ཟླ་འདིའི་ཕྱི་ཚེས་༨་ཉིན་གསེར་རྟ་བླ་རུང་ཆོས་སྒར་གྱི་གྲྭ་ངག་ཆུང་ལགས་མི་ལོ་༦་རིང་གི་དུས་བཀག་བཙོན་འཇུག་གི་དུས་ཡུན་རྫོགས་ཏེ་ད་ལྟ་ཀློད་གྲོལ་བཏང་ཡོད་འདུག
དེ་སྔོན་རྒྱ་ནག་གཞུང་གིས་གྲྭ་ངག་ཆུང་ལགས་ཀྱིས་བོད་ནང་གི་གནས་ཚུལ་ཕྱི་ཕྱོགས་སུ་ཁྱབ་བསྒྲགས་བྱས་པའི་ཉེས་མིང་འོག་ཁོང་དང་ཁོང་གི་སྤུན་མཆེད་ཆེ་བ་དགེ་འདུན་པ་བཀྲ་ཕུན་དང་སློབ་གླིང་དེའི་དགེ་འདུན་པ་གཞན་གྲྭ་འགུ་དྲག་བཅས་རྒྱ་ནག་ཁྲིན་ཏུའུ་གྲོང་ཁྱེར་ནས་ཕྱི་ལོ་༢༠༠༨ཟླ་༧ཚེས་༨་ཉིན་གྱི་དགོང་མོ་གསང་བའི་ཐོག་འཇུ་བཟུང་བྱས་ཡོད་པ་རེད།འཇུ་བཟུང་བྱས་པའི་རྗེས་སུ་བཀྲ་ཕུན་ལགས་དང་འགུ་དྲག་གཉིས་ཀློད་འདུག་མོད།ཡིན་ཡང་གྲྭ་ངག་ཆུང་ལགས་མུ་མཐུད་དུ་བཀག་ཉར་བརྒྱུད་ཕྱི་ཕྱོགས་སུ་བོད་ནང་གི་གནས་ཚུལ་ཁྱབ་བསྒྲགས་བྱས་པ་སོགས་ཀྱི་ཉེས་མིང་འོག་ལོ་༦་གི་དུས་བཀག་བཙོན་འཇུགགི་ཁྲིམས་ཆད་བཏང་ཡོད་པ་རེད།ཁོང་ལ་རྒྱ་གཞུང་གིས་གསང་བའི་ཐོག་ཁྲིམས་ཆད་བཏང་བ་དེ་ཁོང་གི་ནང་མི་གཉེན་འབྲེལ་སོགས་ཀྱིས་ཟླ་ངོ་གཉིས་ཀྱི་རྗེས་སུ་མ་གཏོགས་ཤེས་རྟོགས་བྱུང་མེད་པ་དང་།ཁོང་རང་འཛིན་བཟུང་བཀག་ཉར་བྱེད་དུས་དགུང་ལོ་༣༩་ལས་སོན་མེད་པ་རེད།
གཞན་ཁོང་རང་ཆོས་རྗེ་མཁན་ཆེན་འཇིགས་མེད་ཕུན་ཚོགས་མཆོག་གི་སྐུ་ཚ་ཡིན་པས་ཆུང་དུས་ནས་གསེར་རྟ་བླ་རུང་ཆོས་སྒར་དུ་འཛུལ་ཞུགས་ཀྱིས་ལོ་ངོ་ཉི་ཤུ་ལྷག་གི་རིང་ལ་ནང་ཆོས་སློབ་གཉེར་གནང་ཡོད་པ་དང་།དགོན་པའི་ནང་དུ་བཞུགས་དུས་ཀྱང་ལས་སྣེ་ཆེ་ཆུང་འདྲ་མིན་གྱི་འགན་ཁུར་མྱོང་བར་མ་ཟད།འཇུ་བཟུང་བྱེད་སྐབས་ཀྱང་ཆོས་སྡེའི་བཟང་སྤྱོད་ལས་ཁང་གི་འགན་འཛིན་གྱི་གྲས་སུ་ཡོད་འདུག་ལ་དེ་སྔ་ཁྲིན་ཏུའུ་རུ་ཡོང་དོན་ཡང་དགོན་པའི་ལས་དོན་ཞིག་གི་ཆེད་དུ་ཡིན་པ་རེད།གཞན་ཁྲིམས་ཐག་བཅད་པའི་རྗེས་སུ་ཁོང་རང་ཁྲིན་ཏུའུ་གྲོང་ཁྱེར་དང་ཐག་མིང་རིང་བའི་ཡཱའ་ཨན་བཙོན་ཁང་དུ་བཙོན་འཇུག་བྱས་ཡོད་འདུག
ཉེ་ཆར་ཟླ་འདིའི་ཕྱི་ཚེས་༨་ཉིན་ལོ་༦་རིང་གི་དུས་བཀག་བཙོན་འཇུག་གི་དུས་ཡུན་ཚང་སྟེ་ཀློད་གྲོལ་བཏང་ཡོད་ཀྱང་།ད་ལྟའི་ཆར་རྒྱ་ནག་གཞུང་གིས་ས་གནས་སུ་བརྒྱུད་ལམ་བཀག་འགོག་བྱེད་ཀྱི་ཡོད་པས་ཞིབ་འཕྲའི་གནས་ཚུལ་ཤེས་རྟོགས་བྱུང་མེད་མོད་ཡིན་ནའང་འབྲེལ་ཡོད་མི་སྣ་ཞིག་གིས་འགྲེལ་བརྗོད་བྱས་པ་ལྟར་ན་ངག་ཆུང་ལགས་ཀློད་གྲོལ་བཏང་རྗེས་མིག་གཉིས་གིས་གསལ་པོ་མི་མཐོང་པ་སོགས་ཀྱི་གཟུགས་པོའི་གནས་སྟངས་ཧ་ཅང་སྐྱོ་པོ་ཆགས་ཡོད་ཚུལ་བརྗོད་ཡོད་པ་རེད།