རྒྱ་གཞུང་གིས་བོད་ནང་ཆོས་དང་རིག་གཞུང་། ཆབ་སྲིད་གང་ཐད་ནས་དྲག་གནོན་དབང་སྒྱུར་གྱི་མི་སེར་སྤེལ་བའི་སྲིད་ཇུས་ཁོ་ན་ལག་བསྟར་བྱས་པར་བརྟེན། འདས་པའི་ལོ་ལྔ་བཅུ་ལྷག་གི་རིང་བོད་ནང་ཞི་བའི་ངོ་རྒོལ་ཡར་ལངས་རིམ་པར་བྱུང་ཡོད་པ་མ་ཟད། ཕྱི་ལོ་ ༢༠༠༩ ནས་བཟུང་རང་ལུས་མེར་བསྲེགས་ཀྱི་ཞི་རྒོལ་ལས་འགུལ་བྱུང་སྟེ། ད་ལྟའི་བར་བོད་མི་ ༡༢༠ རང་ལུས་མེར་བསྲེགས་ཀྱིས་རྒྱ་གཞུང་གི་ནོར་འཁྲུལ་ཅན་གྱི་དབང་སྒྱུར་སྲིད་བྱུས་ལ་ངོ་རྒོལ་བྱས་ཡོད་ཀྱང་། རྒྱ་གཞུང་གིས་བཟང་ཕྱོགས་ཀྱི་འགྱུར་བ་གང་ཡང་བཏང་མེད་པ་མ་ཟད། ཉེ་སྔོན་རྒྱ་གཞུང་ཆབ་སྲིད་གྲོས་ཚོགས་ཀྱི་ཚོགས་གཙོ་ཡུས་ཀྲིན་ཧྲིན་གྱིས་༧གོང་ས་མཆོག་ལ་ཁ་གཏད་ངོ་རྒོལ་བྱ་དགོས་པ་བསྒྲགས་ཏེ། དགོན་སྡེ་ཁག་ནང་དམ་དྲག་བྱེད་ཤུགས་ཆེ་རུ་བཏང་ཡོད་པ་ལྟར། ཟླ་འདིའི་ཕྱི་ཚེས་ ༢༠ ཉིན་བོད་མདོ་སྨད་མཛོད་དགེ་རྫོང་སོག་ཚང་དགོན་བཀྲ་ཤིས་ཐེག་མཆོག་གླིང་དུ་གྲྭ་བ་ཞིག་གིས་རང་ལུས་བསྲེགས་བཏང་སྟེ་འདས་གྲོངས་ཕྱིན་འདུག
འདི་ག་ལྟེ་གནས་ཁང་དུ་གནས་ཚུལ་འབྱོར་དོན། ཕྱི་ལོ་ ༢༠༡༣ ཕྱི་ཟླ་ ༧ ཚེས་ ༢༠ ཉིན་གྱི་སྔ་དྲོའི་བོད་ནང་གི་ཆུ་ཚོད་ ༨ དང་ཕྱེད་ཀ་ཡས་མས་ཙམ་གྱི་སྟེང་། རྒྱ་གཞུང་གིས་ད་ལྟའི་ས་ཆ་བཅད་བགོས་ཀྱི་ས་ཁོངས་ལྟར་ན། སི་ཁྲོན་ཞིང་ཆེན་རྔ་པ་ཁུལ་མཛོད་དགེ་རྫོང་ཁོངས་སུ་ཡོད་པའི་ཐང་སྐོར་སོག་ཚང་དགོན་བཀྲ་ཤིས་ཐེག་མཆོག་གླིང་དུ། རང་ལོ་ ༡༨ ཡིན་པའི་གྲྭ་དཀོན་མཆོག་བསོད་ནམས་ཀྱིས་རྒྱ་གཞུང་གི་དྲག་གནོན་དབང་བསྒྱུར་གྱི་མི་སེར་སྤེལ་བའི་སྲིད་ལ་ངོ་རྒོལ་གྱིས་རང་ལུས་མེར་བསྲེགས་བཏང་སྟེ་འདས་གྲོངས་སུ་ཕྱིན་ཡོད་འདུག
གྲྭ་དཀོན་མཆོག་བསོད་ནམས་ལགས་ཀྱིས་ཞོགས་པའི་ཚོགས་གྲོལ་ནས་ཡོང་སྐབས་ཀྱི་ལམ་བར་ནས་རང་ལུས་མེར་བསྲེགས་གནང་ཡོད་པ་དང་། དགེ་འདུན་པ་རྣམས་ཀྱིས་མཐོང་དུས་མེ་ལྕེ་དམར་པོའི་དབུས་སུ་ཁོང་གིས་ལག་གཉིས་ཐལ་མོ་སྦྱར་ཏེ་སྐད་འབོད་གནང་བཞིན་ཡོད་ཀྱང་། མེ་ལྕེ་དྲག་པོ་འབར་བཞིན་པའི་རྐྱེན་གྱིས་ཁོང་གི་སྐད་འབོད་ཀྱི་ཚིག་འབྲི་རྣམས་གསལ་བོ་ཐོས་ཐུབ་མེད་པ་རེད། ཁོང་ས་ལ་འགྱེལ་མ་ཐག་གྲྭ་བ་རྣམས་ཁོང་གི་འཁྲིས་སུ་བཅར་སྐབས། ཁོང་གིས་ཕྱག་གཉིས་དམ་པོར་ཐལ་མོ་སྦྱར་ཏེ་སྐུ་གྲོངས་ཚར་ཡོད་འདུག
མེར་བསྲེགས་གནས་ཚུལ་དེ་བྱུང་རྗེས་རྒྱ་གཞུང་ཉེན་རྟོག་པ་དང་དམག་མི་མང་པོས་དགོན་པ་བསྐོར་ཏེ་ཕུང་པོ་རྩིས་སྤྲོད་བྱེད་དགོས་ཚུལ་བརྗོད་ཡོད་ཀྱང་། ཉིན་དེར་ས་གནས་དེའི་ཨར་ཙཱ་ཏི་ཞེས་པའི་གནས་རིར་ལ་ཙེ་བསྟད་དེ་བསང་གསོལ་གཏོང་བའི་ཉིན་མོར་ཁེལ་ཡོད་སྟབས། ས་གནས་མང་ཚོགས་རྣམས་ཀྱིས་གྲྭ་དཀོན་མཆོག་བསོད་ནམས་ལགས་ཀྱིས་རང་བསྲེགས་བཏང་བའི་གནས་ཚུལ་དེ་ཐོས་འཕྲལ། རི་མགོར་བསང་གསོལ་གཏོང་རྒྱུ་མཚམས་བཞག་སྟེ་དགོན་པའི་ནང་འདུ་འཛོམས་ཀྱིས་འདས་པོ་ཁོང་ལ་མྱང་ངན་དང་། ཁོང་གི་སྐུ་ཕུང་རྒྱ་ལག་ཏུ་ཤོར་མ་བཅུག་པར་ལྷ་ཁང་ཞིག་ཏུ་གདན་འདྲེན་གྱིས་གྲྭ་མང་གིས་བསྔོ་སྨོན་གསུངས་ཡོད་ཀྱང་། རྗེས་སུ་རྒྱ་གཞུང་ཉེན་རྟོག་པ་དང་དམག་མི་རྣམས་བཙན་ཤུགས་ཀྱིས་དགོན་ནང་དུ་ཡོང་སྟེ་སྐུ་ཕུང་འཕྲོག་རྩིས་བྱས་པར་བརྟེན། སྐུ་ཕུང་ག་རེ་བྱས་ཡོད་མེད་ཀྱི་གནས་སྟངས་གསལ་ཁ་བྱུང་མི་འདུག ད་ལྟའི་ཆར་རྒྱ་གཞུང་གིས་ཉེན་རྟོག་པ་དང་དམག་མི་ཕོན་ཆེན་པོ་འགྲེམས་འཇོག་གིས། སོག་ཚང་དགོན་བཀྲ་ཤིས་ཐེག་མཆོག་གླིང་དང་ས་གནས་ཡུལ་མིར་བཀག་སྡོམ་དམ་དྲག་བྱེད་ཤུགས་ཆེ་རུ་བཏང་ཡོད་འདུག
ཕྱི་ལོ་ ༢༠༠༩ ལོར་གྲྭ་བཀྲ་བྷེ་ལགས་ཀྱིས་རང་ལུས་མེར་བསྲེགས་གནང་སྟེ། རྒྱ་གཞུང་གིས་བོད་ཐོག་འཛིན་པའི་དྲག་གནོན་དབང་སྒྱུར་གྱི་མི་སེར་སྤེལ་བའི་སྲིད་ཇུས་ངོ་རྒོལ་གནང་བ་ནས་བཟུང་། ད་ལྟའི་བར་བོད་ནང་སྔ་ཕྱིར་རང་ལུས་མེར་བསྲེགས་གནང་མཁན་སེར་སྐྱ་ཕོ་མོ་ ༡༢༠ བྱུང་བའི་ནང་ནས་མི་ ༡༠༠ འདས་གྲོངས་སུ་ཕྱིན་ཡོད། དེ་བཞིན། རང་ལུས་མེར་བསྲེགས་གནང་མཁན་ཚོའི་ཁྲོད་དུ་ལས་རིགས་ཀྱི་ཆ་ནས་བླ་མ་དང་གྲྭ་པ། བཙུན་མ། ཞིང་པ་དང་འབྲོག་པ། སློབ་ཕྲུག་བཅས་ཚུད་ཡོད་པ་མ་ཟད། ན་ཚོད་ཀྱི་ཆ་ནས་རྒན་གཞོན་དར་གསུམ་ཡོད་ལ། ཁོང་ཚོའི་ཁྲོད་ལོ་ན་ཆུང་ཤོས་ལོ་ ༡༦ དང་ཆེ་ཤོས་ལོ་ ༦༤ ཡིན་པ་རེད། རང་ལུས་མེར་བསྲེགས་གནང་མཁན་མང་ཆེ་བས། ༧གོང་ས་མཆོག་བོད་དུ་ཕེབས་འཇུག་དགོས། བོད་ལ་རང་དབང་དགོས་ཞེས་དང་། ཁག་ཅིག་གིས་བོད་རང་བཙན་གྱི་སྐད་འབོད་ཀྱང་བྱས་ཡོད་པ་རེད།
ཡིན་ནའང་། ད་ལྟའི་བར་རྒྱ་གཞུང་གིས་བོད་མི་དེ་དག་གི་འབོད་སྐུལ་ལ་སྣང་འཇོག་གང་ཡང་བྱས་པར། དེ་ལས་ལྡོག་སྟེ་རྒྱ་གཞུང་རང་གི་རྩ་ཁྲིམས་དང་འགལ་བའི་ཐོག་ནས། རྒྱ་གཞུང་ཆེས་མཐོའི་ཁྲིམས་ཞིབ་ཁང་དང་ཁྲིམས་ཁང་། རྒྱ་གཞུང་དབུས་ཉེན་རྟོག་ཁང་གསུམ་གྱིས་བོད་མིའི་རང་ལུས་མེར་བསྲེགས་ཐད་ཆེད་དམིགས་ཀྱི་ཁྲིམས་ཡིག་ཅིག་འགྲེམས་བསྒྲགས་ལག་བསྟར་བྱས་ཏེ། རང་ལུས་མེར་བསྲེགས་གནང་མཁན་གྱི་ནང་མི་དང་གྲོགས་པོ་རྣམས་གང་བྱུང་འཇུ་བཟུང་གིས། ཉེས་མིང་འདྲ་མིན་འོག་ཁྲིམས་ཐག་བཅད་དེ་བཙོན་འཇུག་དང་། ལོ་འགའ་ཤས་ཀྱི་ཉེས་ཆད་བཅད་དེ་ངལ་རྩོལ་སློབ་གཅུན་ཁང་སོགས་སུ་བཙོན་འཇུག་བྱས་ཏེ། སྡུག་སྦྱོང་མནར་གཅོད་དང་ངལ་རྩོལ་བྱེད་འཇུག་གི་ཡོད་པ་རེད།
ཉེ་སྔོན་རྒྱ་གཞུང་དབུས་དམར་ཤོག་རྒྱུན་ལས་དང་ཆབ་སྲིད་གྲོས་ཚོགས་ཀྱི་ཚོགས་གཙོ་ཡུས་ཀྲིན་ཧྲན་ཀན་ལྷོ་བོད་རིགས་རང་སྐྱོང་ཁུལ་དུ་ཡོངས་ཏེ། ༧གོང་ས་མཆོག་ལ་ཁ་གཏད་འཐབ་རྩོད་བྱེད་དགོས་སྐོར་བསྒྲགས་པའི་རྗེས། མཚོ་སྔོན་ཞིང་ཆེན་གྱི་འབྲེལ་ཡོད་སྲིད་གཞུང་གིས་དགོན་སྡེ་ཁག་གི་བླ་གྲྭ་རྣམས་འབོད་འགུགས་ཀྱིས་ཚོགས་འདུ་རིམ་པར་བསྐངས་ཏེ། ༧གོང་ས་མཆོག་གི་སྐུ་པར་བཤམས་མི་ཆོག་པ་དང་། ལངས་ཕྱོགས་བརྟན་པོའི་ཐོག་ནས་ངོ་རྒོལ་ཁ་གཏད་བྱེད་དགོས་སྐོར་བསྒྲགས་ཏེ། སྔར་ལས་ལྷག་པར་དགོན་སྡེ་ཁག་ནང་བཀག་སྡོམ་སུན་གཙེར་བྱེད་མགོ་བརྩམས་ཡོད་པ་རེད།
རྒྱ་གཞུང་གི་དྲག་གནོན་དབང་སྒྱུར་གྱི་མི་སེར་སྤེལ་བའི་སྲིད་ཇུས་ལ་ངོ་རྒོལ་གྱིས་རང་ལུས་མེར་བསྲེགས་ཀྱིས་སྐུ་གྲོངས་མཁན་གྲྭ་དཀོན་མཆོག་བསོད་ནམས་ལགས་ནི། མཛོད་དགེ་ཐང་སྐོར་སོག་ཚང་སྡེ་བའི་ཡིན་པ་དང་། ཁོང་གི་ཕའི་མིང་ལ་བསོད་ནམས་དཔལ་ལྡན་དང་། མའི་མིང་ལ་ལན་ཕྲུག་ཟེར་གྱི་ཡོད་འདུག