རྒྱ་གཞུང་གིས་བཙན་དབང་གིས་ཤག་རོང་པོ་ཆོས་རྗེའི་ཡང་སྲིད་རྫུན་མ་ཐག་གཅོད་ཀྱིས་ཁྲི་འདོན་བྱ་རྒྱུ་ངོ་རྒོལ་གནང་མཁན་གྱི་ཉེས་དོགས་གཞིའི་འོག བོད་མི་མཚོ་སྐྱེས་ལགས་རྒྱ་གཞུང་གིས་འཇུ་བཟུང་བཙན་འཁྲིད་བྱས་འདུག
བོད་ནས་ཁུངས་ལྡན་གནས་ཚུལ་འབྱོར་གསལ་ལྟར་ན། ཟླ་འདིའི་ཕྱི་ཚེས་ ༡༣ ཉིན་ཁམས་ནག་ཆུ་རྫོང་རྟར་ཆེན་ཤང་ཨག་ཆེན་གྲོང་ཚོ་ནས་ཡིན་པའི་མིང་ལ་མཚོ་སྐྱེས་ཟེར་བ་ཞིག་རྒྱ་གཞུང་གིས་འཛིན་བཟུང་བཙན་ཁྲིད་བྱས་རྗེས་གར་སོང་ཆ་མེད་གྱུར་ཡོད་པ་རེད།
ཁོང་འཛིན་བཟུང་བྱེད་རྐྱེན་ནི་རྒྱ་གཞུང་གིས་མང་ཚོགས་ཀྱི་ངོས་ལེན་མེད་པར། ཤག་རོང་པོ་ཆོས་རྗེའི་ཡང་སྲིད་རྫུན་མ་མི་མང་གིས་ངོས་ལེན་བྱས་མེད་ཀྱང་། རྒྱ་གཞུང་གིས་བཙན་དབང་གི་སྒོ་ནས་ཁྲི་འདོན་བྱས་པ་ལྟར། ཁོང་གིས་ངོས་ལེན་མེད་སྐོར་ཤུགས་ཆེན་བཤད་པའི་རྒྱུ་མཚན་ལ་བརྟེན་ནས་ཡིན་པ་ས་གནས་མི་མང་གིས་ཚོད་དཔག་བྱེད་བཞིན་ཡོད་འདུག
ཁོང་འཛིན་བཟུང་བྱས་རྗེས་ཁོང་གི་སྡོད་གནས་ཨག་ཆེན་གྲོང་ཚོ་ཡོངས་རྫོགས་དམག་ མིས་བསྐོར་ཡོད་པ་དང་། དེ་སྔོན་རོང་དགོན་གྱི་དོན་རྐྱེན་བྱུང་བ་ལ་བརྟེན་ནས་བརྡ་འཕྲིན་བརྒྱུད་ལམ་ བཀག་སྡོམ་བྱས་ཡོད་པ་བཅས་ལ་བརྟེན་ནས། མཚོ་སྐྱེས་ལགས་ཀྱི་ཞིབ་ཕྲའི་གནས་ཚུལ་དང་ད་ལྟ་ཁོང་ས་ཆ་གང་དུ་ཁྲིད་ཡོད་མེད་སོགས་ཤེས་རྟོགས་ཐུབ་ ཀྱི་མེད་པ་རེད་འདུག
ཕྱི་ལོ་ ༢༠༡༠ ལོར་རོང་པོ་ཆོས་རྗེའི་ཡང་སྲིད་བཙལ་འཚོལ་སྐབས། རོང་དགོན་གྱི་བླ་མ་ཟླ་བ་༸གོང་ས་མཆོག་དང་འབྲེལ་བ་ཡོད་པའི་ཉེས་འཛུགས་ཐོག་འཛིན་བཟུང་བཀག་ཉར་བྱས་ནས་ལོ་བདུན་གྱི་ཁྲིམས་བཅད་པ་མ་ཟད། དགོན་པར་ཕེབས་མི་ཆོག་པའི་རྒྱུ་མཚན་ལ་བརྟེན་ནས་དགེ་འདུན་པ་དང་མི་མང་གིས་སྲིད་གཞུང་ལ་ཞུ་བ་བྱས་ཀྱང་ཕན་འབྲས་མ་བྱུང་བར་བརྟེན། ཕྱི་ཟླ་ ༧ པའི་ཚེས་ ༣༠ ཉིན་ཤག་རོང་པོ་དགོན་དགའ་ལྡན་དར་རྒྱས་གླིང་སྒོ་རྒྱག་དགོས་བྱུང་ཡོད་པ་རེད།
ད་མིན་གྱི་གནས་ཚུལ་གཞན་ཞིག་ལ། དེ་སྔོན་སྡེ་དགོན་གཉིས་ཀྱི་མི་མང་དང་བཅའ་སྡོད་རུ་ཁག་བར་ལག་འཛིང་ཤོར་སྐབས། འཇུ་བཟུང་བཙོན་འཇུག་བྱས་པའི་བོད་མི་དུང་ཕུག་དང་བློ་བཟང་ཚེ་རིང་སོགས་བཙོན་པ་ཁག་ཅིག་ད་ལྟའི་ཆར་ཕྱིར་གློད་གྲོལ་བཏང་ཡོད་འདུག