ཆོ་འཕྲུལ་དུས་ཆེན་ཉིན་གྱི་མཚན་མོར་བོད་མདོ་སྨད་རྔ་བ་རྫོང་ཁོངས་སུ། བོད་རིགས་བུད་མེད་ནོར་ཕྱུག་ལགས་ཀྱིས་རང་ལུས་མེར་བསྲེགས་ཀྱིས་རྒྱ་གཞུང་གི་དྲག་གནོན་དབང་སྒྱུར་གྱི་སྲིད་ཇུས་ལ་ཞི་བའི་ངོ་རྒོལ་གནང་འདུག
འདི་ག་ལྟེ་གནས་ཁང་ལ་གནས་ཚུལ་འབྱོར་དོན། ཕྱི་ལོ་ ༢༠༡༥ ཟླ་ ༣ ཚེས་ ༥ སྟེ་ཆོ་འཕྲུལ་དུས་ཆེན་ཉིན་གྱི་མཚན་མོར། བོད་མདོ་སྨད་རྔ་བ་རྫོང་སྤྲོ་ཚིགས་ཡུལ་ཚོའི་རྡོ་བ་སྡེ་བའི་བུད་མེད་ནོར་ཕྱུག་ལགས་ཀྱིས་བོད་བསྟན་སྲིད་རང་དབང་ཆེད་རྒྱ་གཞུང་གི་དྲག་གནོན་དབང་སྒྱུར་སྲིད་ཇུས་ལ་ཞི་བའི་ངོ་རྒོལ་གྱིས་རང་ལུས་མེར་བསྲེགས་བཏང་སྟེ་འདས་གྲོངས་སུ་གྱུར་ཡོད་པ་དང་། ཁོང་མོས་མཚན་མོར་རང་ལུས་མེར་བསྲེགས་བཏང་བ་ཡིན་སྟབས་སྐུ་ཕུང་རྒྱ་ལག་ཏུ་ཤོར་མེད་ནའང་། རྒྱ་གཞུང་གིས་བཙན་འཕྲོག་བྱེད་པར་དོགས་ནས་ཕྱི་ཚེས་ ༦ ཉིན་གྱི་སྔ་དྲོ་ཕ་ཡུལ་གཅིག་པའི་མི་མང་གིས་འཕྲལ་དུ་སྐུ་ཕུང་ཞུགས་འབུལ་ཞུས་ཡོད་འདུག
རང་ལུས་མེར་བསྲེགས་ཀྱིས་ཞི་བའི་ངོ་རྒོལ་གནང་མཁན་བོད་རིགས་བུད་མེད་ནོར་ཕྱུག་ལགས་ནི་རང་ལོ་༤༧ ཡིན་ཞིང་། དྷི་ཕུ་དགོན་གྱི་ལྷ་སྡེ་མ་ཎི་སྐྱབས་ཚང་གི་ཕ་ཚེ་བདག་དང་མ་འོད་སྒྲོན་གཉིས་ཀྱི་བུ་མོ་ཡིན་པ་རེད། ཁོ་མོའི་ཁྱོ་གའི་མིང་ལ་དཔལ་རྩལ་ཟེར་ལ། ཁོང་བཟའ་མི་གཉིས་ལ་བུ་ཕུན་ཚོགས་དང་། བུ་མོ་མང་ག བུ་མོ་ཚེ་འཛིན་སྐྱིད་བཅས་བུ་ཕྲུག་གསུམ་ཡོད་འདུག ཁོ་མོས་ལོ་ཤས་གོང་ནས་༸གོང་ས་མཆོག་གི་སྐུ་ཚེ་ཞབས་པད་བརྟན་པའི་ཆེད་དུ་དམིགས་ནས་དམར་ཟས་རྩ་བ་ནས་སྤངས་ཡོད་འདུག
བོད་རིགས་བུད་མེད་ནོར་ཕྱུག་ལགས་ནི་རྔ་བ་རྫོང་ཁོངས་ནས་རང་ལུས་མེར་བསྲེགས་ཀྱིས་རྒྱ་གཞུང་གི་དྲག་གནོན་དབར་སྒྱུར་སྲིད་ཇུས་ལ་ཞི་བའི་ངོ་རྒོལ་གནང་མཁན་ ༣༧ པ་དང་། རྔ་བ་རྫོངས་ཁོངས་ནས་རང་ལུས་མེར་བསྲེགས་ཀྱིས་ཞི་རྒོལ་གནང་མཁན་བུད་མེད་ ༥ པ་དེ་ཆགས་ཡོད།
གནས་ཚུལ་མཁོ་སྤྲོད་པའི་བརྗོད་གསལ་ལ། ད་ལྟའི་ཆར་ས་གནས་ཉེན་རྟོགས་པས་དམ་དྲགས་བྱེད་བཞིན་ཡོད་སྟབས། དེ་རྗེས་ཀྱི་ཞིབ་ཕྲའི་གནས་ཚུལ་རིགས་ཤེས་རྟོགས་ཐུབ་ཀྱི་མེད་པ་རེད།