བོད་རང་སྐྱོང་ལྗོངས་ནག་ཆུ་ས་ཁུལ་སོག་རྫོང་གཡག་ལ་ཡུལ་ཚོའི་གཡིག་གུ་གྲོང་ནས་ཡིན་པ། དགའ་བ་བཟང་པོ་ལགས་ཕྱི་ལོ་ ༢༠༡༣ ཟླ་ ༡ པོའི་ནང་རྒྱ་གཞུང་གིས་འཇུ་བཟུང་རྗེས་ད་ལྟའི་བར་ལོ་གཅིག་ལྷག་འདས་ཟིན་ཡོད་ཀྱང་། ད་དུང་ཁྲིམས་ཐག་སོགས་གང་མ་བཅད་པར་མུ་མཐུད་བཀག་ཉར་ཁང་དུ་སྡུག་སྦྱོང་མནར་གཅོད་གཏོང་བཞིན་ཡོད་འདུག
འདི་ག་ལྟེ་གནས་ཁང་ལ་གནས་ཚུལ་འབྱོར་དོན། ཕྱི་ལོ་ ༢༠༡༣ ཟླ་ ༡ པོའི་ནང་རྒྱ་གཞུང་གིས་འཇུ་བཟུང་བྱས་པའི་བོད་མི་དགའ་བ་བཟང་པོ་ལགས་ད་ལྟའི་བར་དུ་ཁྲིམས་ཐག་སོགས་གང་ཡང་མ་བཅད་པར། ནག་ཆུ་ས་ཁུལ་སོག་རྫོང་གི་བཀག་ཉར་ཁང་དུ་མུ་མཐུད་སྡུག་སྦྱོང་མནར་གཅོད་འོག་གནས་ཡོད་པ་དང་། ད་ལྟའི་ཆར་ཁོང་གི་གཟུགས་པོའི་གནས་སྟངས་ཧ་ཅང་སྐྱོ་བོ་ཆགས་ཡོད་འདུག
དགའ་བ་བཟང་པོ་ལགས་ནི་ནག་ཆུ་ཁུལ་སོག་རྫོང་གཡག་ལ་ཡུལ་ཚོའི་གཡིག་གུ་གྲོང་ནས་ཡིན་པ་དང་། ལོ་སྔོན་མའི་ཕྱི་ཟླ་ ༡ པོའི་ནང་རྒྱ་གཞུང་ཉེན་རྟོག་པས་འཇུ་བཟུང་བཙན་འཁྲིད་བྱས་ཡོད་པ་རེད། ཁོང་ཐོག་མར་འཇུ་བཟུང་བྱེད་དགོས་དོན་ནི། ཁོང་གིས་བོད་དོན་ཐད་དོན་ཚན་གསུམ་ཅན་གྱི་དགོས་འདུན་ཡི་གེ་ཞིག་བྲིས་པའི་རྐྱེན་གྱིས་ཡིན་འདུག
དོན་ཚན་གསུམ་ཅན་གྱི་དགོས་འདུན་ཡི་གེ་དེའི་ནང་། དང་པོ། ང་ཚོའི་རྩ་བའི་བླ་མ་རྒྱལ་བ་རིན་པོ་ཆེ་ཡིན་པས་ཁོང་ལ་ཡིད་ཆེས་དང་དད་པ་ཡོད། གཉིས་པ། ང་ཚོའི་དཔོན་པོ་ནི་བློ་བཟང་སེང་གེ་ཡིན་པས་ཁོང་གི་བཀའ་ལ་ཉན་དགོས། གསུམ་པ། བོད་ནི་རང་བཙན་གྱི་རྒྱལ་ཁབ་ཅིག་ཡིན་པས་ང་ཚོར་རང་བཙན་དགོས། ཞེས་སོགས་བྲིས་ཡོད་འདུག
དགའ་བ་བཟང་པོ་ལགས་འཛིན་བཟུང་བྱས་པའི་སྐོར་གྱི་གནས་ཚུལ་སྐབས་ཐོག་ཕྱིར་བསྒྲགས་མ་བྱས་པར། ལོ་གཅིག་ལྷག་རིང་བཀག་ཉར་ཁང་དུ་སྡུག་སྦྱོང་མནར་གཅོད་མྱོང་བཅུག་ཡོད་འདུག རྗེས་སུ་འབྲེལ་ཡོད་མི་སྣ་བརྒྱུད་བཀག་ཉར་ཁང་ནས་ཁོང་གི་གནས་ཚུལ་ཤེས་རྟོགས་བྱུང་བ་ལྟར་ན། དགའ་བ་བཟང་པོ་ལགས་ཀྱིས་ཁོང་ལ་སེམས་ཁྲལ་དང་འགྱོད་པ་སྐྱེ་དགོས་པ་གསུམ་ཡོད་པ་བརྗོད་འདུག་ལ། གཅིག ངས་རང་ལུས་མེར་སྲེག་བྱེད་མ་ཐུབ་པར་རྒྱ་གཞུང་གི་ལག་པར་ཐེབས་སོང་། གཉིས། བོད་ཀྱི་རྒྱལ་དར་པོ་ཏ་ལའི་སྒང་ལ་སྒྲོན་འདོད་ཀྱང་ཐུབ་མ་སོང་། གསུམ། རྒྱ་མིའི་རྒྱལ་དར་མེར་སྲེག་བྱེད་བསམ་ཡང་བསྲེགས་ཐུབ་མ་སོང་། ངས་གང་བཤད་པ་དེ་དག་འཛམ་བུ་གླིང་གི་མི་རྣམས་ལ་སྒྲོག་དགོས་ཀྱི་ཡོད་ཅེས་རྒྱ་གཞུང་གི་ལས་བྱེད་རྣམས་ལ་བཤད་ཡོད་འདུག