བོད་མདོ་སྨད་རྔ་པ་རང་སྐྱོང་ཁུལ་རྨེའུ་རུ་མའི་གླུ་བ་པདྨ་འཕྲིན་ལས་དང་ཕྱག་རྡོར་གཉིས་ཟླ་ ༦ ལྷག་རིང་རྔ་པ་རྫོང་དུ་བཀག་ཉར་གྱིས་འདྲི་གཅོད་གཅར་རྡུང་སྣ་ཚོགས་བྱས་རྗེས། འདི་ལོའི་ཕྱི་ཟླ་ལོ་ ༢ ནང་ཁོང་གིས་ལ་ལོ་ ༢ བཙོན་འཇུག་ཁྲིམས་ཐག་བཅད་དེ་སི་ཁྲོན་མཱེན་ཡང་ཞེས་པའི་ས་གནས་བཙོན་ཁང་ཞིག་ཏུ་ཁྲིད་ཡོད་པ་དང་། ཁོང་གཉིས་ཀྱི་ནང་རྣམས་ཐེངས་གཉིས་ལ་ཐུག་འཕྲད་ཆེད་མཱེན་ཡང་བཙོན་ཁང་དུ་བསྐྱོད་ཡོད། བཙོན་ཁང་གི་འབྲེལ་ཡོད་མི་སྣས་ཁོང་གཉིས་དེར་མེད་ཚུལ་བརྗོད་དེ་ཐུག་འཕྲད་བྱེད་བཅུག་མེད་སྟབས། ད་ལྟའི་ཆར་ཁོང་གཉིས་གར་ཡོད་གང་གནས་ཀྱི་གནས་ཚུལ་གང་ཡང་ཤེས་རྟོགས་ཐུབ་ཀྱི་མེད་པར་ལྷག་ཡོད་འདུག
རྒྱ་གཞུང་གིས་འདི་ལྟར་བོད་ནང་གི་གླུ་བ་དང་རྩོམ་པ་པོ་མང་པོ་འཇུ་བཟུང་བཙན་ཁྲིད་ཟླ་བ་མང་པོའི་རིང་གར་སོང་ཆ་མེད་དུ་མཐར། ཉེས་མིང་སྣ་ཚོགས་འོག་གང་འདོད་ངལ་རྩོལ་སྒྱུར་བཀོད་ཁང་དུ་གཏོང་བ་དང་ཁྲིམས་ཐག་བཅད་དེ་བཙོན་འཇུག་བྱེད་བཞིན་པའི་བྱ་སྤྱོད་འདི་དག་ནི། རྒྱལ་སྤྱིའི་འགྲོ་བ་མིའི་ཐོབ་ཐང་གི་སྒྲིག་གཞི་དང་རྒྱ་གཞུང་རང་གི་བཅའ་ཁྲིམས་བཅས་ལ་རྒྱབ་འགལ་ཏུ་གྱུར་ཡོད།
འདི་ག་ལྟེ་གནས་ཁང་ལ་གནས་ཚུལ་འབྱོར་གསལ། ཕྱི་ལོ་ ༢༠༡༢ ལོའི་ཟླ་ ༧ ཡས་མས་ཙམ་ལ་བོད་མདོ་སྨད་རྔ་པ་རང་སྐྱོང་ཁུལ་རྔ་པ་རྫོང་རྨེའུ་རུ་མའི་རུ་ཆེན་དང་པོའི་གླུ་བ་པདྨ་འཕྲིན་ལས་དང་གླུ་བ་ཕྱག་རྡོར་གཉིས་ཀྱིས། ད་ལྟའི་རང་ལུས་མེར་སྲེག་གིས་མཚོན་པའི་བོད་ནང་གི་གནས་སྟངས་དང་། དེ་བཞིན་༸གོང་ས་མཆོག་དང་༸པཎ་ཆེན་རིན་པོ་ཆེ། ཀིརྟི་རིན་པོ་ཆེ་བཅས་ལ་དྲན་གླུ་དང་བསྟོད་གླུ། སྲིད་སྐྱོང་བློ་བཟང་སེང་གེ་ལ་བསྟོད་གླུ་བླངས་ཡོད་པའི་ཆེད་སྒྲིག་གླུ་གཞས་འོད་སྡེར་༼སོས་མེད་རྨ་ཁའི་ཟུག་གཟེར།༽ཞེས་པ་ཞིག་འགྲེམས་སྤེལ་བྱས་ཏེ་ཉིན་ཤས་ལས་མ་སོང་བར། རྒྱ་གཞུང་གིས་ཀན་ལྷོ་རྨ་ཆུ་རྫོང་ཐོག་ནས་གླུ་བ་ཁོང་གཉིས་འཇུ་བཟུང་བཙན་ཁྲིད་བྱས་ཏེ་ཟླ་བ་ ༦ ལྷག་རིང་རྔ་པ་རྫོང་དུ་བཀག་ཉར་འདྲི་གཅོད་བྱས་མཐར། ཁོང་གཉིས་ཀྱི་ནང་མིར་ཁོང་གཉིས་ལ་ད་ལོའི་ཕྱི་ཟླ་ ༢ ནང་ལོ་ ༢ རེའི་བཙོན་འཇུག་ཁྲིམས་ཐག་བཅད་དེ་སི་ཁྲོན་གྱི་མེན་ཡང་ཞེས་པའི་ས་གནས་ཀྱི་བཙོན་ཁང་ཞིག་ཏུ་བསྐྱལ་ཡོད་སྐོར་གྱི་ཡི་གེ་ཞིག་སྤྲད་ཡོད་འདུག ཁོང་གཉིས་ཀྱི་ནང་མི་རྣམས་ཐེངས་གཉིས་ལ་ཐུག་འཕྲད་དུ་བསྐྱོད་ཡོད་ཀྱང་། མེན་ཡང་ས་གནས་ཀྱི་འབྲེལ་མི་སྣས་ཁོང་གཉིས་འདིར་མེད་ཚུལ་བརྗོད་ནས་ཐུག་འཕྲད་བྱེད་ཐུབ་མེད་པ་དང་། ད་ལྟ་ཁོང་གཉིས་དོན་དངོས་ཐོག་ས་གནས་གང་ཞིག་ཏུ་བཙོན་འཇུག་བྱས་ཡོད་མེད་ཀྱི་གནས་ཚུལ་གང་ཡང་ཤེས་རྟོགས་ཐུབ་ཀྱི་མེད་པ་རེད།
གླུ་བ་ཕྱག་རྡོར་ལགས་དང་ཕྱི་ལོ་ ༢༠༡༢ ཟླ་ ༨ ཚེས་ ༡༠ ཉིན་རང་ལུས་མེར་སྲེག་གནང་སྟེ་འདས་གྲོངས་སུ་གྱུར་པའི་རྒྱལ་གཅེས་དཔའ་བོ་གཅོད་པ་ལགས་གཉིས་ནི་ཕ་སྤུན་གྱི་བུ་སྤུན་ཡིན་པ་དང་། གླུ་བ་ཕྱག་རྡོར་དང་པདྨ་འཕྲིན་ལས་གཉིས་ཀྱང་ཕན་ཚུན་ཉེ་འབྲེལ་ཞིག་ཡིན་འདུག དེ་མིན་རོལ་མོའི་རམ་འདེགས་པ་མཁྱེན་རབ་དང་ཚིག་རྩོམ་པ་པོ་ཉག་ལྡོམ་པོ་གཉིས་ལ་ད་ལྟའི་ཆར་གནས་ཚུལ་ག་རེ་བྱུང་ཡོད་མེད་ཤེས་རྟོགས་བྱུང་མེད་པ་རེད།
གླུ་བ་པདྨ་འཕྲིན་ལས་ལགས་ནི་རང་ལོ་༢༢ ཡིན་ལ། ཕའི་མིང་ལ་འཛམ་ལྷ་ཟེར་ཞིང་གྲོངས་ཟིན་པ་དང་མའི་མིང་ལ་ཚེ་རིས་མ་ཟེར། གླུ་བ་ཕྱག་རྡོར་ལགས་ནི་རང་ལོ་ ༣༢ ཡིན་ལ། ཕའི་མིང་ལ་མཆོག་ལྡན་མདོ་བ་ཟེར་གྱི་ཡོད་འདུག
༼སོས་མེད་རྨ་ཁའི་ཟུག་གཟེར།༽ཞེས་པའི་གླུ་གཞས་འོད་སྡེར་དེའི་ནང་། ༡ གངས་རིའི་མགོན། ༢ སྐྱོ་འབོད། ༣ ང་ཡི་རྩ་བའི་བླ་མ། ༤ ངོ་ཚ། ༥ བཟོད་མེད་ཀྱི་སྡུག་བསྔལ། ༦ བདེན་དོན་ཁྲག་གི་དར་ཆ། ༧ འཐད་པ་ཡིན། ༨ སྲིན་པོ། ༩ མག་མོག་བྱང་ཐང་གི་ན་བུན། ༡༠ ཡིད་ཐང་ཆད་འགྲོ། བཅས་ཁྱོན་གླུ་གཞས་བཅུ་གཉིས་ཡོད་པ་རེད།
གླུ་བ་ཕྱག་རྡོར་གྱི་༼འེ་རེད།༽ཅེས་པའི་གཞས་ཀྱི་གླུ་ཚིག་ཏུ། ང་ཚོའི་རིན་ཆེན་གཏེར་ཁ།། བཙན་པོའི་འཕྲུལ་གྱིས་གཏོར་ནས།། གནས་འདི་སྟོངས་པར་བཟོས་པ།། དབང་མེད་བཙན་ཤེད་འེ་རེད།། སྔོན་བྱོན་མཁས་པའི་མཛད་རྗེས།། ལྔ་ཟུང་རིག་པའི་གནས་མཆོག། ཐབས་ཀྱིས་བརླགས་བརྩིས་བྱེད་པ།། དབང་མེད་བཙན་ཤེད་འེ་རེད།། ཁ་བ་གངས་རིའི་རྒྱུད་འཛིན།། ན་གཞོིན་དཔའ་བོ་དཔའ་མོ།། བཙན་གྱིས་དམར་གསོད་བྱས་པ།། དབང་མེད་བཙན་ཤེད་འེ་རེད།། གངས་ཅན་འགྲོ་བའི་མགོན་པོ།། རྒྱལ་དབང་བསྟན་འཛིན་རྒྱ་མཚོ།། བཙན་གྱིས་གཏན་བྲལ་བྱས་པ།། ང་ཚོའི་ལས་དབང་འེ་རེད།། ཅེས་དང་། ཡང་གླུ་བ་པདྨ་འཕྲིན་ལས་ཀྱི་༼སྨྲེ་ངག༽ཅེས་པའི་གཞས་ཀྱི་གླུ་ཚིག་ཏུ། རྗེ་བླ་མ་ས་ཕྱོགས་གཞན་ལ་ཕེབས།། བོད་སློབ་འབངས་མ་མེད་ད་ཕྲུག་བཞིན།། རྒྱ་ནག་པོའི་འོག་ན་སྡུག་བསྔལ་ལྕི།། སྡུག་ལྕི་རུང་བཤད་ས་ང་མེད་གི།། བོད་གངས་རིའི་དཔའ་བོ་དཔའ་མོ་རྣམས།། ལུས་བུད་ཤིང་བཞིན་དུ་མེ་ལ་བསྲེགས།། མེ་དམར་པོའི་ཀླུང་ན་ན་ཟུག་ཆེ།། སྡུག་ཆེ་རུང་བཤད་ས་ང་མེད་གི།། བོད་ཉམ་ཆུང་ཉེས་མེད་ཁྲིམས་ལ་སྦྱར།། ལྕགས་ནག་པོ་བརྒྱབས་ནས་གསོད་རྡུང་བྱས།། ལུས་བཙོན་རར་སོང་ནས་འཇིགས་སྐྲག་མྱངས།། འཇིགས་ཆེ་རུང་བཤད་ས་ང་མེད་གི།། ཞེས་བྲིས་ཡོད་པ་རེད།
འདི་ག་ལྟེ་གནས་ཁང་དུ་གླུ་བ་ཁོང་གཉིས་ཀྱི་གླུ་གཞས་འོད་སྡེར་ལག་སོན་བྱུང་ཡོད་ལ། མི་འགྱངས་པར་གཞས་ཚིག་རྣམས་དབྱིན་སྒྱུར་དང་གླུ་གཞས་རྣམས་དྲ་ཐོག་ཏུ་འགོད་རྒྱུ་ཡིན།