བཞུགས་མོལ་བགྲོ་གླེང་གི་གསུང་བཤད་པ་རྣམ་པ།
ཕྱི་ཟླ་༨ པའི་ཚེས་ ༣༠ ནི་མཉམ་འབྲེལ་རྒྱལ་ཚོགས་ཀྱིས་བཙན་དབང་འོག་གར་སོང་ཆ་མེད་དུ་གྱུར་བའི་མི་རྣམས་ཀྱི་ཉིན་མོར་གཏན་འབེབས་བྱས་པ་ལྟར་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གིས་ལོ་ལྟར་ཉིན་མོ་དེ་སྲུང་བརྩི་ཞུ་བཞིན་ཡོད།
འདི་ལོ་རྒྱ་ནག་གཞུང་གིས་བོད་ནང་དུ་བཙན་དབང་འོག་གར་སོང་ཆ་མེད་དུ་གྱུར་བའི་སྦྱོར་བ་ཇི་ལྟར་ལག་བསྟར་བྱེད་ཀྱི་ཡོད་ཚུལ་གསལ་འདོན་ཡོང་ཐབས་སུ་འདི་ག་ལྟེ་གནས་ཁང་གིས་ཕྱི་ཟླ་ ༨ པའི་ཚེས་ ༣༠ ཉིན་གྱི་སྔ་དྲོ་ཚོུད་ ༡༠ ཐོག་རྡ་ས་ནོར་བུ་གསོལ་མགྲོན་ཁང་གི་ཚོགས་ཁང་དུ་བོད་ཀྱི་ཆབ་སྲིད་བཙོན་ཟུར་གསུམ་དང་བོད་གནས་ཉམས་ཞིབ་པ་གཅིག་བཅས་ཀྱི་བར་བཞུགས་མོལ་བགྲོ་གླེང་གི་ལས་རིམ་ཞིག་གོ་སྒྲིག་ཞུས་ཡོད།
བཞུགས་མོལ་ལས་རིམ་དེར་གསུང་བཤད་གནང་མཁན་ཆབ་སྲིད་བཙོན་ཟུར་དགེ་འདུན་རིན་ཆེན་ལགས་དང་། ཆབ་སྲིད་བཙོན་ཟུར་ངག་དབང་འོད་འབར་ལགས། ཆབ་སྲིད་བཙོན་ཟུར་ཚེ་རིང་རྡོ་རྗེ་ལགས། བོད་གནས་ཉམས་ཞིབ་པ་དབང་ལྡན་སྐྱབས་ལགས་བཅས་ཡིན་པ་དང་། ཉན་ཞིབ་ཏུ་ཕེབས་མཁན་གཞུང་འབྲེལ་མ་ཡིན་པའི་ཚོགས་པ་ཁག་གི་ཚོགས་མི་དང་། ས་རཱ་དང་ནོར་གླིང་མཐོ་སློབ་ཀྱི་སློབ་ཕྲུག་ཁག་ཅིག གསར་འགོད་པ་བཅས་ཁྱོན་མི་གྲངས་དྲུག་ཅུ་མ་ཟིན་ཚོགས་བཅར་གནང་འདུག
བཞུགས་མོལ་ལས་རིམ་འགོ་འཛུགས་མ་བྱས་གོང་ལྟེ་གནས་ཁང་གི་འཛིན་སྐྱོང་འགན་འཛིན་བསྟན་འཛིན་ཟླ་བ་ལགས་ཀྱིས་ད་བར་རྒྱ་ནག་གཞུང་གིས་༧པཎ་ཆེན་ཆུང་སྲིད་དགེ་འདུན་ཆོས་ཀྱི་ཉི་མ་མཆོག་གཙོས་པའི་བོད་མི་བརྒྱ་ཕྲག་མང་པོ་བཙན་དབང་འོག་གར་སོང་ཆ་མེད་དུ་གྱུར་བའི་གནས་སུ་བཅུག་ཡོད་པ་དང་། བཙན་དབང་འོག་གར་སོང་ཆ་མེད་དུ་གྱུར་བར་བྱེད་པའི་སྦྱོར་བ་དེ་ཉིད་ཞི་ཅི་ཕིང་རྒྱ་ནག་གི་སྲིད་འཛིན་དུ་སླེབས་པ་ནས་བཟུང་གཞི་རྒྱ་ཇེ་ཆེར་སོང་ཡོད་ཚུལ་གསུངས་སོང་ལ། མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ཆེད་མཁས་མི་སྣས་སྔ་གཞུག་བར་གསུམ་དུ་བོད་མི་མང་པོ་བཙན་དབང་འོག་གར་སོང་ཆ་མེད་དུ་གྱུར་བའི་གནས་སུ་ལྷུང་བར་སེམས་འཚབ་ཀྱིས་རྒྱ་གཞུང་ལ་དོགས་འདྲི་བྱས་ཡོད་པ་དང་། རྒྱ་ནག་གཞུང་གིས་ངེས་པར་དུ་མི་ཐམས་ཅད་བཙན་དབང་འོག་གར་སོང་ཆ་མེད་དུ་འགྱུར་རིགས་འགོག་པའི་རྒྱལ་སྤྱིའི་སྤྱི་ཆིངས་ལ་མཚན་བཀོད་ལག་བསྟར་བྱས་ཏེ་བོད་ཀྱི་ཆབ་སྲིད་བཙོན་པ་རྣམས་ཆ་རྐྱེན་གང་ཡང་མེད་པའི་སྒང་ནས་གློད་བཀྲོལ་གཏོང་དགོས་པའི་འབོད་སྐུལ་གནང་སོང་།
དེ་བཞིན་ལྟེ་གནས་ཁང་གི་སྤེལ་བའི་བརྙན་ཐུང་ནང་དུའང་རྒྱ་ནག་གཞུང་གིས་གསང་ཞིབ་ས་ཚུགས་སོགས་ཀྱི་ནང་དུ་བོད་མི་ཧ་ཅང་མང་པོ་བཙན་དབང་འོག་གསང་བའི་བཀག་ཉར་བྱས་ཏེ་ཁྲིམས་བཤེར་གྱི་ཐོབ་ཐང་རྩ་ནས་མི་རག་པ་མ་ཟད། ནང་མི་ལ་རྩ་ནས་འབྲེལ་ཐག་གཅོད་པ་དང་། མནར་གཅོད་དྲག་པོ་གཏོང་གི་ཡོད་པ་སོགས་བཙོན་པ་ཁག་ཅིག་གི་ལོ་རྒྱུས་བདེན་དཔང་དུ་བགྲངས་ནས་འགྲེལ་བརྗོད་བྱས་སོང་།
ལྟེ་གནས་ཁང་གི་འགན་འཛིན་བསྟན་འཛིན་ཟླ་བ་ལགས།
བཞུགས་མོལ་གྱི་ནང་དོན།
ཆབ་སྲིད་བཙོན་ཟུར་དགེ་འདུན་རིན་ཆེན་ལགས་ཀྱིས་ཕྱི་ལོ་ ༡༩༩༣ ལོར་ཁོང་ཉིད་འཇུ་བཟུང་བྱས་པའི་སྐབས་སུ་དངོས་མྱོང་གཞིར་བཞག་གིས་གསུངས་དོན། སྐབས་དེའི་ལྷ་སའི་ཕྱི་ཕྱོགས་ནས་ཡིན་པའི་བཙོན་པ་ཚོ་འཇུ་བཟུང་བྱས་ཚར་བའི་རྗེས་སུ་འཇའ་ཡལ་བ་ལྟ་བུར་གར་སོང་ཆ་མེད་དུ་གྱུར་བའི་གནས་ཚུལ་མང་པོ་བྱུང་ཡོད་པ་དང། རྒྱ་ནག་གི་རྩ་ཁྲིམས་སོགས་སུ་བཀག་ཉར་འོག་མིའི་ཅ་དངོས་གང་བྱུང་གཞུང་བཞེས་གཏོང་མི་ཆོག་པ་སོགས་ཀྱི་དོན་ཚན་གསལ་པོ་ཡོད་ན་ཡང་། ཁྲིམས་ཡིག་དང་དངོས་གཞིའི་ལག་བསྟར་གཉིས་ནི་ཡོངས་སུ་འགལ་བར་གྱུར་ཡོད་པ་སོགས་གསུངས་སོང་།
ཆབ་སྲིད་བཙོན་ཟུར་ངག་དབང་འོད་འབར་ལགས་ཀྱིས་རྒྱའི་བཙན་འོག་ནས་བོད་དུ་མི་རབས་རང་བཞིན་གྱི་ཞི་རྒོལ་བྱུང་ཡོད་པ་དང། ཕྱི་ལོ་ ༡༩༥༩ ལོའི་ཞི་བའི་སྒེར་ལངས་གནང་མཁན་ཚོ་ནི་རྒྱ་ནག་གིས་བོད་བཙན་བཟུང་མ་བྱས་པའི་སྔ་རོལ་དུ་སྐྱེས་པའི་མི་རབས་ཆགས་ཡོད་ཅིང་། ཕྱི་ལོ་ ༡༩༧༨ ལོ་ནས་འགོ་བཙུགས་པའི་ཞི་རྒོལ་ནི་རྒྱའི་བཙན་འོག་ནས་སྐྱེས་པའི་བོད་ཀྱི་མི་རབས་གསར་པའི་ཞི་རྒོལ་ཡིན་པ། མ་ཟད་ ༢༠༠༨ ལོ་ཡི་ས་བྱིའི་ཞི་བའི་ངོ་རྒོལ་དེ་ཡང་མི་རབས་གསར་པའི་རྒྱུན་མཐུད་ཞི་རྒོལ་ཞིག་ཡིན་ཚུལ་སོགས་ཀྱི་གསུང་བཤད་གནང་བ་དང་། ཕྱི་ལོ་ ༡༩༨༧༨ ལོའི་ཟླ་ ༩ པའི་ཚེས་ ༢༧ ཉིན་འབྲས་སྤུངས་ཀྱི་དགེ་འདུན་པ་གྲངས་ ༢༡ ཀྱིས་ཡང་ན་མེ་མདའི་འོག་ནས་འཆི་དགོས་པ་དང་ཡང་ན་བཙོན་ཁང་དུ་འགྲོ་དགོས་པ་བཅས་གདམ་ཁ་གཉིས་ཀྱི་སྒོ་ནས་ཞི་རྒོལ་གནང་ཡོད་པ་སོགས་འགྲེལ་བརྗོད་གནང་སོང་ལ། བཀག་ཉར་བྱས་པའི་རིང་རང་ལ་བརྒྱུད་སྐུལ་བྱེད་མཁན་སུ་ཡིན་ཞེས་ཡང་ཡང་འདྲི་རྩད་བྱེད་པ་དང་། ཁོང་ལ་༧གོང་ས་མཆོག་གི་ཕྱག་དེབ་ངོས་ཀྱི་ཡུལ་དང་ངོས་ཀྱི་མི་མང་ལག་སོན་བྱུང་ཡོད་པ་ཇི་ལྟར་རག་པ་ཡིན་མིན་དང་དཔེ་དེབ་དེ་སུ་དང་སུས་ལྟ་ཀློག་བྱས་ཡོད་མེད་སོགས་དྲིས་ཏེ་རང་དང་མཉམ་དུ་ནང་མི་སྤུན་མཆེད་དུ་དགོན་པའི་གྲྭ་པ་སོགས་ཁྲིད་ཐབས་བྱེད་ཀྱི་འདུག་པ་ནི་སེམས་ནས་བཟོད་དཀའ་བ་ཞིག་རེད་འདུག་ཅེས་འགྲེལ་བརྗོད་གནང་སོང་།
བགྲོ་གླེང་གཙོ་སྐྱོང་བ་ལྟེ་གནས་ཁང་གི་ཉམས་ཞིབ་པ་ཉི་མ་འོད་ཟེར་ལགས།
མ་ཟད་སྐབས་དེའི་ཞི་རྒོལ་གནང་མཁན་གྱི་ཆབ་སྲིད་བཙོན་པ་དག་༧པཎ་ཆེན་རིན་པོ་ཆེའི་བཀའ་དྲིན་གྱིས་བཙོན་དུ་ཟླ་བ་བཞི་ཙམ་ལས་འདུག་དགོས་འཁེལ་མེད་ཀྱང་ཕྱིས་སུ་མང་པོ་ཞིག་ཡང་བསྐྱར་འཇུ་བཟུང་བྱས་ཏེ་ལྡེབ་རྩིས་བརྒྱབས་ནས་མི་ལོ་ ༥ ནས་ ༡༩ བར་གྱི་བཙོན་འཇུག་ཁྲིམས་ཆད་ཧ་ཅང་ལྕི་མོ་ཕོག་ཡོད་པའི་གནས་ཚུལ་འགྲེལ་བརྗོད་གནང་སོང་།
ཆབ་སྲིད་བཙོན་ཟུར་དགེ་བཤེས་ཚེ་རིང་རྡོ་རྗེ་ལགས་ཀྱིས་རང་ཉིད་རྒྱ་གཞུང་ཉེན་རྟོག་པས་རྐུན་ཇག་གི་བྱེད་སྟངས་ལྟར་བྱས་ནས་འཇུ་བཟུང་བཙན་ཁྲིད་བྱས་རྗེས་བཀག་ཉར་བྱས་པའི་རིང་ལ་མནར་གཅོད་དྲག་པོ་ཐེབས་པའི་སྐོར་ནས་འགྲེལ་བརྗོད་གནང་དོན་ལ། ཕྱི་ལོ་ ༡༩༩༦ ལོར་ཁོང་ཉིད་འཇུ་བཟུང་བཙན་ཁྲིད་བྱས་ཏེ་ཟླ་བ་གསུམ་གྱི་རིང་དགོན་པ་དང་། ནང་མི་གཉེན་འབྲེལ་སུས་ཀྱང་ཤེས་རྟོགས་མ་ཐུབ་པ་བྱུང་བ་དང་། འཇུ་བཟུང་བྱས་པའི་རིང་ནང་ཉེས་བསགས་ཡོད་པ་རང་ངོས་ནས་ཁས་ལེན་བྱ་དགོས་ཟེར་ནས་གློག་དབྱུག་གིས་གཞུ་བ་སོགས་ན་ཟུག་བཟོད་ཐབས་དཀའ་བའི་རྡུང་རྡེག་མནར་གཅོད་ཚད་བཏང་བའི་རྐྱེན་གྱིས་ལྟ་སྲུང་དོ་དམ་དྲགས་པ་མ་གཏོགས་གོ་སྐབས་བྱུང་ན་རང་ཤི་རྒྱག་འདོད་པའི་ཚོར་སྣང་སྐྱེས་ཚུལ་སོགས་འགྲེལ་བརྗོད་གནང་སོང་།
ཚོགས་བཅར་གནང་མཁན་གཞུང་འབྲེལ་མ་ཡིན་པའི་ཚོགས་པ་ཁག་གི་ཚོགས་མི་དང་མཐོ་སློབ་ཀྱི་སློབ་ཕྲུག
དེ་བཞིན་བོད་གནས་ཉམས་ཞིབ་པ་དབང་ལྡན་སྐྱབས་ལགས་ཀྱིས་སྤྱིར་རྒྱ་ནག་གཞུང་གིས་ཡོངས་ཁྱབ་འགྲོ་བ་མིའི་ཐོབ་ཐང་ལས་འཕྲོས་པའི་རྒྱལ་སྤྱིའི་སྤྱི་ཆིངས་མི་ཉུང་བ་ཞིག་ལག་བསྟར་བྱ་རྒྱའི་ཁས་ལེན་བྱས་ཡོད་པ་དང་། རྒྱ་ནག་གི་རྩ་ཁྲིམས་དང་རང་སྐྱོང་བཅའ་ཁྲིམས་སོགས་སུའང་་བཙོན་པའི་ཐོབ་ཐང་དང་ཁྲིམས་ཐོག་ནས་ཚུལ་བཞིན་འཇུ་བཟུང་དང་བཀག་ཉར་བྱེད་སྟངས་ཀྱི་རིམ་པ་གསལ་པོ་ཡིག་ཐོག་ཏུ་བཀོད་ཡོད་མོད། འོན་ཀྱང་དོན་དངོས་ཐོག་རྒྱལ་ཁབ་བདེ་འཇགས་གསང་བའི་ལས་ཁུངས་དང་སྤྱི་བདེ་ལས་ཁུངས་ཀྱི་ཉེན་རྟོག་པས་གང་བྱེད་ཙམ་མ་གཏོགས་ཁྲིམས་ལུགས་ཀྱི་བརྒྱུད་རིམ་ལ་རྩ་ནས་བསྟུན་གྱི་མེད་ཚུལ་གསུངས་བ་དང་། དེང་སང་བོད་ནང་དུ་འབྱུང་བཞིན་པའི་ཛ་དྲག་གནས་སྟངས་ཀྱི་སྐོར་གསལ་པོ་མཁྱེན་མཁན་གྱི་བཙན་བྱོལ་བོད་མི་མང་པོས་གནས་ཚུལ་མཁོ་སྤྲོད་དང་ཕྱིར་བསྒྲགས་མི་བྱེད་པར་སྦས་གསང་བྱེད་པ་ནི་ཧ་ཅང་སེམས་འཚབ་དགོས་པའི་གནད་དོན་ཞིག་ཡིན། བོད་ནང་དུ་རང་གི་ལུས་ལ་མེ་བསྒྲོན་ནས་འཐབ་རྩོད་བྱེད་ཀྱིན་ཡོད་ཀྱང་བཙན་བྱོལ་བོད་མི་མང་པོ་ཞིག་གིས་རང་གི་བདེ་འཇགས་ཕྲན་བུ་ཞིག་ལ་བསམ་བློ་བཏང་ནས་ཁ་མི་གྲགས་པ་དང་འཐབ་རྩོད་ཀྱི་ལས་འགུལ་ནང་དུ་མཉམ་ཞུགས་མི་བྱེད་པ་སོགས་ནི་རྒྱ་ནག་གི་འདོད་དོན་སྒྲུབ་པ་ཡིན་པས་དེའི་ཕྱོགས་ལ་ང་ཚོས་ངེས་པར་དུ་གཟབ་ནན་དགོས་ཚུལ་སོགས་ཀྱི་འབོད་སྐུལ་གནང་སོང་།
བཞུགས་མོལ་གནང་མཁན་ངོ་སྤྲོད།
ཆབ་སྲིད་བཙོན་ཟུར་དགེ་འདུན་རིན་ཆེན་ལགས།
ལྟེ་གནས་ཁང་གི་ཉམས་ཞིབ་པ་ཉི་མ་འོད་ཟེར་ལགས་ཀྱིས་བཞུགས་མོལ་ལས་རིམ་གཙོ་སྐྱོང་གནང་བ་དང་བཞུགས་མོལ་བགྲོ་གླེང་ཐོག་གསུང་བཤད་གནང་མཁན་རེ་རེ་བཞིན་ངོ་སྤྲོད་གནང་དོན་ལ། ཆབ་སྲིད་བཙོན་ཟུར་དགེ་འདུན་རིན་ཆེན་ལགས་ནི་ཕྱི་ལོ་ ༡༩༥༩ ལོར་བཙན་བྱོལ་དུ་ཕེབས་ཏེ་མ་སུ་རི་བོད་ཁྱིམ་སློབ་གྲྭ་རུ་སློབ་སྦྱོང་གནང་བ་དང་། ཕྱི་ལོ་ ༡༩༧༢ ལོར་སློབ་གྲྭ་དེའི་ཚན་རིག་སྡེ་ཚན་གྱི་འཛིན་གྲྭ་ཐོག་མའི་གྲས་སུ་སློབ་ཐོན་གནང་། ཕྱི་ལོ་ ༡༩༨༥ ལོར་དུས་འཁོར་དབང་ཆེན་ཞུས་རྗེས་ཡབ་ཡུམ་གཉིས་དང་ལྷན་དུ་ཕྱིར་བོད་དུ་ཕེབས་ཏེ་ཕྱི་ལོ་ ༡༩༨༧ ནས་ ༡༩༩༣ བར་ལྷ་ས་ནས་ཡུལ་སྐོར་སྣེ་ཤན་པའི་ཕྱག་ལས་གནང་། སྐབས་དེར་ཁོང་ལ་ཨ་རིའི་གློག་བརྙན་འཁྲབ་སྟོན་པ་ Harrison Ford སོགས་ཕྱི་རྒྱལ་གྱི་མི་མང་པོ་ཞིག་དང་འབྲེལ་བ་བྱུང་བར་བརྟེན་ཁོང་གིས་གོ་སྐབས་དེ་བརྒྱུད་ནས་བོད་ནང་གི་སྤྱི་ཚོགས་དང་ཆབ་སྲིད་ཀྱི་གནས་སྟངས་དང་། ཆབ་སྲིད་བཙོན་པ་རྣམས་ཀྱི་གནས་སྟངས་སོགས་དབྱིན་ཡིག་ཏུ་བྲིས་ཏེ་ཡུལ་སྐོར་སྤྲོ་འཆམ་པ་ཚོར་མཁོ་སྤྲོད་གནང་འདུག ཕྱི་ལོ་ ༡༩༩༣ ལོའི་ཕྱི་ཟླ་ ༥ པའི་ཚེས་ ༡༣ ཉིན་ཁོང་ཉིད་ལྷ་སའི་ཉེན་རྟོག་པས་འཇུ་བཟུང་བྱས་ཏེ་ཟླ་གསུམ་གྱི་རིང་འདྲི་རྩད་ཡང་ཡང་བྱས། སྐབས་དེར་ཁོང་ཉིད་འཇུ་བཟུང་བྱས་པའི་གནས་ཚུལ་རྒྱལ་སྤྱིའི་གསར་ལམ་ཁག་ཏུ་ཤུགས་ཆེར་ཁྱབ་བརྡལ་སོང་བར་བརྟེན་ཟླ་བ་བརྒྱད་ཙམ་གྱི་རྗེས་སུ་གློད་གྲོལ་ཐོབ།
ཆབ་སྲིད་བཙོན་ཟུར་ངག་དབང་འོད་འབར་ལགས།
ཆབ་སྲིད་བཙོན་ཟུར་ངག་དབང་འོད་འབར་ལགས་ནི་ཕྱི་ལོ་ ༡༩༨༧ ལོའི་ཟླ་ ༩ པའི་ཚེས་ ༢༧ ཉིན་འབྲས་སྤུངས་དགོན་པའི་དགེ་འདུན་པ་ ༢༡ གིས་ཞི་བའི་ངོ་རྒོལ་གནང་བ་དེའི་ནང་ནས་གཅིག་ཡིན་པ་དང་། དགུ་ཚ་བཀག་ཉར་ཁང་དུ་ཟླ་བ་བཞི་ཙམ་བཅུག་རྗེས་༧པཎ་ཆེན་སྐུ་ཕྲེང་བཅུ་པ་མཆོག་གི་བཀའ་དྲིན་ལ་བརྟེན་ནས་གློད་གྲོལ་ཐོབ། ༧པཎ་ཆེན་རིན་པོ་ཆེ་སྐུ་གཤེགས་པའི་རྗེས་སུ་ཡང་བསྐྱར་འཇུ་བཟུང་བྱ་རྒྱའི་ཉེན་ཁ་ཇེ་ཆེར་སོང་བར་བརྟེན་ཁོང་ཉིད་རྒྱ་གར་དུ་བྲོས་བྱོལ་ལ་ཕེབས། རྒྱ་གར་དུ་འབྱོར་རྗེས་སུ་མུ་མཐུད་བོད་དོན་འཐབ་རྩོད་དང་ཞུ་གཏུག་གི་ལས་འགུལ་སྣ་མང་ཁྲོད་གཙོ་འགན་བཞེས་པ་མ་ཟད། ད་ལྟའི་ཆར་དགེ་རྒན་གྱི་ཕྱག་ལས་གནང་དང་གནང་མུས་རེད་འདུག
ཆབ་སྲིད་བཙོན་ཟུར་དགེ་བཤེས་ཚེ་རིང་རྡོ་རྗེ་ལགས།
ཆབ་སྲིད་བཙོན་ཟུར་དགེ་བཤེས་ཚེ་རིང་རྡོ་རྗེ་ལགས་ནི་ཞིང་གཤེགས་ཆབ་སྲིད་བཙོན་ཟུར་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་མཆོག་གི་དངོས་སློབ་ཡིན་པ་དང་། སྔ་གཞུག་ཏུ་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེའི་བཀའ་མངགས་དགོངས་དོན་ལྟར་ཁོང་གིས་བཙུགས་པའི་སློབ་གྲྭའི་དགེ་རྒན་གནང་བ་དང་། རི་དྭགས་སྲུང་སྐྱོབ་དང་ས་གནས་ཀྱིས་ཤིང་ནགས་གཅོད་བྲེག་བྱས་པར་ཟི་ཁྲོན་ཞིང་ཆེན་སྲིད་གཞུང་བར་ཞུ་གཏུག་གི་ལས་འགུལ་ནང་ཞུགས་ཏེ་རྒྱལ་ཁ་ཐོབ་པ་བྱུང་འདུག ཕྱི་ལོ་ ༡༩༩༦ ལོར་རྒྱ་གཞུང་ཉེན་རྟོག་པས་ཁོང་ཉིད་འཇུ་བཟུང་བཙན་ཁྲིད་བྱས་ཏེ་ཟླ་བ་གསུམ་གྱི་རིང་ལ་བཙན་དབང་འོག་གར་སོང་ཆ་མེད་དུ་གནས་སུ་ལྷུང་བ་དང་། ཟླ་བ་བརྒྱད་ཙམ་འདྲི་རྩད་དང་རྡུང་རྡེག་དྲག་པོ་བཏང་རྗེས་གློད་གྲོལ་བཏང་འདུག གློད་གྲོལ་ཐོབ་ནས་ཡུན་རིང་མ་སོང་བར་ཡང་བསྐྱར་གཟིམ་ཤག་བསྔོག་བཤེར་བྱས་ནས་འཇུ་བཟུང་གི་ཉེན་ཁ་འཕྲད་པར་བརྟེན་ལོ་ཕྱེད་ཙམ་ལ་རི་མགོར་བྲོས་བྱོལ་དུ་ཕེབས་རྗེས་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེའི་བཀའ་མངགས་ལྟར་རྒྱ་གར་དུ་བྲོས་བྱོལ་ལ་ཕེབས་འདུག
ཉམས་ཞིབ་པ་དབང་ལྡན་སྐྱབས་ལགས།
ཉམས་ཞིབ་པ་དབང་ལྡན་སྐྱབས་ལགས་ཕྱི་ལོ་ ༡༩༩༨ ལོར་རྒྱ་གར་དུ་ཕེབས་རྗེས་བོད་ཁྱིམ་དུ་གཞི་རིམ་སློབ་སྦྱོང་གནང་ཞིང་ MCC མཐོ་སློབ་ནས་གསར་འགོད་ལས་རིགས་ཀྱི་སློབ་སྦྱོང་གནང་འདུག ཁོང་གིས་སྔ་གཞུག་ཏུ་བོད་དོན་འཐབ་རྩོད་དང་ཞུ་གཏུག་ལས་འགུལ་མང་པོ་གཙོ་འགན་བཞེས་ཡོད་པ་མ་ཟད། བོད་ཀྱི་དུས་བབ་གསར་ཁང་དུ་ཡུན་རིང་གསར་འགོད་པའི་ཕྱག་ལས་གནང་བ་དང། ད་ལྟའི་ཆར་བོད་གནས་ལྟ་ཞིབ་ཁང་གི་ཉམས་ཞིབ་འགན་འཛིན་གནང་མུས་རེད་འདུག