ་ཐེངས་ ༤༡ པར་འདི་ག་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གིས་ཆོས་ལུགས་དད་མོས་མི་འདྲ་བ་དང་རིག་གཞུང་གི་ངོ་བོ་མི་འདྲ་བའི་དབང་གིས་རྒྱ་གཞུང་གིས་བཙན་དབང་འོག་གར་སོང་ཆ་མེད་དུ་བཏང་བ་དང་། གང་བྱུང་འཇུ་བཟུང་བྱས་པ། རྡུང་རྡེག་སྡུག་སྦྱོང་བཏང་བ་སོགས་མནར་གཅོད་ཕོག་མཁན་རྣམས་དང་འབྲེལ་ཡོད་ནང་མི་ཡོངས་ལ་གདུང་སེམས་མཉམ་སྐྱེད་ཞུ་རྒྱུ་ཡིན།
རྒྱ་ནག་གཞུང་གིས་རང་ཉིད་ཀྱི་འགྲོ་བ་མིའི་ཐོབ་ཐང་རྡོག་རོལ་གཏོང་བཞིན་པ་དེར་མངོན་གསལ་དོད་པོས་སྣང་མེད་བྱས་ཤིང་རྒྱལ་སྤྱིའི་སྤྱི་ཚོགས་ནས་དེ་འབྲེལ་གྱི་ཐལ་སྤྱོད་ཐེར་འདོན་བྱས་པ་དག་ཀྱང་སྣང་མེད་དུ་བཞག་པ་མ་ཟད། རྒྱ་ནག་གི་ཉེས་དོན་གཏུག་བཤེར་གྱི་ཁྲིམས་ཡིག་བསྐྱར་བཅོས་བཏང་སྟེ་བཙན་དབང་འོག་གར་སོང་ཆ་མེད་དུ་གཏོང་བའི་སྦྱོར་བ་དེ་ཉིད་ཁྲིམས་མཐུན་དུ་བཟོས་ཡོད། ཕྱི་ལོ་ ༢༠༡༢ ལོའི་ཟླ་ ༣ པའི་ནང་རྒྱལ་ཡོངས་མི་དམངས་འཐུས་མི་ཚོགས་ཆེན་ཟེར་བས་ལོ་འཁོར་ཚོགས་འདུའི་སྐབས་ཁྲིམས་ཡིག་བསྐྱར་བཅོས་དེ་ལ་མང་མོས་རྒྱབ་སྐྱོར་བྱས་ཏེ། རྒྱ་གཞུང་གི་སྲིད་བྱུས་ལ་སྐྱོན་བརྗོད་བྱེད་མཁན་རྣམས་དམིགས་འབེན་དུ་བཟུང་ནས་གཞུང་ངོས་ནས་མུ་མཐུད་བཙན་དབང་འོག་གར་སོང་ཆ་མེད་དུ་གཏོང་རྒྱུའི་བྱ་སྤྱོད་སྤེལ་བར་མཐུན་འགྱུར་བྱས་ཡོད།
བསྐྱར་བཅོས་བྱས་པའི་ཁྲིམས་ཡིག་གི་དོན་ཚན་ ༧༣ པས་བོད་མི་ཚོར་གོ་དོན་གསལ་ཁ་མིན་པའི་“རྒྱལ་ཁབ་བདེ་འཇགས་”དང་འབྲེལ་བའི་ཉེས་མིང་བཀལ་ཏེ་གསང་བའི་སྒོ་ནས་འཇུ་བཟུང་བཀག་ཉར་བྱ་རྒྱུའི་དབང་ཆ་སྤྲད་ཡོད། དེས་རྒྱ་ནག་རྒྱལ་ཁབ་ཀྱི་གོང་བུ་ཆིག་སྒྲིལ་དང་བརྟན་རླིང་ལ་ཉེན་ཁ་ཡིན་པར་ངོས་འཛིན་བྱས་པའི་བོད་མི་ཚོར་”ཁྲིམས་མཐུན་“ཡིན་ཟེར་ནས་འཇུ་བཟུང་བྱེད་པ་བརྒྱུད་གཞུང་ཕྱོགས་དང་མི་མཐུན་པའི་བསམ་ཚུལ་འདོན་མཁན་དང་སྐྱོན་བརྗོད་བྱེད་མཁན་རྣམས་ལ་དྲག་གནོན་བྱ་རྒྱུའི་ཆོག་མཆན་སྤྲད་ཡོད།
རྒྱ་ནག་གཞུང་གི་འོག་ཏུ་བཙན་དབང་འོག་གར་སོང་ཆ་མེད་དུ་གྱུར་བའི་གནས་ཚུལ་གྱི་གྲངས་ཚད་དངོས་ཤེས་རྒྱུར་དྲྭ་ལམ་གྱི་གནས་ཚུལ་སྟངས་འཛིན་དང་དྲྭ་འགོག་ལྕགས་རི་བཙུགས་ནས་གནས་ཚུལ་འགྲོ་འོང་ཐད་བཀག་བསྡོམས་ཆེན་པོ་བྱེད་བཞིན་ཡོད་པས་འགོག་རྐྱེན་བཟོས་ཡོད་ནའང་། མ་མཐའི་གྲངས་ཚད་དུ་བརྩི་ཆོག་པའི་གཞུང་འབྲེལ་གྱི་གྲངས་ཐོར་བལྟས་ནས་གནས་བབ་ཧ་ཅང་ཛ་དྲག་རང་བཞིན་དུ་གྱུར་ཡོད་པ་གསལ་པོར་རྟོགས་ཐུབ། རྒྱ་གཞུང་གིས་ཕྱི་ལོ་ ༢༠༡༣ ནས་ ༢༠༢༡ བར་མི་གྲངས་ ༥༣,༠༠༠ ནས་ ༩༠,༠༠༠ བར་ལ་གཏན་འཁེལ་བྱས་པའི་གནས་ཡུལ་དུ་བཀག་ཉར་ Residential Surveillance at Designated Location (RSDL) བྱས་ཡོད། བོད་མི་ཚོས་མུ་མཐུད་དེ་དྲག་གནོན་ཚབས་ཆེན་དང་བཙན་དབང་འོག་གར་སོང་ཆ་མེད་དུ་གཏོང་བའི་མནར་གཅོད་མྱོང་བཞིན་ཡོད་ལ། རྒྱ་ནག་གཞུང་ངོས་ནས་དེ་ལྟ་བུའི་དམ་དྲག་ཅན་གྱི་ལག་ལེན་མཚམས་འཇོག་བྱ་རྒྱུའི་རྣམ་འགྱུར་གང་ཡང་སྟོན་གྱི་མེད། དེ་ལས་ལྡོག་སྟེ་འགྲོ་བ་མིའི་ཐོབ་ཐང་གི་གནས་སྟངས་ཇེ་སྡུག་ཏུ་འགྲོ་བཞིན་ཡོད། རྒྱ་ནག་གཞུང་གིས་“བོད་བརྒྱུད་ནང་བསྟན་ཀྲུང་གོ་ཅན་དུ་བསྒྱུར་བ་”ཞེས་བོད་ཀྱི་ཆོས་ལུགས་ནང་དུ་དམར་ཤོག་གི་ལྟ་བ་འཇུག་ཐབས་བྱས་ནས་བོད་མིའི་ངོ་བོ་མེད་པ་བཟོ་རྒྱུར་དམིགས་ཡོད་ལ། བོད་ཕྲུག་ཚོར་རང་གི་སྐད་ཡིག་ཐོག་སློབ་སྦྱོང་བྱེད་རྒྱུའི་གོ་སྐབས་འཕྲོག་པ་དང་། དེ་བཞིན་བོད་མི་མང་པོར་ཉེས་མེད་ཉེས་འགེལ་དང་དབྱུག་པ་ལེབ་རྡུང་གི་ཉེས་ཆད་བཀལ་བ་བརྒྱུད་བོད་མིའི་སྤྱི་ཚོགས་གཏོར་བཤིག་གཏོང་བཞིན་པ་བཅས་འགྲོ་བ་མིའི་ཐོབ་ཐང་ལ་རྡོག་རོལ་གྱི་གནད་དོན་ཚབས་ཆེན་མང་དག་ཅིག་འབྱུང་བཞིན་ཡོད།
འདས་པའི་ལོ་བཞིའི་རིང་ལ་འདི་ག་ལྟེ་གནས་ཁང་གིས་བོད་ནང་དུ་བོད་མི་ ༦༣ ལྷག་བཙན་དབང་འོག་གར་སོང་ཆ་མེད་དུ་བཏང་བ་ཤེས་རྟོགས་བྱུང་ཡོད། གྲངས་ཚད་དེ་ནི་བཀག་རྒྱ་ཆེན་པོའི་ཁྲོད་ནས་ཤེས་རྟོགས་བྱུང་བ་ཞིག་ཡིན་པས་དེ་ནི་མ་མཐའི་གྲངས་ཚད་ཙམ་ལས་དངོས་ཡོད་གྲངས་ཀ་དེ་ལས་མཐོ་བ་ཚོད་དཔག་བྱེད་ཐུབ།
འདི་ལོའི་ཕྱི་ཟླ་ ༢ པའི་ནང་དུ་གཞས་པ་བགེགས་འཇོམས་ལགས་ཀྱིས་《སྐྱོ་གླུ་མཆི་མ་དགུ་འཁྱིལ་》ཞེས་པའི་གླུ་གཞས་ཤིག་བླངས་རྗེས། ས་གནས་ཉེན་རྟོག་པས་ཁོང་ཉེན་རྟོག་ལས་ཁུངས་སུ་འབོད་འགུག་བྱས་ཤིང་། དེ་ནས་ཆུ་ཚོད་འགའི་རྗེས་སུ་ཁོང་གར་སོང་ཆ་མེད་དུ་གྱུར་འདུག གླུ་གཞས་དེའི་ནང་དུ་“༧རྒྱལ་བ་མེད་པའི་རྒྱལ་ཁབ་འདི་ན།། འགོ་ཁྲིད་ཡོད་ཀྱང་རྫུན་མ་རེད་འདུག །”ཟེར་བ་སོགས་རྒྱ་ནག་གི་དབང་བསྒྱུར་ལ་བོད་མི་ཚོས་འདོད་མོས་མེད་པའི་རྣམ་འགྱུར་མཚོན་པར་བྱས་ཡོད།
ཕྱི་ཟླ་ ༣ པའི་ནང་དུའང་རྔ་བ་ཀིརྟི་དགོན་པའི་དགེ་འདུན་པ་པད་མ་ལགས་ཀྱིས་རྔ་བ་རྫོང་”དཔའ་བོའི་སྲང་ལམ་”སྟེང་དུ་༸གོང་ས་མཆོག་གི་སྐུ་པར་འཁྱེར་ནས་ཞི་བའི་ངོ་རྒོལ་གནང་བའི་རྐྱེན་གྱིས་ས་གནས་སྤྱི་བདེ་ཉེན་རྟོག་པས་ཁོང་འཇུ་བཟུང་བྱས་ཏེ་གསང་བའི་བཀག་ཉར་བྱས་འདུག ས་གནས་ཀྱི་དཔང་པོ་ཚོས་བཤད་པ་ལྟར་ན། པད་མ་ལགས་ཀྱིས་”༸རྒྱལ་བ་རིན་པོ་ཆེ་བོད་དུ་གདན་འདྲེན་ཞུ་དགོས།” ཟེར་བ་དང་། “བོད་ནང་ཆོས་དད་རང་དབང་དགོས།” ཞེས་པ་སོགས་ཀྱི་འབོད་ཚིག་སྒྲོག་བཞིན་ཡོད་པ་གོ་ཐོས་བྱུང་འདུག དོན་རྐྱེན་དེའི་རྗེས་སུ་རྒྱ་ནག་གི་བདེ་འཇགས་དམག་མིས་རྔ་བ་རྫོང་དང་ལྷག་པར་དུ་ཚ་རུ་མ་སྡེ་པ་དང་ཀིརྟི་དགོན་པ་སོགས་སུ་དམ་དྲག་དང་སྟངས་འཛིན་ཤུགས་ཆེ་རུ་བཏང་ཡོད་པའི་གནས་ཚུལ་ཐོན་འདུག ད་ལྟའི་ཆར་པད་མ་ལགས་ག་པར་ཡོད་མེད་ཀྱི་གནས་ཚུལ་གང་ཡང་ཤེས་རྟོགས་མི་ཐུབ་པར་གྱུར་ཡོད། འདི་ལྟར་ཞི་བའི་ངོ་རྒོལ་ལའང་དྲག་གནོན་བྱེད་པ་དང་། མི་སྒེར་བཙན་དབང་འོག་གར་སོང་ཆ་མེད་བཟོ་བ། དེ་བཞིན་ས་ཁུལ་ཡོངས་ལ་དམ་དྲག་ཤུགས་ཆེ་རུ་གཏོང་བ་བཅས་ནི་རྒྱལ་སྤྱིའི་ཁྲིམས་ལུགས་དང་འགལ་བའི་བྱ་སྤྱོད་ཅིག་ཡིན།
ཉེ་ལམ་ཕྱི་ཟླ་ ༧ པའི་ཚེས་ ༢༦ ཉིན་མཉམ་འབྲེལ་རྒྱལ་ཚོགས་ཀྱི་བཙན་དབང་འོག་གར་སོང་ཆ་མེད་དུ་གཏོང་བའི་གནད་དོན་གྱི་ལས་དོན་ཚན་ཁག་གིས་ལོ་འཁོར་སྙན་ཐོ་ཞིག་བཏོན་པའི་ནང་རྒྱ་ནག་གིས་འགྲོ་བ་མིའི་ཐོབ་ཐང་རྒྱབ་སྐྱོར་བ་ཚོར་བཙན་དབང་གིས་གར་སོང་ཆ་མེད་དུ་གཏོང་བའི་བྱ་སྤྱོད་ཧ་ཅང་མང་པོ་སྤེལ་བཞིན་པར་སེམས་འཚབ་ཡོད་པ་བཏོན་འདུག ལྷག་པར་དུ་བོད་ནང་གི་གནས་སྟངས་ལ་དམིགས་བསལ་གྱིས་སེམས་འཚབ་ཡོད་པ་གསལ་སྟོན་བྱས་འདུག
ཚོགས་ཆུང་དེས་ཕྱི་ལོ་ ༢༠༡༣ ལོའི་ཟླ་ ༢ པའི་ཚེས་ ༡༩ ཉིན་རྒྱ་ནག་ཏུ་གཟིགས་སྐོར་བསྐྱོད་རྒྱུའི་རེ་འདུན་བཏོན་པ་དང་། དེ་བཞིན་ཕྱི་ལོ་ ༢༠༢༠ ལོའི་ཟླ་ ༣ པའི་ཚེས་ ༡༢ བར་དུ་དྲན་སྐུལ་ཐེངས་མང་བཏང་ཡོད་ནའང་། རྒྱ་ནག་གིས་རྟག་ཏུ་སྣང་མེད་བཏང་ཡོད་པ་གསལ་འདོན་བྱས་འདུག་ཅིང་རྒྱ་ནག་གཞུང་གིས་ཚོགས་ཆུང་དེ་བོད་དུ་གཟིགས་སྐོར་དུ་བསྐྱོད་བཅུག་པའི་དབང་དུ་བཏང་ཡང་། དེར་དོ་དམ་དང་། སྟངས་འཛིན། སྔོན་ཚུད་ནས་གྲ་སྒྲིག་བྱས་པ་བཅས་ཀྱི་དམ་དྲག་ཆེན་པོ་ཡོང་ངེས་ཡིན་པའང་བཀོད་འདུག
མཉམ་འབྲེལ་རྒྱལ་ཚོགས་དང་རྒྱལ་སྤྱིའི་སྤྱི་དམངས་ཚོགས་སྡེ་ཁག་གིས་རྒྱ་གཞུང་ལ་གནོན་ཤུགས་སྤྲད་དེ། བཙན་དབང་འོག་གར་སོང་ཆ་མེད་དུ་གཏོང་བའི་བྱ་སྤྱོད་ཚང་མ་མྱུར་དུ་མཚམས་འཇོག་ཡོང་ཐབས་བྱེད་དགོས་པ་དང་། གནོད་འཚེ་ཕོག་མཁན་རྣམས་དང་འབྲེལ་ཡོད་ནང་མི་ཚོས་དྲང་བདེན་དོན་གཉེར་གྱི་བྱ་གཞག་ལ་རྒྱབ་སྐྱོར་དང་མཐུན་འགྱུར་བསྐྲུན་དགོས། མ་ཟད་རྒྱ་ནག་གཞུང་གི་ངོས་ནས་འགྱངས་འགོར་མེད་པར་“མི་ཐམས་ཅད་བཙན་དབང་འོག་གར་སོང་ཆ་མེད་དུ་འགྱུར་རིགས་འགོག་པའི་རྒྱལ་སྤྱིའི་སྤྱི་ཆིངས་”ལ་མཚན་བཀོད་དང་ལག་བསྟར་ཁས་ལེན་བྱེད་དགོས་པའི་འབོད་སྐུལ་ནན་པོ་ཞུ་རྒྱུ་ཡིན།